৪৮. হিস্স+তো লোপো

অতো পরস্স হিস্স ৰা লোপো হোতি. ত্ৰং সুখী ভৰ ভৰাহি, হিম্হি দীঘো. ‘‘এয্যাথা’’দিনা ৰ্হোক, তুম্হে সুখিতা ভৰথৰ্হো ভৰথ. অহং সুখী ভৰামি, মযং সুখিনো ভৰাম. পরচ্ছক্কে-তথা ভৰতং, ভৰন্তং. ভৰস্সু, ভৰৰ্হো. ভৰে ভৰামসে. কম্মে-তযা অনুভূযতু, অনুভূযন্তু ইচ্চাদি. ভাৰে-ভূযতু, ভূযতং.

আণত্তিযং-দেৰদত্তো দানি ওদনং পচতু, পচন্তু ইচ্চাদি. কম্মে-তেন ওদনো পচ্চতু ইচ্চাদি. তথা সো গামং গচ্ছতু ইচ্চাদি. ‘‘ঊ লস্সে’’তি লস্সে+কারে গমেতু, গমেন্তু ইচ্চাদি. ঘম্মাদেসে ঘম্মতু, ঘম্মন্তু ইচ্চাদি. কম্মে-গচ্ছীযতু ইচ্চাদি. তথা গমীযতু ইচ্চাদি.

ৰিধিম্হি-লস্স লোপে লুত্তে ৰুদ্ধি, ইধ পব্বতো হোতু.

নিমন্তনে-অধিৰাসেথ তুম্হে ভন্তে ভগৰা ভোজনং, ৰসতিস্স ‘‘চুরাদিতো ণী’’তি ণিম্হি ‘‘অস্সা ণানুবন্ধে’’তি আ, ‘‘যুৰণ্ণান+মেও পচ্চযে’’তি এ চ হোতি. ইধ নিস্সীদতু ভৰং, সদস্স ‘‘জর+সদান+মীম ৰা’’তি ঈম, মনুবন্ধত্তা অন্তসরতো ঈম.

অজ্ঝেসনে-দেসেতু ভন্তে ভগৰা ধম্মং, এত্থ চুরাদিত্তা পুরিমসমং.

অনুমতিযং-পুচ্ছ ৰাসৰ মং পঞ্হং, পৰিসতু ভৰং. এত্থ পুচ্ছতো হিস্স লোপো. এৰং নিসীদ.

পত্থনা=যাচনা, তত্র-দদ=দানে, দদাহি মে গামৰরানি পঞ্চ, দাতো লস্স একারে চ একং মে নযনং দেহি.

পত্তকালে-সম্পত্তো তে কালো কটকরণে, কটং করোতু ভৰং. এত্থ ‘‘তনাদিত্ৰো’’তি ও.

ত্ৰাদী এয্যাদযো ৰত্ত-মানা সম্পতি,+নাগতে;

ভৰিস্সতি, পরোক্খাদি-চত্তারো+তীতকালিকা.