সত্তরসম পরিচ্ছেদ

ধাতুআগমনো

১. ৰুত্থৰস্সো পৰারেত্ৰা, কত্তিকপুণ্ণমাসিযং;

অৰোচে’দং মহারাজং, মহাথেরো মহামতি.

২. চিরদিট্ঠো হি সম্বুদ্ধো, সত্থা নো মনুজাধিপ;

অনাথৰাসং অৰসিম্হ, নত্থি নো পূজিযং ইধ.

৩. ‘‘ভাসিত্থ ননু ভন্তেমে, সম্বুদ্ধো নিব্বুতো’’ ইতি;

আহ ধাতূসু দিট্ঠেসু, দিট্ঠো হোতি জিনো’’ ইতি.

৪. ৰিদিতো ৰো অধিপ্পাযো, থূপস্স কারণে মযা;

কারেস্সামি অহং থূপং, তুম্হে জানাথ ধাতুযো.

৫. মন্তেহি সুমনেনাতি, থেরো রাজানমব্রৰি;

রাজা’হ সামণেরং তং, কুতো লচ্ছাম ধাতুযো.

৬. ৰিভূসযিত্ৰা নগরং, মগ্গঞ্চ মনুজাধিপ;

উপোসথী সপরিসো, হত্থিং আরুয্হ মঙ্গলং.

৭. সেতচ্ছত্তং ধারযন্তো, তালাৰচরসংহিতো;

মহানাগৰনুয্যানং, সাযন্হসমযে ৰজ.

৮. ধাতুভেদঞ্ঞুনো রাজ, ধাতুযো তত্থ লচ্ছসি;

ইচ্ছাহ সামণেরো সো, সুমনো তং সুমানসং.

৯. থেরো’থ রাজকুলতো, গন্ত্ৰা চেতিযপব্বতং;

আমন্তিয সামণেরং, সুমনং সুমনো গতিং.

১০. এহি ত্ৰং ভদ্র সুমন, গন্ত্ৰা পুপ্ফপুরং ৰরং;

অয্যকং তে মহারাজং, এৰং নো ৰচনং ৰদ.

১১. সহাযো তে মহারাজ, মহারাজা মরুপ্পিযো;

পসন্নো বুদ্ধসমযে, থূপং কারেতুমিচ্ছতি.

১২. মুনিনো ধাতুযো দেহি, পত্তং ভুত্তঞ্চ সত্থুনা;

সরীরধাতুযো সন্তি, বহৰো হি তৰন্তিকে.

১৩. পত্তপূরা গহেত্ৰা তা, গন্ত্ৰা দেৰপুরং ৰরং;

সক্কং দেৰানমিন্দং তং, এৰং নো ৰচনং ৰদ.

১৪. তিলোকদক্খিণেয্যস্স, দাঠাধাতু চ দক্খিণা;

তৰন্তিকম্হি দেৰিন্দ, দক্খিণক্খকধাতু চ.

১৫. দাঠং ত্ৰমেৰ পূজেহি, অক্খকং দেহি সত্থুনো;

লংকাদীপস্স কিচ্চেসু, মাপমজ্জ সুরাধিপ.

১৬. ‘‘এৰং ভন্তে’’তি ৰত্ৰা সো, সামণেরো মহিদ্ধিকো;

তঙ্খণংযেৰ অগমা, ধম্মাসোকস্স সন্তিকং.

১৭. সালমূলম্হি ঠপিতং, মহাবোধিং তহিং সুতং;

কত্তিকচ্ছণপূজাহি, পূজিযং তঞ্চ অদ্দস.

১৮. থেরস্স ৰচনং ৰত্ৰা, রাজতো লদ্ধধাতুযো;

পত্তপূরং গহেত্ৰান, হিমৰন্তমুপাগমি.

১৯. হিমৰন্তে ঠপেত্ৰান, সধাতুং পত্তমুত্তমং;

দেৰিন্দসন্তিকং গন্ত্ৰা, থেরস্স ৰচনং ভণি.

২০. চূল়ামণি চেতিযম্হা, গহেত্ৰা দক্খিণক্খকং;

সামণেরস্স পাদাসি, সক্কো দেৰানমিস্সরো.

২১. তং ধাতুং ধাতুপত্তঞ্চ, আদায সুমনো ততো;

আগম্ম চেতিযগিরিং, থেরস্স’দাসি তং যতি.

২২. মহানাগৰনুয্যানং, ৰুত্তেনা ৰিধিনা’গমা;

সাযন্হাসমযে রাজা, রাজসেনা পুরক্খতো.

২৩. ঠপেসি ধাতুযো সব্বা, থেরো তত্থেৰ পব্বতে;

মিস্সকং পব্বতং তস্মা, আহু চেতিয পব্বতং.

২৪. ঠপেত্ৰা ধাতুপত্তং তং, থেরো চেতিযপব্বতে;

গহেত্ৰা অক্খকং ধাতুং, সঙ্কেতং সগণো’গমা.

২৫. সচাযং মুনিনো ধাতু, ছত্তং নমতু মে সযং;

জণ্ণুকেহি করীধাতু, ধাতুচঙ্কোটকো অযং.

২৬. সিরস্মিং মে পতিট্ঠাতু, আগম্ম সহ ধাতুকো;

ইতি রাজা ৰিচিন্তেসি, চিন্তিতং তং তথা অহু.

২৭. অমতেনা’ভিসিত্তোৰ, অহু হট্ঠো’তি ভূপতি;

সীসতো তং গহেত্ৰান, হত্থিক্খন্ধে ঠপেসিতং.

২৮. হট্ঠো হত্তী কুঞ্চনাদং, অকা কম্পিত্থ মেদিনী;

ততো নাগো নিৰত্তিত্ৰা, সথের বলৰাহনো.

২৯. পুরত্থিমেন দ্ৰারেন, পৰিসিত্ৰা পুরং সুভং;

দক্খিণেন চ দ্ৰারেন, নিক্খমিত্ৰা ততো পুন.

৩০. থূপারামে চেতিযস্স, ঠানতো পচ্ছতো কতং;

পমোজৰত্থুং গন্ত্ৰান, বোধিঠানে নিৰত্তিয.

৩১. পুরত্থাৰদনো অঠা, থূপঠানং তদা হিতং;

কদম্বপুপ্ফআদারি-ৰল্লীহি চিতকং অহু.

৩২. মনুস্সদেৰো দেৰেহি, তং ঠানং রক্খিতং সুচিং;

সোধাপেত্ৰা ভূসযিত্ৰা, তঙ্খণংযেৰ সাধুকং.

৩৩. ধাতুং ওরোপনত্থায, আরভী হত্থিক্খন্ধতো;

নাগো ন ইচ্ছিতং রাজা, থেরং পুচ্ছিত্থ তং মনং.

৩৪. অত্তনো খন্ধসমকে, ঠানে ঠপনমিচ্ছতি;

ধাতুওরোপনং তেন, ন ইট্ঠমী’তি সো ব্রৰি.

৩৫. আণাপেত্ৰা খণংযেৰ,

সুক্খাতো’ভযৰাপিতো;

সুক্খকদ্দম খণ্ডেহি,

চিতা পেত্ৰান তং সমং.

৩৬. অলঙ্করিত্ৰান বহুধা, রাজা তং ঠানমুত্তমং;

ওরোপেত্ৰা হত্থিক্খন্ধা, ধাতুং তত্থ ঠপেসিতং.

৩৭. ধাতারক্খং সংৰিধায, ঠপেত্ৰা তত্থ হত্থিনং;

ধাতুথূপস্স করণে, রাজা তুরিতমানসো.

৩৮. বহূ মনুস্সে যোজেত্ৰা, ইত্থিকাকরণে লহুং;

ধাতুকিচ্চং ৰিচিন্তেন্তো, সামচ্চো পাৰিসী পুরং.

৩৯. মহামহিন্দত্থেরো তু, মহা মেঘৰনং সুভং;

সগণো অভিগন্ত্ৰান, তত্থ ৰাসমকপ্পযি.

৪০. রত্তিং নাগো’নুপরিযাতি, তং ঠানং সো সধাতু কং;

বোধিঠানম্হি সালায, দিৰাঠাতি সধাতুকো.

৪১. ৰত্থুস্স তস্সো’পরিতো, থূপং থেরমতানু গো;

জঙ্ঘামত্তং চিতাপেত্ৰা, কতিপাহেন ভূপতি.

৪২. তত্থ ধাতুপতিট্ঠানং, ঘোসাপেত্ৰা উপাগমি;

ততো ততো সমন্তো চ, সমাগমি মহাজনো.

৪৩. তস্মিং সমাগমে ধাতু, হত্থিক্খন্ধা নগাগ্গতা;

সত্ততালপ্পমাণম্হি, দিস্সন্তি নভসিট্ঠিতা.

৪৪. ৰিম্হাপযন্তি জনতং, যমকং পাটিহারিযং;

কণ্ণম্বমূলে বুদ্ধো’ৰ, অকরি লোমহংসনং.

৪৫. ততো নিক্খন্তজালাহি, জলধারাহি চা’সকিং;

অযং ওভাসিতা’সিত্তা, সব্বালংকামহী মহু.

৪৬. পরিনিব্বানমঞ্চম্হি, নিপন্নেন জিনেন হি;

কতং মহাঅধিট্ঠান-পঞ্চকং পঞ্চচক্খুনা.

৪৭. গয্হমানা মহাবোধি সাখাসোকেন দক্খিণা;

ছিজ্জিত্ৰান সযংযেৰ, পতিট্ঠাতু কটাহকে.

৪৮. পতিট্ঠহিত্ৰা সা সাখা, ছব্বণ্ণরস্মিযো সুভা;

রঞ্জযন্তী দিসা সব্বা, ফলপত্তেহি মুচ্চতু.

৪৯. সসুৰণ্ণকটাহা সা, উগ্গন্ত্ৰান মনোরমা;

অদিস্সমানা সত্তাহং, হিমগব্ভম্হি তিট্ঠতু.

৫০. থূপারামে পতিট্ঠন্তং, মম দক্খিণঅক্খকং;

করোতু নভমুগ্গন্ত্ৰা, যমযং পাটিহারিযং.

৫১. লঙ্কা লঙ্কারভূতম্হি, হেমমালিকচেতিযে;

পতিট্ঠহন্তিযো ধাতু, দোণমত্তা পমাণতো.

৫২. বুদ্ধৰেসধরা হুত্ৰা, উগ্গন্ত্ৰা নভসিট্ঠিতা;

পতিট্ঠং তু করিত্ৰান, যমকং পাটিহারিযং.

৫৩. অধিট্ঠানানি পঞ্চে’ৰ, অধিট্ঠাসি তথাগতো;

অকাসি তস্মা সা ধাতু, তদা তং পাটিহারিযং.

৫৪. আকাসা ওতরিত্ৰা সা, অট্ঠাভূপস্স মুদ্ধনি;

অতীৰহট্ঠো তং রাজা, পতিট্ঠাপেসি চেতিযে.

৫৫. পতিট্ঠিতায তস্সা চ, ধাতুযা চেতিযে তদা;

অহু মহাভূমিচালো, অব্ভুতো লোমহংসনো.

৫৬. এৰং অচিন্তিযা বুদ্ধা, বুদ্ধধম্মা অচিন্তিযা;

অচিন্তিযে পসন্নানং, ৰিপাকো হোতি অচিন্তিযো.

৫৭. তং পাটিহারিযং দিস্ৰা, পসীদিংসু জনে জনা;

মত্তাভযো রাজপুত্তো, কনিট্ঠো রাজিনো পন.

৫৮. মুনিস্সরে পসীদিত্ৰা, যাচিত্ৰান নরিস্সরং;

পুরিসানং সহস্সেন, সহ পব্বজিসাসনে.

৫৯. চেতারিগামতো চাপি, দ্ৰারমণ্ডলতোপি চ;

ৰিহীরবীজতো চাপি, তথা গল্লকপিট্ঠিতো.

৬০. তথো’পতিস্সগামা চ, পঞ্চ পঞ্চ সতানি চ;

পব্বজুং দারকা হট্ঠা, জাতসদ্ধা তথাগতে.

৬১. এৰং পুরা বাহিরা চ, সব্বে পব্বজিতা তদা;

তিংস ভিক্খুসহস্সানি, অহেসুং জিনসাসনে.

৬২. থূপারামে থূপৰরং, নিট্ঠাপেত্ৰা মহীপতি;

রতনাদীহি’নেকেহি, সদা পূজমকারযি.

৬৩. রাজোরোধা খত্তিযা চ, অমচ্চা নাগরা তথা;

সব্বে জনপদা চেৰ, পুজা’কংসু ৰিসুং ৰিসুং.

৬৪. থূপপুব্বঙ্গমং রাজা, ৰিহারং তত্থ কারযি;

থূপারামোতি তেনে’স, ৰিহারো ৰিস্সুতো অহু.

৬৫. সকধাতুসরীরকেন চে’ৰং,

পরিনিব্বানগতোপি লোকনাথো;

জনকাযহিতং সুখঞ্চ সম্মা,

বহুধা’কাসি ঠিতে জিনে কথাৰকাতি.

সুজনপ্পসাদসংৰেগত্থায কতে মহাৰংসে

ধাতুঅগমনো নাম

সত্তরসমো পরিচ্ছেদো.