৩. কারককণ্ড
পঠমাৰিভত্তিরাসি
অথ নামৰিভত্তীনং অত্থভেদা ৰুচ্চন্তে.
কস্মিং অত্থে পঠমা?
২৮৯. পঠমত্থমত্তে [চং. ২.১.৯৩; পা. ২.৩.৪৬].
নামস্স অভিধেয্যমত্তে পঠমাৰিভত্তি হোতি.
রুক্খো, মালা, ধনং.
এত্থ চ মত্তসদ্দেন কত্তু, কম্মাদিকে ৰিভত্যত্থে নিৰত্তেতি. তস্মা অত্থমত্তন্তি লিঙ্গত্থোযেৰ ৰুচ্চতি.
তত্থ অনুচ্চারিতে সতি সুণন্তস্স অৰিদিতো অত্থো লীনত্থো নাম. তং লীনমত্থং গমেতি বোধেতীতি লিঙ্গং, উচ্চারিতপদং.
তং পন পকতিলিঙ্গং, নিপ্ফন্নলিঙ্গন্তি দুৰিধং. তত্থ ৰিভত্তিরহিতং পকতিলিঙ্গং ইধাধিপ্পেতং লিঙ্গ, ৰিভত্তীনং ৰিসুং ৰিসুং ৰিভাগট্ঠানত্তা.
লীনং অঙ্গন্তি লিঙ্গং. তত্থ ‘লীন’ন্তি অপাকটং. ‘অঙ্গ’ন্তি অৰযৰো. লিঙ্গং, নামং, পাটিপদিকন্তি অত্থতো একং.
লিঙ্গস্স অত্থো পরমত্থো, পঞ্ঞত্তিঅত্থোতি দুৰিধো. তথা ৰিসেসনত্থো, ৰিসেস্যত্থোতি.
তত্থ ৰিসেসনত্থো নাম সকত্থো, তস্স তস্স সদ্দস্স পটিনিযতো পাটিপুগ্গলিকত্থোতি ৰুত্তং হোতি. সোযেৰ তস্মিং তস্মিং অত্থে আদিম্হি সদ্দুপ্পত্তিযা চিরকালঞ্চ সদ্দপৰত্তিযা নিবদ্ধকারণত্তা নিমিত্তত্থোতি চ ৰুচ্চতি. সো সুতি, জাতি, গুণ, দব্ব, ক্রিযা, নাম, সম্বন্ধৰসেন সত্তৰিধো হোতি.
ৰিসেস্যত্থো নাম সামঞ্ঞত্থো, বহুনিমিত্তানং সাধারণত্থোতি ৰুত্তং হোতি, সোযেৰ তংতংনিমিত্তযোগা নেমিত্তকত্থোতি চ ৰুচ্চতি, সো জাতি, গুণ, দব্ব, ক্রিযা, নামৰসেন পঞ্চৰিধো. গো, সুক্কো, দণ্ডী, পাচকো, তিস্সোতি.
তত্থ গোসদ্দো যদা জাতিমত্তং ৰদতি গো জাতীতি, তদা সুতি ৰিসেসনং. যদা দব্বং ৰদতি গো গচ্ছতীতি, তদা সুতি চ জাতি চ ৰিসেসনং.
সুক্কসদ্দো যদা গুণমত্তং ৰদতি সুক্কো গুণোতি, তদা সুতি ৰিসেসনং. যদা গুণৰিসেসং ৰদতি গোস্স সুক্কোতি, তদা সুতি চ গুণজাতি চ ৰিসেসনং. যদা গুণৰন্তং দব্বং ৰদতি সুক্কো গোতি, তদা সুতি চ গুণজাতি চ গুণৰিসেসো চ সম্বন্ধো চ ৰিসেসনং.
দণ্ডীসদ্দো যদা জাতিমত্তং ৰদতি দণ্ডী জাতীতি, তদা সুতি চ দব্বঞ্চ ৰিসেসনং. যদা দব্বৰন্তং দব্বং ৰদতি দণ্ডী পুরিসোতি, তদা সুতি চ দব্বঞ্চ জাতি চ সম্বন্ধো চ ৰিসেসনং.
পাচকসদ্দো যদা জাতিমত্তং ৰদতি পাচকো জাতীতি, তদা সুতি চ ক্রিযা চ ৰিসেসনং. যদা ক্রিযানিপ্ফাদকং দব্বং ৰদতি পাচকো পুরিসোতি, তদা সুতি চ ক্রিযা চ জাতি চ ক্রিযাকারকসম্বন্ধো চ ৰিসেসনং.
তিস্সসদ্দো যদা নামমত্তং ৰদতি তিস্সো নামন্তি, তদা সুতি ৰিসেসনং. যদা নামৰন্তং দব্বং ৰদতি, তিস্সো ভিক্খূতি, তদা সুতি চ নামজাতি চ সম্বন্ধো চ ৰিসেসনং.
সব্বত্থ যং যং ৰদতীতি ৰুত্তং, তং তং ৰিসেস্যন্তি চ দব্বন্তি চ ৰেদিতব্বং. এত্থ চ সুতি নাম সদ্দসভাৰা এৰ হোতি, সদ্দপক্খিকা এৰ. সব্বো সদ্দো পঠমং সত্তাভিধাযকোতি চ ঞাসে ৰুত্তং. তস্মা সব্বত্থ সুতিট্ঠানে সত্তা এৰ যুত্তা ৰত্তুন্তি. সত্তাতি চ তস্স তস্স অত্থস্স ৰোহারমত্তেনপি লোকে ৰিজ্জমানতা ৰুচ্চতি, তং তং সদ্দং সুণন্তস্স চ ঞাণং তংতদত্থস্স অত্থিতামত্তং সব্বপঠমং জানাতি, ততো পরং জাতিসদ্দে জাতিং জানাতি. গুণসদ্দে গুণন্তি এৰমাদি সব্বং ৰত্তব্বং. লিঙ্গ, সঙ্খ্যা, পরিমাণানিপি ৰিসেসনত্থে সঙ্গয্হন্তি.
তত্থ লিঙ্গং নাম যে ইত্থি, পুরিসানং লিঙ্গ, নিমিত্ত, কুত্তা’কপ্পা নাম অভিধম্মে ৰুত্তা, যে চ নপুংসকানং লিঙ্গ, নিমিত্ত, কুত্তা’কপ্পা নাম অৰুত্তসিদ্ধা, যে চ সদ্দেসু চেৰ অত্থেসু চ ৰিসদা’ৰিসদাকার, মজ্ঝিমাকারা সন্দিস্সন্তি, সব্বমেতং লিঙ্গং নাম.
এৰং ৰিসেসন, ৰিসেস্যৰসেন দুৰিধো অত্থো পুব্বে ৰুত্তস্স সদ্দলিঙ্গস্স অত্থো নাম, সো সলিঙ্গো, সসঙ্খ্যো, সপরিমাণো চাতি তিৰিধো হোতি.
তত্থ সলিঙ্গো যথা? সঞ্ঞা, ফস্সো, চিত্তং. কঞ্ঞা, পুরিসো, কুলং. মালা, রুক্খো, ধনন্তি.
সসঙ্খ্যো যথা? একো, দ্ৰে, তযো, বহূ ইচ্চাদি.
সপরিমাণো যথা? ৰিদত্থি, হত্থো, দোণো, আল়্হকং ইচ্চাদি.
অপি চ সুদ্ধো, সংসট্ঠোতি দুৰিধো লিঙ্গত্থো. তত্থ কম্মাদিসংসগ্গরহিতো সুদ্ধো নাম. সো সলিঙ্গো, সসঙ্খ্যো, সপরিমাণো, উপসগ্গত্থো, নিপাতত্থো, পাটি-পদিকত্থোতি ছব্বিধো. অত্থি, সক্কা, লব্ভাইচ্চাদি ইধ পাটিপদিকং নাম. তুন, ত্ৰান, ত্ৰা, তৰে, তুং, খত্তুংপচ্চযন্তাপি নিপাতেসু গয্হন্তি.
সংসট্ঠো ৰুত্তসংসট্ঠো, অৰুত্তসংসট্ঠোতি দুৰিধো. তত্থ ৰুত্তসংসট্ঠো চতুব্বিধো সমাসেন ৰুত্তসংসট্ঠো, তদ্ধিতেন, আখ্যাতেন, কিতেনাতি. তত্থ সমাসেন ৰুত্তো ছকারকসম্বন্ধৰসেন সত্তৰিধো, ভাৰেন সদ্ধিং অট্ঠৰিধো ৰা, তথা তদ্ধিতেন ৰুত্তো. আখ্যাতেন ৰুত্তো কত্তু, কম্ম, ভাৰৰসেন তিৰিধো. কিতেন ৰুত্তো ছকারক, ভাৰৰসেন সত্তৰিধো. সব্বো সুদ্ধো চেৰ ৰুত্তসংসট্ঠো চ পঠমায ৰিসযো.
অৰুত্তসংসট্ঠোপি কত্তুসংসট্ঠো, কম্মসংসট্ঠোতিআদিনা অনেকৰিধো. সো দুতিযাদীনং এৰ ৰিসযোতি. এত্থ চ ৰিভত্তিযা ৰিনা কেৰলো সদ্দো পযোগং নারহতীতি কত্ৰা পযোগারহত্থমেৰ ছব্বিধে সুদ্ধে চতুব্বিধে চ ৰুত্তসংসট্ঠে পঠমা পযুজ্জতি, ন অত্থজোতনত্থং.
কেনচি ৰাচকেন অৰুত্তানি পন কম্মাদীনি ৰিভত্তীহি ৰিনা ৰিদিতানি ন হোন্তীতিকত্ৰা অত্থজোতনত্থম্পি কম্মাদীসু দুতিযাদযো পযুজ্জন্তি. তস্মা অত্থমত্তেতি ইধ দেসন্তরাৰচ্ছেদকে ৰিসযমত্তে ভুম্মং. কম্মে দুতিযাইচ্চাদীসু পন নিপ্ফাদেতব্বে পযোজনে ভুম্মন্তি এৰং দ্ৰিন্নং ভুম্মানং নানত্তং ৰেদিতব্বন্তি.
২৯০. আমন্তনে [ক. ২৮৫; রূ. ৭০; নী. ৫৭৮; চং. ২.১.৯৪; পা. ২.৩.৪৭; আমন্তণে (বহূসু)].
পগেৰ সিদ্ধস্স ৰত্থুনো নামেন ৰা নিপাতেন ৰা অত্তনো অভিমুখীকরণং আমন্তনং নাম. অধিকামন্তনে অত্থমত্তে পঠমা হোতি. এত্থ চ আমন্তনপদং নাম ক্রিযাপেক্খং ন হোতি, তস্মা কারকসঞ্ঞং ন লভতি.
তং পন দুৰিধং সাদরা’নাদরৰসেন. এহি সম্ম, এহি জেতি.
তথা সজীৰ, নিজ্জীৰৰসেন, ভো পুরিস, ৰদেহি ভো সঙ্খ, ৰদেহি ভো সঙ্খ [দী. নি. ২.৪২৬]. উম্মুজ্জ ভো পুথুসিলে, উম্মুজ্জ ভো পুথুসিলেতি [সং. নি. ৪.৩৫৮].
তথা পচ্চক্খা’পচ্চক্খৰসেন, ভো পুরিস, কহং একপুত্তক, কহং একপুত্তকাতি [সং. নি. ২.৬৩; ধ. প. অট্ঠ. ১.২].
তথা নিযমা’নিযমৰসেন, ভো পুরিস, অচ্ছরিযং ৰত ভো অব্ভুতং ৰত ভো [দী. নি. ২.১৯২]. যত্র হি নাম সঞ্ঞী সমানোতিআদি [দী. নি. ২.১৯২]. ইদং আমন্তনং নাম পগেৰ সিদ্ধে এৰ হোতি, ন ৰিধাতব্বে, ন হি পগেৰ রাজভাৰং ৰা ভিক্খুভাৰং ৰা অপ্পত্তং জনং ‘‘ভো রাজা’’তি ৰা ‘‘ভো ভিক্খূ’’তি ৰা আমন্তেন্তীতি.
পঠমাৰিভত্তিরাসি নিট্ঠিতো.
দুতিযাৰিভত্তিরাসি
কস্মিং অত্থে দুতিযা?
২৯১. কম্মে দুতিযা [ক. ২৯৭; রূ. ২৮৪; নী. ৫৮০; চং. ২.১.৪৩; পা. ১.৪.৪৯-৫১].
কম্মত্থে দুতিযা হোতি. করিযতেতি কম্মং, তং নিব্বত্তিকম্মং, ৰিকতিকম্মং, পত্তিকম্মন্তি তিৰিধং হোতি.
তত্থ নিব্বত্তিকম্মং যথা? ইদ্ধিমা হত্থিৰণ্ণং মাপেতি, রাজা নগরং মাপেতি, মাতা পুত্তং ৰিজাযতি, বীজং রুক্খং জনেতি, কম্মং ৰিপাকং জনেতি, আহারো বলং জনেতি, জনো পুঞ্ঞং করোতি, পাপং করোতি, বুদ্ধো ধম্মং দেসেসি, ৰিনযং পঞ্ঞপেসি, ভিক্খু ঝানং উপ্পাদেতি, মগ্গং উপ্পাদেতি ইচ্চাদি.
ৰিকতিকম্মং যথা? গেহং করোতি, রথং করোতি, ঘটং করোতি, পটং ৰাযতি, ওদনং পচতি, ভত্তং পচতি, কট্ঠং অঙ্গারং করোতি, সুৰণ্ণং কটকং করোতি, গেহং ঝাপেতি, রুক্খং ছিন্দতি, পাকারং ভিন্দতি, ৰিহযো লুনাতি, পাণং হনতি, ভত্তং ভুঞ্জতি ইচ্চাদি.
পত্তিকম্মং যথা? গামং গচ্ছতি, গেহং পৰিসতি, রুক্খং আরোহতি, নদিং তরতি, আদিচ্চং পস্সতি, ধম্মং সুণাতি, বুদ্ধং ৰন্দতি পযিরুপাসতি ইচ্চাদি.
পকতিকম্মং, ৰিকতিকম্মন্তি দুৰিধং. সুৰণ্ণং কটকং করোতি, কট্ঠং অঙ্গারং করোতি, পুরিসং ঠিতং পস্সতি, পুরিসং গচ্ছন্তং পস্সতি, ভিক্খুং পস্সতি সতং, সম্পজানং, অভিক্কমন্তং, পটিক্কমন্তং, আলোকেন্তং, ৰিলোকেন্তং, সমিঞ্জেন্তং, পসারেন্তং.
এত্থ ‘পুরিসং, ভিক্খু’ন্তি পকতিকম্মং, ‘ঠিতং, সতং’ইচ্চাদীনি ৰিকতিকম্মানি.
ধাতুকম্মং, কারিতকম্মন্তি দুৰিধং. গামং গচ্ছতি, পুরিসং গামং গমেতি.
ধাতুকম্মঞ্চ দ্ৰিকম্মিকধাতূনং দুৰিধং পধানকম্মং, অপ্পধানকম্মন্তি. অজপালো অজং গামং নেতি, পুরিসো ভারং গামং ৰহতি, হরতি, গামং সাখং কড্ঢতি, গাৰিং খীরং দোহতি, ব্রাহ্মণং কম্বলং যাচতি, ব্রাহ্মণং ভত্তং ভিক্খতি, গাৰিযো ৰজং অৰরুন্ধতি, ভগৰন্তং পঞ্হং পুচ্ছতি, রুক্খং ফলানি ওচিনাতি, সিস্সং ধম্মং ব্রৰীতি, ভগৰা ভিক্খূ এতদৰোচ [উদা. ২৩ (থোকং ৰিসদিসং)], সিস্সং ধম্মং অনুসাসতি ইচ্চাদি.
এত্থ চ ‘অজং, খীরং’ ইচ্চাদি পধানকম্মং নাম কত্তারা পরিগ্গহেতুং ইট্ঠতরত্তা. ‘গামং, গাৰিং’ইচ্চাদি অপ্পধানকম্মং নাম তথা অনিট্ঠতরত্তা.
তত্থ পধানকম্মং কথিনকম্মং নাম, কম্মভাৰে থিরকম্মন্তি ৰুত্তং হোতি. অপ্পধানকম্মং অকথিনকম্মং নাম, অথিরকম্মন্তি ৰুত্তং হোতি. তঞ্হি কদাচি সম্পদানং হোতি, কদাচি অপাদানং, কদাচি সামি, কদাচি ওকাসো. যথা – সো মং দকায নেতি, গাৰিতো খীরং দোহতি, গাৰিযা খীরং দোহহি, গাৰিযং খীরং দোহতি ইচ্চাদি.
কম্মে দুতিযাতি ৰত্ততে.
২৯২. গতিবোধাহারসদ্দত্থা কম্মক ভজ্জাদীনং পযোজ্জে [ক. ৩০০; রূ. ২৮৬; নী. ৫৮৭; চং. ২.১.৪৪; পা. ১.৪.৫২].
নিচ্চৰিধিসুত্তমিদং. গমনত্থানং বোধনত্থানং আহারত্থানং সদ্দত্থানং অকম্মকানং ভজ্জাদীনঞ্চ ধাতূনং পযোজ্জে কম্মনি দুতিযা হোতি. এত্থ চ পযোজ্জকম্মং নাম কারিতকম্মং ৰুচ্চতি.
পুরিসো পুরিসং গামং গমযতি, সামিকো অজপালং অজং গামং নযাপেতি, আচরিযো সিস্সং ধম্মং বোধেতি, পুরিসো পুরিসং ভত্তং ভোজেতি, আচরিযো সিস্সং ধম্মং পাঠেতি, পুরিসো পুরিসং সযাপেতি, অচ্ছাপেতি, উট্ঠাপেতি, পুরিসো পুরিসং ধঞ্ঞং ভজ্জাপেতি, কোট্টাপেতি, উদ্ধরাপেতি.
এতেসমীতি কিং? পুরিসো পুরিসেন ওদনং পাচেতি.
এত্থ চ গমনত্থাদীনং পযোজ্জে ততিযাপি রূপসিদ্ধিযং [১৪১ পিট্ঠে] সদ্দনীতিযঞ্চ [সুত্ত-১৪৮ পিট্ঠে] ৰুত্তা. সদ্দনীতিযং ততিযাপযোগেপি কম্মত্থমেৰ ইচ্ছতি. ঞাসাদীসু কত্ৰত্থং ইচ্ছন্তি.
যদা পন পঠমং পযোজকং অঞ্ঞো দুতিযো পযোজেতি, তদা পঠমো পযোজ্জো নাম. তস্মিং ততিযাএৰাতি ৰুত্তিযং ৰুত্তং. অত্তনা ৰিপ্পকতং কুটিং পরেহি পরিযোসাপেতি [পারা. ৩৬৩].
২৯৩. হরাদীনং ৰা [ক. ৩০০; রূ. ২৮৬; নী. ৫৮৭; চং. ২.১.৪৫; পা. ১.৪.৫৩].
হরাদীনং পযোজ্জে কম্মনি ৰিকপ্পেন দুতিযা হোতি.
সামিকো পুরিসং ভারং হারেতি পুরিসেন ৰা, পুরিসং আহারং অজ্ঝোহারেতি পুরিসেন ৰা, পুরিসং কম্মং কারেতি পুরিসেন ৰা, রাজা পুরিসং অত্তানং দস্সেতি পুরিসেন ৰা, পুরিসং বুদ্ধং ৰন্দাপেতি পুরিসেন ৰা.
১৯৪. ন খাদাদীনং [ক. ৩০০; রূ. ২৮৬; নী. ৫৮৭; চং. ২.১.৪৭; পা. ১.৪.৫৭].
খাদাদীনং পযোজ্জে কম্মনি ন দুতিযা হোতি.
সামিকো পুরিসেন খজ্জং খাদাপেতি, অদ-ভক্খনে, ভত্তং আদেতি, সামিকো দাসেন পুরিসং অৰ্হাপেতি, সদ্দাযাপেতি, কন্দযতি, নাদযতি. এত্থ চ ‘সদ্দাযাপেতী’তি সদ্দং কারাপেতি, নামধাতু চেসা. কন্দ, নদাপি সদ্দত্থাযেৰ.
২৯৫. ৰহিস্সানিযন্তুকে [ক. ৩০০; রূ. ২৮৬; নী. ৫৮৭; চং. ২.১.৪৮; পা. ১.৪.৫২].
ৰহিস্সাতি ধাতুনিদ্দেসো ই-কারো, নিযামেতি পযোজেতীতি নিযন্তা, নত্থি নিযন্তা এতস্সাতি অনিযন্তুকো. যস্স অঞ্ঞেন পযোজকেন কিচ্চং নত্থি, সযমেৰ ঞত্ৰা ৰহতি, সো অনিযন্তুকো নাম, ৰহধাতুস্স তাদিসে অনিযন্তুকে পযোজ্জে কম্মনি দুতিযা ন হোতি.
সামিকো দাসেন ভারং ৰাহেতি.
অনিযন্তুকেতি কিং? বলীবদ্দে ভারং ৰাহেতি.
২৯৬. ভক্খিস্সাহিংসাযং [ক. ৩০০; রূ. ২৮৬; নী. ৫৮৭; চং. ২.১.৪৯; পা. ১.৪.৫].
ভক্খিতুং ইচ্ছন্তস্স ভক্খাপনং হিংসা নাম ন হোতি, অনিচ্ছন্তস্স ভক্খাপনং হিংসা নাম, ভক্খধাতুস্স পযোজ্জে কম্মনি অহিংসাৰিসযে দুতিযা ন হোতি.
সামিকো পুরিসেন মোদকে ভক্খাপেতি.
অহিংসাযন্তি কিং? বলীবদ্দে সস্সং ভক্খাপেতি. এত্থ ‘সস্স’ন্তি থূলতরং সস্সন্তি ৰদন্তি.
পাল়িযং ‘‘সব্বেসং ৰিঞ্ঞাপেত্ৰান [অপ. থের ১.১.৪৩৮], তোসেন্তি সব্বপাণিনং [অপ. থের ১.১.৩০০]. থেরস্স পত্তো দুতিযস্স গাহেতব্বো’’ ইচ্চাদিনা [পারা. ৬১৫] পযোজ্জে ছট্ঠীপি দিস্সতি.
২৯৭. ঝাদীহি যুত্তা [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫০; পা. ২.৩.২].
ধীইচ্চাদীহি নিপাতোপসগ্গেহি যুত্তা লিঙ্গম্হা দুতিযা হোতি.
ধী ব্রাহ্মণস্স হন্তারং [ধ. প. ৩৮৯], ধীরত্থু’মং পূতিকাযং [জা. ১.৩.১২৯], ধীরত্থু তং ধনলাভং [জা. ১.৪.৩৬], ধীরত্থু বহুকে কামে. ততিযাপি দিস্সতি, ধীরত্থু জীৰিতেন মে [জা. ২.১৭.১৩৫]. অন্তরা চ রাজগহং অন্তরা চ নাল়ন্দং [দী. নি. ১.১], অভিতো গামং ৰসতি, পরিতোগামং ৰসতি, নদিং নেরঞ্জরং পতি [সু. নি. ৪২৭], এতেসু ছট্ঠ্যত্থে দুতিযা.
তথা পটিভাতি মং ভগৰা [উদা. ৪৫; সং. নি. ১.২১৭], অপিস্সু মং তিস্সো উপমাযো পটিভংসু [ম. নি. ১.৩৭৪], পটিভাতু তং ভিক্খু ধম্মো ভাসিতুং [মহাৰ. ২৫৮]. পটিভন্তু তং চুন্দ বোজ্ঝঙ্গা [সং. নি. ৩.৭৯] – ‘ম’ন্তি মম, ‘ত’ন্তি তৰ, সম্পদানত্থে দুতিযা. ‘ম’ন্তি মমঞাণে, ‘ত’ন্তি তৰঞাণেতিপি ৰণ্ণেসুং. ন উপাযমন্তরেন অত্থস্স সিদ্ধি, নত্থি সমাদানমন্তরেন সিক্খাপটিলাভো, নেৰিধ ন হুরং ন উভযমন্তরেন, এসেৰন্তো দুক্খস্স [ম. নি. ৩.৩৯৩; উদা. ৭৪]. তত্থ ‘অন্তরেনা’তি নিপাতপদমেতং, ৰজ্জেত্ৰাত্যত্থো. পুব্বেন গামং, দক্খিণেন গামং, উত্তরেন গামং, গামস্স পুব্বেতি অত্থো.
উপসগ্গপুব্বানং অকম্মকধাতূনং পযোগে আধারে দুতিযা, পথৰিং অধিসেস্সতি, গামং অধিতিট্ঠতি, রুক্খং অজ্ঝাৰসতি, মঞ্চং ৰা পীঠং ৰা অভিনিসীদেয্য ৰা অভিনিপজ্জেয্য ৰা [পাচি. ১৩০], গামং উপৰসতি, গামং অনুৰসতি, পব্বতং অধিৰসতি, ঘরং আৰসতি, অগারং অজ্ঝাৰসতি [দী. নি. ১.২৫৮; পারা. ৫১৯], উপোসথং উপৰসতি, কামাৰচরং উপপজ্জতি, রূপাৰচরং উপপজ্জতি, অরূপাৰচরং উপপজ্জতি, সক্কস্স সহব্যতং উপপজ্জতি, নিপন্নং ৰা উপনিপজ্জেয্য [দী. নি. ৩.২৮২], নিসিন্নং ৰা উপনিসীদেয্য [দী. নি. ৩.২৮২], ঠিতং ৰা উপতিট্ঠেয্য [দী. নি. ৩.২৮২] ইচ্চাদি.
তপ্পান, চারেপি দুতিযা, নদিং পিৰতি, সমুদ্দং পিৰতি, গামং চরতি, অরঞ্ঞং চরতি, নদিযং, গামেতি অত্থো.
কাল, দিসাসুপি আধারে এৰ দুতিযা, তং খণং, তং মুহুত্তং, তং কালং, একমন্তং [খু. পা. ৫.১], একং সমযং [খু. পা. ৫.১; দী. নি. ১.১], পুব্বণ্হসমযং [পারা. ১৬], সাযন্হসমযং, তং দিৰসং, ইমং রত্তিং [দী. নি. ৩.২৮৫], দুতিযম্পি, ততিযম্পি, চতুত্থং ৰা পঞ্চমং ৰা অপ্পেতি, ততো পুব্বং, ততো পরং, পুরিমং দিসং [দী. নি. ২.৩৩৬], দক্খিণং দিসং [দী. নি. ২.৩৩৬], পচ্ছিমং দিসং [দী. নি. ২.৩৩৬], উত্তরং দিসং [দী. নি. ২.৩৩৬], ইমা দস দিসাযো, কতমং দিসং তিট্ঠতি নাগরাজা [জা. ১.১৬.১০৪], ইমাসু দিসাসু কতমায দিসায তিট্ঠতি ছদ্দন্তনাগরাজাতি অত্থোইচ্চাদি.
২৯৮. লক্খণিত্থম্ভূতৰিচ্ছাস্ৰভিনা [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৪; পা. ১.৪.৯০, ৯১; ২.৩.৮].
লক্খণাদীসু অত্থেসু পৰত্তেন অভিনা যুত্তা লিঙ্গম্হা দুতিযা হোতি.
লক্খীযতি লক্খিতব্বং অনেনাতি লক্খণং. অযং পকারো ইত্থং, ঈদিসো ৰিসেসোতি অত্থো. ইত্থং ভূতো পত্তোতি ইত্থম্ভূতো. ভিন্নে অত্থে ব্যাপিতুং ইচ্ছা ৰিচ্ছা.
তত্থ লক্খণে –
রুক্খমভি ৰিজ্জোততে ৰিজ্জু, রুক্খং অভি ব্যাপেত্ৰা ৰিজ্জোততেতি অত্থো, ৰিজ্জোভাসেন ব্যাপিতো রুক্খো ৰিজ্জুপ্পাদস্স লক্খণং সঞ্ঞাণং হোতি.
ইত্থম্ভূতে –
সাধু দেৰদত্তো মাতরমভি, মাতরং অভি ৰিসিট্ঠং কত্ৰা সাধূতি অত্থো, দেৰদত্তো সক্কচ্চং মাতুপট্ঠানে অগ্গপুরিসোতি ৰুত্তং হোতি. তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো [পারা. ১]. এত্থ চ ‘অব্ভুগ্গতো’তি অভি ৰিসিট্ঠং কত্ৰা উগ্গতোতি অত্থো, অযং কিত্তিসদ্দো ভোতো গোতমস্স সকললোকগ্গভাৰং পকাসেত্ৰা উগ্গতোতি ৰুত্তং হোতি, কিত্তিসদ্দসম্বন্ধে পন তস্স খো পন ভোতো গোতমস্সাতি অত্থো.
ৰিচ্ছাযং –
রুক্খং রুক্খং অভি ৰিজ্জোততে চন্দো, ব্যাপেত্ৰা ৰিজ্জোততেত্যত্থো.
এত্থ চ লক্খণাদিঅত্থা অভিসদ্দেন জোতনীযা পিণ্ডত্থা এৰ, ন ৰচনীযত্থা, ব্যাপনাদিঅত্থা এৰ ৰচনীযত্থাতি.
২৯৯. পতিপরীহি ভাগে চ [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৫; পা. ১.৪.৯০].
লক্খণি’ত্থম্ভূত, ৰিচ্ছাসু চ ভাগে চ পৰত্তেহি পতি, পরীহি যুত্তা লিঙ্গম্হা দুতিযা হোতি.
লক্খণে –
রুক্খং পতি ৰিজ্জোততে ৰিজ্জু, রুক্খং পরি ৰিজ্জোততে ৰিজ্জু. তত্থ ‘পতী’তি পটিচ্চ, ‘পরী’তি ফরিত্ৰা.
ইত্থম্ভূতে –
সাধু দেৰদত্তো মাতরং পতি, সাধু দেৰদত্তো মাতরং পরি.
ৰিচ্ছাযং –
রুক্খং রুক্খং পতি ৰিজ্জোততে চন্দো, রুক্খং রুক্খং পরি ৰিজ্জোততে চন্দো.
ভাগে –
তং দীযতু, যদেত্থ মং পতি সিযা, তং দীযতু, যদেত্থ মং পরি সিযা. তত্থ ‘পতী’তি পটিচ্চ, ‘পরী’তি পরিচ্চ, উদ্দিস্সাতি অত্থো, ‘ঠপিত’ন্তি পাঠসেসো. এত্থ মং উদ্দিস্স যং ৰত্থু ঠপিতং সিযা, তং মে দীযতূত্যত্থো, এতেসু বহূসু ভাগেসু যো মম ভাগো, সো ময্হং দীযতূতি ৰুত্তং হোতীতি.
৩০০. অনুনা [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৬; পা. ১.৪.৮৪, ৯০].
লক্খণি’ত্থম্ভূত, ৰিচ্ছাসু চ ভাগে চ পৰত্তেন অনুনা যুত্তা লিঙ্গম্হা দুতিযা হোতি.
লক্খণে –
রুক্খং অনু ৰিজ্জোততে ৰিজ্জু, রুক্খং অনু ফরিত্ৰাতি অত্থো. চতুরাসীতিসহস্সানি, সম্বুদ্ধমনুপব্বজুং [বু. ৰং. ২১.৫], ‘সম্বুদ্ধ’ন্তি বোধিসত্তং, অনু গন্ত্ৰা পব্বজিংসূতি অত্থো, ৰিপস্সিবোধিসত্তে পব্বজিতে সতি তানিপি চতুরাসীতিকুলপুত্তসহস্সানি পব্বজিংসূতি ৰুত্তং হোতি. সচ্চক্রিযমনু ৰুট্ঠি পাৰস্সি, ‘অনূ’তি অন্ৰায, পটিচ্চাতি অত্থো, সচ্চক্রিযায সতি সচ্চক্রিযহেতু দেৰো পাৰস্সীতি ৰুত্তং হোতি. ‘‘হেতু চ লক্খণং ভৰতী’’তি ৰুত্তিযং ৰুত্তং. সচ্চক্রিযায সহেৰাতিপি যুজ্জতি. ‘‘সহ সচ্চে কতে ময্হ’’ন্তি [চরিযা. ৩.৮২] হি ৰুত্তং.
ইত্থম্ভূতে –
সাধু দেৰদত্তো মাতরমনু. তত্থ ‘অনূ’তি অন্ৰায পটিচ্চ.
ৰিচ্ছাযং –
রুক্খং রুক্খং অনু ৰিজ্জোততে চন্দো. তত্থ ‘অনূ’তি অনু ফরিত্ৰা.
ভাগে –
যদেত্থ মং অনু সিযা, তং দীযতু. তত্থ ‘অনূ’তি অন্ৰায. সেসং ৰুত্তনযমেৰ.
৩০১. সহত্থে [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৭; পা. ১.৪.৮৫].
সহত্থে অনুনা যুত্তা লিঙ্গম্হা দুতিযা হোতি.
পব্বতং অনু তিট্ঠতি [পব্বতমনুসেনা তিট্ঠতি (মোগ্গল্লানৰুত্তিযং)]. নদিং অন্ৰাৰসিতা বারাণসী. ‘অনূ’তি অনুগন্ত্ৰা, নদিযা সহ আবদ্ধা তিট্ঠতীতি ৰুত্তং হোতি.
৩০২. হীনে [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৮; পা. ১.৪.৮৬].
হীনে পৰত্তেন অনুনা যুত্তা লিঙ্গম্হা দুতিযা হোতি.
অনু সারিপুত্তং পঞ্ঞৰন্তো, অনুগতা পচ্ছতো গতাতি অত্থো, সব্বে পঞ্ঞৰন্তো সারিপুত্ততো হীনাতি ৰুত্তং হোতি.
৩০৩. উপেন [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৯; পা. ১.৪.৮৭].
হীনে উপেন যুত্তা লিঙ্গম্হা দুতিযা হোতি.
উপ সারিপুত্তং পঞ্ঞৰন্তো, উপেচ্চ গতা সমীপে গতাতি অত্থো, হীনাত্ৰেৰ ৰুত্তং হোতি.
এত্থ চ অভিইচ্চাদযো কম্মপ্পৰচনীযাতি সদ্দসত্থেসু ৰুত্তা. তত্থ পকারেন ৰুচ্চতীতি পৰচনীযং, পকারো চ লক্খণি’ত্থম্ভূত, ৰিচ্ছাদিকো পিণ্ডত্থো ৰুচ্চতি, কম্মন্তি ব্যাপনাদিক্রিযা, কম্মং পৰচনীযং যেহি তে কম্মপ্পৰচনীযা.
তত্থ ব্যাপনাদিক্রিযাৰিসেসৰাচীহি উপসগ্গেহি সম্বন্ধেসতি কম্মত্থে দুতিযা হোতি, অসম্বন্ধে পন আধার, সাম্যাদিঅত্থেসু হোতি, লক্খণাদযো পন সামত্থিযসিদ্ধা পিণ্ডত্থা এৰাতি.
৩০৪. কালদ্ধানমচ্চন্তসংযোগে [ক. ২৯৮; রূ. ২৮৭; নী. ৫৮১; পা. ২.৩.৫]
কালস্স ৰা অদ্ধুনো ৰা দব্ব, গুণ, ক্রিযাহি অচ্চন্তং নিরন্তরং সংযোগে কাল’দ্ধানৰাচীহি লিঙ্গেহি পরং দুতিযা হোতি.
কালে –
সত্তাহং গৰপানং, মাসং মংসোদনং, সরদং রমণীযা নদী, সব্বকালং রমণীযং নন্দনং, মাসং সজ্ঝাযতি, ৰস্সসতং জীৰতি, তযো মাসে অভিধম্মং দেসেতি.
অদ্ধানে –
যোজনং ৰনরাজি, যোজনং দীঘো পব্বতো, কোসং সজ্ঝাযতি.
অচ্চন্তসংযোগেতি কিং? মাসে মাসে ভুঞ্জতি, যোজনে যোজনে ৰিহারো.
এত্থ চ ক্রিযাৰিসেসনম্পি কত্তারা সাধেতব্বত্তা কম্মগতিকং হোতি, তস্মা তম্পি ‘কম্মে দুতিযা’তি এত্থ কম্মসদ্দেন গয্হতি.
সুখং সেতি, দুক্খং সেতি, সীঘং গচ্ছতি, খিপ্পং গচ্ছতি, দন্ধং গচ্ছতি, মুদুং পচতি, গরুং এস্সতি, লহুং এস্সতি, সন্নিধিকারকং ভুঞ্জতি, সম্পরিৰত্তকং ওতাপেতি, কাযপ্পচালকং গচ্ছতি [পাচি. ৫৯০], হত্থপ্পচালকং গচ্ছতি, সীসপ্পচালকং গচ্ছতি [পাচি. ৫৯৪-৫৯৫], সুরুসুরুকারকং ভুঞ্জতি [পাচি. ৬২৭], অৰগণ্ডকারকং ভুঞ্জতি [পাচি. ৬২২], পিণ্ডুক্খেপকং ভুঞ্জতি [পাচি. ৬২০], হত্থনিদ্ধুনকং ভুঞ্জতি [পাচি. ৬২৩], হত্থনিল্লেহকং ভুঞ্জতি [পাচি. ৬২৮], চন্দিমসূরিযা সমং পরিযাযন্তি, ৰিসমং পরিযাযন্তি ইচ্চাদি.
দুতিযাৰিভত্তিরাসি নিট্ঠিতো.
ততিযাৰিভত্তিরাসি
কস্মিং অত্থে ততিযা?
৩০৫. কত্তুকরণেসু ততিযা [ক. ২৮৬, ২৮৮; রূ. ২৯১, ২৯৩; নী. ৫৯১, ৫৯৪; চং. ২.১.৬২-৩; পা. ২.৩.১৮].
কত্তরি করণে চ ততিযা হোতি. কত্তাতি চ কারকোতি চ অত্থতো একং ‘‘করোতীতি কত্তা, করোতীতি কারকো’’তি, তস্মা ‘‘কত্তুকারকো’’তি ৰুত্তে দ্ৰিন্নং পরিযাযসদ্দানং ৰসেন অযমেৰ ক্রিযং একন্তং করোতি, সামী হুত্ৰা করোতি, অত্তপ্পধানো হুত্ৰা করোতীতি ৰিঞ্ঞাযতি, ততো ক্রিযা নাম কত্তুনো এৰ ব্যাপারো, ন অঞ্ঞেসন্তি চ, অঞ্ঞে পন ক্রিযাসাধনে কত্তুনো উপকারকত্তা কারকা নামাতি চ, তথা অনুপকারকত্তা অকারকা নামাতি চ ৰিঞ্ঞাযন্তীতি.
তত্থ কত্তা তিৰিধো সযংকত্তা, পযোজককত্তা, কম্মকত্তাতি.
তত্থ ধাত্ৰত্থং সযং করোন্তো সযংকত্তা নাম, পুরিসো কম্মং করোতি.
পরং নিযোজেন্তো পযোজককত্তা নাম, পুরিসো দাসং কম্মং কারেতি.
কম্মকত্তা নাম পযোজ্জককত্তাপি ৰুচ্চতি, পুরিসো দাসেন কম্মং কারেতি দাসস্স ৰা, যো চ অঞ্ঞেন কতং পযোগং পটিচ্চ কম্মভূতোপি সুকরত্তা ৰা কম্মভাৰেন অৰত্তুকামতায ৰা অজাননতায ৰা ৰঞ্চেতুকামতায ৰা কত্তুভাৰেন ৰোহরীযতি, সো কম্মকত্তা নাম, কুসূলো সযমেৰ ভিজ্জতি, ঘটো সযমেৰ ভিজ্জতি. অপিচ সুকরো ৰা হোতু দুক্করো ৰা, যো কম্মরূপক্রিযাপদে পঠমন্তো কত্তা, সো কম্মকত্তাতি ৰুচ্চতি. সদ্দরূপেন কম্মঞ্চ তং অত্থরূপেন কত্তা চাতি কম্মকত্তা, কুসূলো ভিজ্জতি, ঘটো ভিজ্জতি, পচ্চতি মুনিনো ভত্তং, থোকং থোকং ঘরে ঘরে ইচ্চাদি.
এত্থ চ সদ্দত্থো দুৰিধো পরমত্থো, পঞ্ঞত্তত্থোতি. তত্থ পরমত্থো একন্তেন ৰিজ্জমানোযেৰ. পঞ্ঞত্তত্থো পন কোচি ৰিজ্জমানোতি সম্মতো. যথা? রাজপুত্তো, গোৰিসাণং, চম্পকপুপ্ফন্তি. কোচি অৰিজ্জমানোতি সম্মতো. যথা? ৰঞ্ঝাপুত্তো, সসৰিসাণং, উদুম্বরপুপ্ফন্তি. সদ্দো চ নাম ৰত্তিচ্ছাপটিবদ্ধৰুত্তী হোতি, ৰত্তমানো চ সদ্দো অত্থং ন দীপেতীতি নত্থি, সঙ্কেতে সতি সুণন্তস্স অত্থৰিসযং বুদ্ধিং ন জনেতীতি নত্থীতি অধিপ্পাযো. ইতি অৰিজ্জমানসম্মতোপি অত্থো সদ্দবুদ্ধীনং ৰিসযভাৰেন ৰিজ্জমানো এৰ হোতি. ইতরথা ‘ৰঞ্ঝাপুত্তো’তি পদং সুণন্তস্স তদত্থৰিসযং চিত্তং নাম ন পৰত্তেয্যাতি, সদ্দবুদ্ধীনঞ্চ ৰিসযভাৰেন ৰিজ্জমানো নাম অত্থো সদ্দনানাত্তে বুদ্ধিনানাত্তে চ সতি নানা হোতি, ৰিসুং ৰিসুং ৰিজ্জমানো নাম হোতীতি অধিপ্পাযো. এৰং সদ্দবুদ্ধিৰিসযভাৰেন ৰিজ্জমানঞ্চ নানাভূতঞ্চ অত্থং পটিচ্চ কারকনানাত্তং ক্রিযাকারকনানাত্তঞ্চ হোতি, ন পন সভাৰতো ৰিজ্জমানমেৰ নানাভূতমেৰ চ অত্থন্তি নিট্ঠমেত্থ গন্তব্বং. তস্মা ‘‘সংযোগো জাযতে’’ ইচ্চাদীসু সদ্দবুদ্ধীনং নানাত্তসিদ্ধেন অত্থনানাত্তেন দ্ৰিন্নং সদ্দানং দ্ৰিন্নং অত্থানঞ্চ ক্রিযাকারকতাসিদ্ধি ৰেদিতব্বাতি.
কযিরতে অনেনাতি করণং, ক্রিযাসাধনে কত্তুনো সহকারীকারণন্তি ৰুত্তং হোতি. তং দুৰিধং অজ্ঝত্তিককরণং, বাহিরকরণন্তি.
তত্থ কত্তুনো অঙ্গভূতং করণং অজ্ঝত্তিকং নাম, পুরিসো চক্খুনা রূপং পস্সতি, মনসা ধম্মং ৰিজানাতি, হত্থেন কম্মং করোতি, পাদেন মগ্গং গচ্ছতি, রুক্খো ফলভারেন ওণমতি.
কত্তুনো বহিভূতং বাহিরং নাম, পুরিসো যানেন গচ্ছতি, ফরসুনা [পরসুনা (সক্কতগন্থেসু)] ছিন্দতি, রুক্খো ৰাতেন ওণমতি.
৩০৬. সহত্থেন [ক. ২৮৭; রূ. ২৯৬; নী. ৫৯২; চং. ২.১.৬৫; পা. ২.৩.১৯].
সহসদ্দস্স অত্থো যস্স সোতি সহত্থো, সহত্থেন সদ্দেন যুত্তা লিঙ্গম্হা ততিযা হোতি. সহসদ্দস্স অত্থো নাম সমৰাযত্থো.
সো তিৰিধো দব্বসমৰাযো, গুণসমৰাযো, ক্রিযাসমৰাযোতি. পুত্তেন সহ ধনৰা পিতা, পুত্তেন সহ থূলো পিতা, পুত্তেন সহ আগতো পিতা. সহ, সদ্ধিং, সমং, নানা, ৰিনাইচ্চাদিকো সহত্থসদ্দো নাম.
নিসীদি ভগৰা সদ্ধিং ভিক্খুসঙ্ঘেন [মহাৰ. ৫৯], সহস্সেন সমং মিতা [সং. নি. ১.৩২], পিযেহি নানাভাৰো ৰিনাভাৰো [দী. নি. ২.১৮৩, ২০৭], সঙ্ঘো সহ ৰা গগ্গেন ৰিনা ৰা গগ্গেন উপোসথং করেয্য [মহাৰ. ১৬৭].
৩০৭. লক্খণে [রূ. ১৪৭ পিট্ঠে; নী. ৫৯৮; চং. ২.১.৬৬; পা. ২.৩.২১].
লক্খণং ৰুচ্চতি ইত্থম্ভূতলক্খণং, তস্মিং ততিযা হোতি.
অস্সুপুণ্ণেহি নেত্তেহি, পিতরং সো উদিক্খতি [জা. ২.২২.২১২৩]. ব্রহ্মভূতেন অত্তনা ৰিহরতি [অ. নি. ৩.৬৭], অসম্ভিন্নেন ৰিলেপনেন রাজানমদক্খি, তিদণ্ডকেন পরিব্বাজকমদক্খি, ঊনপঞ্চবন্ধনেন পত্তেন অঞ্ঞং পত্তং চেতাপেতি [পারা. ৬১২ (থোকং ৰিসদিসং)], ভিক্খু পাসাদিকেন অভিক্কন্তেন পটিক্কন্তেন আলোকিতেন ৰিলোকিতেন সমিঞ্জিতেন পসারিতেন গামং পিণ্ডায পাৰিসি, সা কাল়ী দাসী ভিন্নেন সীসেন লোহিতেন গলন্তেন পতিৰিস্সকানং উজ্ঝাপেসি [ম. নি. ১.২২৬], উক্খিত্তকায অন্তরঘরে গচ্ছন্তি [পাচি. ৫৮৪], পল্লত্থিকায অন্তরঘরে নিসীদন্তি [পাচি. ৫৯৯].
অঙ্গৰিকারোপি ইধ সঙ্গয্হতি [ক. ২৯১; রূ. ২৯৯; নী. ৬০৩], অক্খিনা কাণং পস্সতি, ‘অক্খী’তি ইদং ‘কাণ’ন্তি পদে ৰিসেসনং, ৰিকলেন চক্খুঅঙ্গেন সো কাণো নাম হোতি. হত্থেন কুণিং পস্সতি, পাদেন খঞ্জং পস্সতি.
৩০৮. হেতুম্হি [ক. ২৮৯; রূ. ২৯৭; নী. ৬০১].