১৪. ৰিপাকপচ্চযো

ছত্তিংসৰিধা ৰিপাকভূতা সহজাতচিত্তচেতসিকা ধম্মা ৰিপাক পচ্চযো. তেযেৰ অঞ্ঞমঞ্ঞঞ্চ পটিসন্ধিক্খণে কম্মজরূপানি চ পৰত্তিক্খণে ৰিপাক চিত্তজাতানি চিত্তজরূপানি চ ৰিপাকপচ্চযুপ্পন্না.

কেনট্ঠেন ৰিপাকোতি. ৰিপচ্চনট্ঠেন ৰিপাকো. ৰিপচ্চনং নাম মুদুতরুণভাৰং অতিক্কম্ম ৰিপক্কভাৰং আপজ্জনং. কস্স পন ধম্মস্স মুদুতরুণভাৰো, কস্স ৰিপক্কভাৰোতি. নানাক্খণিককম্মপচ্চয সঙ্খাতস্স অতীতকম্মস্স মুদুতরুণভাৰো, তস্সেৰ কম্মস্স ৰিপক্কভাৰো.

তত্থ একস্স কম্মস্স চতস্সো অৰত্থাযো হোন্তি চেতনা ৰত্থা কম্মাৰত্থা নিমিত্তাৰত্থা ৰিপাকাৰত্থাতি.

তত্থ তায চেতনায নিরুদ্ধাযপি তস্সা কিরিযা ৰিসেসো ন নিরুজ্ঝতি, তং চিত্তসন্তানং অনুগচ্ছতিযেৰ. অযং কম্মাৰত্থা নাম.

নিমিত্তাৰত্থাতি তং কম্মং যদা ৰিপচ্চিতুং ওকাসং লভতি, তদা মরণাসন্নকালে তস্স পুগ্গলস্স তমেৰ কম্মং ৰা পচ্চুপট্ঠাতি, সো পুগ্গলো তদা দানং দেন্তো ৰিয সীলং রক্খন্তো ৰিয পাণঘাতং ৰা করোন্তো ৰিয হোতি. কম্মনিমিত্তং ৰা পচ্চুপট্ঠাতি, দান ৰত্থুআদিকং ৰা সত্থাদিকং ৰা অঞ্ঞং ৰাপি পুব্বে তস্স কম্মস্স উপকরণভূতং আরম্মণং তদা তস্স পুগ্গলস্স হত্থগতং ৰিয হোতি. গতিনিমিত্তং ৰা পচ্চুপট্ঠাতি, দিব্বৰিমানাদিকং ৰা নিরযগ্গিজালাদিকং ৰা উপ্পজ্জমানভৰে উপলভিতব্বং ৰা অনুভৰিতব্বং ৰা আরম্মণং তদা দিস্সমানং হোতি. অযং নিমিত্তা ৰত্থা নাম.

ৰিপাকাৰত্থাতি সচে সো পুগ্গলো তথা পচ্চুপট্ঠিতং তং কম্মং ৰা কম্মনিমিত্তং ৰা গতিনিমিত্তং ৰা একং আরম্মণং অমুঞ্চমানো মরতি, তদা তং কম্মং তস্মিংভৰে ৰিপচ্চতি, তং কম্মং তস্মিংভৰে একো অত্তভাৰো হুত্ৰা পাতুভৰতি. তত্থ পুরিমাসু তীসু অৰত্থাসু তং কম্মং মুদুতরুণভূতং হোতি, পচ্ছিমং পন ৰিপাকাৰত্থং পত্ৰা ৰিপক্কভূতং হোতি. তেন ৰুত্তং ৰিপচ্চনং নাম মুদুতরুণভাৰং অতিক্কম্ম ৰিপক্কভাৰং আপজ্জনন্তি. এৰং ৰিপক্কভাৰং আপন্নো চিত্ত চেতসিকধম্মসমূহো ৰিপাকো নাম.

তত্থ যথা অম্বপ্ফলানি নাম যদা ৰিপক্কভাৰং আপজ্জন্তি, তদা সব্বসো সিনিদ্ধরূপানি হোন্তি. এৰমেৰং ৰিপাকধম্মা নাম নিরুস্সাহা নিব্যাপারা হুত্ৰা সব্বসো সন্তরূপা হোন্তি. তেসং সন্তরূপত্তাযেৰ ভৰঙ্গচিত্তানং আরম্মণং অৰিভূতং হোতি, ভৰঙ্গতো ৰুট্ঠানকালে তং আরম্মণং ন জানাতি. তথাহি রত্তিযং নিদ্দাযন্তস্স পুরিমভৰে মরণাসন্নকালে যথাগহিতং কম্মাদিকং আরম্মণং আরব্ভ ভৰঙ্গসোতং পৰত্তমানংপি তস্স ভৰঙ্গসোতস্স তং আরম্মণং আরব্ভ ইদং নাম মে পুরিমভৰে আরম্মণং দিট্ঠন্তি কস্সচি জাননৰীথিচিত্তস্স উপ্পত্তিযা পচ্চযো ন হোতি. সো পুগ্গলো নিদ্দাযনকালেপি উট্ঠানকালেপি পুরিমভৰসিদ্ধং তং নিমিত্তং ন জানাতি. এৰং নিরুস্সাহনিব্যাপারসন্তরূপ ভাৰেন উপকারকতা ৰিপাকপচ্চযতা নামাতি. ৰিপাক পচ্চযদীপনা নিট্ঠিতা.