১২৭. কোসজ্জা+জ্জৰ+পারিসজ্জ+সোহজ্জ+মদ্দৰা+রিস্সা+সভা+জঞ্ঞ+থেয্য+ বাহুসচ্চা

এতে সদ্দা নিপচ্চন্তে ণানুবন্ধে. কুসীতস্স ভাৰোতি ভাৰে ণ্যো হোতি, ইমিনা ঈস্স অকারে চ তস্স জে চ কতে যস্স পুব্বরূপং, কোসজ্জং. উজুনো ভাৰে অজ্জৰংতি ণো, ইমিনা উস্স অত্তং, ‘‘উৰণ্ণস্সা+ৰঙ সরে’’তি অৰঙআদেসে জস্স দ্ৰিত্তং. পরিসাসু সাধূতি ৰাক্যে ‘‘ণ্যো তত্থ সাধূ’’তি ণ্যো, ইমিনা জাগমো চ, ‘‘ব্যঞ্জনে দীঘরস্সা’’তি আস্স রস্সে চ কতে জস্স পুব্বরূপং, পারিসজ্জো. ইমিনা কমেন ৰাক্যেনেৰ সদ্দসিদ্ধি ৰেদিতব্বা. সুহদযোৰ সুহজ্জো, তস্স ভাৰো সোহজ্জং, ইমিনা অযলোপো. মুদুনো ভাৰো মদ্দৰং, ইমিনা উস্স অত্তং. ইসিনো ইদং ভাৰো ৰা আরিস্সং, ণ্যপচ্চযে ইমিনা আরঞাগমে ‘‘লোপো+ৰণ্ণি+ৰণ্ণানং’’তি অন্তইকারলোপো চ. উসভস্স ইদং ভাৰো ৰা আসভং, ইমিনা উস্স আ. আজানীযস্স ভাৰো আজঞ্ঞং, ইমিনা যলোপে ‘‘লোপো+ৰণ্ণি+ৰণ্ণানং’’তি ঈকারলোপো. থেনস্স ভাৰো থেয্যং, ইমিনা নস্স যকারো. বহুস্সুতস্স ভাৰো বাহুসচ্চং, ইমিনা উস্স অকারো সংযোগাদিলোপো. (ভাৰতদ্ধিতং).