১২. নঞ

নঊচ্চেতং স্যাদ্যন্তং স্যাদ্যন্তেন সহে+কত্থং হোতি. ঞ্ঞকারো ‘‘ট নঞস্সা’’তি ৰিসেসনত্থো ‘পামনপুত্তাদীসু নস্স টো মা হোতূ’তি. ন ব্রাহ্মণো অব্রাহ্মণো, ‘‘ট নঞস্সা’’তি নস্স টাদেসো. ঞ্ঞ-কারো এত্থেৰ ৰিসেসনত্থো.

ন-নিসেধো সতো যুত্তো, দেসাদিনিযমং ৰিনা;

অসতো ৰা+ফলো তস্মা, কথ+মব্রাহ্মণোতিচে.

নিসেধত্থানুৰাদেন, পটিসেধৰিধি ক্ৰচি;

পরস্স মিচ্ছাঞাণত্তা+খ্যাপনাযো+পপজ্জতে.

দুৰিধো চ+স্স নস্স অত্থো পসজ্জপটিসেধ+পরিযুদাসৰসেন. তত্থ যো ‘‘অসূরিকপস্সারাজদারা’’তিআদীসু ৰিয উত্তরপদত্থস্স সব্বদা অভাৰং দীপেতি, সো পসজ্জপটিসেধৰাচী নাম. যো পন ‘‘অব্রাহ্মণ+মানযা’’তিআদীসু ৰিয উত্তরপদত্থং পরিযুদাসিত্ৰা পটিক্খিপিত্ৰা তংসদিসে ৰত্থুম্হি কারিযং পটিপাদযতি, সো পরিযুদাসৰাচী নাম. ৰুত্তঞ্চ –

পসজ্জপটিসেধস্স, লক্খণং ৰত্থুনত্থিতা;

ৰত্থুতো+ঞ্ঞত্র যা ৰুত্তি, পরিযুদাসলক্খণং.

যত্র অব্রাহ্মণাদীসু, ৰত্থুং পরিযুদস্সতি;

তক্রিযাযুত্তরাজাদিং, ৰদে সো পরিযুদাসকো.

পসজ্জপটিসেধো তু, ৰত্থন্তর+মনাদিয;

কিঞ্চিৰত্থুনিসেধস্স, পসঙ্গো ন ভৰেয্য সো.

তদঞ্ঞো চ তংৰিরুদ্ধো,

তদভাৰো চ নঞ্ঞত্থো.

তদঞ্ঞত্থে – অব্রাহ্মণো, ব্রাহ্মণতো অঞ্ঞো তংসদিসোতি ৰুত্তং হোতি. এৰং অমনুস্সো, অস্সমণো, ন ব্যাকতা অব্যাকতা ধম্মা. তব্বিরুদ্ধত্থে-ন কুসলা অকুসলা, কুসলপটিপক্খাতি অত্থো. এৰং অলোভো, অমিত্তো, অযং পরিযুদাসনযো. তদভাৰে-ন কত্ৰা অকত্ৰা, অকাতুন পুঞ্ঞং, অকরোন্তো, অভাৰো ভৰতি. অযং পসজ্জপটিসেধনযো.

এত্থ চ উভোসু পরিযুদাসে ব্রাহ্মণা অঞ্ঞো ব্রাহ্মণধম্মে অপ্পতিট্ঠিতো খত্তিযাদি ব্রাহ্মণসদিসোৰ অব্রাহ্মণোতি ৰুত্তে পতীযতে. ইতরস্মিং পন পক্খে কেনচি সংসযনিমিত্তেন খত্তিযাদো ব্রাহ্মণোতি ৰুত্তস্স মিচ্ছাঞাণনিৰুত্তি করীযতি ‘‘ব্রাহ্মণো+যং ন ভৰতি অব্রাহ্মণো’’তি, ব্রাহ্মণত্তজ্ঝাসিতো ন ভৰতীত্যত্থো. তত্থ সদিসত্তং ৰিনা মিচ্ছাঞাণাসম্ভৰা পযোগসামত্থিযা চ সদিসপটিপত্তি, তগ্গতা চ লিঙ্গ+সঙ্খ্যা ভৰন্তি. অতোযেৰ উচ্চতে ‘‘নঞ্ঞিৰযুত্ত+মঞ্ঞসদিসাধিকরণে, কথা হি অত্থসম্পচ্চযো’’তি.