২৬. লভ ৰস+চ্ছিদ ভিদ রুদানং চ্ছঙ

লভাদীনং চ্ছঙ হোতি স্সেন সহ. লচ্ছতি লভিস্সতি, লচ্ছন্তি লভিস্সন্তি ইচ্চাদি. ক্রিযাতিপত্তিযং স্সাভাগস্স চ্ছঙাদেসে অলচ্ছা অলভিস্স ইচ্চাদি. ৰস=নিৰাসে, ৰচ্ছতি ৰসিস্সতি. কম্মে-বহুলাধিকারা ‘‘অস্সূ’’তি উকারো, পুব্বরূপে ৰুস্সতি ৰুস্সিস্সতি ইচ্চাদি. তথা অৰচ্ছা অৰসিস্সা. ছিদ=দ্ৰেধাকরণে, ছেচ্ছতি ছিন্দিস্সতি, ‘‘মঞ্চ রুধাদীনং’’তি মং লো চ. লস্স লোপো চ. ভিদ=ৰিদারণে, ভেচ্ছতি ভিন্দিস্সতি. অভেচ্ছা অভিন্দিস্সা. রুদ=রোদনে, রুচ্ছতি রোদিস্সতি. অরুচ্ছা অরোদিস্সা ইচ্চাদি.

অঞ্ঞপচ্চযেপি ছিদস্স ‘‘চ্ছঙ’’ ইতি যোগৰিভাগা চ্ছঙ, ভূতে ঊং পচ্চযে অচ্ছেচ্ছুং অচ্ছিন্দিংসু. ৰুত্ততো অঞ্ঞধাতূনঞ্চ, গম=গমনে, গচ্ছং গচ্ছিস্সং. অঞ্ঞপচ্চযেপি ৰচ=ব্যত্তৰচনে ইচ্চাদি, কম্মে-বহুলাধিকারা ত্যাদীসু পরভূতেসুপি যথাগমং ৰচাদীনঞ্চস্স ‘‘ৰচাদীনং ৰস্সুট ৰা’’তি কম্মে উট চ ‘‘অস্সূ’’তি অস্স উ চ, তেন ধম্মো উচ্চতি ৰুচ্চতি, ৰুচ্চন্তি ইচ্চাদি, যস্স চ পুব্বরূপং.