৪. অনন্তরপচ্চযো

কতমো অনন্তরপচ্চযো. অনন্তরে খণে নিরুদ্ধো চিত্ত চেতসিকধম্মসমূহো অনন্তরপচ্চযো.

কতমো ধম্মো অনন্তরপচ্চযস্স পচ্চযুপ্পন্নো. পচ্ছিমে অনন্তরে এৰ খণে উপ্পন্নো চিত্তচেতসিকধম্মসমূহো তস্স পচ্চযস্স পচ্চযুপ্পন্নো.

একস্মিং ভৰে পটিসন্ধিচিত্তং পঠমভৰঙ্গচিত্তস্স অনন্তর পচ্চযো, পঠম ভৰঙ্গচিত্তং দুতিযভৰঙ্গচিত্তস্স অনন্তরপচ্চযোতিআদিনা ৰত্তব্বো.

যদা পন ধম্মযমকে সুদ্ধাৰাসানং দুতিযে অকুসলে চিত্তে ৰত্তমানেতি ৰুত্তনযেন তস্স সত্তস্স অত্তনো অভিনৰং অত্তভাৰং আরব্ভ এতং মম এসোহমস্মি এসো মে অত্তাতি পৰত্তং ভৰনিকন্তিক তণ্হাসহগতচিত্তং উপ্পজ্জতি. তদা পঠমং দ্ৰিক্খত্তুং ভৰঙ্গং চলতি. ততো মনোদ্ৰারাৰজ্জনচিত্তং উপ্পজ্জতি. ততো সত্ত ভৰনিকন্তিকজৰনানি উপ্পজ্জন্তি. ততো পরং ভৰঙ্গৰারো.

অপি চ সো সত্তো তদা পচ্চুপ্পন্নভৰে কিঞ্চি ন জানাতি, পুব্বভৰে অত্তনা অনুভূতং আরম্মণং অনুস্সরমানো অচ্ছতি. ৰত্থুস্স পন অতিদুব্বলত্তা তঞ্চ আরম্মণং অপরিব্যত্তমেৰ হোতি. তং আরব্ভ উদ্ধচ্চসহগতচিত্তমেৰ বহুলং পৰত্ততি.

যদা গব্ভো থোকং ৰড্ঢমানো হোতি অতিরেকদ্ৰেমাসং গতো, তদা চক্খাদীনি ইন্দ্রিযানি পরিপুণ্ণানি হোন্তি. এৰং সন্তেপি মাতুগব্ভে আলোকাদীনং পচ্চযানং অভাৰতো চক্খুৰিঞ্ঞাণাদীনি চত্তারি ৰিঞ্ঞাণানি নুপ্পজ্জন্তি, কাযৰিঞ্ঞাণমনোৰিঞ্ঞাণানি এৰ উপ্পজ্জন্তি. সো সত্তো মাতুযা ইরিযাপথপরিৰত্তনাদীসু বহূনি দুক্খদোমনস্সানি পচ্চনুভোতি. ৰিজাযনকালে পন ভুসং দুক্খং নিগচ্ছতিযেৰ. ৰিজাযিত্ৰাপি যাৰ ৰত্থুরূপানি মুদূনি হোন্তি, পরিপাকং ন গচ্ছন্তি, তাৰ সো অতিমন্দরূপো উত্তানসেয্যকো হুত্ৰা অচ্ছতি. ন কিঞ্চি পচ্চুপ্পন্নং আরম্মণং সল্লক্খেতি. যেভুয্যেন পুরিম ভৰানুসারী এৰ তস্স ৰিঞ্ঞাণং হোতি. সচে সো নিরয ভৰতো আগতো হোতি, সো ৰিরূপমুখবহুলো হোতি. পুরিমানি নিরযারম্মণানি আরব্ভ খণে খণে ৰিরূপমুখমস্স পঞ্ঞাযতি. অথ দেৰলোকতো আগতো হোতি, দিব্বানি আরম্মণানি আরব্ভ ৰিপ্পসন্নমুখবহুলো হোতি, খণে খণে মিহিতমুখমস্স পঞ্ঞাযতি.

যদা পন ৰত্থুরূপানি তিক্খানি হোন্তি, পরিপাকং গচ্ছন্তি. ৰিঞ্ঞাণানি চস্স সুৰিসদানি পৰত্তন্তি. তদা অমন্দরূপো হুত্ৰা কীল়ন্তো লীল়ন্তো মোদন্তো পমোদন্তো অচ্ছতি. পচ্চুপ্পন্নে আরম্মণানি সল্লক্খেতি. মাতুভাসং সল্লক্খেতি. ইধ লোকানুসারী ৰিঞ্ঞাণমস্স বহুলং পৰত্ততি. পুরিমজাতিং পমুস্সতি.

কিং পন সব্বোপি সত্তো ইমস্মিং ঠানে এৰ পুরিমং জাতিং পমুস্সতীতি চে. ন সব্বোপি সত্তো ইমস্মিং ঠানে এৰ পমুস্সতি. কোচি অতিরেকতরং গম্ভৰাসদুক্খেন পরিপীল়িতো গব্ভে এৰ পমুস্সতি. কোচি ৰিজাযনকালে, কোচি ইমস্মিং ঠানে পমুস্সতি. কোচি ইতোপরম্পি দহরকালে ন পমুস্সতি. ৰুড্ঢকালে এৰ পমুস্সতি. কোচি যাৰজীৰংপি ন পমুস্সতি. দ্ৰে তযো ভৰে অনুস্সরন্তোপি অত্থিযেৰ. ইমে জাতিস্সরসত্তা নাম হোন্তি.

তত্থ ৰিজাযনকালতো পট্ঠায ছদ্ৰারিকৰীথিচিত্তানি পৰত্তন্তি. পচ্চুপ্পন্নারম্মণং সল্লক্খণতো পট্ঠায ছদ্ৰারিকৰীথি চিত্তানি পরিপুণ্ণানি পৰত্তন্তি. সব্বত্থপি পুরিমং পুরিমং অনন্তরে নিরুদ্ধং চিত্তং পচ্ছিমস্স পচ্ছিমস্স অনন্তরে উপ্পন্নস্স চিত্তস্স অনন্তর পচ্চযো হোতি. অযঞ্চ অনন্তরপচ্চযো নাম অনমতগ্গে সংসারে একস্স সত্তস্স একপ্পবন্ধো এৰ হোতি. যদা সত্তো অরহত্ত মগ্গং লভিত্ৰা খন্ধপরিনিব্বানং পাপুণাতি, তদা এৰ সো পবন্ধো ছিজ্জতি.

কেনট্ঠেন অনন্তরো, কেনট্ঠেন পচ্চযোতি. অত্তনো অনন্তরে অত্তসদিসস্স ধম্মন্তরস্স উপ্পাদনট্ঠেন অনন্তরো, উপকারকট্ঠেন পচ্চযো. তত্থ অত্তসদিসস্সাতি সারম্মণ ভাৰেন অত্তনা সদিসস্স. সারম্মণভাৰেনাতি চ যো ধম্মো আরম্মণেন ৰিনা ন পৰত্ততি, সো সারম্মণো নাম, এৰং সারম্মণভাৰেন. ধম্মন্তরস্স উপ্পাদনট্ঠেনাতি পুরিমস্মিং চিত্তে নিরুদ্ধেপি তস্স চিন্তনকিরিযাৰেগো ন ৰূপসম্মতি, পচ্ছিমং চিত্তং উপ্পাদেত্ৰা এৰ ৰূপসম্মতি, এৰং পচ্ছিমস্স ধম্মন্তরস্স উপ্পাদনট্ঠেন.

তত্থ পুরিমা পুরিমা মাতুপরম্পরা ৰিয অনন্তরপচ্চযপরম্পরা দট্ঠব্বা. পচ্ছিমা পচ্ছিমা ধীতুপরম্পরা ৰিয তস্স পচ্চযুপ্পন্নপরম্পরা দট্ঠব্বা. এৰং সন্তে অরহন্তানং সব্বপচ্ছিমং পরিনিব্বানচিত্তম্পি পুন পটিসন্ধিচিত্তসঙ্খাতং ধম্মন্তরং উপ্পাদেয্যাতি. ন উপ্পাদেয্য. কস্মা, তদা কম্মকিলেসৰেগানং সব্বসো পটিপ্পস্সদ্ধিভাৰেন অচ্চন্তসন্ততরত্তা তস্স চিত্তস্সাতি. অনন্তরপচ্চয দীপনা নিট্ঠিতা.