১৬. ইন্দ্রিযপচ্চযো

তিৰিধো ইন্দ্রিযপচ্চযো সহজাতিন্দ্রিযপচ্চযো পুরে জাতিন্দ্রিযপচ্চযো রূপজীৰিতিন্দ্রিযপচ্চযো.

তত্থ পন্নরসিন্দ্রিযধম্মা সহজাতিন্দ্রিযপচ্চযো নাম, জীৰিতিন্দ্রিযং মনিন্দ্রিযং সুখিন্দ্রিযং দুক্খিন্দ্রিযং সোমনস্সিন্দ্রিযং দোমনস্সিন্দ্রিযং উপেক্খিন্দ্রিযং সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযন্তি. তেহি সহজাতা চিত্তচেতসিকধম্মা চ রূপধম্মা চ তস্স পচ্চযুপ্পন্না.

পঞ্চিন্দ্রিযরূপানি পুরেজাতিন্দ্রিযপচ্চযো, চক্খুন্দ্রিযং সোতিন্দ্রিযং ঘানিন্দ্রিযং জিৰ্হিন্দ্রিযং কাযিন্দ্রিযং. পঞ্চৰিঞ্ঞাণচিত্ত চেতসিক ধম্মা তস্স পচ্চযুপ্পন্না.

একং রূপজীৰিতিন্দ্রিযং রূপজীৰিতিন্দ্রিযপচ্চযো. সব্বানি কম্মজ রূপানি জীৰিতরূপৰজ্জিতানি তস্স পচ্চযুপ্পন্নানি.

কেনট্ঠেন ইন্দ্রিযন্তি. ইস্সরিযট্ঠেন ইন্দ্রিযং. তত্থ কত্থ ইস্সরিযন্তি. অত্তনো অত্তনো পচ্চযুপ্পন্নেসু ধম্মেসু ইস্সরিযং. কস্মিং কস্মিং কিচ্চে ইস্সরিযন্তি. অত্তনো অত্তনো কিচ্চে ইস্সরিযং. নামজীৰিতং সম্পযুত্তধম্মানং জীৰনকিচ্চে ইস্সরিযং. জীৰনকিচ্চেতি আযুৰড্ঢনকিচ্চে, সন্ততিঠিতিযা চিরকালঠিতিকিচ্চেতি অত্থো. মনিন্দ্রিযং আরম্মণগ্গহণকিচ্চে সম্পযুত্তধম্মানং ইস্সরিযং. অৰসেসো ইন্দ্রিযট্ঠো পুব্বে ইন্দ্রিযযমকদীপনিযং ৰুত্তোযেৰ.

এত্থ ৰদেয্য, দ্ৰে ইত্থিন্দ্রিযপুরিসিন্দ্রিযধম্মা ইন্দ্রিযভূতা সমানাপি কস্মা ইন্দ্রিযপচ্চযে ৰিসুং ন গহিতাতি. পচ্চযকিচ্চস্স অভাৰতো. তিৰিধঞ্হি পচ্চযকিচ্চং জননকিচ্চঞ্চ উপত্থম্ভনকিচ্চঞ্চ অনুপালনকিচ্চঞ্চ. তত্থ যো পচ্চযো পচ্চযুপ্পন্নধম্মস্স উপ্পাদায পচ্চযো হোতি, যস্মিং অসতি পচ্চযুপ্পন্নো ধম্মো ন উপ্পজ্জতি, তস্স পচ্চযকিচ্চং জননকিচ্চং নাম. যথা অনন্তরপচ্চযো. যো পচ্চযো পচ্চযুপ্পন্নধম্মস্স ঠিতিযা চ ৰুড্ঢিযা চ ৰিরুল়্হিযা চ পচ্চযো হোতি, যস্মিং অসতি পচ্চযুপ্পন্নো ধম্মো ন তিট্ঠতি ন ৰড্ঢতি ন ৰিরূহতি, তস্স পচ্চযকিচ্চং উপত্থম্ভনকিচ্চং নাম. যথা পচ্ছাজাতপচ্চযো. যো পচ্চযো পচ্চযুপ্পন্নস্স ধম্মস্স পৰত্তিযা পচ্চযো হোতি, যেন ৰিনা পচ্চযুপ্পন্নো ধম্মো চিরকালং ন পৰত্ততি, সন্ততি গমনং ছিজ্জতি, তস্স পচ্চয কিচ্চং অনুপালনকিচ্চং নাম. যথা রূপ জীৰিতিন্দ্রিযপচ্চযো. এতে পন দ্ৰে ইন্দ্রিযধম্মা তেসু তীসু পচ্চয কিচ্চেসু এককিচ্চংপি নসাধেন্তি, তস্মা এতে দ্ৰে ধম্মা ইন্দ্রিয পচ্চযে ৰিসুং ন গহিতাতি.

এতং সন্তে এতে দ্ৰে ধম্মা ইন্দ্রিযাতিপি ন ৰত্তব্বাতি. নো ন ৰত্তব্বা. কস্মা. ইন্দ্রিযকিচ্চসব্ভাৰতোতি. কিং পন এতেসং ইন্দ্রিযকিচ্চন্তি. লিঙ্গনিমিত্তকুত্তআকপ্পেসু ইস্সরতা ইন্দ্রিয কিচ্চং. তথা হি যস্স পুগ্গলস্স পটিসন্ধিক্খণে ইত্থিন্দ্রিযরূপং উপ্পজ্জতি, তস্স সন্তানে চতূহি কম্মাদীহি পচ্চযেহি উপ্পন্না পঞ্চক্খন্ধ ধম্মা ইত্থিভাৰায পরিণমন্তি, সো অত্তভাৰো একন্তেন ইত্থিলিঙ্গ ইত্থিনিমিত্ত ইত্থিকুত্ত ইত্থাকপ্পযুত্তো হোতি, নো অঞ্ঞথা. ন চ ইত্থিন্দ্রিযরূপং তে পঞ্চক্খন্ধধম্মে জনেতি, ন চ উপত্থম্ভতি, নাপি অনুপালেতি, অথ খো তে ধম্মা অত্তনো অত্তনো পচ্চযেহি উপ্পজ্জমানা এৰঞ্চেৰঞ্চ উপ্পজ্জন্তূতি আণং ঠপেন্তং ৰিয তেসু অত্তনো অনুভাৰং পৰত্তেতি. তে চ ধম্মা তথেৰ উপ্পজ্জন্তি, নো অঞ্ঞথাতি. অযং ইত্থিন্দ্রিযরূপস্স ইত্থিলিঙ্গাদীসু ইস্সরতা. এস নযো পুরিসিন্দ্রিযরূপস্স পুরিসলিঙ্গাদীসু ইস্সরতাযং. এৰং এতে দ্ৰে ধম্মা লিঙ্গাদীসু ইন্দ্রিযকিচ্চ সব্ভাৰতো ইন্দ্রিযা নাম হোন্তীতি.

হদযৰত্থুরূপং পন দ্ৰিন্নং ৰিঞ্ঞাণধাতূনং নিস্সযৰত্থুকিচ্চং সাধযমানংপি তাসু ইন্দ্রিযকিচ্চং ন সাধেতি. ন হি ভাৰিত চিত্তস্স পুগ্গলস্স হদযরূপে পসন্নেৰা অপ্পসন্নে ৰা জাতেপি মনোৰিঞ্ঞাণধাতুযো তদনুৰত্তিকা হোন্তীতি. ইন্দ্রিয পচ্চযদীপনা নিট্ঠিতা.