নমক্কারটীকা

নমো তস্স ভগৰতো অরহতো সম্মাসম্বুদ্ধস্স

১. সুগতন্ত্যাদিৰণ্ণেহি, পসত্থঞ্চ সুখদ্দদং;

ৰন্দন্তানং জিনং নত্ৰা, ধম্মং সুদ্ধং গণুত্তমং.

২. নমক্কারং হিতত্থীহি, পোরাণাচরিযেহি চ;

লিখিত্ৰা ঠপিতং পুঞ্ঞ, বুদ্ধিযা তেন ৰন্দিনং.

৩. তস্সত্থৰণ্ণনং কস্সং, গম্ভীরত্থসুবোধনং;

মোৰিপুনামেন সন্তেন, সীলুপেতেন যাচিতো.

৪. ৰণ্ণন্তোপি চ তস্সত্থং, তং তং অট্ঠকথাদিসু;

ৰুত্তঞাযেন কস্সামি, সদ্ধা সুণাথ সাধৰো.

৫. নমনং নমতীতী ৰা, নমতী তেন ৰা নমো;

তস্স কারোন্তি তাহীতি, নমক্কারোতি ৰুচ্চতি.

৬. তঞ্চ বুদ্ধঘোসাচরি, যেন পুব্বসুতং কতং;

বুদ্ধঘোসুপ্পত্তিযঞ্চ, তং তং পন কথাদিসু.

৭. ন দিট্ঠং কতকারণং, তস্মা হিতত্থিকেহি চ;

পোরাণাচরিযেহী চ, ঠপিতন্তি মযা ৰুত্তং;

তং কারণং ৰিঞ্ঞূহী চ, ৰিচারেত্ৰা ৰিজানিতন্তি.

১. সুগতং সুগতং সেট্ঠং, কুসলংকুসলং জহং;

অমতং অমতং সন্তং, অসমং অসমং দদং.

সরণং সরণং লোকং, অরণং অরণং করং;

অভযং অভযং ঠানং, নাযকং নাযকং নমে.

১. [ক] ইদানি পঠমং তাৰ সুগতন্ত্যাদীহি অট্ঠারসহি গুণেহি থোমেত্ৰা বুদ্ধস্স ৰন্দিতুকামেন সুগতন্তিআদি গাথাদ্ৰযং আরদ্ধং. অযং পন সব্বপাদাদিযমকপথ্যা ৰত্তগাথাতি দট্ঠব্বং. তং পন যমকং সুবোধালঙ্কারে কিলিট্ঠদোসন্তি ৰুত্তং.

ৰুত্তঞ্হি তত্থ –

‘‘যং কিলিট্ঠপদং মন্দা, ভিধেয্যং যমকাদিকং;

কিলিট্ঠপদদোসেৰ, তম্পি অন্তো করীযতী’’তি.

অযং পনেত্থ পতীতসদ্দরচিতত্তাযেৰ পসাদগুণ সঙ্খাতেন সদ্দালঙ্কারেন সংযুত্তা হোতি. তস্মা তং যমকং সুৰুত্তন্তি দট্ঠব্বং. এৰং পরাসু যমকগাথাসু. তেন ৰুত্তং পুনা লঙ্কারে –

‘‘পতীতসদ্দরচিতং, সিলিট্ঠপদসন্ধিকং;

পসাদগুণসংযুত্তং, যমকং মতমেদিস’’ন্তি.

তত্থ সুগতন্তি সোভনগমনত্তা সুন্দরং ঠানং গতত্তা সম্মা গতত্তা চ সুগতো, সো হি সোভনং অরিযমগ্গেন গচ্ছতীতি সুগতোতি ৰুচ্চতি, সুপুব্বো গমুধাতু ত. সুসদ্দো সোভনত্থো. অরিযমগ্গগমনেন পরিসুদ্ধং অনৰজ্জং খেমং দিসং অসজ্জমানো গতোতি অত্থো. তঞ্চ গমনং দুৰিধং হোতি কাযগমনং, ঞাণগমনঞ্চাতি. তত্থ ভগৰতো ৰেনেয্যজনুপসঙ্কমনং একন্তেন তেসং হিতসুখস্স নিপ্ফাদ নতো সোভনং কাযেন গমনং কাযগমনং নাম. সযম্ভূ ঞাণেন পন সকলম্পি লোকং পরিঞ্ঞাভিসমযৰসেন পরিজাননতো ঞাণেন গমনং ঞাণগমনং নাম. ইধ পন ঞাণগমনং অধিপ্পেতং. অঙ্গুত্তরটীকাযং পন ‘‘সোভনং গতং গমনং এতস্সাতি সুগতো’’তি ৰুত্তং. সুন্দরং ঠানং গচ্ছতীতি সুগতোতি চ ৰুচ্চতি, আরম্মণকরণৰসেন অমতং নিব্বানং গতোতি অত্থো. সম্মা অৰিপরীতং চেস গচ্ছতীতি সুগতোতি ৰুচ্চতি. সুসদ্দো সম্মাসদ্দত্থো. তেন তেন মগ্গেন যে কিলেসা পহীনা, তে কিলেসে ন পুনেতি ন পচ্চেতি ন পচ্চাগচ্ছতীতি অত্থো. অথ ৰা সম্মা আগচ্ছতীতি সুগতোতি চ ৰুচ্চতি, দীপঙ্করপাদমূলতো পভুতি যাৰ বোধিমণ্ডা তাৰ সমতিংসপারমিপূরিকায সম্মাপটিপত্তিযা সব্বলোকস্স হিতসুখমেৰ করোন্তো সস্সতং উচ্ছেদং কামসুখং অত্তকিলমথঞ্চাতি ইমে চন্তে অনুপগচ্ছন্তো আগতোতি অত্থো. তং সুগতং বুদ্ধং নমে নমামীতি সম্বন্ধো.

পুন সুগতন্তি সম্মা গদত্তা সুগতো. সো হি সম্মা গদতি ভাসতীতি সুগতোতি ৰুচ্চতি. সুপুব্বগদধাতু ভাসাযং ৰিযত্তিযং ৰাচাযং ৰা, ত, দস্স তো. ছসু ৰাচাসু যুত্তট্ঠানে যুত্তমেৰ দ্ৰিৰাচং ভাসতীতি অত্থো. ৰুত্তঞ্হি মজ্ঝিমপণ্ণাসপাল়িযং অভযরাজকুমারসুত্তে –

১.

.‘‘রাজকুমার যং তথাগতো তং ৰাচং জানাতি অভূতং অতচ্ছং অনত্থসংহিতং, সা চ পরেসং অপ্পিযা অমনাপা, ন তং তথাগতো ৰাচং ভাসতি. ২. যম্পি তথাগতো ৰাচং জানাতি ভূতং তচ্ছং অনত্থসংহিতং, সা চ পরেসং অপ্পিযা অমনাপা. তম্পি তথাগতো ৰাচং ন ভাসতি. ৩. যঞ্চ খো তথাগতো ৰাচং জানাতি ভূতং তচ্ছং অত্থসংহিতং, সা চ পরেসং অপ্পিযা অমনাপা, তত্রকালঞ্ঞূ তথাগতো হোতি তস্সা ৰাচায ৰেয্যাকরণায. ৪. যং তথাগতো ৰাচং জানাতি অভূতং অতচ্ছং অনত্থসংহিতং, সা চ পরেসং পিযা মনাপা, ন তং তথাগতো ৰাচং ভাসতি. ৫. যম্পি তথাগতো জানাতি ভূতং তচ্ছং অনত্থসংহিতং, সা চ পরেসং পিযা মনাপা, তম্পি তথাগতো ৰাচং ন ভাসতি. ৬. যঞ্চ খো তথাগতো ৰাচং জানাতি ভূতং তচ্ছং অত্থসংহিতং, সা চ পরেসং পিযা মনাপা. তত্র কালঞ্ঞূ তথাগতো হোতি তস্সা ৰাচায ৰেয্যাকরণাযা’’তি.

এত্থ পাল়িযং পনেসা সুখগ্গহণত্থং সঙ্খেপেন ৰেদিতব্বা. কথং হেসা অভূতা অনত্থসংহিতা অপ্পিযা ৰাচা চ, ভূতা অনত্থসংহিতা অপ্পিযা ৰাচা চ, ভূতা অত্থ সংহিতা অপ্পিযা ৰাচা চ, অভূতা অনত্থসংহিতা পিযা ৰাচা চ, ভূতা অনত্থসংহিতা পিযা ৰাচা চ, ভূতা অত্থসংহিতা পিযা ৰাচা চাতি ছব্বিধা হোতীতি. তত্থ অচোরংযেৰ চোরো অযন্তিআদিৰসেন ৰত্তব্বৰাচা পঠমৰাচা নাম. চোরংযেৰ চোরো অযন্তিআদিৰসেন ৰত্তব্বৰাচা দুতিযৰাচা নাম. অকতপুঞ্ঞতায দুগ্গতো দুব্বণ্ণো অপ্পেসক্খো, ইধ পন ঠত্ৰাপি পুন পুঞ্ঞং ন করোতি, দুতিযচিত্তৰারে কথং চতূহি অপাযেহি মুচ্চিস্সতীতি এৰং মহাজনস্স অত্থপুরেক্খারেন ধম্মপুরেক্খারেন অনুসাসনীপুরেক্খারেন ৰত্তব্বৰাচা ততিযৰাচা নাম. একো ধুত্তো আহ-ময্হং ভো মাতু মযি কুচ্ছিগতে কপিট্ঠফলদোহল়ো অহোসি. সা অঞ্ঞং কপিট্ঠহারকং অলভমানা মংযেৰ পেসেসি. অহং গন্ত্ৰা রুক্খং অভিরুহিতুং অসক্কোন্তো অত্তনাৰ অত্তানং পাদে গহেত্ৰা মুগ্গরং ৰিয রুক্খস্স উপরি খিপিং. অথ সাখতো সাখং ৰিচরন্তো ফলানি গহেত্ৰা ওতরিতুং অসক্কোন্তো ঘরং গন্ত্ৰা নিস্সেণিং আহরিত্ৰা ওরুয্হ মাতু সন্তিকে গন্ত্ৰা ফলানি মাতুযা অদাসিং. তানি পন মহন্তানি হোন্তি চাটিপ্প মাণানি. ততো মে মাতরা একাসনে নিসিন্নায সমসট্ঠিফলানি খাদিতানীতি. এৰমাদিৰসেন ৰত্তব্বৰাচা চতুত্থৰাচা নাম. আমিসহেতু চাটুকম্যতাদিৰসেন নানপ্পকারকং পরেসং থোমনা ৰাচা চেৰ রাজকথং চোরকথন্তিআদিনযপ্পৰত্তা তিরচ্ছানকথা চ পঞ্চমৰাচা নাম. অরিযসচ্চসন্নিস্সিতা ধম্মকথা ছট্ঠমৰাচা নাম. তং পন ৰস্সসতম্পি সুণন্তা পণ্ডিতা নেৰ তিত্তিং গচ্ছন্তি. তাসু পন ভগৰা ততিযছট্ঠমা দ্ৰিৰাচাএৰ ভাসতি. তস্মা সপ্পুরিসেহি সাযেৰ দ্ৰিৰাচা ৰত্তব্বাতি. অযং তদট্ঠকথাযং আগতো সঙ্খেপনযো. ৰিসুদ্ধিমগ্গ মহাটীকাযং পন সারত্থদীপনীটীকাযঞ্চ তদঞ্ঞাকারেন ৰণ্ণিতো. তাসু পন তং ওলোকেত্ৰা গহেতব্বন্তি. অযং পনেত্থ সঙ্গহগাথা –

‘‘যো ভূতমত্থসংহীতং, পরেসমপ্পিযা ৰাচং;

ভূতমত্থসহীতঞ্চ, পরেসং পিযৰাচন্তি;

দ্ৰিৰাচং যুত্তট্ঠানেৰ, ৰদতীতি সুগতোতি;

ৰুচ্চতী চ দকারস্স, কত্ৰা তকারৰিঞ্ঞুনা’’তি.

সেট্ঠন্তি গুণমহন্তত্তা পসত্থতরং. সো হি পসত্থানং ৰিসেসেন পসত্থোতি সেট্ঠোতি ৰুচ্চতি. পসত্থপদং, ৰিসেসতদ্ধিতে ইট্ঠপচ্চযো. পসত্থসদ্দস্স সো, পসত্থানং পচ্চেকবুদ্ধারিযসাৰকাদীনং সীলসমাধিপঞ্ঞাদি গুণেহি ৰিসেসেন পসত্থোতি অত্থো. অথ ৰা সুন্দরে সতিপট্ঠানাদিভেদে ধম্মে এসতি গৰেসতি এসিং গৰেসিন্তি ৰা সেট্ঠো, বুদ্ধো. সুপুব্বোএস গৰেসনে ত. তস্স রট্ঠো. সুসদ্দো সুন্দরত্থো. সন্তেহি সপ্পুরিসেহি এসিতব্বো গৰেসিতব্বোতি ৰা সেট্ঠো. সন্তসদ্দূপপদো ইস গৰেসনে ত, সন্তসদ্দস্স সো, ইকারস্সে, তস্স ট্ঠো. সন্তেহি সপ্পুরিসেহি ইচ্ছিযতি কন্তিয তীতি ৰা সেট্ঠো. সন্তসদ্দূপপদো ইসু ইচ্ছাকন্তীসু ত. অথ ৰা সন্তানং সপ্পুরিসানং হিতসুখং ইচ্ছতীতি সেট্ঠো, বুদ্ধো. কত্তুসাধনোযং. সুন্দরে সতিপট্ঠানা দিভেদে ধম্মে এসেতি বুদ্ধেতীতি ৰা সেট্ঠো. হেতু কত্তুসাধনোযং. সুপুব্বএসধাতু বুদ্ধিযং ত. তং সেট্ঠং.

কুসলংকুসলং জহন্তি এত্থ কুসলং অকুসলং জহন্তি পদৰিভাগো কাতব্বো. কুচ্ছিতং পাপধম্মং সলযতি চলযতি কম্পেতি ৰিদ্ধংসেতীতি কুসলং, চতুভূমিককুসলং লব্ভতি. কুপুব্বো সলধাতু অ. তত্থ কামাৰচরকুসলং তদঙ্গপ্পহানেন পাপধম্মং সলযতি চলযতি, মহগ্গত কুসলং ৰিক্খম্ভনপ্পহানেন সলযতি কম্পেতি, লোকুত্তর কুসলং সমুচ্ছেদপ্পহানেন সলযতি ৰিদ্ধংসেতীতি অত্থো.

অথ ৰা কুচ্ছিতং অপাযদ্ৰারং সলন্তি সংৰরন্তি পিদহন্তি সাধৰো এতেনাতি কুসলং, করণসাধনোযং. ইধ পন জহন্তি ৰুত্তত্তা তেভূমককুসলমেৰাধিপ্পেতং. তং পন অনৰজ্জসুখৰিপাকলক্খণং, অকুসলৰিদ্ধংসনরসং, ৰোদান পচ্চুপট্ঠানং, ইট্ঠৰিপাকপচ্চুপট্ঠানং ৰা, যোনিসোমনসিকার পদট্ঠানং. ন কুসলং অকুসলং, মিত্তপটিপক্খো অমিত্তো ৰিয পহাযকপহাতব্বভাৰেন কুসলপটিপক্খন্তি অত্থো. তং পন সাৰজ্জদুক্খৰিপাকলক্খণং, সাৰজ্জানিট্ঠৰিপাক লক্খণং ৰা, অনত্থজননরসং, অনিট্ঠৰিপাকপচ্চুপট্ঠানং, অযোনিসোমনসিকারপদট্ঠানং. পুঞ্ঞাভিসঙ্খারআনেঞ্জা ভিসঙ্খারসঙ্খাতং কুসলং অপুঞ্ঞাভিসঙ্খারসঙ্খাতং অকুসলঞ্চ কুসলংকুসলং. তং পন পদং জহন্তিপদে কম্মং.

জহন্তি মগ্গক্খণে সমুচ্ছেদপ্পহানেন ফলক্খণে পটিপ্পস্সম্ভনপ্পহানেন পজহন্তং ৰিদ্ধংসেন্তন্তি অত্থো. তঞ্হি অরহত্তমগ্গঞাণেন জহতি পজহতি, ফলঞাণেন জহিং পজহিং পটিপ্পস্সম্ভিন্তি ৰা জহো, বুদ্ধো. হাধাতু চাগে অ. কিঞ্চাপি পনেত্থ কুসলং মগ্গেন পহাতব্বধম্মে ন ৰুত্তং, ৰট্টমূলভূতে অৰিজ্জাতণ্হাদিকিলেসে পন অরহত্তমগ্গ ঞাণেন জহিতে লোকিযকুসলুপ্পত্তিযা মূলভূতায অৰিজ্জাতণ্হায অভাৰা পুঞ্ঞাভিসঙ্খারো সংসারে পুন পটিসন্ধিযা নিব্বত্তেতুং ন সক্কোতি, তস্মা ৰট্টমূলভূতে কিলেসে জহিতে ফলূপচারেন কুসলম্পি জহিতং নাম হোতি. রূপং ভিক্খৰে ন তুম্হাকং তং পজহথাতিআদীসু ৰিয. অরহন্তেন হি অভিসমাচারিকৰত্তং কতম্পি কুসলন্তি ন ৰুত্তং, ক্রিযাতি পন ৰুত্তন্তি ৰেদিতব্বং.

ৰুত্তঞ্হি নিদানৰগ্গসংযুত্তট্ঠকথাযং ‘‘খীণাসৰেন হি কতং কম্মং নেৰ কুসলং হোতি নাকুসলং, অৰিপাকং হুত্ৰা ক্রিযমত্তে তিট্ঠতী’’তি.

অঙ্গুত্তরট্ঠকথাযঞ্চ ‘‘অরহত্তমগ্গো চ কুসলাকুসল কম্মক্খযায সংৰত্ততীতি এৰং তেন তং ভিজ্জতী’’তি ৰুত্তং.

তেন ৰুত্তং চূল়নিদ্দেসপাল়িযং ‘‘অরহত্তমগ্গঞাণেন অভিসঙ্খারৰিঞ্ঞাণস্স নিরোধেন যে উপ্পজ্জেয্যুং নামঞ্চ রূপঞ্চ, এত্থেতে নিরুজ্ঝন্তি ৰূপসমন্তি অত্থং গচ্ছন্তি পটিপ্পস্সম্ভন্তী’’তি.

অমতন্তি মরণৰিরহিতং. সো জিনো হি ন মতো অমতো, মরণধম্মস্স নিব্বত্তকানং কিলেসানং অরহত্ত মগ্গেন সমুচ্ছিন্দিতত্তা পুন মরণতো ৰিরহিতোতি ৰা অমতো. অথ ৰা নিব্বানে আরম্মণকরণৰসেন অধিগতে নত্থি মতং মরণং যস্স জিনস্সাতি অমতোতি ৰুচ্চতি. জিনেন হি খন্ধমচ্চুমারং অজিতোপি কিলেসমারং জযিত্ৰা তেসং অৰস্সং জিযমানত্তা ফলূপচারেন অমতোতি ৰুচ্চতীতি ৰেদিতব্বং.

পুন অমতন্তি অমতনিব্বানসমন্নাগতং. নত্থি মতং মরণং এত্থাতি অমতং, নিব্বানং. তং পন সন্তিলক্খণং, অচ্চুতরসং, অনিমিত্তপচ্চুপট্ঠানং, নিস্সরণপচ্চুপট্ঠানং ৰা, নিব্বানস্স পন পদট্ঠানং ন লব্ভতি.

ৰুত্তঞ্হি মিলিন্দপঞ্হে নাগসেনত্থেরেন ‘‘ন কেনচি কারণেন নিব্বানং উপ্পজ্জতী’’তি.

তং অস্স অত্থীতি অমতো, জিনো. সদ্ধাদিতো ণাতি সুত্তেন অস্সথ্যত্থে ণপচ্চযো. সদ্ধো পঞ্ঞোতিআদীসু ৰিয. অস্স জিনস্স চতুমগ্গঞাণেন সচ্ছিকতং অমতং নিব্বানং অত্থীতি অত্থো, তং অমতং.

সন্তন্তি সব্বকিলেসদরথেহি চ ৰট্টদুক্খেহি চ সুৰূপসন্তং. সো হি বুদ্ধো সব্বকিলেসদরথৰট্টদুক্খেহি সমিত্থ ৰূপসমিত্থাতি সন্তোতি ৰুচ্চতি. সমুধাতু উপসমে ত. ধাত্ৰন্তস্স লোপং তপচ্চযস্সন্তোআদেসং কত্ৰা পদসিদ্ধি ৰেদিতব্বা. সংসারৰট্টে দরথকারকানং কিলেসানং বোধিমণ্ডে অরহত্তমগ্গঞাণেন সমুচ্ছিন্দিতত্তা সীতিভূতো সন্তকাযচিত্তোতি ৰুত্তং হোতি, তং সন্তং.

অসমন্তি সীলাদিগুণেহি কেনচি পুগ্গলেন অসদিসং, সো হি বুদ্ধো নত্থি সীলাদিগুণেহি সমো সদিসো এতস্সাতি অসমোতি ৰুচ্চতি. ইমস্মিং সত্তলোকে সীল সমাধিপঞ্ঞাদিগুণেহি বুদ্ধেন সদিসো কোচি মনুস্সো ৰা দেৰো ৰা ব্রহ্মা ৰা নত্থীতি অত্থো. ভগৰতো হি অসীতি অনুব্যঞ্জনপটিমণ্ডিত বাত্তিংস মহাপুরিসলক্খণেহি ৰিচিত্ররূপকাযো চ সব্বাকারেহি পরিসুদ্ধসীলক্খন্ধাদিগুণ রতনসমিদ্ধো ধম্মকাযো চ পুঞ্ঞমহত্তথামমহত্ত ইদ্ধিমহত্তযসমহত্তপঞ্ঞামহত্তাদিগুণেহি চ পরমুক্কংসগতো চ অত্থি, তস্মা ভগৰা সীলাদিগুণেহি কেনচি অসমো অসদিসোতি ৰুত্তং হোতি.

অসমং দদন্তি লোকিযধম্মেন অসদিসং মগ্গফলনিব্বান ধম্মং ৰেনেয্যানং সত্তানং দেসনাঞাণেন দাযকং. এত্থ চ অসমন্তি নত্থি এত্থ এতেসং ৰা সমো সদিসো লোকিযধম্মোতি অসমো, মগ্গফলনিব্বানং লব্ভতি. অথ ৰা অসমন্তি অঞ্ঞেসং ধম্মানং অগ্গভাৰতো চতুব্বিধেন অরিয মগ্গেন সচ্ছিকাতব্বং নিব্বানং ৰুচ্চতি. ৰুত্তঞ্হেতং ভগৰতা ‘‘যাৰতা ভিক্খৰে ধম্মা সঙ্খতা ৰা অসঙ্খতা ৰা, ৰিরাগো তেসং অগ্গমক্খাযতী’’তি. তস্স পন পদস্স দদন্তিপদেন কম্মভাৰেন সম্বন্ধো. দদাতীতি দদো, বুদ্ধো. দাধাতু অ, সো কেনচি লোকিযধম্মেন অসমং অসদিসং মগ্গফলনিব্বানসঙ্খাতং লোকুত্তরধম্মং মহাকরুণাপ্পধানেন অমতাধিগমপটিপত্তিদস্সনেন দেসনাঞাণেন ৰেনেয্যানং সত্তানং দাতাতি অত্থো. তং অসমং দদং.

(খ) দুতিযগাথাযং পন সরণন্তি সব্বসত্তলোকস্স পটিসরণভূতো পরাযণো লেণো তাণোতি ৰুত্তং হোতি. সো হি বুদ্ধো সরন্তি পটিসরন্তি এত্থ সত্তলোকাতি সরণোতি ৰুচ্চতি. সরধাতু যু. অথ ৰা সরন্তি ওসরন্তি সমোসরন্তি এত্থ সত্তলোকাতি সরণোতি ৰুচ্চতি. সরন্তি চিন্তেন্তি এত্থ সদ্ধা পসন্না দেৰমনুস্সা সরণমিদন্তি সরণোতি চ. সরন্তি পটিৰিজ্ঝন্তি এত্থুপগতা দেৰমনুস্সা সদ্ধম্মন্তি সরণোতি চ ৰুচ্চতি. সর চিন্তাযং যু. সরণগমনট্ঠানে পন সরতি হিংসতি ভযং সন্তাপং দুক্খং কিলেসঞ্চাতি সরণং. রতনত্ত যন্তি অট্ঠকথাসু ৰুত্তং. তং সরণং.

পুন সরণং লোকন্তি সত্তসঙ্খারোকাসসঙ্খতং লোকং সরন্তং জানন্তং. এত্থ হি লোকযতি পতিট্ঠযতি এত্থ পুঞ্ঞাপুঞ্ঞঞ্চ তব্বিপাকো চাতি লোকো, সত্ত লোকো লব্ভতি. লোকধাতু পতিট্ঠাযং ণ. লুজ্জতি পলুজ্জতীতি লোকো, সঙ্খারলোকো. লুজধাতুণ. লোকিযতি ৰিচিত্তাকারেন দিস্সতীতি লোকো, লোকিযন্তি পতিট্ঠিযন্তি এত্থ ৰা জঙ্গমা চ থাৰরা চাতি লোকো, চক্কৰাল়সঙ্খতো ওকাসলোকো লব্ভতি. লোকধাতুণ. এত্থ চ সস্সতো লোকোতি ৰা অসস্সতো লোকোতি ৰাতি আগতট্ঠানে ইন্দ্রিযবদ্ধানং রূপাদীনং খন্ধানং সমূহো সন্তানো চ সত্তোযেৰ লোকো সত্তলোকোতি ৰচনত্থেন সত্তলোকোতি ৰেদিতব্বো. একো লোকো সব্বে সত্তা আহা রট্ঠিতিকাতি আগতট্ঠানে ইন্দ্রিযবদ্ধানং ৰা অনিন্দ্রিযবদ্ধানং ৰা খন্ধানং সমূহো সন্তানো চ পচ্চযেহি সঙ্খরিযন্তীতি সঙ্খারা, সঙ্খারাএৰ লোকো সঙ্খারলোকোতি ৰচনত্থেন সঙ্খারলোকোতি.

‘‘যাৰতা চন্দিমসূরিযা পরিহরন্তি,

দিসা ভন্তি ৰিরোচমানা;

তাৰ সহস্সধা লোকো,

এত্থ তে ৰত্ততি ৰসো’’তি.

আগতট্ঠানে অনিন্দ্রিযবদ্ধানং রূপাদীনং সমূহো সন্তানো চ অৰকসন্তি পতিট্ঠহন্তি এত্থাতি ওকাসো, সোযেৰ লোকো ওকাসলোকোতি ৰচনত্থেন ওকাস লোকোতি ৰেদিতব্বো, তং লোকং. সরতি জানাতি অজানীতি ৰা সরণো, বুদ্ধো. সর চিন্তাযং যু. লোকং সরণন্তি সম্বন্ধো. বুদ্ধো পন সত্তলোকং, সঙ্খারলোকং, ওকাসলোকং, কিলেসলোকং, ভৰলোকং, ইন্দ্রিয লোকং, খন্ধলোকং, আযতনলোকং ধাতুলোকঞ্চাতিআদিমনেকলোকং অনাৰরণঞাণেন পটিৰিজ্ঝতীতি ৰুত্তং হোতি.

অরণন্তি নিক্কিলেসং, কিলেসসঙ্খাতরণৰিরহিতং ৰা. রণসদ্দো চ কিলেসেসু চ যুদ্ধে চুণ্ণৰিচুণ্ণকরণে চ দিস্সতি. তথা হি সরণা ধম্মা অরণা ধম্মাতিআদীসু কিলেসেসু দিস্সতি. তে হি রণন্তি কন্দন্তি সত্তা এতেহীতি রণাতি ৰুচ্চন্তি.

‘‘ধনুগ্গহো অসদিসো, রাজপুত্তো মহব্বলো;

সব্বামিত্তে রণং কত্ৰা, সংযমং অজ্ঝুপাগমী’’তি.

অসদিসজাতকে যুদ্ধে দিস্সতি. রণং কত্ৰাতি হি যুদ্ধং কত্ৰা, সংযমন্তি সংযতং ইসিপব্বজ্জং অজ্ঝুপাগমীতি অত্থো. তিণঞ্চ কট্ঠঞ্চ রণং করোন্তো, ধাৰিংসু তে অট্ঠদিসা সমন্ততোতি ছদ্দন্তজাতকে চুণ্ণৰিচুণ্ণকরণে দিস্সতি. রণং করোন্তোতি হি চুণ্ণং ৰিচুণ্ণং করোন্তো. তেতি সব্বে অট্ঠসহস্সনাগাতি অত্থো. ইধ পন কিলেসে দট্ঠব্বো. অযং পনেত্থ ৰচনত্থো. রণন্তি সত্তে রাগাদযো চুণ্ণেন্তি পীল়েন্তীতি রণা, রণন্তি সত্তা এতেহি কন্দন্তি পরিদেৰন্তীতি ৰা রণা, কিলেসা. রণধাতু সদ্দে অ. নত্থি রণা কিলেসা এতস্সাতি অরণোতি ৰুচ্চতি. জিনস্স কিলেসমারস্স বোধিমূলে জিযমানত্তা রণা কিলেসা ন সন্তীতি অত্থো. তং অরণং.

অরণং করন্তি ৰেনেয্যসন্তানে রণসঙ্খতকিলেসস্স অভাৰকরণং. এত্থ চ রণন্তি এতং যেহি অভিভূতা সত্তা কন্দন্তি পরিদৰন্তি এতেসং রাগাদীনং অধিৰচনং. তেসং অভাৰং ৰেনেয্যসন্তানে দেসনাঞাণেন করোতি অত্থো. অথ ৰা করোতীতি করো, বুদ্ধো. তং করং.

অভযন্তি জাতিভযাদীনং অভাৰতো নিব্ভযং. এত্থ হি ভযং চিত্তুত্রাসভযং, ঞাণভযং, আরম্মণভযং, ওত্তপ্প ভযঞ্চাতি চতুব্বিধং হোতি. তত্থ ভাযতি চিত্তেনাতি ভযং, চিত্তুত্রাসভযং. ঞাণেন তীরেত্ৰা ভাযতীতি ভযং, ঞাণং. ভাযতি এতস্মাতি ভযং, আরম্মণভযং. ভাযতি এতেন পাপতোতি ভযং, ওত্তপ্পভযং. ভীধাতু ভযে ণ.

মহানিদ্দেসপাল়িযং পন আগতানি জাতিভযং, জরাভযং, ব্যাধিভযং, মরণভযং, রাজভযং, চোরভযং, অগ্গিভযং, উদকভযং, অত্তানুৰাদভযং, পরানুৰাদভযং, দণ্ডভযং, দুগ্গতিভযং, ঊমিভযং, কুম্ভীল়ভযং, আৰট্টভযং, সুসুকভযং, আজীৰিকভযং, অসিলোকভযং, পরিসযসারজ্জভযং, মদন ভযং, দুগ্গতিভযন্তিআদীনি গহিতানি. নত্থি ভযানি এতস্সাতি অভযো, বুদ্ধো. তস্স ভযানং কারণ ভূতানং সব্বকিলেসানং অরহত্তমগ্গেন সমুচ্ছিন্দিতত্তা সব্বভযং নত্থীতি অত্থো.

পুন অভযং ঠানং নাযকন্তি এত্থ অভযন্তিপদং ঠানন্তিপদে ৰিসেসনং. ঠানন্তিপদং নাযকন্তিপদে কম্মং. ভযসদ্দস্স অত্থো হেট্ঠা ৰুত্তোযেৰ. নত্থি সব্বভযং এত্থ নিব্বানেতি অভযং, নিব্বানং. বুদ্ধপচ্চেকবুদ্ধ অরহন্তা ঠন্তি উপ্পজ্জন্তি এত্থাতি ঠানং, নিব্বানং. ৰেনেয্যসত্তে নেতীতি নাযকো, বুদ্ধো. নীধাতু নযনে ণ্ৰু. সো বুদ্ধো ভব্বে কুলপুত্তে মগ্গাধি গমপ্পত্তিযা ধম্মদেসনায মগ্গফলঞাণং অধিগমেন্তো নিব্বানট্ঠানং নেতীতি অত্থো, তং নাযকং.

পুন নাযকং নমেতি নাযকং বুদ্ধং অহং নমে নমামীতি সম্বন্ধো. তত্থ নাযকন্তি ৰেনেয্যসত্তে সংসারণ্ণৰতো নিব্বানপারং নেতীতি নাযকো, বুদ্ধো. সো হি যথা নাৰিকো জনে নাৰায ওরিমতীরতো পারিমতীরং নেতি, এৰং সত্তে মগ্গঙ্গনাৰায সংসারণ্ণৰতো নিব্বান পারং নেতি পাপুণেতীতি অত্থো. অথ ৰা নাযকন্তি তিণ্ণং লোকানং জেট্ঠভাৰগমনত্তা নাযকো জেট্ঠ সেট্ঠৰুড্ঢতরো. সো হি জেট্ঠভাৰং নেতি গচ্ছতি পাপুণাতীতি নাযকোতি ৰুচ্চতি. নীধাতু গতিম্হি ণ্ৰু. সো পন ইধ লোকে অৰিজ্জণ্ডগতানং সব্বপজানং পঠমতরং অৰিজ্জণ্ডকোসং অরহত্তমগ্গেন পদালেত্ৰা অরিযায জাতিযা জাতত্তা সব্বসত্তানং সেট্ঠজেট্ঠৰুড্ঢতরভাৰং গতোতি অত্থো. তং নাযকং. নমেতি অহং তীহি দ্ৰারেহি সক্কচ্চং নমামীতি অত্থো. এত্থ হি ৰত্তমানমিৰিভত্তিযা ক্ৰচিধাতুত্যাদিসুত্তেন এআদেসো হোতি. অযং পনেত্থ ৰাচ্চত্থাদিনযো. নমেতিপদস্স আখ্যাতপদত্তা ৰচনত্থো ন কাতব্বো. ৰুত্তঞ্হি সদ্দৰিদূহি –

‘‘রুল়্হীখ্যাতং নিপাতঞ্চু, পসগ্গালপনং তথা;

সব্বনামন্তিমেতেসু, ন কতো ৰিগ্গহো ছসূ’’তি.

তং পন পদং নমুধাতুৰত্তমানঅম্হযোগপরস্সপদমিৰিভত্যন্তং আখ্যাতপদং. নমুধাতুযা ৰাচ্চত্থো নমনক্রিযা সঙ্খাতো কুসলচিত্তুপ্পাদো পধানৰসেন লব্ভতি. মিৰিভত্তিযা ৰাচ্চত্থো তেন চিত্তুপ্পাদেন উপলক্খিতো উপ্পাদ ৰন্তো তদাকারো পুগ্গলো অপ্পধানৰসেন লব্ভতি. পদসমুদাযস্স পন ৰাচ্চত্থো কত্তুকম্মভাৰেসু কত্তুভূতো অতীতাদিকালেসু পচ্চুপ্পন্নকালভূতো ধাত্ৰত্থ কিরিযাৰিসেসোৰ লব্ভতি. অযমেত্থ সঙ্খেপো.

ৰিত্থারো পনেৰং ৰেদিতব্বো. নমুধাতুযা ৰচ্চং সুগতাদি বুদ্ধগুণং আরম্মণং কত্ৰা ৰন্দনাকারপ্পৰত্তো কাযৰচী ৰিঞ্ঞত্তিসমুট্ঠাপকো সদ্ধাচেতনাপঞ্ঞাপধানো কুসল চিত্তুপ্পাদো চ দ্ৰে ৰিঞ্ঞত্তিযো অসমুট্ঠাপেত্ৰা মনোদ্ৰারে ৰন্দনাকারপ্পৰত্তো কুসলচিত্তুপ্পাদো চ মুখ্যেন লব্ভতি. বুদ্ধগুণানুস্সরণৰসেন পৰত্তো যোনিসোমনসিকা রাদিপুরেচরানুচরকুসলচিত্তুপ্পাদো ফলূপচারেন. দিট্ঠধম্মি কসম্পরাযিকসঙ্খাতং পচ্ছিমপচ্ছিমফলং রোগাদিঅন্তরাযানং অভাৰঞ্চ ৰা সগ্গমোক্খসম্পত্তিসুখঞ্চ কারণূপচারেন, পুরে পুরে ৰন্দনা সদিস্যূপচারেন, ৰন্দনস্স নামপঞ্ঞত্তি ঠানূপচারেন, ৰত্থুদ্ৰারারম্মণং ঠানূপচারেন, ৰন্দন গুণেন লক্খিতং পুগ্গলদব্বং গুণূপচারেন. উক্কট্ঠমজ্ঝ মুদুত্তমত্তভাৰো গুণ্যূপচারেন, অৰযৰভূতা ৰন্দনা একদেসূপচারেন. সমূহভূতা ৰন্দনা একদেস্যূপচারেন, পুব্বপুব্বকুসলচিত্তুপ্পাদো সমীপূপচারেন, পচ্ছিমপচ্ছিম কুসলচিত্তুপ্পাদো সমীপ্যূপচারেন, পণামকুসলচিত্তুপ্পাদভূতানং পরমত্থধম্মানং নিব্যাপারভাৰো তদ্ধম্মূপচারেন. তেসং এৰং ধম্মতাভাৰো অতদ্ধম্মূপচারেন, ৰন্দনাকারো অভেদভেদূপচারেন. ৰন্দনসত্তি ভেদঅভেদূপচারেন লব্ভতি. মিৰিভত্তিযা ৰাচ্চং তংমুখ্যাদীহি লক্খিতো কত্তু ক্রিযাৰিসেসেন চ ৰত্তমানৰিভত্তিসঙ্খাতেন ৰিভত্তিৰিসে সেন চ পরস্সপদসঙ্খাতেন পদৰিসেসেন চ উত্তমপুরিস ৰিসেসেন চ অম্হযোগৰিসেসেন চ সব্বধাতুৰিসেসেন চ একৰচনৰিসেসেন চ পচ্চুপ্পন্নকালৰিসেসেন চ ধাত্ৰত্থক্রিযাৰিসেসেন চ অলিঙ্গ ৰিসেসেন চ ভূৰাদিগণ ৰিসেসেন চ নোৰিকরণৰিসেসেন চ ভাৰকম্মকত্তূসুকত্তুৰিসেসেন চ লক্খিতো অহংসঙ্খাতো খন্ধসঙ্খতো সন্তানো অপ্পধানেন লব্ভতি. ক্রিযাপদস্স ক্রিযায পধানেন ৰাচকত্তা ধাত্ৰত্থোৰ পধানেন লব্ভতি. অপচ্চযস্স ৰাচ্চং ভূৰাদিগণজোতকা রূপসিদ্ধিমত্তা পদ সিলিট্ঠতা লব্ভতি.

অথ ৰা যো অহং নমামীতি সো নমে. সামঞ্ঞত্থ ৰিগ্গহোযং. ৰাচ্চত্থো পন ৰুত্তনযেন ৰেদিতব্বো. নমনঞ্চেত্থ বুদ্ধস্স সীলাদিঅনন্তগুণেসু নিন্নপব্ভারতাৰসেন পণামক্রিযাভিনিপ্ফাদিকা কুসলচেতনা. সা চ ৰন্দনেয্য ৰন্দনকানং খেত্তজ্ঝাসযসম্পদাহি দিট্ঠধম্মৰেদনীযভূতা যথালদ্ধসম্পত্তিনিমিত্তকস্স পুরিমকম্মস্স অনুবলপ্পদান ৰসেন তন্নিব্বত্তিতৰিপাকসন্ততিযা অন্তরাযকরানি উপপীল়কউপচ্ছেদককম্মানি পটিবাহিত্ৰা পৰত্তিকালে রোগাদিঅন্তরাযানমপ্পৰত্তিং সাধেতি. সম্পরাযে চ উপপজ্জৰেদনীযভূতা সগ্গমোক্খসম্পত্তিসুখং নিব্বত্তেতীতি.

অযং পনেত্থ দস্সনত্থনযো. নমেতিইমিনা বুদ্ধস্স সুগতাদিগুণং আরব্ভ পৰত্তা তিৰিধা পণামকুসল চেতনা মুখ্যেন দস্সেতি. তং দস্সনেন তস্সা কারণভূতা যোনিসোমনসিকারাদযো চ চতুচক্কসম্পত্তিঞ্চ বুদ্ধুপ্পাদনৰমখেত্তঞ্চ পুব্বভাগে পৰত্তং সদ্ধাপঞ্ঞাপধানং কুসলচিত্তুপ্পাদঞ্চ ফলূপচারেন দীপেতি. তদ্দীপনেন তস্সা ফলভূতং দিট্ঠধম্মরোগাদিঅন্তরাযৰিসোসনঞ্চ সগ্গমোক্খ সুখঞ্চ পঠমকারণূপচারেন পকাসেতি. তপ্পকাসনেন বুদ্ধস্স পণামারহভাৰং দুতিযকারণূপচারেন ৰিভাৰেতি. তংৰিভাৰনেন ৰন্দকস্স মে খেত্তঙ্গতভাৰঞ্চ পণামে তব্বভাৰঞ্চ ততিযকারণূপচারেন অনুভাৰেতি.

অযং পনেত্থ অলঙ্কারনযো. নমেতিৰাচকপদস্স ৰাচ্চভূতা তিৰিধা বুদ্ধপণামকুসলচেতনা সমট্ঠাযী ভাৰো নাম. কস্মা, সরীরত্তা. অথ ৰা তিৰিধায বুদ্ধপণা মকুসলচেতনায সম্পযুত্তো সমাধিপ্পধানো মহা কুসলচিত্তুপ্পাদো সমট্ঠাযীভাৰো নাম. কস্মা, বুদ্ধস্স সুগতাদিগুণারম্মণে একগ্গত্তা সমাহিতচিত্তত্তা ৰা. সোযেৰ পন সন্তরসো নাম. কস্মা, বুদ্ধপণামচেতনা কুসলঙ্গেন অকুসলঙ্গস্স পহীনত্তা. বুদ্ধন্তিপাঠসেস পদস্স ৰাচ্চভূতো বুদ্ধদব্বো আরম্মণৰিভাৰো নাম. কস্মা, তস্স পণামকুসলচিত্তুপ্পাদস্স আরম্মণপচ্চযেন উপকারত্তা. বুদ্ধস্স সুগতন্ত্যাদিগুণো উদ্দীপনৰিভাৰো নাম. কস্মা, পণামস্স কারণত্তা. কারণভূতং তং সমট্ঠাযীভাৰং উপাদায জানিতব্বো দিট্ঠধম্মরোগা দিঅন্তরাযাভাৰো চ সম্পরাযে সগ্গমোক্খসুখসম্পত্তি চ আনুভাৰো নাম. কস্মা, আনিসংসফলত্তা.

তত্থ হি কিঞ্চাপি আনুভাৰদীপকং পদং নত্থি. কারণস্স পন ফলেন ৰিনাভাৰতো কারণস্স ফলং ৰিঞ্ঞেয্যন্তি. অথ ৰা নমেতিপদস্স সামত্থিযতো আনুভাৰো দস্সিতোযেৰাতি দট্ঠব্বো. আৰিভূতো উস্সুকো চ বুদ্ধপণামস্স আনিসংসপজাননা মতি চ অলসাভাৰো চ চিত্তপ্পসাদো চ সমাধিত্যাদি চ ব্যভিচারীভাৰো নাম. লোমহংসাদিভাৰো সত্ৰংকাভাৰো নামাতি অলঙ্কার নযো ৰেদিতব্বো. এৰং পচ্ছিমপচ্ছিমগাথাসূতি.

অযং পনেত্থ সঙ্খেপযোজনা. সুগতং সোভনগতং সুন্দরনিব্বানট্ঠানং গতং ৰা সম্মা গতং ৰা, সুগতং সম্মা ৰচনং গদং ভাসনং, সেট্ঠং পসত্থতরং সতিপট্ঠানাদিভেদে ধম্মে গৰেসন্তং ৰা সন্তেহি গৰেসিতব্বং ৰা সত্তানং হিতসুখং ইচ্ছিতং ৰা, কুসলংকুসলং কুসলংঅকুসলং, জহং জহিতং, অমতং মরণৰিরহিতং অমতং অমতনিব্বানসমন্না গতং, সন্তং কিলেসদরথৰূপসমং, অসমং লোকিযধম্মেন অসদিসং মগ্গফলনিব্বানধম্মং. দদং দাতং দাযকং ৰা, সরণং সব্বসত্তলোকস্স পটিসরণভূতং. লোকং সত্তসঙ্খ রোকাসসঙ্খতং তিলোকং, সরণং জানন্তং, অরণং নিক্কিলেসং, কিলেসসঙ্খাতরণৰিরহিতং ৰা. অরণং সত্তেসু কিলেসরজস্সাভাৰং, করং দেসনাঞাণেন কতং, অভযং নিব্ভযং, অভযং নিব্ভযট্ঠানং নিব্বানদিসং, নাযকং সত্তে নিব্বানপারং নেন্তং, নাযকং তিলোকানং জেট্ঠং পামোক্খং বুদ্ধং সক্কচ্চং তীহি দ্ৰারেহি অহং নমে নমামীতি.

পঠমৰন্দনগাথাদ্ৰযৰণ্ণনা সমত্তা.

২. নযনসুভগকাযঙ্গং,

মধুরৰরসরোপেতং;

অমিতগুণগণাধারং,

দসবলমতুলং ৰন্দে.

২. এৰং পঠমং গাথাদ্ৰযেন বুদ্ধস্স নমস্সিত্ৰা ইদানি নযনসুভগকাযঙ্গন্ত্যাদীহি পঞ্চহি গুণেহি থোমিত্ৰা বুদ্ধং ৰন্দিতুং নযনসুভগকাযঙ্গন্তিআদিগাথমাহ. অযং পন ন ন মগণযুত্তত্তা নৰক্খরেহি লক্খিতা ভুজগসু সুগাথাতি দট্ঠব্বা. ৰুত্তঞ্হি ৰুত্তোদযে ‘‘ভুজগসুসুমতা নামো’’তি.

অযং পনেত্থ যোজনা. যস্সং পটিপাদং না চ দ্ৰে নগণামো চ মগণো চ যদি সিযা. সা ভুজগসুসু গাথাতি মতা ঞাতব্বাতি. তত্থ পন নযনসুভগকাযঙ্গন্তি সব্বসত্তানং চক্খুস্স সোভনং গতেন কাযঙ্গেনসমন্নাগতং. এত্থ হি নযনন্তি সমৰিসমং দস্সেন্তং অত্তভাৰং নেতীতি নযনং, চক্খু লব্ভতি. নীধাতু যু. সুভং সোভনং গচ্ছতীতি সুভগং, কাযঙ্গং লব্ভতি. সুভসদ্দূপপদো গমুধাতু ক্ৰি. কাযস্স অঙ্গং অৰযৰং কাযঙ্গং. ভগৰতো কাযঙ্গং লব্ভতি. ছট্ঠীতপ্পুরিসসমাসোযং. নযনস্স সুভগং নযনসুভগং, তং কাযঙ্গং যস্স বুদ্ধস্সাতি নযনসুভগ কাযঙ্গো, বুদ্ধো. সো হি রূপকাযস্স দস্সনা নুত্তরিযগুণযোগতো সব্বসত্তানং পসাদচক্খুস্স সোভনং গতেন দ্ৰত্তিংসমহাপুরিসলক্খণেহি চ অসীত্যা নুব্যঞ্জনলক্খণেহি চ লক্খিতেন কাযঙ্গেন সমন্নাগতোতি অত্থো.

মধুরৰরসরোপেতন্তি পিযপেমনীযউত্তমসদ্দেন সমন্নাগতং, সো হি ভগৰা মধিযতি পিযতি পেমিযতি ৰাতি মধুরো. মধধাতু উরো. ৰুত্তঞ্হি মজ্ঝিমপণ্ণাসটীকাযং ‘‘মধুরোতি পিযো পেমনীযো অপলিবুদ্ধো’’তি. অথ ৰা মধিযতি অস্সাদিযতীতি মধুরো, মধতি সব্বসত্তানং পীতিং উন্দেতি ৰড্ঢেতীতি মধুরো, মধধাতু উন্দে উরো. তেন ৰুত্তং সদ্দনীতিযং ‘‘মধ উন্দে’’তি. ৰরিতব্বো ইচ্ছিতব্বো পত্থিতব্বো ৰাতি ৰরো, সরো. ৰরধাতু ইচ্ছাযং অ. সরতি গচ্ছতি সোতৰিঞ্ঞাণারম্মণভাৰন্তি সরো, সদ্দো. সরধাতু গতিযং অ. সরতি গচ্ছতি সুয্যমানতন্তি ৰা সরো, সরিযতি সুণিযতীতি ৰা সরো, ভগৰতো অট্ঠঙ্গসমন্নাগতো সদ্দো লব্ভতি. উপসম্পজ্জতীতি উপেতো, উপপুব্বইধাতু ত. মধুরো চ ৰরো চ সো সরো চাতি মধুরৰরসরো, তেন উপেতো সম্পন্নো সমন্নাগতোতি মধুরৰরসরোপেতোতি ৰুচ্চতি. ভগৰতো পন হদয ৰত্থুনো সুৰিসুদ্ধত্তা পিত্তসেম্হাদীহি অপলিবুদ্ধত্তা দেৰ মনুস্সেহি মধুরেন পিযেন মনাপিযেন ৰরেন ইচ্ছিতপত্থি তেন অট্ঠঙ্গসমন্নাগতেন সরেন সদ্দেন উপেতো সম্পন্নো সমন্নাগতোতি ৰুত্তং হোতি.

এত্থ চ কিঞ্চাপি সরোপেতন্তি সামঞ্ঞৰসেন ৰুত্তং, ভগৰতো সরো পন ৰিসট্ঠো চ, ৰিঞ্ঞেয্যো, মঞ্জু, সৰনীযো, বিন্দু, অৰিসারী, গম্ভীরো, নিন্নাদি চাতি ৰিসেসেন অট্ঠঙ্গসমন্নাগতোতি অত্থো দট্ঠব্বো. ৰুত্তঞ্হি মজ্ঝিম পণ্ণাসে ব্রহ্মাযুসুত্তে ‘‘অট্ঠঙ্গসমন্নাগতো খো পনস্স গোতমস্স মুখতো ঘোসো নিচ্ছরতি ৰিসট্ঠো চ, ৰিঞ্ঞেয্যো চ, মঞ্জু চ, সৰনীযো চ, বিন্দু চ, অৰিসারী চ, গম্ভীরো চ, নিন্নাদি চ. যথাপরিসং খো পন সো ভৰং গোতমো সরেন ৰিঞ্ঞাপেতি, ন চস্স বহিদ্ধা পরিসায ঘোসো ন নিচ্ছরতী’’তি.

তস্সাট্ঠকথাযং পন ৰিসট্ঠোতি সিনিদ্ধো অপলিবুদ্ধো. ৰিঞ্ঞেয্যোতি ৰিঞ্ঞাপনীযো পাকটো. ৰিসট্ঠত্তাযেৰ চেস ৰিঞ্ঞেয্যো হোতি. মঞ্জূতি মধুরো. সৰনীযোতি সোতসুখো, মধুরত্তাযেৰ চেস সৰনীযো হোতি. বিন্দূতি সম্পিণ্ডিতো. অৰিসারীতি অৰিসটো. বিন্দুত্তাযেৰ চেস অৰিসারী হোতি. গম্ভীরোতি গম্ভীরসমুট্ঠিতো. নিন্নাদীতি নিন্নদৰা. গম্ভীরত্তাযেৰ চেস নিন্নাদি হোতি. যথাপরিসন্তি চক্কৰাল়পরিযন্তাপি একবদ্ধং পরিসং ৰিঞ্ঞাপেতি. বহিদ্ধাতি অঙ্গুলিমত্তম্পি পরিসতো বহিদ্ধা ন গচ্ছতি. কস্মা. সো এৰরূপো মধুরসরো অকারণা মা নস্সীতি. ইতি ভগৰতো ঘোসো পরিসায মত্তকেনেৰ চরতীতি ৰণ্ণিতোতি. অভিধানপ্পদীপিকাযঞ্চ ৰুত্তা সঙ্গহগাথা –

‘‘ৰিসট্ঠমঞ্জুৰিঞ্ঞেয্যা, সৰনীযাৰিসারিনো;

বিন্দুগম্ভীরনিন্নাদি, ত্যেৰমট্ঠঙ্গিকো সরো’’তি.

যথা হি ব্রহ্মুনো সরো পিত্তসেম্হেহি অপলিবুদ্ধত্তা ৰিসুদ্ধো মধুরো হোতি. যথা চ সীহব্যগ্ঘাদীহি ৰাল়মিগেহি অনুবন্ধা ধাৰন্তা খুদ্দকমিগা করৰীকসকুণস্স ৰিকূজমানং সদ্দং সুত্ৰা সরস্স মধুরত্তা মরণভযং হিত্ৰা অধাৰিত্ৰা উক্খিত্তপাদং অনিক্খিপিত্ৰা তিট্ঠন্তা সুণন্তি, এৰং করৰীকস্স সদ্দো ধম্মতাভাৰেন মধুরো পিযো মনাপো হোতি. এৰং ভগৰতা কতং কম্মং ৰত্থুং সোধেতি, ৰত্থুস্স সুদ্ধত্তা পিত্তসেম্হেহি চ অপলিবুদ্ধত্তা ভগৰতো নাভিতো সমুট্ঠহন্তো সরোপি অট্ঠঙ্গসমন্নাগতো সুৰিসুদ্ধো অতিমধুরো অতিপিযো অতিমনাপো হোতি. সা পনেসা হীনূপমা হোতি, ভগৰতো হি সরো তেহি সদ্দেহি সতভাগেন সহস্সভাগেন অতিমধুরো অতিপিযো অতিমনাপো হোতি, তথা হি ধম্মাসো করঞ্ঞো অসন্ধিমিত্তা দেৰী করৰীকসকুণস্স মধুরসদ্দং সুত্ৰা চিন্তেসি ‘‘ইমস্স তিরচ্ছানস্স মধুরো সদ্দো, কো নাম সব্বঞ্ঞুতঞাণসিরিং পত্তস্স ভগৰতো অতিমধুরো সদ্দো’’তি, পীতিং উপ্পাদেত্ৰা তং পীতিং অৰিজহিত্ৰা সত্তহি জঙ্ঘসতেহি সদ্ধিং সোতাপত্তিফলে পতিট্ঠাতি, তস্মা ভগৰতো মধুরৰরসরোপেতন্তি থোমেতীতি.

অমিতগুণগণাধারন্তি অপরিমিণিতব্বসীলাদিগুণসমূহানং পতিট্ঠানভূতং. এত্থ চ সমিতোতি পরিমিণিতব্বোতি মিতো, মাধাতু পরিমাণে ত, ন মিতো অমিতো. গুণোতি সীলাদযো ধম্মা. তে হি গুণেন্তি তংসমঙ্গীপুগ্গলং পকাসেন্তীতি গুণাতি ৰুচ্চন্তি. গুণধাতু পকাসনে অ. মণিসারমঞ্জূসাটীকাযং পন ‘‘গুণন্তি অত্তনো আধারং পাকটং করোন্তীতি গুণা’’তি ৰুত্তং.

সদ্দনীতিধাতুমালাযঞ্চ ‘‘গুণ আমন্তনে, গুণোতি সীলাদযো ধম্মা, কেনট্ঠেন তে গুণা, গোণাপিযতি আমন্তাপিযতি অত্তনি পতিট্ঠিতো পুগ্গলো দট্ঠুং সোতুং পূজিতুঞ্চ ইচ্ছন্তেহি জনেহীতি গুণো. এত্থ কিঞ্চাপি সীলাদি ধম্মানং আমন্তাপনং নত্থি, তথাপি তংহেতু আমন্তনং নিমন্তনঞ্চ তেযেৰ করোন্তি নামাতি এৰং ৰুত্তং. অঞ্ঞে পন গুঞ্জন্তে অব্যযন্তে ইতি গুণাতি অত্থং ৰদন্তি. তদনুরূপং পন ধাতুসদ্দংন পস্সাম. গুণ আমন্তনে ইচ্চেৰ পস্সাম. ৰিচারেত্ৰা গহেতব্ব’’ন্তি ৰুত্তং. অমিতো গুণো অমিতগুণো, তেসং গণো সমূহো অমিতগুণগণো, তেসং. আধারতি তিট্ঠতি এত্থাতি অমিতগুণগণাধারো, জিনো লব্ভতি. সো পন সমুদ্দোদকং নাল়িপত্তেন অপরিমিতং ৰিয কেনচি অপরিমিতানং সীলাদিগুণসমূহানং আধারো পতিট্ঠানভূতোতি অত্থো.

দসবলন্তি অঞ্ঞেহি অসাধারণং তথাগতদসবলসম্পন্নং. এত্থ হি বলন্তি কেহিচি ৰিরুদ্ধেহি কারণে হি বলন্তি ন কম্পেন্তি থিরন্তীতি বলং, দস বলানি যস্স সোতি দসবলো, বুদ্ধো. তং পন দুৰিধং হোতি তথা গতস্স দসবলং কাযদসবলঞ্চ, ঞাণদসবলঞ্চাতি. তেসু হি কাযবলং হত্থিকুলানুসারেন ৰেদিতব্বং. ৰুত্তঞ্হেতং পোরাণেহি –

‘‘কাল়া ৰকঞ্চ গঙ্গেয্যং, পণ্ডরং তম্বপিঙ্গলং;

গন্ধ মঙ্গলহেমঞ্চ, উপোসথং ছদ্দন্তিমে দসা’’তি.

ইমানি হি দস হত্থিকুলানি. তত্থ কাল়াৰকন্তি পকতিহত্থিকুলং দট্ঠব্বং. যং দসন্নং পুরিসানং কাযবলং, তং একস্স কাল়াৰকহত্থিনো. যং দসন্নং কাল়াৰকানং বলং, তং একস্স গঙ্গেয্যস্স. যং দসন্নং গঙ্গেয্যানং, তং একস্স পণ্ডরস্স. যং দসন্নং পণ্ডরানং, তং একস্স তম্বস্স. যং দসন্নং তম্বানং, তং একস্স পিঙ্গলস্স. যং দসন্নং পিঙ্গলানং, তং একস্স গন্ধহত্থিনো. যং দসন্নং গন্ধহত্থীনং, তং একস্স মঙ্গলস্স. যং দসন্নং মঙ্গলানং, তং একস্স হেমৰতস্স. যং দসন্নং হেমৰতানং, তং উপোসথস্স. যং দসন্নং উপোসথানং, তং একস্স ছদ্দন্তস্স. যং দসন্নং ছদ্দন্তানং, তং একস্স তথাগতস্স, নারাযনসঙ্ঘাতবলন্তিপি ইদমেৰ ৰুচ্চতি. তদেতং পকতিহত্থীনং গণনায হত্থিকোটিসহস্সানং. পুরিসগণনায দসন্নং পুরিসকোটিসহস্সানং বলং হোতি. ইদং তথাগতস্স কাযবলং হোতি. ইদং পন তাসু তাসু পাল়ীসু ন আগতং. অট্ঠকথাসুযেৰ আগতং. তেন ৰুত্তং দসক নিপাত অঙ্গুত্তরটীকাযং ‘‘দস বলঞাণং পন পাল়িযং আগতমেৰ. ন কাযবলং ৰিয অট্ঠ কথারূল়্হমেৰাতি অধিপ্পাযো’’তি. এত্থ চ নারাযন সঙ্ঘাত বলন্তি এত্থ নারা ৰুচ্চন্তি রস্মিযো, তা বহূ নানাৰিধা ইতো উপ্পজ্জন্তীতি নারাযনং, ৰজিরং. তস্মা নারাযনসঙ্ঘাত বলন্তি ৰজিরসঙ্ঘাতবলন্তি অত্থোতি.

ঞাণদসবলং পন ৰিভঙ্গপাল়িযঞ্চ মূলপণ্ণাসে মহা সীহনাদসুত্তে দসকনিপাতঅঙ্গুত্তরপাল়িযঞ্চ ৰিত্থারেন আগতমেৰ. সুখগ্গহণত্থং পন সঙ্খেপেন দস্সযিস্সামি. সেয্যথিদং. ঠানাট্ঠানঞাণঞ্চ, কম্মসমাদানানং ৰিপাকঞাণং, সব্বত্থগামিনিপটিপদাঞাণং, অনেকধাতু নানাধাতু লোক ঞাণং, সত্তানং নানাধিমুত্তিকতং ঞাণং, পরসত্তানং পরপুগ্গলানং ইন্দ্রিযপরোপরিযত্তিঞাণং, ঝানৰিমোক্খসমাধিসমাপত্তীনং সংকিলেসং ৰোদানং ৰুট্ঠানং ঞাণং, পুব্বেনিৰাসানুস্সতিঞাণং, সত্তানং চুতূপপাতং ঞাণং, আসৰানং খযঞাণঞ্চাতি. অযং পন কমো অভিধম্মৰিভঙ্গপাল়িযং আগতক্কমো.

চুতূপপাতঞাণট্ঠানে পন মূলপণ্ণাসপাল়িযং মহাসীহনাদসুত্তে চ দসকনিপাতঅঙ্গুত্তরপাল়িযং দিব্বচক্খুঞাণং আগতং. অত্থতো পন দিব্বচক্খুঞাণেন চুতূপপাতস্স পস্সিতত্তা সদিসমেৰাতি. তত্থ হি ঠানাট্ঠানঞাণন্তি কারণাকারণং যথাভূতং জাননঞাণং. কারণঞ্হি যস্মা তত্থ ফলং তিট্ঠতি তদাযত্তৰুত্তিতায উপ্পজ্জতি চেৰ পৰত্ততি চ, তস্মা ঠানন্তি ৰুচ্চতি. কম্মসমাদানানং ৰিপাকঞাণন্তি সমাদিযিত্ৰা কতানং অতীতানাগত পচ্চুপ্পন্নানং কুসলাকুসলকম্মানং সুগতিদুগ্গতিপটিসন্ধিসঙ্খাতং ৰিপাকং নিব্বানফলঞ্চ যথাভূতং পজাননঞাণং. সব্বত্থ গামিনিপটিপদং ঞাণন্তি সব্বগতিগামিনিঞ্চ পটিপদং মগ্গং যথাভূতং পজাননঞাণং. তত্থ চ পটিপদন্তি পটিপজ্জতি পাপুণাতি এতেনাতি পটিপদং, মগ্গং. গতিগামিনিন্তি নিরযাদিপঞ্চগতিগামিনিং. অগতিগামিনিন্তি নিব্বানগামিনিং. ৰুত্তঞ্হি ‘‘নিব্বানঞ্চাহং সারিপুত্ত পজানামি নিব্বানগামিনিঞ্চ পটিপদ’’ন্তি.

অনেকধাতুনানাধাতুলোকং ঞাণন্তি এত্থ অনেক ধাতূতি চক্খুধাতুআদীহি কামধাতূহি ৰা বহুধাতুং. নানাধাতূতি তাসংযেৰ ধাতূনং ৰিলক্খণত্তা ৰিসদিস সভাৰত্তা নানাপ্পকারধাতুং. লোকন্তি খন্ধাযতন ধাতুলোকং. ঞাণন্তি যথাভূতং পজাননঞাণং. সত্তানং অধিমুত্তিকতং ঞাণন্তি সত্তানং হীনাদীহি অধিমুত্তীহি নানাধিমুত্তিকভাৰং যথাভূতং পজাননঞাণং. পরসত্তানং পরপুগ্গলানং ইন্দ্রিযপরোপরিযত্তিঞাণন্তি এত্থ পরসত্তানন্তি পধানসত্তানং. পরপুগ্গলানন্তি ততো পরেসং হীনসত্তানং. একত্থমেৰ ৰা এতং পদদ্ৰযং ৰেনেয্যৰসেন দ্ৰেধা ৰুত্তং. ইন্দ্রিযপরোপরিযত্তিঞাণন্তি সদ্ধাদীনং ইন্দ্রিযানং পরভাৰং ৰড্ঢঞ্চ অপরভাৰং হানিঞ্চ যথাভূতং পজাননঞাণং.

ঝানৰিমোক্খসমাধিসমাপত্তীনং সংকিলেসং ৰোদানং ৰুট্ঠানং ঞাণন্তি এত্থ ঝানৰিমোক্খসমাধিসমাপত্তীনন্তি পঠমাদীনং চতুন্নং ঝানানং, রূপী রূপানি পস্সতীতিআদীনং অট্ঠন্নং ৰিমোক্খানং, সৰিতক্কসৰিচারাদীনং তিণ্ণং সমাধীনং, পঠমজ্ঝান সমাপত্তিআদীনঞ্চ নৰন্নং অনুপুব্বসমাপত্তীনং. সংকিলেসন্তি হানভাগিযধম্মং. ৰোদানন্তি ৰিসেসভাগিযধম্মং. ৰুট্ঠানন্তি যেন কারণেন ঝানাদীহি ৰুট্ঠহন্তি, তং কারণং. ঞাণন্তি যথাভূতং পজাননঞাণং. পুব্বেনিৰাসানুস্সতিঞাণন্তি পুব্বে নিৰুত্থক্খন্ধানুস্সরণসঙ্খাতং পজাননঞাণং. সত্তানং চুতূপপাতং ঞাণন্তি সত্তানং চুতিঞ্চ উপপাতঞ্চ পজাননং দিব্বচক্খুঞাণং. আসৰানং খযঞাণন্তি কামাসৰাদীনং খযসঙ্খাতং আসৰনিরোধং নিব্বানং যথাভূতং পজানন ঞাণন্তি. ইমানি পন ঞাণানি অঞ্ঞেহি অসাধারণানি তথাগতস্স দসবলঞাণানীতি দট্ঠব্বানি.

হোন্তি চেত্থ –

‘‘ঠানাট্ঠানং ৰিপাকঞ্চ, ঞাণং পটিপদং ঞাণং;

অনেকধাতুলোকঞ্চ, সত্তানং অধিমুত্তিকং. [সা পনেসা সেতৰৰিপুলাগাথাতি দট্ঠব্বা;]

ইন্দ্রিযপরাপরঞ্চ, ঝানাদিনং সংকিলেসং;

ৰোদানং ৰুট্ঠানং ঞাণং, পুব্বেনিৰাসানুস্সতিং;

সত্তানং চুতূপপাতং, আসৰক্খযং ঞাণন্তি;

দসিমানি বুদ্ধস্স চা, সাধারণানি ঞাণানী’’তি. [সা পনেসা সামঞ্ঞগাথাতি দট্ঠব্বা;]

ননু দসবলঞাণং নাম পাটিযেক্কং নত্থি, সব্বঞ্ঞুতঞাণমেৰ হোতি, অথ কস্মা তং ঞাণং দসভেদেন ৰুত্তন্তি. ৰুচ্চতে. অঞ্ঞমেৰ হি দসবলঞাণং, অঞ্ঞং সব্বঞ্ঞুতঞাণং, দসবলঞ্হি সকসককিচ্চমেৰ জানাতি. সব্বঞ্ঞুতঞাণং পন তম্পি ততো অৰসেসম্পি পজানাতি. দসবলঞাণেসু হি পঠমং কারণাকারণমেৰ জানাতি. দুতিযং কম্মন্তর ৰিপাকন্তরমেৰ. ততিযং কম্মপরিচ্ছেদমেৰ. চতুত্থং ধাতু নানত্তকারণমেৰ. পঞ্চমং সত্তানং অজ্ঝাসযাধিমুত্তিমেৰ. ছট্ঠং ইন্দ্রিযানং তিক্খমুদুভাৰমেৰ. সত্তমং ঝানাদীহি সদ্ধিং তেসং সংকিলেসাদিমেৰ. অট্ঠমং পুব্বে নিৰুত্থখন্ধসন্ততিমেৰ. নৰমং সত্তানং চুতিপটিসন্ধিমেৰ. দসমং সচ্চপরিচ্ছেদমেৰ. সব্বঞ্ঞুতঞাণং পন এতেহি জানিতব্বঞ্চ ততো উত্তরিঞ্চ পজানাতি. এতেসং পন কিচ্চং ন সব্বং করোতি. তঞ্হি ঝানং হুত্ৰা অপ্পেতুং ন সক্কোতি. ইদ্ধি হুত্ৰা ৰিকুব্বিতুং ন সক্কোতি. মগ্গো হুত্ৰা কিলেসে খেপেতুং ন সক্কোতি. এৰং তেসং ঞাণদ্ৰযানং ৰিসেসোতি. তং পন ইধ ঞাণদ্ৰযং অধিপ্পেতন্তি.

অতুলন্তি সীলাদীহি গুণেহি কেনচি পুগ্গলেন অসদিসং. অযং পনেত্থ ৰচনত্থো. তুলনং উম্মানং তুলা, তুল সদিস্যং. সদ্দনীতিযঞ্হি ‘‘তুল উম্মানে’’তি ৰুত্তং. অথ ৰা তুলিযতি পমিযতি এতাযাতি তুলা, পকতিতুলা. তুলা ৰিযাতি তুলা, ঞাণং. তায সম্মিতো তুলো. সম্মিত তদ্ধিতে অপচ্চযো. তুলসদিসঞাণেন সম্মিতো পুগ্গলো. ন তুলো অতুলো. কম্মধারযমিস্সকতপ্পুরিস সমাসোযং. সীলাদিগুণেহি কেনচি পুগ্গলেন অসদিসো ভগৰা লব্ভতি. অথ ৰা নত্থি তুলো সদিসো পুগ্গলো এতস্সাতি অতুলো, ভগৰা. অতগ্গুণসংৰিঞ্ঞাণোযং বহুব্বীহি. সীলাদিগুণেহি কেনচি অসদিসো অগ্গপুগ্গলোতি অত্থো. সদেৰকে লোকে অগ্গপুগ্গলভাৰতো. যথাহ ‘‘যাৰতা ভিক্খৰে সত্তা অপদা ৰা দ্ৰিপদা ৰা চতুপ্পদা ৰা, তথাগতো তেসং অগ্গমক্খাযতি, ৰিরাগো সেট্ঠো ধম্মানং দ্ৰিপদানঞ্চ চক্খুমা’’তি. তং অতুলং বুদ্ধন্তি সম্বন্ধো. ৰন্দেতি বুদ্ধস্স নযনসুভগকাযঙ্গাদিগুণং অনুস্সরিত্ৰা তীহি দ্ৰারেহি সক্কচ্চং অহং ৰন্দামীতি অত্থো. এত্থ চ মিৰিভত্তিযা মহাৰিসযসুত্তেন একারা দেসোতি দট্ঠব্বো. ৰন্দনা পন তিৰিধা হোতি কাযৰচীমনোৰন্দনাৰসেনাতি. যথাহ ‘‘তিস্সো ইমা ভিক্খৰে ৰন্দনা. কতমা তিস্সো. কাযেন ৰন্দতি, ৰাচায ৰন্দতি, মনসা ৰন্দতী’’তি.

তত্থ যোনিসো মনসিকারচিত্তং পচ্চুপট্ঠাপেত্ৰা জাণুদ্ৰযকপ্পরদ্ৰযনলাটসঙ্খাতানি পঞ্চ অঙ্গানি ভূমিযং পতিট্ঠাপেত্ৰা ৰন্দনেয্যানং অভিমুখং নিপতন্তো কাযেন ৰন্দতি নাম. যং সন্ধায ‘‘পঞ্চপতিট্ঠিতেন ৰন্দিত্ৰা’’তি অট্ঠ কথাদীসু ৰুত্তং. বুদ্ধগুণপদানি ৰাচায পৰত্তেন্তো ৰাচায ৰন্দতি নাম. ৰিপস্সিস্স নমত্থু, সিখিস্সাপি নমত্থু, ৰেস্স ভুস্স নমত্থু, ককুসন্ধস্স নমত্থু, কোণাগমনস্স নমত্থু, কস্সপস্স নমত্থু, অঙ্গীরস্সস্স নমত্থু ত্যাদীসুপি ৰাচাৰন্দনাযেৰ. বুদ্ধাদি গুণানি অনুস্সরন্তো মনসা ৰন্দতি নামাতি.

অযং পনেত্থ সঙ্খেপযোজনা. নযনসুভগকাযঙ্গং সব্বসত্তানং চক্খুস্স সোভনং গতেন কাযঙ্গেন সমন্নাগতং, মধুরৰরসরোপেতং পিযপেমনীযেন অস্সাদি যেন উত্তমসদ্দেন সমন্নাগতং, অমিতগুণগণাধারং অপরিমিণিতব্বসীলাদিগুণসমূহানং পতিট্ঠানভূতং, দসবলং অনঞ্ঞসাধারণেন তথাগতস্স কাযঞাণদস বলেন সমন্নাগতং, অতুলং সীলাদিগুণেহি কেনচি অসদিসং বুদ্ধং তীহি দ্ৰারেহি সক্কচ্চং অহং ৰন্দে ৰন্দামীতি.

দুতিযৰন্দনগাথাৰণ্ণনা সমত্তা.

৩. যো বুদ্ধো ধিতিমাঞ্ঞধারকো,

সংসারে অনুভোসি কাযিকং;

দুক্খং চেতসিকঞ্চ লোকতো,

তং ৰন্দে নরদেৰ মঙ্গলং.

৩. এৰং ততিযগাথায বুদ্ধস্স ৰন্দিত্ৰা ইদানি সমাধি আদীহি চতূহি গুণেহি থোমিত্ৰা ৰন্দিতুকামো যো বুদ্ধো ধিতিমাঞ্ঞধারকো তিআদিগাথমাহ. অযং পন মসজগণ গরুযুত্তত্তা দসক্খরেহি লক্খিতা সুদ্ধৰিরা জিতগাথাতি দট্ঠব্বা. ৰুত্তঞ্হি ৰুত্তোদযে-ম্সা জ্গা সুদ্ধৰিরা জিতং মতন্তি. তস্সত্থো. যস্সং পটিপাদং ম্সা মসগণা চ জ্গা জগণগরুকা চ চে সিয্যুং, তং ৰুত্তং সুদ্ধৰিরাজিতন্তি মতং ঞাতব্বন্তি. ধিতিমা অঞ্ঞধারকো যো বুদ্ধো লোকতো সংসারে কাযিকং দুক্খঞ্চ চেতসিকং দুক্খঞ্চ অনুভোসি নরদেৰমঙ্গলং, তং বুদ্ধং অহং ৰন্দেতি সম্বন্ধো.

তত্থ হি যোতি অনিযমনিদ্দেসো. যো যাদিসোতি অত্থো. তস্স চ অনিযমৰাচক সব্বনামপদত্তা ৰচনত্থো ন কাতব্বো. তস্স পন য ওতি পদৰিভাগো কাতব্বো. তেসু চ যসদ্দস্স ৰাচ্চং অনিযমো বুদ্ধদব্বো অপ্পধানেন লব্ভতি, তস্স যাদিসযুত্তজচ্চনামগোত্তসীলৰিহারী গোচরসঙ্খাতং অনিযমসামঞ্ঞাকারত্তগুণমেৰ পধানেন লব্ভতি. পঠমাসিৰিভত্তিযা কারিযভূতস্স ওকারস্স ৰাচ্চং পকতূপনিস্সযসঙ্খাতং কত্তুকারকেকৰচনসঙ্খ্যং লব্ভতি. অথ ৰা সব্বনামভাৰং যাতি গচ্ছতীতি যো, অনিযমৰাচকভাৰং যাতি গচ্ছতীতি ৰা যো, সব্বনাম ভাৰেন যাতি পৰত্ততীতি ৰা যো, সব্বনামভাৰেন যাতব্বো ঞাতব্বোতি ৰা যো, যাতব্বো ঞাতব্বো এতেন ৰা অনিযমত্থোতি যো.

তেনাহু পোরাণা –

‘‘নানাকারণং পটিচ্চ, ধাতুপচ্চযৰিগ্গহং;

চিন্তকানং পভাৰোৰ, পধানং হোতি চিন্তনে’’তি.

বুদ্ধোতি পটিৰিদ্ধচতুসচ্চধম্মো. অযং পনেত্থ ৰচনত্থো. বুজ্ঝতি চত্তারি সচ্চানীতি বুদ্ধো, ভগৰা. সুদ্ধকত্তুসাধনোযং. বুধধাতু ত. বোধেতা পজাযাতি ৰা বুদ্ধো, হেতু কত্তুসাধনোযং. অঞ্ঞেসং চত্তারি সচ্চানি বোধেতীতি অত্থো. অথ ৰা অনঞ্ঞবোধিতো হুত্ৰা সৰাসনায সম্মোহনিদ্দায বুজ্ঝতি জাগরোতীতি বুদ্ধো, দিনকরকিরণ সমাগমেন পরমরুচিরসিরীসোভগ্গপ্পত্তিযা ৰিকসিতমিৰ পদুমং অগ্গমগ্গঞাণসমাগমেন অপরিমিতগুণগণালঙ্কত সব্বঞ্ঞুতঞাণপ্পত্তিযা বুজ্ঝতি ৰিকসতীতি ৰা বুদ্ধো, নিব্বান সঙ্খাতং একাযনমগ্গং বুজ্ঝতি গচ্ছতীতি ৰা বুদ্ধো. বুধসদ্দো হি ঞাণাদীসু চতূস্ৰত্থেসু ৰত্ততি.

তেন ৰুত্তং –

‘‘ঞাণে ৰিকসনে চেৰ, গমনে চাপি জাগরে;

চতূস্ৰেতেসু অত্থেসু, বুধসদ্দো পৰত্ততী’’তি.

অথ ৰা সব্বঞেয্যধম্মে বুজ্ঝতি জানাতীতি বুদ্ধো, পারমি ভাৰিতায পঞ্ঞায সব্বে সঙ্খতাসঙ্খতধম্মে বুজ্ঝতি অবুজ্ঝি বুজ্ঝিস্সতীতি ৰা বুদ্ধো, সম্মাসম্বুদ্ধো ৰত সো ভগৰাতি অধিগতঞাণগুণৰিসেসেহি বুজ্ঝিতব্বোতি ৰা বুদ্ধো, ভগৰতা বুজ্ঝিতব্বং ঞাতব্বন্তি বুদ্ধং. কিং তং, সব্বঞ্ঞুত ঞাণং, তদস্সত্থীতি বুদ্ধো, ভগৰা. অত্থতো পন পারমিতা ভাৰিতো সযম্ভূঞাণেন সহ ৰাসনায ৰিহতৰিদ্ধস্ত নিরৰসেসক্লেসো মহাকরুণাসব্বঞ্ঞুতঞাণাদিঅপরি মেয্যগুণগণাধারো খন্ধসন্তানো বুদ্ধো. যথাহ ‘‘বুদ্ধোতি যো সো ভগৰা সযম্ভূ অনাচরিযকো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝি, তত্থ চ সব্বঞ্ঞুতং পত্তো, বলেসু চ ৰসীভাৰ’’ন্তি.

এত্থ চ বুদ্ধো নাম সব্বঞ্ঞুবুদ্ধ, পচ্চেকবুদ্ধ, চতুসচ্চবুদ্ধ, সুত বুদ্ধৰসেন চতুব্বিধো হোতি. তত্থ কপ্পসতসহস্সাধিকানি চত্তারি অসঙ্খ্যেয্যানি সমতিংসপারমিযো পূরেত্ৰা সম্বোধিপ্পত্তো সব্বঞ্ঞুবুদ্ধো নাম. কপ্পসতসহস্সাধিকানি দ্ৰে অসঙ্খ্যেয্যানি পারমিযো পূরেত্ৰা সযম্ভূপত্তো পচ্চেকবুদ্ধো নাম. অৰসেসা খীণাসৰা চতুসচ্চবুদ্ধো নাম. বহুস্সুতো সুতবুদ্ধো নাম. ইধ পন সব্বঞ্ঞুবুদ্ধো অধিপ্পেতো.

ধিতিমাঞ্ঞধারকোতি এত্থ ধিতিমা অঞ্ঞধারকোতি পদচ্ছেদো কাতব্বো. ধিতিমাতি সমাধিৰন্তো, সম্পযুত্ত ধম্মে একারম্মণে ধারেতীতি ধিতি, সমাধি. ধাধাতুতি. আকারস্স ইকারাদেসো. ধিযতি ঠপেতি একারম্মণে সম্পযুত্তধম্মেতি ধিতি, চিত্তেন যোগেনেৰেসো একা রম্মণে পতিট্ঠাপনৰসেন চিত্তস্স আরম্মণে নিচ্চলভাৰেন পতিট্ঠাপেতীতি অত্থো. ধিতি অস্স অত্থীতি ধিতিমা, বুদ্ধো. সো হি যথা মহামেরু চতূহি দিসাহি ভুসং আগতেহি ৰাতেহি ন সমিঞ্জতি, এৰং পটিপক্খেহি মিচ্ছাৰাদ ৰাতেহি চ ইট্ঠানিট্ঠারম্মণেহি চ লাভালাভ যসাযস নিন্দা পসংস সুখদুক্খসঙ্খাতেহি লোকধম্মেহি চ ন সমিঞ্জতি, সমাধিৰন্তোযেৰ হোতীতি ৰুত্তং হোতি.

অঞ্ঞধারকোতি অরহত্তফলহারকো. ৰিমুত্তিসঙ্খাতং অরহত্তফলসেতচ্ছত্তং ধারেন্তো ৰা. জানাতি পঠম মগ্গেন দিট্ঠসচ্চস্স আমরিযাদং অনতিক্কমিত্ৰা ৰাতি অঞ্ঞং, অরহত্তফলং. আপুব্বঞাধাতু ক্ৰি. আসদ্দো মরিযাদত্থো. সংযোগপরত্তা আকারস্স রস্সো, তং ধারেতীতি অঞ্ঞধারকো. অঞ্ঞসদ্দূপপদধরধাতু ণ্ৰু. সংসারেতি খন্ধধাতুআযতনানং অব্বোচ্ছিন্নং পৰত্তমানে সংসারৰট্টে.

ৰুত্তঞ্হি অট্ঠকথাযং –

‘‘খন্ধানঞ্চ পটিপাটি, ধাতুআযতনান চ;

অব্বোচ্ছিন্নং ৰত্তমানা, সংসারোতি পৰুচ্চতী’’তি.

খন্ধধাতুআযতনানং অঞ্ঞমঞ্ঞসম্বন্ধেন সংপুনপ্পুনং সরতি গচ্ছতি পৰত্ততীতি সংসারো. সংপুব্বসরধাতু গতিম্হি ণ. অথ ৰা খন্ধাযতনধাতুযো সং অব্বোচ্ছিন্নং সরন্তি গচ্ছন্তি পৰত্তন্তি এত্থাতি সংসারোতি ৰচনত্থো কাতব্বো, তস্মিং. অনুভোসীতি অনুপুনপ্পুনং অভুঞ্জি, অৰেদযীতি অত্থো. কাযিকন্তি কাযে সরীরে পৰত্তং কাযিকং. চেতসিকন্তি চেতসি পৰত্তং চেতসিকং. তং পন পদদ্ৰযং দুক্খন্তিপদে ৰিসেসনং. দুক্খন্তি ৰট্টদুক্খং. দুক্খনং দুক্খং, অথ ৰা দুক্খযতীতি দুক্খং, দুক্খধাতু অ. ইদং পন নিব্বচনং কারিতৰসেন ৰুত্তং. যস্স উপ্পজ্জতি, তং দুক্খিতং করোতীতি ৰুত্তং হোতি. লোকতোতি সত্তলোকহেতু. লোকিযন্তি পৰত্তন্তি এত্থ পুঞ্ঞাপুঞ্ঞানি তব্বিপাকো চাতি লোকো. লোকধাতু ণ. অথ ৰা কুসলাদীনি লাতি গণ্হাতীতি লোকো. লাধাতু ওকপচ্চযো. সত্ত লোকোৰ লব্ভতি. ধিতিমা অঞ্ঞধারকো যো বুদ্ধো সংসারৰট্টে নিমুগ্গানং সত্তানমনুদযায সংসারৰট্টদুক্খতো পমোচেতুকামো কপ্পসতসহস্সাধিকানি চত্তারি অসঙ্খ্যেয্যানি অতিদুক্করানি সমতিংসপারমিযো পঞ্চ মহা পরিচ্চাগে চ করোন্তো সত্তলোকহেতু কাযিকং চেতসিকং সংসারৰট্টদুক্খং অনুভৰসীতি ৰুত্তং হোতি. তন্তি তাদিসং বুদ্ধং. ৰন্দেতি ৰন্দামি.

নরদেৰমঙ্গলন্তি নরদেৰানং মঙ্গলভূতং. অযং পনেত্থ ৰচনত্তো. নিরযং নেতি পাপুণাতীতি নরো, মনুস্সো. নিধাতু পাপুননে অরো. অরিযমনুস্সো পন ভূতপুব্বগতিক নযেন নরো নামাতি. অথ ৰা সেট্ঠভাৰং নেতীতি নরো, উত্তমং পব্বজ্জং নেতীতি অত্থো. ৰিমানৰত্থুঅট্ঠকথাযং পন জেট্ঠভাৰং নেতীতি নরো. পুত্তভাতুভূতোপি হি পুগ্গলো মাতুজেট্ঠভগিনীনং পিতুট্ঠানে তিট্ঠতি, পগেৰ ভত্তুভূতো ইতরাসন্তি ৰুত্তং. ৰিসুদ্ধিমগ্গমহাটীকাযং পন নরতীতি নরো, পুরিসো. যথা হি পঠমপকতিভূতো সত্তো ইতরায পকতিযা সেট্ঠট্ঠেন পুরিউচ্চে ঠানে সেতি পৰত্ততীতি পুরিসোতি ৰুচ্চতি, এৰং নযনট্ঠেন নরোতি ৰুচ্চতি. পুত্তভাতু ভূতোপি হি পুগ্গলো মাতুজেট্ঠভগিনীনং পিতুঠানে তিট্ঠতি. পগেৰ ইতরা ইতরাসন্তি ৰুত্তং. তস্মা ইধ পন নরন্তি সামঞ্ঞেন ৰুত্তম্পি ৰিসেসেন পুরিসনরন্তি ৰিঞ্ঞাযতি পধাননযেন গহণস্স যুত্তত্তা. দিব্বন্তি কামগুণ ঝানাভিঞ্ঞাচিত্তিস্সরিযাদীহি কীল়ন্তীতি দেৰা. দিৰুধাতু ণ. অথ ৰা সরীরালঙ্কারজুতিযা দিব্বন্তীতি দেৰা. দেৰা চ নাম তিৰিধা হোন্তি সম্মুতিদেৰা, উপপত্তিদেৰা, ৰিসুদ্ধিদেৰা চাতি. তত্থ মহাসম্মতকালতো পট্ঠায লোকেন দেৰাতি সম্মতত্তা রাজানো দেৰিযো রাজকুমারা চ সম্মুতিদেৰা নাম. দেৰলোকে উপপন্না উপপত্তিদেৰা নাম. বুদ্ধপচ্চেকবুদ্ধখীণাসৰা ৰিসুদ্ধিদেৰা নাম. ইধ পন উপপত্তিদেৰা অধিপ্পেতা.

মঙ্গলন্তি মঙ্গলভূতং. তন্তিপদে ৰিসেসনং. মঙ্গন্তি ৰড্ঢেন্তি সব্বসম্পত্তীহি সত্তানং এতেনাতি মঙ্গলো, বুদ্ধো. মঙ্গল ধাতু ৰড্ঢনে অলো. অথ ৰা মঙ্গং ৰুচ্চতি পাপং, তং ৰেনেয্যানং দেসনায লুনাতি ছিন্দতীতি মঙ্গলো, বুদ্ধো. মঙ্গসদ্দূপপদলুধাতু ক্ৰি. নরা চ দেৰা চ নরদেৰা, তেসং মঙ্গলো নরদেৰমঙ্গলো, বুদ্ধো. সো পন মনুস্সদেৰব্রহ্মানং পূজনীযত্তা চ সঙ্খে, চক্কং, পুণ্ণকুম্ভো, গরা, সিরী, সেতচ্ছত্তং, অঙ্কুসো, ধজং, সোৰত্তিকঞ্চাতি অট্ঠহি লোকিযমঙ্গলেহি সেট্ঠত্তা উত্তমত্তা চ মঙ্গলো নামাতি ৰুচ্চতি, তস্মা বুদ্ধস্স নরদেৰমঙ্গলন্তি থোমেতীতি অধিপ্পাযোতি.

অযং পনেত্থ সঙ্খেপযোজনা. ধিতিমা সমাধিৰন্তো অঞ্ঞধারকো অরহত্তফলধারকো অরহত্তফলসে তচ্ছত্তং ধারেন্তো ৰা, যো যাদিসো বুদ্ধো, সংসারে সংসারৰট্টে, কাযিকং কাযে পৰত্তং দুক্খঞ্চ ৰট্টদুক্খঞ্চ চেতসি পৰত্তং দুক্খঞ্চ ৰট্টদুক্খঞ্চ, লোকতো লোকহেতু, অনুভোসি পুনপ্পুনং অভৰসি অৰেদযি, নরদেৰমঙ্গলং নরদেৰানং মঙ্গলভূতং, তং তাদিসং বুদ্ধং অহং ৰন্দে ৰন্দামীতি.

ততিযৰন্দনগাথাৰণ্ণনা সমত্তা.

৪. বাত্তিংসতিলক্খণচিত্রদেহং,

দেহজ্জুতিনিগ্গতপজ্জলন্তং;

পঞ্ঞাধিতিসীলগুণোঘৰিন্দং,

ৰন্দে মুনিমন্তিমজাতিযুত্তং.

৪. এৰং ততিযগাথায বুদ্ধস্স নত্ৰা ইদানি বাত্তিংসতিলক্খণচিত্রদেহন্ত্যাদীহি ছহি গুণেহি থোমিত্ৰা মুনিনো ৰন্দিতুকামো বাত্তিংসতি লক্খণ চিত্র দেহ ন্ত্যাদিগাথমাহ. অযং পন ত জ জ গণ গরুদ্ৰয যুত্তত্তা একাদসক্খরেহি লক্খিতা উপট্ঠিতা গাথাতি দট্ঠব্বা. ৰুত্তঞ্হি ৰুত্তোদযে ত্জা জ্গা গরুনাযমুপট্ঠিতা সা’’তি. তস্সত্থো. যস্সং পটিপাদং ত্জা তজগণা চ জ্গাজগণগরূ চ গরুনা পাদন্তগরুনা চে যুত্তা, সা অযং গাথা উপট্ঠিতা নামাতি. এত্থ চ এক গরুকে সতিপি দ্ৰিগরুকেপি লক্খণসমানত্তা উপট্ঠিতা গাথা নামাতি দট্ঠব্বা. তত্থ বাত্তিংসতি লক্খণ চিত্র দেহন্তি দ্ৰত্তিংসমহাপুরিসলক্খণেহি ৰিচিত্রং সরীরৰন্তং. এত্থ চ দ্ৰীহি অধিকং তিংসং বাত্তিংসতি. দ্ৰিসদ্দস্স বাদেসো. লক্খিযতি লক্খিতব্বং বুদ্ধসরীরং এতেনাতি লক্খণং. দিহতি উপচযতি ৰড্ঢতি ৰা এত্থ কুসলা কুসলন্তি দেহং, সরীরং. দিহধাতু উপচযে ৰড্ঢনে ৰা ণ. বাত্তিংসতি মহাপুরিসলক্খণেহি চিত্রং ৰিচিত্রং দেহং সরীরং যস্স সোতি বাত্তিংসতিলক্খণচিত্রদেহো, মুনি লব্ভতি.

ইদং পনেত্থ দ্ৰত্তিংসমহাপুরিসলক্খণসরূপস্স সঙ্খেপ দস্সনং. সুপ্পতিট্ঠিতপাদো চ, আযতপণ্হি, দীঘঙ্গুলি, মুদুত লুণহত্থপাদো, জালহত্থপাদো, উস্সঙ্খপাদো, এণিজঙ্ঘো, ঠিতকোৰ অনোনমন্তো উভোহি পাণিতলেহি জাণু কানি পরিমসতি পরিমজ্জতি, কোসোহিতৰত্থগুয্হো, সুৰণ্ণ ৰণ্ণো কঞ্চনসন্নিভত্তচো, সুখুমচ্ছৰী, একেকলোমো, উদ্ধগ্গলোমো, ব্রহ্মুজুগত্তো, সত্তুস্সদো, সীহপুব্বদ্ধ কাযো, চিতন্তরংসো, নিগ্রোধপরিমণ্ডলো, সমৰট্টক্খন্ধো, রসগ্গরসী, সীহহনু, চত্তালীসদন্তো, সমদন্তো, অৰিরল়দন্তো, সুসুক্কদাঠো, পহূতজিৰ্হো, ব্রহ্মস্সরো করৰীকভাণি, অতিনীলনেত্তো, গোপখুমো, উণ্ণা ভমু কন্তরে জাতো, উণ্হীসসীসো চাতি দ্ৰত্তিংসৰিধানি হোন্তি মহাপুরিসলক্খণানি.

তেন ৰুত্তং পাথেয্যৰগ্গে লক্খণসুত্তে ‘‘কতমানি তানি ভিক্খৰে দ্ৰত্তিংসমহাপুরিসস্স মহাপুরিসলক্খণানি, যেহি সমন্নাগতস্স মহাপুরিসস্স দ্ৰে গতিযো ভৰন্তি, অনঞ্ঞা. সচে অগারং অজ্ঝাৰসতি রাজা হোতি চক্কৰত্তি…পে… সচে খোপন অগারস্মা অনগারিযং পব্বজতি, অরহং হোতি সম্মা সম্বুদ্ধো লোকে ৰিৰটচ্ছদো ১. ইধ ভিক্খৰে মহা পুরিসো সুপ্পতিট্ঠিতপাদো হোতি. যম্পি ভিক্খৰে মহা পুরিসো সুপ্পতিট্ঠিতপাদো হোতি. ইদম্পি ভিক্খৰে মহা পুরিসস্স মহাপুরিসলক্খণং ভৰতি ২. পুন চপরং ভিক্খৰে মহাপুরিসস্স হেট্ঠাপাদতলেসু চক্কানি জাতানি হোন্তি সহস্সারানি সনেমিকানি সনাভিকানি সব্বা কারপরিপূরানি. ইদম্পি ভিক্খৰে মহাপুরিসস্স মহাপুরিস লক্খণং ভৰতি ৩. পুন চপরং ভিক্খৰে মহাপুরিসো আযতপণ্হী হোতি ৪. দীঘঙ্গুলী হোতি ৫. মুদুতলুণ হত্থপাদো হোতি ৬. জালহত্থপাদো হোতি ৭. উস্সঙ্খপাদো হোতি ৮. এণিজঙ্ঘো হোতি ৯. ঠিতকোৰ অনোনমন্তো উভোহি পাণিতলেহি জাণুকানি পরিমসতি পরিমজ্জতি ১০. কোসোহিতৰত্থগুয্হো হোতি ১১. সুৰণ্ণৰণ্ণো কঞ্চনসন্নিভত্তচো ১২. সুখুমচ্ছৰী হোতি সুখুমত্তা ছৰিযা রজোজল্লং কাযে ন উপলিম্পতি ১৩. একেকলোমো হোতি, একেকানি লোমানি লোমকূপেসু জাতানি ১৪. উদ্ধগ্গলোমো হোতি. উদ্ধগ্গানি লোমানি জাতানি নীলানি অঞ্জনৰণ্ণানি কুণ্ডলা ৰত্তানি পদক্খিণাৰত্তকজাতানি ১৫. ব্রহ্মুজুগত্তো হোতি ১৬. সত্তুস্সদো হোতি ১৭. সীহপুব্বদ্ধ কাযো হোতি ১৮. চিতন্তরংসো হোতি ১৯. নিগ্রোধপরিমণ্ডলো হোতি, যাৰতক্ৰস্স ব্যামো, তাৰ তক্ৰস্স কাযো ২০. সমৰট্টক্খন্ধো হোতি ২১. রসগ্গ সগ্গী হোতি ২২. সীহহনু হোতি ২৩. চত্তালীসদন্তো হোতি ২৪. সমদন্তো হোতি ২৫. অৰিরল়দন্তো হোতি ২৬. সুসুক্কদাঠো হোতি ২৭. পহূতজিৰ্হো হোতি ২৮. ব্রহ্মস্সরো হোতি করৰীকভাণি ২৯. অতিনীলনেত্তো হোতি ৩০. গোপখুমো হোতি ৩১. উণ্ণা ভমুকন্তরে জাতা হোতি ওদাতা মুদুতূল সন্নিভা. যম্পি ভিক্খৰে মহাপুরিসস্স উণ্ণা ভমুকন্তরে জাতা হোতি ওদাতা মুদুতূলসন্নিভা. ইদম্পি ভিক্খৰে মহাপুরিসস্স মহাপুরিসলক্খণং ভৰতি ৩২. পুন চপরং ভিক্খৰে মহাপুরিসো উণ্হীসসীসো হোতি. যম্পি ভিক্খৰে মহাপুরিসো উণ্হীসসীসো হোতি. ইদম্পি ভিক্খৰে মহাপুরিসস্স মহাপুরিসলক্খণং ভৰতি. ইমানি খো তানি ভিক্খৰে দ্ৰত্তিংসমহাপুরিসস্স মহাপুরিস লক্খণানী’’তি. এতেসং পন দ্ৰত্তিংসমহাপুরিসলক্খণানং অত্থো পচ্ছা আৰিভৰিস্সতীতি.

দেহজ্জুতিনিগ্গতপজ্জলন্তন্তি ভগৰতো রূপকাযতো নিক্খন্তেহি ছব্বণ্ণরংসীসঙ্খাতেহি ওভাসেহি পরিসমন্ততো ৰিজ্জোতৰন্তং. জৰতি দিব্বতীতি জুতি. জুধাতুতি. নিগচ্ছতি নিচ্ছরতীতি নিগ্গতা, রস্মি. নিপুব্বগমুধাতু ত. পকারেন জলতে দিব্বতে পজ্জলন্তং. এত্থ চ দেহনিগ্গতজুতীতি ৰত্তব্বে ছন্দানুরক্খণত্থং পদৰিপরিযাযেন দেহজ্জুতিনিগ্গতন্তি ৰুত্তং. তস্মা দেহতো নিগ্গতা জুতীতি সমাসো দট্ঠব্বো. দেহতো রূপকাযতো নিগ্গতেহি নিচ্ছরেহি জুতীহি রংসীহি পজ্জলন্তং যস্স সোতি দেহজ্জুতি নিগ্গতপজ্জলন্তো, মুনি লব্ভতি. মুনিনো হি পুরত্থিমকাযতো ছব্বণ্ণরস্মিযো উট্ঠহিত্ৰা অসীতিহত্থট্ঠানং অগ্গ হেসি. পচ্ছিমকাযতো দক্খিণহত্থতো ৰামহত্থতো ছব্বণ্ণা রস্মিযো উট্ঠহিত্ৰা অসীতিহত্থট্ঠানং অগ্গহেসি. উপরি কেসন্ততো পট্ঠায সব্বকেসৰত্তেহি মোরগীৰৰণ্ণা রস্মি উট্ঠহিত্ৰা গগনতলে অসীতিহত্থট্ঠানং অগ্গহেসি. হেট্ঠাপাদতলেহি পৰাল়ৰণ্ণা রস্মি উট্ঠহিত্ৰা ঘনপথৰিযং অসীতিহত্থট্ঠানং অগ্গহেসি, এৰং সমন্তা অসীতিহত্থমত্তং ঠানং ছব্বণ্ণা বুদ্ধরস্মিযো ৰিজ্জোতমানা ৰিপ্ফন্দমানা কঞ্চনদণ্ডদীপিকাহি নিচ্ছরিত্ৰা আকাসং পক্খন্দজালা ৰিয চতুদ্দীপিক মহামেঘতো নিক্খন্তৰিজ্জুলতা ৰিয ৰিধাৰিংসূতি ৰুত্তং হোতি. তস্মা দেহজ্জুতিনিগ্গতপজ্জলন্তন্তি থোমেতীতি.

পঞ্ঞাধিতি সীল গুণোঘৰিন্দন্তি এত্থ পঞ্ঞাতি সব্বঞ্ঞুত ঞাণং. ধিতীতি ঝানমগ্গফলসম্পযুত্তসমাধি. সীলন্তি পচ্চেক বুদ্ধারিযসাৰকেহি অসাধারণং সুৰিসুদ্ধং চতুপারিসুদ্ধিসীলং. ওঘন্তি সমূহং. ৰিন্দন্তি লদ্ধং. পকারেন যথাসভাৰং সব্বঞেয্যধম্মং ৰা জানাতি পটিৰিজ্ঝতীতি পঞ্ঞা. সব্বঞ্ঞুত ঞাণং. পপুব্বঞাধাতু অ. সা পনেসা পজাননলক্খণা পটিৰেধলক্খণা ওভাসনলক্খণা চ, ৰিসযোভাস রসা, অসম্মোহপচ্চুপট্ঠানা, সমাধিপদট্ঠানা. ধিতিসদ্দস্স ৰচনত্থো হেট্ঠা ৰুত্তোযেৰ. সীলতীতি সীলং. কাযৰচীকম্মানি সম্মা দহতি সম্মা ঠপেতীতি অত্থো. অথ ৰা সীলতি সমাধিযতি কাযকম্মাদীনং সুসিল্য ভাৰেন ন ৰিপ্পকিরতীতি সীলং, সীলন্তি সমাদহন্তি চিত্তং এতেনাতি ৰা সীলং, চতুপারিসুদ্ধিসীলং. সীলধাতু অ. ইদং পন পতিট্ঠাপনলক্খণং, দুস্সিল্যৰিদ্ধংসনরসং অনৰজ্জরসং ৰা, সোচেয্যপচ্চুপট্ঠানং, হিরিওত্তপ্পপদট্ঠানং. গুণসদ্দস্স ৰচনত্থো হেট্ঠা ৰুত্তোযেৰ. উহনতি সমূহং করোতি এত্থ অৰযৰন্তি ওঘো, সমূহো. উপুব্বহনধাতু ণ. উস্স ও. হনস্স ঘো. অভিধানপ্পদীপিকাটীকাযং পন ‘‘অৰযৰং ব্যপিযতি গচ্ছতীতি ওঘো’’তি ৰুত্তং. ৰিন্দনংলভনং ৰিন্দং, ৰিন্দিযিত্থ লব্ভিত্থাতি ৰা ৰিন্দং, পঞ্ঞা চ ধিতি চ সীলঞ্চ তং গুণঞ্চাতি পঞ্ঞাধিতিসীলগুণা, তেসং ওঘো সমূহোতি তথা, তং ৰিন্দং লভনং যস্সাতি পঞ্ঞাধিতিসীলগুণোঘৰিন্দো, মুনি. অথ ৰা ৰিন্দং লভিতব্বং পঞ্ঞাধিতিসীলগুণোঘং যেনাতি পঞ্ঞাধিতিসীলগুণোঘৰিন্দো. ততিযাবহুব্বীহি সমাসোযং. ৰিন্দানং লভিতব্বানং পঞ্ঞাধিতিসীল সঙ্খাতানং গুণানং সমূহো অত্থীতি অত্থো. তং.

ৰন্দেতি অহং ৰন্দামি. মুনিন্তি বুদ্ধং. মুনাতি জানাতি পরিচ্ছিন্দতি ৰা হিতাহিতন্তি মুনি, বুদ্ধো. মুনধাতু ঞাণে ই. অথ ৰা মুনাতি জানাতি উভো অত্থেতি মুনি, খন্ধাদি লোকে তুলং আরোপেত্ৰা মিনন্তো ৰিয ইমে অজ্ঝত্তিকা খন্ধা ইমে বাহিরাতিআদিনা নযেন ইধলোকত্থঞ্চ পরলোকত্থঞ্চ ভগৰা জানাতীতি অত্থো. সো পনেস অগারিযমুনি, অনাগারিযমুনি, সেখমুনি, অসেখমুনি, পচ্চেকমুনি, মুনিমুনি চাতি অনেকৰিধো. তত্থ অগারিযমুনীতি গিহিপি আগতফলো ৰিঞ্ঞাতসাসনো. অনাগারিযমুনীতি তথারূপোৰ পব্বজিতো. সেখমুনীতি সত্ত সেক্খা. অসেখমুনীতি খীণাসৰো. পচ্চেকমুনীতি পচ্চেকবুদ্ধো. মুনিমুনীতি সম্মাসম্বুদ্ধো. তেসু পন ইধ মুনিমুনি অধিপ্পেতো, তং মুনিং. অন্তিমজাতিযুত্তন্তি অন্তিমেন চরিমভৰেন যুত্তং. অৰসানং অমতি গচ্ছতীতি অন্তং. অমধাতু ত. মস্স নো. অন্তে ভৰো অন্তিমো, চরিমভৰো. জাননং নিব্বত্তনং জাতি, খন্ধানং পৰত্তি. কম্মেন জনিযতি নিব্বত্তিযতীতি ৰা জাতি. উপপত্তিভৰো লব্ভতি. জানিধাতুতি. ধাত্ৰন্ত লোপো. অন্তিমজাতিযা যুত্তোতি অন্তিমজাতিযুত্তো, মুনি. আযতিঞ্হি তীসু ভৰেসু পটিসন্ধিজনকানং সব্ব কিলেসানং বোধিপল্লঙ্কেযেৰ অগ্গমগ্গেন সমুচ্ছিন্দিতত্তা ভগৰতো অনাগতে পুনব্ভৰো নত্থি, তস্মা অযং অরিযজাতি পচ্ছিমত্তভাৰযুত্তোতি ৰুত্তং হোতি.

তেন ৰুত্তং ধম্মচক্কপৰত্তনসুত্তে –

‘‘ঞাণঞ্চ মেদস্সনং উদপাদি, অকুপ্পামে ৰিমুত্তি, অযমন্তিমা জাতি, নত্থিদানি পুনব্ভৰো’’তি.

অযং পনেত্থ সঙ্খেপযোজনা. বাত্তিংসতিলক্খণচিত্রং দেহং দ্ৰত্তিংসমহাপুরিসলক্খণেহি ৰিচিত্রং রূপকাযৰন্তং, দেহজ্জুতিনিগ্গত পজ্জলন্তং রূপকাযতো নিগ্গতেহি ছব্বণ্ণরং সীহি পরিসমন্ততো ৰিজ্জোতৰন্তং, পঞ্ঞাধিতিসীলগুণো ঘৰিন্দং পঞ্ঞাধিতিসীলসঙ্খতানং গুণানং সমূহং লভনৰন্তং, ৰিন্দিতব্বানং পঞ্ঞাধিতিসীলসঙ্খাতানং গুণানং সমূহৰন্তং ৰা, অন্তিমজাতিযুত্তং চরিমভৰেন চরিমত্তভাৰেন ৰা যুত্তং মুনিং বুদ্ধং অহং তীহি দ্ৰারেহি সক্কচ্চং ৰন্দে ৰন্দামীতি.

চতুত্থৰন্দনগাথাৰণ্ণনা সমত্তা.