সোল়সম পরিচ্ছেদ

চেতিযপব্বতৰিহার পটিগ্গহকো

১. পুরে চরিত্ৰা পিণ্ডায, করিত্ৰা জনসঙ্গহং;

রাজগেহম্হি ভুঞ্জন্তো, কারেন্তো রাজসঙ্গহং.

২. ছব্বসদিৰসে থেরো, মহামেঘৰনে ৰসী;

আসল়্হসুক্কপক্খস্স, তেরসে দিৰসে পন.

৩. রাজগেহম্হি ভুঞ্জিত্ৰা, মহারঞ্ঞো মহামতি;

মহা’প্পমাদসুত্তন্তং, দেসযিত্ৰা ততো চ সো.

৪. ৰিহারকরণং ইচ্ছং, তত্থ চেতিযপব্বতে;

নিক্খম্ম পুরিমদ্ৰারা, অগা চেতিযপব্বতং.

৫. থেরং তত্থ গতং সুত্ৰা, রথং আরুয্হ ভূপতি;

দেৰিযো দ্ৰে চ আদায, থেরস্সানুপদং অকা.

৬. থেরা নাগচতুক্কম্হি, নহাত্ৰা রহদে তহিং;

পব্বতারোহণত্থায, অট্ঠংসু পটিপাটিযা.

৭. রাজা রথা তদো’রুয্হ, সব্বে থেরে’ভিৰাদযি;

উণ্হে কিলন্তে কিংরাজ, আগতোসী’তি অহুতে.

৮. তুম্হাকং গমনাসঙ্কী, আগতোম্হী’তি ভাসিতে;

ইধেৰ ৰস্সং ৰসিতুং, আগতম্হা’তি ভাসিয.

৯. তস্সূপনাযিকং থেরো, খন্ধকং খন্ধকোৰিদো;

কথেসি রঞ্ঞো তং সুত্ৰা, ভাগিনেয্যো চ রাজিনো.

১০. মহারিট্ঠো মহামচ্চো, পঞ্চপঞ্ঞাসভাতুহি;

সদ্ধিং জেট্ঠকনিট্ঠেহি, রাজানমভিতো ঠিতো.

১১. যাচিত্ৰা তদহু চেৰ, পব্বজুং থেরসন্তিকে;

পত্তারহত্তং সব্বেপি, তে খুরগ্গে মহামতী.

১২. কন্তকচেতিযঠানে, পরিতো তদহেৰ সো;

কম্মানি আরভাপেত্ৰা, লেণানি অট্ঠসট্ঠিযো.

১৩. অগমাসি পুরং রাজা, থেরা তত্থেৰ তে ৰসুং;

কালে পিণ্ডায নগরং, পৰিসন্তা’নুকম্পকা.

১৪. নিট্ঠিতে লেণকম্মম্হি, আসল়্হিপুণ্ণমাসিযং;

গন্ত্ৰা অদাসি থেরানং, রাজা ৰিহারদক্খিণং.

১৫. দ্ৰত্তিংসমাল়কানঞ্চ, ৰিহারস্স চ তস্স খো;

সীমং সীমাতিগো থেরো, বন্ধিত্ৰা তদহেৰ সো.

১৬. তেসং পব্বজ্জাপেক্খানং, অকাসি উপসম্পদং;

সব্বেসং সব্বপঠমং, বদ্ধে তুম্বরুমাল়কে.

১৭. এতে দ্ৰাসট্ঠি অরহন্তো, সব্বে চেতিযপব্বতে;

তত্থ ৰস্সং উপগন্ত্ৰা, অকংসু রাজসঙ্গহং.

১৮. দেৰমনুস্সগণগণিতং তং,

তঞ্চ গণং গুণৰিত্থতকিত্তিং;

যানমুপচ্চ চ মানযমানা,

পুঞ্ঞচযং ৰিপুলং অকরিংসূতি.

সুজনপসাদসংৰেগত্থায কতে মহাৰংসে

চেতিযপব্বতৰিহারপটিগ্গহকো নাম

সোল়সমো পরিচ্ছেদো.