৭. অঞ্ঞমঞ্ঞপচ্চযো

সহজাতপচ্চযে ৰিভত্তেসু ধম্মেসু যো যো পচ্চয ধম্মোতি ৰুত্তো, সো সো এৰ ইধ পচ্চযধম্মো চেৰ পচ্চযুপ্পন্ন ধম্মো চ হোতি. সব্বেপি চিত্তচেতসিকা ধম্মা অঞ্ঞমঞ্ঞস্স পচ্চযধম্মা চ হোন্তি অঞ্ঞমঞ্ঞস্স পচ্চযুপ্পন্নধম্মা. সহজাতা চত্তারো মহাভূতা অঞ্ঞমঞ্ঞস্স পচ্চযধম্মা চ হোন্তি অঞ্ঞমঞ্ঞস্স পচ্চযুপ্পন্নধম্মা চ. পটিসন্ধিনামক্খন্ধা চ পটিসন্ধি সহজাতং হদযৰত্থুরূপঞ্চ অঞ্ঞমঞ্ঞস্স পচ্চযধম্মা চ হোন্তি অঞ্ঞমঞ্ঞস্স পচ্চযুপ্পন্নধম্মা চ. অত্থো সুৰিঞ্ঞেয্যোযেৰ.

যথা অঞ্ঞমঞ্ঞং নিস্সায উস্সাপিতা তযো দণ্ডা অঞ্ঞমঞ্ঞস্স নিস্সযা চ হোন্তি, অঞ্ঞমঞ্ঞং নিস্সিতা চ. তেসু একমেকস্মিং উস্সিতে সব্বে উস্সিতা হোন্তি, একমেকস্মিং পতন্তে সব্বে পতন্তি. এৰং অঞ্ঞমঞ্ঞধম্মা চ দট্ঠব্বা.

এত্থ ৰদেয্যুং, সব্বে চেতসিকা ধম্মা চিত্তপচ্চযং অলভ মানা উপ্পজ্জিতুং ন সক্কোন্তীতি যুত্তং. কস্মা. ফুসনাদীনং চেতসিক কিচ্চানং ৰিজাননকিচ্চপুব্বঙ্গমত্তা, মনোপুব্বঙ্গমাতি হি ৰুত্তং. চিত্তং পন চেতসিকপচ্চযং অলভমানং উপ্পজ্জিতুং ন সক্কোতীতি ন যুজ্জেয্যাতি. ৰুচ্চতে, চেতসিকধম্মা নাম চিত্তস্স সহাযঙ্গানি হোন্তি. তস্মা তেহি ৰিনা চিত্তম্পি উপ্পজ্জিতুং ন সক্কোতিযেৰ. এসেৰ নযো চতূসু মহাভূতেসুপীতি. উপাদারূপানি পন মহাভূতানং নিস্সন্দমত্তত্তা সহাযঙ্গানি ন হোন্তীতি. ননু আহাররূপঞ্চ জীৰিতরূপঞ্চ পচ্চযৰিসেসত্তা সহাযঙ্গং হোতীতি. ৰুচ্চতে, ঠিতিযা এৰ সহাযঙ্গং হোতি. ন উপ্পাদে. ইধ পন উপ্পাদে সহাযঙ্গং অধিপ্পেতন্তি. অঞ্ঞমঞ্ঞপচ্চযদীপনা নিট্ঠিতা.