১৭. ঝানপচ্চযো

সত্ত ঝানঙ্গানি ঝানপচ্চযো, ৰিতক্কো ৰিচারো পীতি সোমনস্সং দোমনস্সং উপেক্খা একগ্গতা. তেহি সহজাতা পঞ্চৰিঞ্ঞাণৰজ্জিতা চিত্তচেতসিকধম্মা চ রূপধম্মা চ তস্স পচ্চযুপ্পন্না.

কেনট্ঠেন ঝানন্তি. উপনিজ্ঝাযনট্ঠেন ঝানং. উপনিজ্ঝায নট্ঠেনাতি চ মনসা আরম্মণং উপগন্ত্ৰা নিজ্ঝাযনট্ঠেন পেক্খনট্ঠেন. যথা হি ইস্সাসো দূরে ঠত্ৰা খুদ্দকে লক্খমণ্ডলে সরং পৰেসেন্তো হত্থেহি সরং উজুকঞ্চ নিচ্চলঞ্চ কত্ৰা মণ্ডলঞ্চ ৰিভূতং কত্ৰা চক্খুনা নিজ্ঝাযন্তো পৰেসেতি. এৰমেৰ ইমেহি অঙ্গেহি চিত্তং উজুকঞ্চ নিচ্চলঞ্চ কত্ৰা আরম্মণঞ্চ ৰিভূতং কত্ৰা নিজ্ঝাযন্তো পুগ্গলো উপনিজ্ঝাযতীতি ৰুচ্চতি. এৰং উপনিজ্ঝাযিত্ৰা যংকিঞ্চি কাযকম্মং ৰা ৰচীকম্মং ৰা মনোকম্মং ৰা করোন্তো অৰিরজ্ঝমানো করোতি.

তত্থ কাযকম্মং নাম অভিক্কমপ্পটিক্কমাদিকং ৰুচ্চতি. ৰচীকম্মং নাম অক্খরৰণ্ণপরিপুণ্ণং ৰচীভেদকরণং ৰুচ্চতি. মনোকম্মং নাম যংকিঞ্চি মনসা আরম্মণৰিভাৰনং ৰুচ্চতি. দানকম্মং ৰা পাণাতিপাত কম্মং ৰা অনুরূপেহি ঝানঙ্গেহি ৰিনা দুব্বলেন চিত্তেন কাতুং ন সক্কা হোতি. এস নযো সেসেসু কুসলাকুসল কম্মেসূতি.

অযঞ্চ অত্থো ৰিতক্কাদীনং ঝানঙ্গধম্মানং ৰিসুং ৰিসুং সভাৰ লক্খণেহি দীপেতব্বো. সম্পযুত্তধম্মে আরম্মণাভিনিরোপন লক্খণো ৰিতক্কো, সো চিত্তং আরম্মণে দল়্হং নিযোজেতি. আরম্মণানুমজ্জনলক্খণো ৰিচারো, সো চিত্তং আরম্মণে দল়্হং সংযোজেতি. আরম্মণসম্পিযাযনলক্খণাপীতি, সা চিত্তং আরম্মণে পরিতুট্ঠং করোতি. তিস্সোপি ৰেদনা আরম্মণরসানু ভৰনলক্খণা, তাপি চিত্তং আরম্মণে ইট্ঠানিট্ঠমজ্ঝত্তরসানুভৰন কিচ্চেন দল়্হপ্পটিবদ্ধং করোন্তি. সমাধানলক্খণা একগ্গতা, সাপি চিত্তং আরম্মণে নিচ্চলং কত্ৰা ঠপেতীতি. ঝানপচ্চযদীপনা নিট্ঠিতা.