৭. সত্তমো কণ্ডো (ণ্ৰাদি)

‘‘বহুলং’’ (১.৫৮) ‘‘ক্রিযত্থা’’তি (৫.১৪) চ সব্বত্থ ৰত্থতে.

১. চর দর কর রহ জন সন তল সাদ সাধ কসাস চটায ৰাহি ণু.

চর-গতিভক্খণেসু, দর-দরণে, কর-করণে, রহ-চাগে, জন-জননে, সন-সম্ভত্তিযং, তল-পতিট্ঠাযং, সাদ-অস্সাদনে, সাধ-সংসিদ্ধিযং, কস-ৰিলেখনে, অস-খেপনে, চট-ভেদনে, অয-ইতি গমনত্থো দণ্ডকো ধাতু, ৰা-গতিগন্ধনেসু, এতেহি ক্রিযত্থেহি বহুলং ণু হোতি. ‘‘অস্সা ণানুবন্ধে’’তি (৫.৮৪) উপন্তস্স অস্স আ, চরতি হদযে মনুঞ্ঞভাৰেনাতি চারু=সোভনং. দরীযতীতি দার=কট্ঠং. করোতীতি কারু=সিপ্পী, মঘ ৰা, ৰিসুকম্মো চ. রহতি চন্দাদীনং সোভাৰিসেসং নাসেতীতি রাহু=অসুরিন্দো. জাযতি গমনাগমনং অনেনাতিজানু=জঙ্ঘোরূনং সন্ধি. সনেতি অত্তনি ভত্তিং উপ্পাদেতীতি সানু=গিরিপ্পদেসো. তলন্তি পতিট্ঠহন্তি এত্থ দন্তাতি তালু=ৰদনেকদেসো. সা দীযতি অস্সাদীযতীতি সাদু=মধুরং. সাধেতি অত্তপরহিতন্তি সাধু=সজ্জনো. কসীযতীতি কাসু=আৰাটো, অসতি সীঘভাৰেন পৰত্ততীতি আসু=সীঘং. চটতি ভিন্দতি অমনুঞ্ঞভাৰন্তি চাটু=মনুঞ্ঞো. অযন্তি পৰত্তন্তি সত্তা এতেনাতি আযু=জীৰিতং. ‘‘অস্সা ণাপিম্হি যুক’’ ইতি (৫.৯১) যুক- ৰাতি গচ্ছতীতি ৰাযু-ৰাতো.

২. ভর মর চর তর অর গর হন তন মন ভম কিত ধন বংহ কম্বম্ব চক্খ ভিক্খ সংকিন্দন্দ যজ পটাণাস ৰস পস পংস বন্ধা উ.

ভর-ভরণে, মর-পাণচাগে, চর-গতিভক্খণেসু, তর তরণে, অর-গমনে, গর ঘর-সেচনে, গিরাতি ৰা নিপাতনা অকারো, হন-হিং সাযং, তন-ৰিত্তারে, মন-ঞাণে, ভম-অনৰট্ঠানে, কিত-নিৰাসে, ধন-সদ্দে, বংহ ব্রহ ব্রূহ-ৰুদ্ধিযং, কম্ব-সংৰরণে, অম্ব-সদ্দে, চক্খ ইক্খ দস্সনে, ভিক্খ-যাচনে, সংকসঙ্কাযং, ইন্দ-পরমিস্সরিযে, অন্দ-বন্ধনে, যজ-দেৰপূজাযং, অট পট-গমনথা, অণ-সদ্দত্থো, অস-খেপনে, ৰস-নিৰাসে, পসবাধনে, পংস-নাসনে, বন্ধ-বন্ধনে, এতেহি ক্রিযত্থেহি উ হোতি. ভরতীতি ভর=ভত্তা. মরতি রূপকাযেন সহেৰাতি মরু=দেৰো, নিজ্জলদেসো চ. চরীযতি ভক্খীযতীতি চরু=হব্যপা কো. তরন্তি অনেনাতি তরু=রুক্খো. অরতি সূনভাৰেন উদ্ধং গচ্ছতীতি অরু=ৰণো. গরতি সিঞ্চতি, গিরতি ৰমতি ৰা সিস্সেসু সিনেহন্তি গরু=আচরিযো. হনতি ওদনাদীসু ৰণ্ণৰিসেসং নাসেতীতি হনু=ৰদনেকদেসো. তনোতি সংসার দুক্খন্তি তনু-সরীরং. মঞ্ঞতি সত্তানং হিতাহিতন্তি মনু=পজাপতি. ভমতি চলতীতি ভমু=নযনো পতিট্ঠানং. কেততি উদ্ধং গচ্ছতি, উপরি নিৰসতীতি ৰা কেতু=ধজো. ধনতি সদ্দং করোতীতি ধনু=চাপো. বংহ ইতি নিদ্দেসা উম্হি নিচ্চং নিগ্গহীতলোপো, বংহতি ৰুদ্ধিং গচ্ছতীতি বহু=অনপ্পকং. কম্বতি সংৰরং করোতীথি কম্বু=ৰলযো, সঙ্খো চ. অম্বতি নাদংকরোতীতি অম্বু=ৰারি. চক্খতি রূপন্তি চক্খু=নযনং. ভিক্খতীতি ভিক্খু=সমণো. সংকিরতীতি সংকু=সূলং. ইন্দতি নক্খত্তানং পরমিস্সরিযং পৰত্তেতীতি ইন্দু=চন্দো. অন্দন্তি বন্ধন্তি সত্তা এতাযাতি অন্দু=সঙ্খলিকা. যজন্তি অনেনাতি যজু=ৰেদো. পটতি ব্যত্তভাৰং গচ্ছতীতি পটু=ৰিচক্খণো. অণতি সুখুমভাৰেন পৰত্ততীতি অণু=সুখুমো, ৰীহিভেদো চ. অসন্তি পৰত্তন্তি সত্তা এতেহীতি অসৰো=পাণা. সুখং ৰসন্ত্যনেনাতি ৰসু=ধনং. পসীযতি বাধীযতি সামিকেহীতি পসু. চতুপ্পদো. পংসতি সোভাৰিসেসং নাসেতীতি পংসু=রেণু. বন্ধীযতি সিনেহভাৰেনাতি বন্ধু=ঞাতি.

৩. বন্ধা ঊ ৰধো চ.

বন্ধ-বন্ধনে তিমস্মা ঊ হোতি, বন্ধস্স ৰধাদেসো চ. পঞ্চহি কামগুণেহি অত্তনি সত্থে বন্ধতীতি ৰধূ-সুণিসা, ইত্থীচ.

৪. জম্বাদযো.

জম্বূআদযো সদ্দাঊপচ্চযন্তা নিপচ্চন্তে, নিপাতনং অপ্পত্তস্স পাপনং পত্তস্স পটিসেধো চ. জনিস্মা ঊ, বুকাগমো, ‘‘মনানং নিগ্গহীত’’ন্তি (৫.৯৬) নস্স নিগ্গহীতং, ‘‘ৰগ্গে ৰগ্গন্তো’’তি (১.৪১) নিগ্গহীতস্স মো, জাযতি, জনীযতী ৰা জম্বূ=রুক্খো. ভমিস্স অমলোপো, ভমতি কম্পতীতি ভূ=ভমু. করোতিস্মা ঊ, তস্স কন্ধুঞ চ, ‘‘পররূপমযকারে ব্যঞ্জনে’’তি (৫.৯৫) ধাত্ৰন্তস্স ব্যঞ্জনস্স পররূপত্তং, রুধিরুপ্পাদং করোতীতি কক্কন্ধূ=বদরী. লম্ব-অৰসংসনে, আপুব্বো, সংযোগাদিলোপদীঘরস্সা, আলম্বতি অৰসংসতীতি অলাবূ=তুম্বি. সর-গতি হিংসাচিন্তাসু, ঊম্হি অভুক অবুক চ, সরতি গচ্ছতীতি সরভূ=একা মহানদী. সরতি পাণে হিংসতীতি সরবূ=খুদ্দজন্তুকৰিসেসো. চমঅদনে, চমতি ভক্খতি নিৰাপন্তি চমূ=সেনা. তন-ৰিত্থারে, তনোতি সংসারদুক্খন্তি তনু=সরীরং, এৰমঞ্ঞেপি পযোগতো দট্ঠব্বা.

৫. তপুস ৰি ধ কুর পুথ মুদা কু.

তপ-সন্তাপে, উস-দাহে, ৰিধ-ৰেধনে, কুর-সদ্দে, পুথ পথ-ৰিত্থারে, মুদ-তোসে, এতেহি কু, হোতি. ককারোনুবন্ধো ‘‘ন তে কানুবন্ধনাগমেসূ’’তি (৫.৮৫) এওনমভাৰত্থো. তপ ইতি নিদ্দেসতোৰ অস্স ইত্তং, তাপীযতীতি তিপু=লোহৰিসেসো. উসতি দাহং করোতীতি উসু=সরো. ৰেধতি রংসীহি তিমিরন্তি ৰিধু=চন্দো. কুরতি কিচ্চাকিচ্চং ৰদতীতি কুরু=রাজা, কুরৰো=জনপদো. পুথতি মহন্থভাৰেন পত্থিরতীতি পুথু=ৰিত্থিণ্ণো, মোদনং, মুদীযতীতি ৰা মুদু=অথদ্ধো.

৬. সিন্ধাদযো.

সিন্ধু আদযো কুপচ্চযন্তা নিপচ্চন্তে. সন্দ-পস্সৰনে, অস্স ইত্তং, ধোচান্তা দেসো নিপাতনা, সন্দতি পস্সৰতীতি সিন্ধু=নদি, ৰহিসুপন্তস্স দীঘাদিবত্তে, বাধিস্স ৰান্তহত্তে চ, ৰহন্ত্যনেনাতি বাহু, বাধতি উপদ্দৰে ৰারেতী তি ৰা বাহু=ভুজো. রংঘ-গমনে, নিগ্গহীতলোপো, রঙ্ঘতি পৰত্তহি রাজধম্মেতি রঘু=রাজা. ৰিদ-লাভে, নকারাগমো, ৰস্স বো, ৰিন্দত্যনেন নন্দনন্তি বিন্দু=কণিকা. মন-ঞাণে, নস্স ধো, মঞ্ঞতি ঞাযতি মধুরন্তি মধু=মধুকরীহি কতমধু, রপ লপ জপ জপ্প-ৰচনে, অস্সইত্তং, রপতি জপ্পতি মন্তন্তী রিপু=পচ্চামিত্তো. সস-গতি হিং সাপাণনেসু, অস্স উত্তং, সসতি জীৰতীতি সুসু=যুৰা. অর গমনে, অস্সউত্ত মূত্তঞ্চ, অরতি মহন্তভাৰং গচ্ছতীতি উরু=মহা, অরতিনেনাতি ঊরু-সত্থি. খণ-অৰদারণে, আ পুব্বো অনলোপো, আখনতীতি আখু=উন্দূরো. তরতরণে, তস্স থো, তরতীতি থরু=খগ্গাৰযৰো. লংঘ-গতি সোসনেসু ঘস্স ৰা হত্তং, নিগ্গহীতলোপো চ, লঙ্ঘতি পৰত্ততি লঘুভাৰেনাতি লঘু লহূ একত্থা, (ভংজ-ওমদ্দনে, প-পুব্বো, জস্স গত্তং, পভঞ্জতি ৰিসেসেনাতি পভঙ্গু=ভঙ্গুরো.) ঠা-গতিনিৰত্তিযং, সুপুব্বো, ঠাতি পৰত্ততি সুন্দরভাৰেনাতি সুট্ঠু=সোভনং, দুপুব্বো ঠাতি পৰত্ততি অসুন্দরভাৰেনাতি দুট্ঠু=অসোভনং. এৰমঞ্ঞেপি ৰিঞ্ঞেয্যা.

৭. ই.

ক্রিযত্থা বহুলং ই হোতি, অভ-খেপনে, অসীযতি খিপীযতীতি অসি=খগ্গো. কস-ৰিলেখনে, কসীযতে কসি=কসনং. মস-আমসনে, মসীযতীতি মসি=মেল়া. কু-সদ্দে ও অৰাদেসা, কৰতি কথেভীতি কৰি=কব্বকারো. রুসদ্দে, রৰতি গজ্জতীতি রৰি=আদিচ্চো. সপ্প-গমনে, সপ্পতি পৰত্ততীতি সপ্পি=ঘতং. গন্থ-গন্থনে, ‘‘ত থ ন রানং ট ঠ ণলা’’তি (১.২৫) নথানং ণঠা, গন্থেতীতি গণ্ঠি=পব্বো, গণ্ঠিচ. রাজ-দিত্তিযং, রাজতি পৰত্ততীতি রাজি=পাল়ি. কল-সঙ্খ্যানে, কলীযতি পরিমীযতীতি কলি=পাপং. বল-পাণনে, বলন্তি জীৰন্তি অনেনাতি বলি=করো. ধন-সদ্দে, ধনতি নদতীতি ধনি=সদ্দো. অচ্চ অঞ্চ-পূজাযং, অচ্চীযতি পূজীযতীতি অচ্চি=জালা. ৰল ৰল্ল-সংৰরণে, ৰলনং সংকোচনং ৰলি=উদরাদীসু পলি, ৰল্লীযন্তি সংৰরীযন্তি সত্তা এতাযাতি ৰল্লি=লতা. ৰিম্হি ৰলী ৰল্লীতিপি হোতি, সোযেৰত্থো, এৰমঞ্ঞেপি.

৮. দঝাদযো.

দধিআদযো সদ্দা ইপচ্চযন্তা নিপচ্চন্তে. ধা-ধারণে, দ্ৰিভাৰো নিপাতনা, ঘতমাদধাতীতি দধি=গোর সৰিসেসো. অংহ-গমনে, নিগ্গহীতলোপো, অংহতি গচ্ছতীতি অহি=সপ্পো. কম্প চলনে, সংযোগাদিলোপো, কম্পতি চলতীতি কপি=ৰানরো. মন-ঞাণে, অস্স উত্তং, মনতি জানাতীতি মুনি=সমণো. নস্স ণত্তং, মনতি মহগ্ঘভাৰং গচ্ছতীতী মণি=রতনং. ইক্খ চক্খ-দস্সনে, ইস্স অত্তং ইক্খতি অনেনাতি অক্খি=নযনং. কমপৰিক্খেপে, অস্স ইত্তং, কমতি যাতীতি কিমি=খুদ্দজন্তুকৰিসেসো. তর তরণে, তিত্তিরাদেসো, তুরিতো তরতি যাতীতি তিত্তিরি=পক্খিৰিসেসো. কীল়-ৰিহারে, ঈস্স এত্তং, কীল়নং কেল়ি=কীল়া. উসিস্মা ইস্স খলুঞ, উসতি দহতী উক্খলি=ভাজনং, এৰমঞ্ঞেপি.

৯. যুৰণ্ণুপন্তা কি.

ইৰণ্ণুপন্তেহি চ উৰণ্ণুপন্তেহি চ ক্রিযত্থেহি বহুলং কি হোতি. ককারো-নুবন্ধো, ইস সিস-ইচ্ছাযং, সিৰং ইচ্ছতীতি ইসি=তপস্সী. গির-নিগিরণে, গিরতি পসৰতি ছৰিমংসসারভূতং ভেসজ্জাদিন্তি গিরি=সেলো. সুচ-সোচনে. সোচনং সুচি=সোচেয্যং, রুচ-অভিলাসে রুচন্তি এতাযাতি রুচি=আভিলাসো, এৰমঞ্ঞেপি.

১০. ৰপ ৰর ৰস রস নভ হর হন পণা ইণ.

ৰপ-বীজনিক্খেপে, ৰর-ৰরণসম্ভত্তীসু, ৰস-নিৰাসে, রস-অস্সাদনে, নভ-হিংসাযং, হর হরণে, হন হিংসাযং, পণ-ব্যৰহারথুতিসু, এতেহি ইণ হোতি. ৰপন্তি এতাযাতি ৰাপি=জলাসযো. ৰারেন্তি এতেনাতি ৰারি=জলং. ৰসন্তি এতাযাতি ৰাসি=তচ্ছক ভণ্ডং. রসীযতি অস্সাদনৰসেন সমো সরীযতীতি রাসি=সমূহো. নভতি হিংসতীতি নাভি=সরীরাৰযৰো. হারেতীতি হারি=মনুঞ্ঞং. ‘‘হনস্স ঘাতো ণানুবন্ধে’’ (৫.৯৯) তি হনস্স ঘাতো, হনন্তি এতেনাতি ঘাতি=পহরণং, পণতি ৰোহরতীতি পাণি, পণতি ৰোহরতি এতেনাতি ৰা পাণি=করো.

১১. ভূগমা ঈণ.

ভূ-সত্তাযং, অম গম-গমনে এতেহি ঈণ হোতি ভৰিস্সতি কালে. ভৰিস্সতীতি ভাৰী=ভৰিস্সমানো. গমিস্সতীতি গামী=গমিস্সামানো.

১২. তন্দলক্খা ঈ.

তন্দ-আলসিযে, লক্খ-দস্সনঙ্কেসু, এতেহি ঈ হোতি. তন্দনং তন্দী=আলস্যং, লক্খীযন্তি সত্তা এতাযাতি লক্খী=সিরী.

১৩. গমা রো.

গমিস্মা রো হোতি. ‘‘রানুবন্ধেন্তসরাদিস্সা’’তি (৪.১৩২) অমলোপো, গচ্ছতীতি গো=পসু.

(ইতি সরপচ্চযৰিধানং).

১৪. ই ভী কা করার ৰক সক ৰাহি কো.

ই-অজ্ঝেন গতীসু, ভী-ভযে, কা গা-সদ্দে, কর-করণে, অর-গমনে, কুক ৰক-আদানে, সক-সত্তিযং, ৰা-গতিবন্ধনেসু, এতেহি কপচ্চযো হোতি. এতি পৰত্ততীতি এতো=অসহাযো. ভাযন্তি এতস্মাতি ভেকো=মণ্ডূকো. কাযতি সদ্দং করোতীতি কাকো=ৰাযসো. করোতি ৰণ্ণকন্তি কক্কো=ৰণ্ণৰিসেসো, পিসিতদব্বঞ্চ. অরতি যাতীতি অক্কো=সূরো, ৰিটপিৰিসেসো চ. ৰকতি ওদনং আদদাতীতি ৰক্কং=দেহকোট্ঠাসৰিসেসো, সক্কতীতি সক্কো-দেৰিন্দো, সমত্থো চ. ৰাতি বন্ধতি এতেনাতি ৰাকো=ৰক্কলং.

১৫. ঞুকাদযো.

ঞুকাদযো কপচ্চযন্তা নিপচ্চন্তে. ঊহ-ৰিতক্কে, হলোপো নিপাতনা ঊহীযতি ৰিচিনীযতীতি ঊকা-ওকোদনী. উন্দ কিলেদনে, সংযোগাদি লোপো, অক চ. উন্দতি দ্রৰং করোতীতি উদকং=জলং. ভী-ভযে, এত্তাভাৰো, ভাযন্তি এতস্মাতি ভীকো=ভীরু. সক-সত্তিযং, উপন্তস্সি, সক্কোতি ধারেতুন্তি সিক্কা=উপকরণৰিসেসো. হা-চাগে, হীযতি সাধূহি জহীযতীতি হাকো=কোধো. সম্ব-মণ্ডনে, কস্স উঞ, সম্বতি উদকং মণ্ডেতীতি সম্বুকো=জলজন্তুৰিসেভো. পুথ পথ-ৰিত্থারে, ওত্তাভাৰো, কস্স উঞ, পুথতি পত্থরতি অত্তনো বালভাৰন্তি পুথুকো=বালো. সুচ-সোকে, সোচন্তি এতেনাতি সুক্কং=সম্ভৰো, সেতঞ্চ. চি-চযে, উপপুব্বো, এত্তাভাৰো, উপচিনন্তীতি উপচিকা=ৰম্মিক কারা. কম্প-চলনে, কম্পিস্স পং, কম্পতি চলতীতি পঙ্কো=কদ্দমো. উস-দাহে, উসতীতি উক্কা=জালা. কস্স মুঞ, উসতি দহতীভি উম্মুকং=অলাতং. ৰম-উগ্গিরণে, কস্স মিঞ, ৰমীযতীতি ৰম্মিকো=উপচিকাকতো চযো, মস-আমসনে, সস্স ত্থঙ, মসীযতি পেমেনাতি মত্থকং=সীসং, এৰমঞ্ঞেপি.

১৬. ভীত্ৰা নকো.

ভী-ভযে তীমস্মা আনকো হোতি. ভাযন্তি এতস্মাকি ভযানকো=ভযজনকো.

১৭. সিঙ্ঘা আণিকাটকা.

সিঙ্ঘ-ঘাযনেতীমস্মা আণিক আটকা হোন্তি. ‘‘ইত্থিযমত্ৰা’’তি ৯৩.২৬০ আ, সিঙ্ঘযতি পস্সৰতীতি সিঙ্ঘাণিকা=নাসাস্সৰো. সিঙ্ঘতি একীভাৰং যাতীতি সিঙ্ঘাটকং=ৰীথিচতুক্কং.

১৮. করাদিত্ৰকো.

কর-করণে, সর-গতিহিংসাচিন্তাসু, নর-নযে, তরতরণে, ৰর-ৰরণ সম্ভত্তীসু, জন-জননে, কর-দিত্তি গতিকন্তীসু, কট-মন্দনে, কুর-সদ্দে, থু-অভিত্থৰে, এৰমাদীহি অকো হোতি. করীযতীতি করকো=কমণ্ডলু. করোতীতি করকা=ৰস্সোপলা. সরতি উদকমেত্থাতি সরকো=পানভাজনং. নরন্তি পাপুণন্তি সত্তা এত্থাতি নরকো=নিরযো. তরন্ত্যনেনাতি তরকো=তরণং. ৰারেতীতিৰরকো=ৰরণো, ধঞ্ঞৰিসেসো চ. জনেতীতি জনকো=পিতা. কনতি দিব্বতীতি কনকং=সুৰণ্ণং. কটতি মদ্দতি রিপৰোতি কটকং=নগরং. কুরতীতি কোরকো=কলিকা. থৰীযতীতি থৰকো-গুচ্ছো.

১৯. বল পতেহ্যাকো.

বল-পাণনে, পত পথ-গমনে, এতেহি আকো হোতি. বলতি জীৰতীতি বলাকা=পক্খিৰিসেসো. পততি যাতীতি পতাকা=ধজো.

২০. সামাকাদযো.

সামাকআদযো আকন্তা নিপচ্চন্তে. সা-তনু করণাৰসানেসু, সাস্স মুক, সাতি দেহং ত নুং করোতীতি সামাকো=তিণধঞ্ঞং. পা-পানে, ইনঙ, পিৰতি রত্তন্তি পিনাকো=মহিস্সরধনু. গু-সদ্দে, ‘‘যুৰণ্ণান মিযঙুৰঙ সরে’’তি (৫.১৩৬) উৰঙ, গৰতি নদতি এতেনাতি গুৰকো=পূগফলং. অট পট-গমনত্থা, পটতি যাতীতি পটাকা=ৰেজযন্তী. সল পিল পল হুল-গমনত্থা, সলতি যাতীতি সলাকা=ৰেজ্জোপকরণদব্বং. ৰিদ-ঞাণে, ৰিদতি জানাতীতি ৰিদাকো=ৰিদ্ৰা. পণব্যৰহারথুতীসু অস্স ইত্তং, ঊক চ, পণীযতি ৰোহরীযতীতি পিঞ্ঞাকো=তিলকক্কো, এৰমঞ্ঞেপি.

২১. ৰিচ্ছালগমমুসা কিকো.

ৰিচ্ছা-গমনে, অল=বন্ধনে, অম গম-গমনে, মুস-থেয্যে, এতেহি কিকো হোতি. ৰিচ্ছতি যাতীতি ৰিচ্ছিকো=কীটো. অলতি বন্ধতি এতেনাতি অলিকং=অসচ্চং. গচ্ছতীতি গমিকো=গন্তা. মুসাতি নিদ্দেসা দীঘো, মুসতি থেনেতীতি মূসিকো=উন্দূরো.

২২. কিংকণিকাদযো.

কিংকণিকাদযো সদ্দা কিকন্তা নিপচ্চন্তে. কণইতি দণ্ডকো ধাতু সদ্দত্থো, কস্স দ্ৰিত্তং, অস্স ইত্তং, নিগ্গহীতাগমো চ, কণতি সদ্দং করোতী কিংকণিকা=ঘণ্ডিকা. মুদ-তোসে, দস্স দ্ৰিত্তং, মুদন্তি এতমযাতি মুদ্দিকা=অঙ্গুলিযাৰেট্ঠনং, ফলৰিসেসো অ. মহীযতি পূজীযতীতি মহিকা=হিমং. কল-সঙ্খ্যানে, কলীযতি পরিমীতযতীতি কলিকা=কোরকো. সপ্প-গমনে, অস্স ইত্তং. সপ্পতি গচ্ছতীতি সিপ্পিকা=জলজন্তুৰিসেসো, এৰমঞ্ঞেপি.

২৩. ইসা কীকো.

ইস সিংস-ইচ্ছাযং, ইচ্চস্মা কীকো হোতি. ইচ্ছীযতীতি ইসীকা=তূলনিস্সযো.

২৪. কমপদা ণুকো.

কম-ইচ্ছাযং, পদ-গমনে, এতেহি ণুকো হোতি. ‘‘ণিণাপীন’’ন্তি (৫.১৬০) যোগৰিভাগা ণিলোপো. কামেতীতি কামুকো=কামযিতা. পজ্জতি যাতি এতাযাতি পাদুকা=পাদোপকরণং.

২৫. মণ্ডসলা ণূকো.

মণ্ড-ভূসনে, সল-গমনত্থো দণ্ডকো ধাতু, এতেহি ণূকো হোতি. মণ্ডেতি জলং ভূসেতীতি মণ্ডূকো=ভেকো, সলতি গোচরত্ত মুপযাতীতি সালূকং=উপ্পলকণ্ডো.

২৬. উলূকাদযো.

উলূকাদযো সদ্দা ণূকন্তা নিপচ্চন্তে. উল-গৰেসনে, ওত্তাভাৰো নিপাতনা, উলতি গৰেসতীতি উলূকো=কোসিযো. মন=ঞাণে, নস্স ধত্তং, মঞ্ঞতীতি মধূকো=রুক্খো. জল-দিত্তিযং, জলতীতি জলূকা=লোহিতপো, এৰমঞ্ঞেপি.

২৭. কসা সকো.

কস-ৰিলেখনেতীমস্মা সকো হোতি. কসতীতি কস্সকো=কসিকম্মকারো.

২৮. করা তিকো.

করোতিস্মা তিকো হোতি. করোন্তি কীল়ং এত্থাতি কত্তিকো=বাহুলো.

২৯. ইসা ঠকন.

ইস সিংস-ইচ্ছাযং, ইচ্চস্মা ঠকন হোতি. ইচ্ছীযতীতি ইট্ঠকা=মত্তিকাৰিকারো.

৩০. সমা খো.

সম-উপসমখেদেসু, এতস্মা খো হোতি. সমেতি উপসমেতীতি সঙ্খো=কম্বু.

৩১. মুখা দযো.

মুখ আদযো খন্তা নিপচ্চন্তে. মু-বন্ধনে, ওত্তাভাৰো নিপাতনা, মুনন্তি বন্ধন্তি এতেনাতি মুখং=লপনং. সি-সেৰাযং, এত্তা ভাৰো নিপাতনা, সযন্তি এত্থ ঊকা কুসুম-দযো চাতি সিখা=চূল়া. ৰিপুব্বস্স সিস্স, ৰিসতিস্স ৰা, ৰিসেসেন সযন্তি এত্থ, পৰিসন্তীতি ৰিসিখা=রচ্ছা. কন-দীত্তি গতি কন্তীসু, নিপুব্বো, অনভাগলোপো, কনতি দিব্বতীতি নিক্খো=সুৰণ্ণৰিকারো. মযইতি গমনত্থো দণ্ডকো ধাতু, খস্স ঊঞ, মযতি যাতীতি মযূখো-কিরণো. লূ-ছেদনে, ওত্থাভাৰো, লুনাতি ছিন্দতি সোভন্তি লূখো=অসিনিদ্ধো. অর-গমনে, অরন্তি যন্তি এতেনাতি অক্খো=সকটাৰযৰা, পাসকো চ. যস-পযতনে, যস্সতি পযততি বলিমাহরণত্থাযাতি যক্খো=অমনুস্সো, রুহ-জননে, রুহতি জাযতীতি রুক্খো=পাদপো, উস-দাহে, উসতি দহতি কামগ্গিনাতি উক্খো=বলীবদ্দো. সহ-মরিসনে ‘হলোপো, সহতি অত্তনি কতাপরাধং খমতীতি সখা=সহাযো, এৰমঞ্ঞেপি.

৩২. অজ ৰজ মুদ গদ গমা গক.

অজ ৰজ-গমনে, মুদ-তোসে, গদ-ৰচনে, অম গম-গমনে, এতেহি গক হোতি. অজতি গচ্ছতি সেট্ঠভাৰন্তি অগ্গো-সেট্ঠো. ৰজতি সমূহত্তং গচ্ছতীতি ৰগ্গো=সমূহো. মুদন্তি এতেনাতি মুগ্গো=ধঞ্ঞৰিসেসো. গদতীতি গগ্গো=ইসি. ‘‘মনানং নিগ্গহীত’’ন্তি (৫.৯৬) মস্স নিগ্গহীতং, গচ্ছতীতি গঙ্গা=সুরাপগা.

৩৩. সিঙ্গাদযো.

সিঙ্গআদযো সদ্দা গকঅন্তা নিপচ্চন্তে. সী-সযে, নিগ্গহীতাগমো, রস্সত্তঞ্চ, সযতি পৰত্ততি মত্থকেতি সিঙ্গং=ৰিসাণং. ফুর-চলনে, লিমুঙ, ফুরতি চলতীতি পুলিঙ্গো=জলিতঙ্গা রাৰযৰো. চল-কম্পনে, উপুব্বো, চলস্স চালিং, উচ্চলতি কম্পতীতি উচ্চালিঙ্গো=সুক্ককীটো, কল-সদ্দে, ইমুক, কলতি অভিনাদং করোতি বহুরজ্জতাযা তি কলিঙ্গো=দক্খিণাপথো. ভম-অনৰট্ঠানে, অস্স ইত্তং, ভমতীতি ভিঙ্গো=ভমরো. পট অট-গমনে, পটিস্স অমুক, অক চ. পটতি পতন্তো গচ্ছতীতি পটঙ্গো, পটগো=সলভো, এৰমঞ্ঞেপি.

৩৪. অগা গি.

অগ-কুটিলগমনেতীমস্মা গি হোতি. অগতি কুটিলো হুত্ৰা গচ্ছতীতি অগ্গি=পাৰকো.

৩৫. যাৰলা গু.

যা-পাপুণনে, ৰল ৰল্ল-সংৰরণে, এতেহি গু হোতি. যাতীতি যাগু=পেয্যা. ৰলীযতি সংৰরীযতীতি ৰগ্গু=মনুঞ্ঞো.

৩৬. ফেগ্গাদযো.

ফেগ্গু আদযো গুঅন্তা নিপচ্চন্তে. ফল-নিপ্ফত্তিযং, অস্স এত্তং, ফলতি নিট্ঠানং গচ্ছতীতি ফেগ্গু=অসারো. ভর-ভরণে, রলোপো. ভরতীতি ভগু=ইসি. হি-গতীযং, নিগ্গহীতাগমো, হিনো তি পৰত্ততীতি হিঙ্গু=রামঠজং. কম-ইচ্ছাযং, কামীযতীতি কঙ্গু=ধঞ্ঞৰিসেসো, এৰমঞ্ঞেপি.

৩৭. জনা ঘো.

জন-জননেতীমস্মা ঘো হোতি. ‘‘মনানং নিগ্গহীত’’ন্তি (৫.৯৬) নস্স নিগ্গহীতং, জাযতি গমনমেতাযাতি জঙ্ঘা=পাণ্যঙ্গৰিসেসো.

৩৮. মেঘাদযো.

মেঘআদযো ঘন্তা নিপচ্চন্তে. মিহ-সেচনে, হলোপো, মেহতি সিঞ্চতীতি মেঘো=অম্বুদো. মুহ-মুচ্ছাযং, হলোপো, মুয্হন্তি সত্তা এত্থাতি মোঘো=তুচ্ছো. সী-সযে, এত্তাভাৰো, সেতি লহু হুত্ৰা পৰত্ততীতি সীঘং=আসু. অহ-ভস্মীকরণে, নিপুব্বো, হলোপদীঘা, নিদহতীতি নিদাঘো=গিম্হো. মহীস্স হলোপো, মহীযতি পূজীযতীতি মঘা=নক্খত্তং, এৰমঞ্ঞেপি.

(ইতি কৰগ্গপচ্চযৰিধানং).

৩৯. চুসরৰরা চো.

চু-চৰনে, সর-গতি হিংসা চিন্তাসু, ৰর-ৰরণ সম্ভত্তীসু, এযেহি চো হোতি. চৰতি রুক্খাতি চোচং=উপভুত্তফল- ৰিসেসো. সরতি আযতিং দুক্খং হিংসতীতি সচ্চং=অৰিতথং. ৰারেতি সুখন্তি ৰচ্চং=গূথো.

৪০. মরা চুঈচী চ.

মর-পাণচাগে তীমস্মা চুঈচী হোন্তি চো চ. মরণং মচ্চু=মরণং. মারেতি অন্ধকারং ৰিনাসেতীতি মরীচি=রংসি, মিগতণ্হিকা চ. মরতীতি মচ্চো=সত্তো.

৪১. কুস পসা ছিক.

কুস-অক্কোসে, পস-বাধনে, এতেহি ছিক হোতি. কুসীযতি অক্কোসীযতীতি কুচ্ছি=উদরং. পসীযতি বাধীযতি এত্থাতি পচ্ছি=ভাজনৰিসেসো.

৪২. কস উসা ছুক.

কস-ৰিলেখনে, উস-দাহে, এতেহি ছুক হোতি. কসন্তি ৰিলেখন্তি এত্থাতি কচ্ছু=পামং. উসতি দহতি সন্তাপন্তি উচ্ছু=রসালো.

৪৩. অস মস ৰদ কুচ কচা ছো.

অস-খিপনে, মস-আমসনে, ৰদ-ৰচনে, কুচ-সংকোচনে, কচ-বন্ধনে, এতেহি ছো হোতি. অসতি ছিপতীতি অচ্ছো=ভল্লূকো. মসতি জলন্তি মচ্ছো=মীনো. ৰদতীতি ৰচ্ছো=নেলকো. কুচীযতি সংকোচীযতীতি কোচ্ছো=ভদ্দপীট্ঠং. কচীযতি বন্ধীযতীতি কচ্ছো=তনুপদেসো, অনূপো চ.

৪৪. গুচ্ছাদযো.

গুচ্ছআদযো ছন্তা নিপচ্চন্তে. গুপ-গোপনে, ওত্তাভাৰো, গোপীযতীতি গুচ্ছো=থৰকো. তুস-তুট্ঠিম্হী, তুসন্তি এতেনাতি তুচ্ছং=মুসা. পুস-পোসনে, পোসন্তি তনুমনেনাতি পুচ্ছো=ৰালধি, এৰমঞ্ঞেপি.

৪৫. অরা জু ঞট চ.

অর-গমনেতীমস্মা জু হোতি, অরিস্স উট চ. টকারো সব্বাদেসত্থো, অরতি অকুটিলভাৰেন পৰত্ততীতি উজু=অৰঙ্কো.

৪৬. রজ্জাদযো.

রজ্জুআদযো জুঅন্তা নিপচ্চন্তে. রুধ-আৰরণে, উস্স অত্তং, রুন্ধন্তি এতেনাতি রুজ্জু-যোত্তং. মন-ঞাণে, অমঞ্ঞিত্থাতি মঞ্জু=মঞ্জুলং, এৰমঞ্ঞেপি.

৪৭. গিধা ঝক.

গিধ-অভিকঙ্খাযমিচ্চস্মা ঝক হোতি. গেধতীতি গিজ্ঝো=পক্খিৰিসেসো.

৪৮. ৰঞ্ঝাদযো.

ৰঞ্চ্যাদযো ঝক অন্তা নিপচ্চন্তে. ৰন-যাচনে, ৰনোতি অত্তানং অনুভৰিতুং যাচতীতি ৰঞ্ঝো=অফলরুক্খো, ৰঞ্ঝা=অপসৰা ইত্থী, অস্স ইত্তং ৰিঞ্ঝো=পব্বতো, সংজ-সঙ্গে, নিগ্গহীতলোপো, সঞ্জিযতীতি সজ্ঝং=রজতং, এৰমঞ্ঞেপি.

৪৯. কমযজা ঞো.

কম-ইচ্ছাযং, যজ-দেৰপূজাসঙ্গতিকরণদানেসু, এতেহি ঞো হোতি, মস্স নিগ্গহীতৰগ্গন্তা, কামীযতীতি কঞ্ঞা=কুমারী. জস্স পররূপত্তং, যজন্ত্যনেনাতি যঞ্ঞো=যাগো.

৫০. পুঞ্ঞং.

পুনাতি পুণতিস্মা ৰা ঞোওত্তাভাৰো চ নিপচ্চন্তে. পুনাতি, পুণতি সুন্দরত্তং করোতীতি ৰা পুঞ্ঞং=কুসলং.

৫১. অর হাঞ্ঞো হাস্স হির চ.

অর-গমনে, ৰা-চাগে, এতেহি অঞ্ঞো হোতি, হাস্স হিরঞ্চাদেসো. অরীযতে গম্যতেতি অরঞ্ঞং=ৰনং. জহাতি সত্তানং হীনত্তন্তি হিরঞ্ঞং=ধনং, সুৰণ্ণঞ্চ.

(ইতি চৰগ্গপচ্চযৰিধানং).

৫২. কির তরা কীটো.

কির-ৰিকিরণে, তর-তরণে, এতেহি, কীটো হোতি. সোভেতুমেত্থ রতনানি ৰিকিরীযন্তীতি কিরীটং=মকুটং. তরইতি নিদ্দেসা অস্স ইত্তং, তরন্তি যন্তি সুরূপত্ত মনেনাতি তিরীটং=ৰেট্ঠনং.

৫৩. সকাদীহ্যটো.

সক-সত্তিযং, কস-গমনে, কর-করণে, মক্ক ইতি সুত্তিযো ধাতু, দেৰ-দেৰনে, কম-ইচ্ছাযং, এৰমাদিহি অটো হোতি. সণ্ণোতি ভারং ৰহিতুন্তি সকটো=যানং. অকসি নিরোজত্তং অগমীতি কসটং=নিরোজং. করোতি অমনাপন্তি করটো=কাকো. মক্কতি চলতীতি মক্কটো=ৰানরো. দেৰীযতি পূজীযতীতি দেৰটো=ইসি. কমতি ইচ্ছতি আরোহত্থন্তি কমটো=ৰামনো.

৫৪. মকুটাৰাট কৰাট কুক্কুটা.

এতে সদ্দা নিপচ্চন্তে. মংকিস্মা উটো, নিগ্গহীতলোপো চ, মংকেতি সোভেতীতি মকুটং=কিরীটং. অৰতিস্মা আটণ, অৰ্যতে খঞ্ঞতেতি আৰাটো=কাসু. কু-সদ্দেতীমস্মা আটো, ওঅৰাদেসা যথাযোগং, কৰতি রৰতীতি কৰাটং=দ্ৰারপিধানং. কুক ৰক-আদানেতীমস্মা কুটক, কুকতি গোচরমাদদাতীতি কুক্কুটো=তম্বচূল়ো.

৫৫. কমুস কুস কসা ঠো.

কম-ইচ্ছাযং, উস-দাহে, কুস-অক্কোসে, কস-গমনে, এতেহিঠো হোতি, নিগ্গহীতৰগ্গন্তা, ওদনাদীনি কামেতীতি কণ্ঠো=গলো. ওক্কপররূপাদীনি, ওদনাদীসু উণ্হেন উসীযতী তি ওট্ঠো=দন্তচ্ছদো, করভো চ. কুসীযতি অক্কোসীযতীতি কোট্ঠো=ধঞ্ঞনিলযো. কসতি যাতি ৰিনাসন্তি কট্ঠং=দারু.

৫৬. কুট্ঠাদযো.

কুট্ঠআদযো সদ্দা ঠন্তা নিপচ্চন্তে. কুসিস্মা ঠো, ওত্তাভাৰো চ, কুসীযতি অক্কোসীযতীতি কুট্ঠং=ছৰিরোগো. কুণ-সদ্দে, পররূপাভাৰো ওত্তাভাৰো চ, কুণতি নদতীতি কুণ্ঠো=অতিখিণো, কুণীযতি অক্কোসীযতীতি কুণ্ঠো= ছিন্নহত্থপাদাদিকো. দংসিস্স দা, দংসতি এতাযাতি দাঠা=দন্তৰিসেসো. কমিস্স অক চ. কামীযাতি দীনেতীতি কমঠো=ভিক্খাভাজনং, ৰামনো, কুম্মো চ. ফস্সিস্স ফুটো, ফস্সীযতীতি ফুট্ঠো=ফস্সো, এৰমঞ্ঞেপি.

৫৭. ৰর করা অণ্ডো.

ৰর-ৰরণে, কর-করণে, এতেহি অণ্ডো হোতি. অত্তনি পেফং ৰারযতীতি ৰরণ্ডো=মুখরোগো. করীযতীতি করণ্ডো=ভণ্ডৰিসেসো.

৫৮. মনন্তা ডো.

মকার নকারন্তেহি ক্রিযত্থেহি বহুলং ডপ্পচ্চযো হোতি. সম-উপসমে, সমনং সণ্ডং=সমূহো. কম-পদৰিক্খেপে, কমতি যাতীতি কণ্ডো=সরো, পরিচ্ছেদো চ, দম-দমনে, দমন্ত্ৰ্যনেনাতি দণ্ডো=নিগ্গহো. অম গম-গমনে, অমন্তি উপ্পজ্জন্তি এত্থাতি অণ্ডো=পক্খিপসৰো, কোসো চ. গচ্ছতি সূনভাৰন্তি গণ্ডো=ব্যাধি, ৰদনেকদেসো চ. রমু-কীল়াযং, রমন্তি এত্থাতি রুণ্ডা=ৰিধৰা. মন-ঞাণে, মঞ্ঞন্তি এতেনাতি মণ্ডো=ওদনাদিনিস্সাৰো. খন খণ=অৰদারণে, খঞ্ঞতীতি খণ্ডো=উচ্ছুৰিকার ৰিসেসো. লম-হিংসাযং, লমতি হিংসতি সুচিভাৰন্তি লণ্ডো=ৰচ্চং, এৰমঞ্ঞেপি.

৫৯. কুণ্ডা দযো.

কুণ্ডআদযো ডন্তা নিপচ্চন্তে. কম মন তনানং অস্স উত্তং, কামীযতীতি কুণ্ডং=ভাজনং. মঞ্ঞতি হিতাহিতন্তি মুণ্ডো= ছিন্নকেসো. তনোতি এতেনাতি তুণ্ডং=লপনং. ঈর-খেপে, এরংআদেসো. ঈরতি কম্পতীতি এরণ্ডো=ব্যগ্ঘপুচ্ছো, সি-সেৰাযং, সিস্স খমুক, সুগন্ধং সেৰতীতি সিখণ্ডো=চূল়া, এৰমঞ্ঞেপি.

৬০. তিজ কস তস দক্খা কিণো জস্স খো চ.

তিজ-নিসানে, কস-গমনে, তস-পিপাসাযং, দক্খ-ৰুদ্ধিযং, এতেহি কিণো হোতি, জস্স খো চ, তেজযিত্থাতি তিখিণং=নিসিতং. কসতি পৰত্ততীতি কসিণং=অসেসং. তসনং তসিণা=তণ্হা. দক্খতি ৰুদ্ধিং গচ্ছতি এতাযাতি দক্খীণা=কুসলং.

৬১. ৰীআদিতো ণি.

ৰী-তন্তসন্তানে, সি-সেৰাসং, সূ-পস্সৰনে, দু-গমনে, কী-দব্বৰিনীমযে, সা-তনুকরণাৰসানেসু, এৰমাদীহি ণি হোতি. ৰীযতীতি ৰেণি=কেসকলাপো. সেৰনং সেণি=সজাতীনং কারূনং সমূহো. নিপুব্বো, নিসেৰীযতীতি নিসেণি=সোপানং. সৰতি পস্সৰতীতি সোণি=কটি. দৰতি ৰহতীতি দোণি=কট্ঠম্বুৰাহনী, নাৰা চ. নদাদিপাঠা ৰিম্হি সোণী দোণী তিপি হোতি. কযনং, কীযতে এতাযাতি ৰা কেণি=কযো সাতি দুক্খং তনুং করোতীতি সাণি=তিরোকরণী, এৰমঞ্ঞেপি.

৬২. গহাদীহ্যণি.

গহ-উপাদানে, অর-গমনে, ধর-ধারণে, সর-গতিযিংসা চিন্তাসু, তর-তরণে, এৰমাদীহি অণিপ্পচ্চযো হোতি. গণ্হাতীতি গহণি=অসিতাদিপাচকো অগ্গি. অরীযতি গমীযতীতি অরণি=অগ্গিমন্থনকট্ঠং. ধারেতীতি ধরণি=মহী. সরীযতি গমীযতীতি ভরণি=মগ্গো. তরন্ত্যনেনাতি তরণি=নাৰা, সূরিযো চ.

৬৩. রীৰীভাহি ণু.

রী-পস্সৰনে, ৰী ৰা-গমনে, ভা-দিত্তিযং, এতেহিণু হোতি. রীযতি পস্সৰতীতি রেণু=রজো. ৰেতি পৰত্ততীতি ৰেণু=ৰেল়ু. ভাতি দিব্বতীতি ভাণু=রংসি.

৬৪. খাণ্ৰা দযো.

খাণুআদযো ণুঅন্তা নিপচ্চন্তে. খণ খন-অৰদারণে, ণস্স আ, খঞ্ঞতি অৰদারীযতীতি খাণু=ছিন্নসাখো রুক্খো. জন-জননে, নস্স ৰা আত্তং, জাযতি গমন মনেনাতি জাণু, জণ্ণু=জঙ্ঘোরূনং সন্ধি. হর-হরণে, এক, হরীযতীতি হরেণু=গন্ধদব্ব, এৰমঞ্ঞেপি.

৬৫. ক্ৰাদিতো ণো.

কু-সদ্দে, সু-সৰনে, দু-গমনে, ৰর-ৰরণে, কর-করণে, পণ-ব্যৰহারথুতিসু, তা-পালনে, লী-নিলীযনে, এৰমাদীহি ণো হোতি. কৰতি নদতি এত্থাতি কোণো=অস্সি, ৰীণাদিৰাদনদণ্ডো চ. সুণোতীতি সোণো=সুনখো, নরো চ. দৰতি পৰত্ততীতি দোণো=পরিমাণৰিসেসো. ৰিরূপত্ত ৰারেতীতি ৰণ্ণো=নীলাদি. সৰনং করোতীতি কণ্ণো=সৰনং. পণীযতি ৰোহরীযতীতি পণ্ণো=পলাসো. লাযতীতি তাণং=রক্খা. নিলীযন্তি এত্থাতি লেণং=নিলীযনট্ঠানং.

৬৬. সুৰীহি ণক.

সু-সৰনে, ৰী-তন্তসন্তানে, এতেহি ণক হোতি. সুণোতীতি সুণো=সুনখো. ৰীযতীতি ৰীণা=ৰল্লকী.

৬৭. তিণাদযো.

তিণআদযো ণকন্তা নিপচ্চন্তে. তিজ-তেজনে, জলোপো, তেজেতি এতেনাতি তিণং=বীরণাদি. লী লিহ সাদ ক্লেদানং লো লৰা, লীযতি রসতো সব্বত্থ অল্লীযতীতি লোণং লৰণং, লেহীযতীতি লোণং লৰণং, সাদীযতীতি লোণং লৰণং, ক্লেদযতীতি লোণং লৰণং, গমিস্স ও, গচ্ছতীতি গোণো=গো. হর-হরণে, ণস্সঞ্জি, হরীযতীতি হরিণো=মিগো. ঈর-কম্পনে, রস্সত্তং, ণস্স ঞিচ, অত্তনো লূখভাৰে সম্পত্তে ঈরতি কম্পতীতি ইরিণং=ঊসরং. থু-অভিত্থৰে, দীঘো, অভিত্থৰীযতীতি থূণং=নগরং, থূণো=ঘরত্থম্ভো, এৰমঞ্ঞেপি.

৬৮. রৰণ ৰরণ পূরণা দযো.

রৰণ ৰরণ পূরণা দযো অণপ্পচ্চযেন সিদ্ধা. রৰতীতি রৰণো=কোকিলো. ৰারেতীতি ৰরণো=পাকারো. পূরীযতে অনেনাতি পূরণো=পরিপূরী.

(ইতি টৰগ্গপচ্চযৰিধানং).

৬৯. পাৰসা অতি.

পা-রক্খণে, ৰস-নিৰাসে, এতেতি অতি হোতি. পুব্বসরলোপো, পাতি রক্খতীতি পতি=সামী, ৰসন্তি এত্থাতি ৰসতি=গেহং.

৭০. ধা হি সি তন জন জর গম সচা তু.

ধা-ধারণে, হি-গতিযং, তন-ৰিত্থারে, জন-জননে, জর-ৰযো-হানিযং, অম গম-গমনে, সচ-সমৰাযে, এতেহি তু হোতি. ধারেতীতি ধাতু=গেরুকাদি. হিনোতি পৰত্তাতি ফলং এতেনাতি হেতু=কারণং, সেৰীযতি জনেহীতি সেতু=বন্ধতি (পদ্ধতি). তঞ্ঞতেতি তন্তু=সুত্তং. জনীযতে কম্মকিলেসেহীতি জন্তু, জাযতি কম্মকিলেহীতি ৰা জন্তু=সত্তো. জীরতীতি জত্তু=অংসসন্ধি. গচ্ছতীতি গন্তু=গমিকো, সচতি সমেতীতি সত্তু=যৰাদিচুণ্ণং.

৭১. অরিস্সুট চ.

অর-গমনেতীমস্মা তু হোতি, অরিস্স উট আদেসোচ. অরতি পৰত্ততীতি উতু=হেমন্তাদি,

৭২. পিত্ৰাদযো.

পিতুআদযো সদ্দা তুঅন্তা নিপচ্চন্তে. পা-রক্খণে, আস্স ইত্তং, পাতি রক্খতীতি পিতা=জনকো. পাতিস্সেৰাদিস্স মো, পাযেতীতি মাতা=জননী. ভা-দিত্তিযং, ভাতীতি ভাতা=সোদরিযো. ধা-ধারণে, আস্স ঈত্তং, ধারীযতীতি ধীতা=পুত্তী. দুহ-পপূরণে, ওত্তাভাৰো, তুস্স ঞ্ছিচ. দুহতি পসৰে পপূরেতীতি দুহিতা=পুত্তী. জন-জননে, অস্স আত্তং, মা চান্তাদেসো. পপুত্তে জনেতীতি জামাতা=দুহিতুপতি. নহ-বন্ধনে, নহীযতি বন্ধীযতি পেমেনাতি নত্তা-পপুত্তো. হু-হৰনে, হৰতি পূজেতীতি হোতা=যঞ্ঞকো. পূ-পৰনে, পুনাতি আযতিং ভৰং পৰিত্তং করোতীতি পোতা=সোযেৰ.