৮. নিস্সযপচ্চযো

তিৰিধো নিস্সযপচ্চযো, সহজাতনিস্সযো ৰত্থু পুরেজাতনিস্সযো ৰত্থারম্মণপুরেজাতনিস্সযো.

তত্থ কতমো সহজাতনিস্সযো. সব্বো সহজাত পচ্চযো সহজাতনিস্সযো. তস্মা তত্থ পচ্চযৰিভাগো চ পচ্চযুপ্পন্নৰিভাগো চ সহজাতপচ্চযে ৰুত্তনযেন ৰেদিতব্বো.

কতমো পন ৰত্থুপুরেজাতনিস্সযো. ছ ৰত্থূনি চক্খু ৰত্থু সোতৰত্থু ঘানৰত্থু জিৰ্হাৰত্থু কাযৰত্থু হদযৰত্থু. ইমানি ছৰত্থূনি পৰত্তিকালে সত্তানং ৰিঞ্ঞাণধাতূনং ৰত্থুপুরে জাতনিস্সযো.

ৰত্থুরূপমেৰ পুরেজাতং হুত্ৰা নিস্সযো ৰত্থুপুরেজাত নিস্সযো. তত্থ চিত্তচেতসিকানং নিস্সযট্ঠানট্ঠেন ৰত্থু নাম. পুরেজাতন্তি অত্তনো অত্তনো পচ্চযুপ্পন্নস্স ধম্মস্স উপ্পত্তিক্খণতো পুরিমে খণে জাতং.

তত্থ পটিসন্ধিচিত্তং তদা পুরেজাতস্স ৰত্থুরূপস্স অভাৰতো অত্তনা সহুপ্পন্নমেৰ হদযৰত্থুরূপং নিস্সায উপ্পজ্জতি. পঠম ভৰঙ্গচিত্তং পন পটিসন্ধিচিত্তেন সহুপ্পন্নহদয ৰত্থুরূপং নিস্সায উপ্পজ্জতি. দুতিযভৰঙ্গচিত্তং পঠমভৰঙ্গচিত্তেন সহুপ্পন্নং নিস্সায উপ্পজ্জতি. এৰং ততিযভৰঙ্গচিত্তং দুতিয ভৰঙ্গচিত্তেন সহুপ্পন্নন্তিআদিনা যাৰমরণাসন্নকালা দ্ৰিন্নং মনোধাতুমনোৰিঞ্ঞাণধাতূনং ৰত্থুপুরেজাতনিস্সযো ৰেদিতব্বো.

যথা ৰীণাসদ্দা নাম ৰীণাতন্তীসু ৰীণাদণ্ডকেহি পহরণৰেগেন এৰ জাযন্তি, নো অঞ্ঞথা. তথা পঞ্চৰিঞ্ঞাণানি নাম পঞ্চৰত্থুসঙ্খাতেসু পঞ্চদ্ৰারেসু পঞ্চন্নং আরম্মণানং আপাতা গমনৰেগেন এৰ জাযন্তি, নো অঞ্ঞথা.

আপাতাগমনঞ্চ তেসং দ্ৰারারম্মণানং ঠিতিপত্তকালে এৰ হোতি. আপাতাগমনপচ্চযা চ দ্ৰিক্খত্তুং ভৰঙ্গং চলতি. ভৰঙ্গচলন পচ্চযা চ আৰজ্জনং উপ্পজ্জতি. আৰজ্জনপচ্চযা চ তানি পঞ্চৰিঞ্ঞাণানি উপ্পজ্জন্তি. তস্মা চক্খাদীনি পঞ্চৰত্থূনি পুরে অতীতভৰঙ্গচিত্তস্স উপ্পাদক্খণে উপ্পন্নানি এৰ পঞ্চৰিঞ্ঞাণধাতূনং ৰত্থুপুরেজাতপচ্চযা হোন্তি.

মরণাসন্নকালে পন সব্বানি ছ ৰত্থূনি চুতিচিত্ততো পুরে সত্তরসমস্স ভৰঙ্গচিত্তস্স উপ্পাদক্খণে এৰ উপ্পজ্জন্তি, ততো পরং ন উপ্পজ্জন্তি. তস্মা মরণাসন্নকালে ভৰঙ্গচিত্তানি চ সব্বানি ছদ্ৰারিকৰীথিচিত্তানি চ চুতিচিত্তঞ্চ পুরেতরং উপ্পন্নানি তানিযেৰ অত্তনো অত্তনো ৰত্থূনি নিস্সায উপ্পজ্জন্তি. অযং ৰত্থুপুরেজাত নিস্সযো.

কতমো পন ৰত্থারম্মণপুরেজাতনিস্সযো. যদা অত্তনো অজ্ঝত্তং ৰত্থুরূপং আরব্ভ যং রূপং নিস্সায মম মনোৰিঞ্ঞাণং ৰত্ততি, এতং মম এসো হমস্মি এসো মে অত্তাতি এৰং তণ্হামান দিট্ঠীহি গহণৰসেন ৰা এতং অনিচ্চং এতং দুক্খং এতং অনত্তাতি এৰং সম্মসনৰসেন ৰা আৰজ্জনাদীনি মনোদ্ৰারিকৰীথি চিত্তানি পৰত্তন্তি. তদা তং তং ৰত্থুরূপং পচ্চেকং তেসং নিস্সযৰত্থু চ হোতি তেসং আরম্মণঞ্চ. তস্মা তং তং হদযরূপং তস্স তস্স চিত্তুপ্পাদস্স ৰত্থারম্মণপুরেজাতপচ্চযো হোতি. অযং ৰত্থারম্মণ পুরেজাতনিস্সযো. এৰং নিস্সযপচ্চযো তিৰিধো হোতি.

ইধ সুত্তন্তনিস্সযোপি ৰত্তব্বো. ইমে মনুস্সা ৰা তিরচ্ছানগতা ৰা রুক্খাদযো ৰা মহাপথৰিযং পতিট্ঠিতা, মহা পথৰী চ হেট্ঠা মহাউদকক্খন্ধে, মহাউদকক্খন্ধো চ হেট্ঠা মহাৰাতক্খন্ধে, মহাৰাতক্খন্ধো চ হেট্ঠা অজটাকাসে, মনুস্সা গেহেসু, ভিক্খূ ৰিহারেসু, দেৰা দিব্বৰিমানেসূতিআদিনা সব্বং লোকপ্পৰত্তিং ঞত্ৰা নিস্সযপচ্চযো ৰেদিতব্বো. নিস্সযপচ্চযদীপনা নিট্ঠিতা.