১৩. কম্মপচ্চযো

দুৰিধো কম্মপচ্চযো সহজাতকম্মপচ্চযো নানাক্খণিক কম্মপচ্চযো.

তত্থ খণত্তযসমঙ্গি ভূতা সব্বাপি কুসলাকুসলা ব্যাকতচেতনা সহজাতকম্ম পচ্চযো. চেতনাসম্পযুত্তা সব্বেপি চিত্তচেতসিকা ধম্মাচ পটিসন্ধিচিত্তেন সহুপ্পন্না কম্মজরূপধম্মা চ পৰত্তিকালে সব্বেপি চিত্তজরূপধম্মা চ তস্স পচ্চযস্স পচ্চযুপ্পন্না.

অতীতা কুসলাকুসলচেতনা নানাক্খণিককম্ম পচ্চযো. বাত্তিংসৰিধা লোকিযৰিপাক চিত্তচেতসিকা ধম্মা চ সব্বে কম্মজরূপধম্মা চ তস্স পচ্চযস্স পচ্চযুপ্পন্না.

কেনট্ঠেন কম্মন্তি. কিরিযাৰিসেসট্ঠেন কম্মং. চেতনা হি কিরিযা ৰিসেসো হোতি সব্বকম্মেসু জেট্ঠকত্তা. তা হি সব্বেসু কাযৰচীমনোকম্মেসু পচ্চুপট্ঠিতেসু তস্স তস্স কম্মস্স নিপ্ফত্তত্থায সম্পযুত্তধম্মে চেতেতি কপ্পেতি সংৰিদহতি, একতো উট্ঠাপেতি, তস্মা সব্বকম্মেসু জেট্ঠকা হোতি. ইতি কিরিযাৰিসেসট্ঠেন কম্মং নাম. করোন্তি এতেনাতি ৰা কম্মং. কিং করোন্তি. কাযিককিরিযংপি করোন্তি, ৰাচসিককিরিযংপি করোন্তি, মানসিককিরিযংপি করোন্তি. তত্থ কাযিককিরিযা নাম গমনঠান নিসজ্জাদযো অভিক্কমনপটিক্কমনাদযো অন্তমসো অক্খিদলানং উক্খিপননিক্খিপনানিপি. ৰাচসিককিরিযা নাম ৰাচাপৰত্তনকিরিযা. মানসিককিরিযা নাম সুচিন্তিত দুচিন্তিতকিরিযা, অন্তমসো পঞ্চ ৰিঞ্ঞাণানং দস্সনকিচ্চসৰনকিচ্চাদীনিপি. সব্বাপি ইমা কিরিযাযো এতায চেতনায সত্তা করোন্তি, সংৰিদহন্তি, তস্মা সা চেতনা কম্মং নাম.

অত্তনো পচ্চযুপ্পন্নেন সহ জাযতীতি সহজাতং. সহজাতঞ্চ তং কম্মঞ্চাতি সহজাতকম্মং. সহজাতকম্মং হুত্ৰা পচ্চযো সহজাতকম্ম পচ্চযো. সহজাতকম্মভাৰেন পচ্চযোতি ৰুত্তং হোতি.

অঞ্ঞো কম্মস্স উপ্পত্তিক্খণো অঞ্ঞো ৰিপাকস্স উপ্পত্তিক্খণোতি এৰং ৰিসুং ৰিসুং উপ্পত্তিক্খণো এতস্সাতি নানাক্খণিকং. নানাক্খণিকঞ্চ তং কম্মঞ্চাতি নানাক্খণিককম্মং. নানাক্খণিককম্মং হুত্ৰা পচ্চযো নানাক্খণিককম্মপচ্চযো. নানাক্খণিককম্মপচ্চযভাৰেন পচ্চযোতি ৰুত্তং হোতি. অরিযমগ্গসম্পযুত্তা চেতনা অত্তনো নিরুদ্ধানন্তরে এৰ অরিযফলৰিপাকং জনেতি, সাপি নানাক্খণিকা এৰ হোতি.

এত্থ চ একা দানকুসলচেতনা অত্তনা সহজাতানং চিত্তচেতসিকানঞ্চ কাযিকৰাচসিককিরিযাভূতানং চিত্তজরূপানঞ্চ সহজাতকম্মপচ্চযো. তায চেতনায আযতিং কালন্তরে উপ্পজ্জমানস্স ৰিপাকক্খন্ধস্স চ কম্মজরূপক্খন্ধস্স চ নানাক্খণিক কম্মপচ্চযো. এৰং একা কম্মপথপত্তা সুচরিতদুচ্চরিতচেতনা দ্ৰীসু কালেসুদ্ৰিন্নং পচ্চযুপ্পন্নানং দ্ৰীহি পচ্চযসত্তীহি পচ্চযো হোতীতি.

এত্থ চ নানাক্খণিককম্মপচ্চযে কম্মন্তি কিরিযাৰিসেসো. সো পন চেতনায নিরুদ্ধাযপি অনিরুজ্ঝিত্ৰা তং চিত্তসন্তানং অনুগচ্ছতিযেৰ. যদা ৰিপচ্চিতুং ওকাসং লভতি, তদা সো কিরিযা ৰিসেসো চুতিনন্তরে একো অত্তভাৰো হুত্ৰা ৰিপচ্চতি পাতুভৰতি. ওকাসং পন অলভমানা ভৰসতংপি ভৰসহস্সংপি ভৰসতসহস্সংপি তং সন্তানং অনুগচ্ছতিযেৰ. মহগ্গতকম্মং পন লদ্ধোকাসে সতি দুতিযভৰে ব্রহ্মলোকে একো ব্রহ্মত্তভাৰো হুত্ৰা ৰিপচ্চতি পাতুভৰতি. সুপরিপক্ককম্মত্তা পন দুতিযভৰেযেৰ খীযতি, ততো পরং নানুগচ্ছতীতি. কম্মপচ্চযদীপনা নিট্ঠিতা.