৫. সমনন্তরপচ্চযো

পচ্চযধম্মৰিভাগো চ পচ্চযুপ্পন্নধম্মৰিভাগো চ অনন্তপচ্চয সদিসো.

কেনট্ঠেন সমনন্তরোতি. সুট্ঠু অনন্তরট্ঠেন সমনন্তরো. যথা সিলাথম্ভাদীসু রূপকলাপা একাবদ্ধা সমানাপি রূপ ধম্মভাৰেন সণ্ঠান জাতিকত্তা মজ্ঝে পরিচ্ছেদরূপসহিতা এৰ হোন্তি. দ্ৰিন্নং রূপকলাপানং মজ্ঝে অন্তরং নাম ৰিৰরং নাম অত্থিযেৰ. ন তথা পুরিমপচ্ছিমানং দ্ৰিন্নং চিত্তচেতসিক কলাপানং মজ্ঝে. তে পন অরূপধম্মভাৰেন অসণ্ঠান জাতিকত্তা মজ্ঝে পরিচ্ছেদধম্মস্স নাম কস্সচি আকাসৰিৰরস্স অভাৰতো সব্বসো অন্তর রহিতা এৰ হোন্তি. লোকস্সপি দ্ৰিন্নং কলাপানং অন্তরং নাম ন দিস্সতি. ততো ইমে সত্তা চিত্তং নাম নিচ্চং ধুৰং থাৰরং অৰিপরিণামধম্মন্তি এৰং চিত্তে নিচ্চসঞ্ঞিনো হোন্তি. এৰং সুট্ঠু অনন্তরট্ঠেন সমনন্তরো. অনন্তরট্ঠেনাতি চ অত্তনো অনন্তরে অত্তসদিসস্স ধম্মন্তরস্স উপ্পাদনট্ঠেনাতি পুব্বে ৰুত্তমেৰ.

এৰং সন্তে নিরোধসমাপত্তিকালে পুরিমচিত্তং নাম নেৰ সঞ্ঞানাসঞ্ঞাযতনচিত্তং, পচ্ছিমচিত্তং নাম অরিযফলচিত্তং, দ্ৰিন্নং চিত্তানং অন্তরে একরত্তিদিৰম্পি দ্ৰেরত্তিদিৰানিপি.ল. সত্তরত্তিদিৰানিপি অচিত্তকো হোতি. অসঞ্ঞসত্তভূমিযংপি পুরিমে কামভৰে চুতিচিত্তং পুরিমচিত্তং নাম. পচ্ছিমে কামভৰে পটিসন্ধিচিত্তং পচ্ছিমচিত্তং নাম, দ্ৰিন্নং চিত্তানং অন্তরে অসঞ্ঞসত্তভৰে পঞ্চকপ্পসতানি পুগ্গলো অচিত্তকো তিট্ঠতি. তত্থ দ্ৰে পুরিমচিত্তানি অত্তনো অনন্তরে অত্তসদিসস্স ধম্মন্তরস্স উপ্পাদনপচ্চযসত্তিরহিতানি হোন্তীতি. ন হোন্তি. মহন্তেহি পন ভাৰনাপণিধিবলেহি পটিবাহিতত্তা পুরিমচিত্তানি চ নিরুজ্ঝমানানি অনন্তরে ধম্মন্তরস্স উপ্পাদন সত্তিসহিতানি এৰ নিরুজ্ঝন্তি. পচ্ছিমচিত্তানি চ উপ্পজ্জমানানি তস্মিং খণে একাবদ্ধভাৰেন অনুপ্পজ্জিত্ৰা চিরকালে এৰ উপ্পজ্জন্তি. ন চ এত্তকমত্তেন পুরিমচিত্তানং অনন্তরে ধম্মন্তরস্স উপ্পাদন সত্তিনাম নত্থীতি চ, তে অনন্তরপচ্চযধম্মা নাম ন হোন্তীতি চ সক্কা ৰত্তুং. যথা তং রঞ্ঞো যোধা নাম অত্থি, কদাচি রাজা কালং ঞত্ৰা তুম্হে ইদানি মাযুজ্ঝথ, যুদ্ধকালো ন হোতি, অসুকস্মিং কালে এৰ যুজ্ঝথাতি ৰদেয্য. তে চ তদা অযুজ্ঝমানা ৰিচরেয্যুং. এৰং সন্তেপি তেসং যুজ্ঝনসত্তি নাম নত্থীতি চ, তে যোধা নাম ন হোন্তীতি চ ন সক্কা ৰত্তুন্তি.

এত্থ ৰদেয্যুং, ইমস্মিং পচ্চযে তে পন অরূপধম্মভাৰেন অসণ্ঠান জাতিকত্তা মজ্ঝেপরিচ্ছেদধম্মস্স নাম কস্সচি অভাৰতো সব্বসো অন্তররহিতা এৰ হোন্তীতি ৰুত্তং. এৰং সন্তে পুব্বে আরম্মণ পচ্চযে ভেরিসদ্দৰীণাসদ্দোপমাহি যো চিত্তানং খণে খণে উপ্পাদো চ নিরোধো চ ৰুত্তো, সো অম্হেহি কথং পচ্চেতব্বোতি. অঞ্ঞমঞ্ঞৰিরুদ্ধানং নানাচিত্তানং খণমত্তেপি পুব্বাপর পরিৰত্তনস্স লোকে পঞ্ঞাযনতো. অযমত্থো পুব্বে চিত্ত যমকদীপনিযং ৰিত্থারতো ৰুত্তোযেৰাতি. সমনন্তরপচ্চয দীপনা নিট্ঠিতা.