পঞ্চদসম পরিচ্ছেদ

মহাৰিহার পটিগ্গহকো

১. হত্থিসালাপি সম্বাধা, ইতি তত্থ সমাগতা;

তে নন্দনৰনে রম্মে, দক্খিণদ্ৰারতো বহি.

২. রাজুয্যানে ঘনচ্ছাযে, সীতলে নীলসদ্দলে;

পঞ্ঞাপেসুং আসনানি, থেরানং সাদরা নরা.

৩. নিক্খম্ম দক্খিণদ্ৰারা, থেরো তত্থ নিসীদি চ;

মহাকুলীনা চা’গম্ম, ইত্থিযো বহুকা তহিং.

৪. থেরং উপনিসীদিংসু, উয্যানং পূরযন্তিযো;

বালপণ্ডিতসুত্তন্তং, তাসং থেরো অদেসযি.

৫. সহস্সং ইত্থিযো তাসু, পঠমং ফলমজ্ঝগুং;

এৰং তত্থেৰ উয্যানে, সাযণ্হসমযো অহু.

৬. ততো থেরা নিক্খমিংসু, ‘‘যাম তং পব্বতং’’ ইতি;

রঞ্ঞো পটিনিৰেদেসুং, সীঘং রাজা উপাগমি.

৭. উপাগম্মা’ব্রৰী থেরং, ‘‘সাযং দূরো চ পব্বতো;

ইধেৰ নন্দনুয্যানে, নিৰাসো ফাসুকো ইতি.

৮. পুরস্স অচ্চাসন্নত্তা, ‘‘অসারুপ্প’’ন্তি ভাসিতে;

‘‘মহামেঘৰনুয্যানং, নাতিদূরাতি সন্তিকে.

৯. রম্মং ছাযূদকূপেতং, নিৰাসো তত্থ রোচতু;

নিৰত্তিতব্বং ভন্তে’’ন্তি, থেরো তত্থ নিৰত্তযি.

১০. তস্মিং নিৰত্তঠানম্হি, কদম্বনদিযন্তিকে;

নিৰত্তচেতিযং নাম, কতং ৰুচ্চতি চেতিযং.

১১. তং নন্দনা দক্খিণেন, নযং থেরং রথেসভো;

মহামেঘৰনুয্যানং, পাচিনদ্ৰারকং নযি.

১২. তত্থ রাজঘরে রম্মে, মঞ্চপীঠানি সাধুকং;

সাধূতি সন্থরাপেত্ৰা, ‘‘ৰসতে’ত্ত সুখং’’ ইতি.

১৩. রাজা থেরে’ভিৰাদেত্ৰা, অমচ্চপরিৰারিতো;

পুরং পাৰিসি থেরা তু, তং রত্তিং তত্থ তে ৰসুং.

১৪. পভাতেযেৰ পুপ্ফানি, গাহেত্ৰা ধরণীপতি;

থেরে উপচ্চ ৰন্দিত্ৰা, পূজেত্ৰা কুসুমেহি চ.

১৫. পুচ্ছি কচ্চি সুখং ৰুট্ঠং, উয্যানং ফাসুকং ইতি;

সুখং ৰুত্থং মহারাজ, উয্যানং যতি ফাসুকং.

১৬. আরামো কপ্পতে ভন্তে, সঙ্ঘস্সা’’তি অপুচ্ছি সো;

‘‘কপ্পতে’’ইতি ৰত্ৰান, কপ্পাকপ্পেসু কোৰিদো.

১৭. থেরো ৰেল়ুৰনারাম, পটিগ্গহণমব্রৰি;

তং সুত্ৰা অভিহট্ঠো সো, তুট্ঠহট্ঠো মহাজনো.

১৮. থেরানং ৰন্দনত্থায, দেৰী তু অনুলাগতা;

সদ্ধিং পঞ্চসতিত্থীহি, দুতিযং ফলমজ্ঝগা.

১৯. সা পঞ্চসতা দেৰী, অনুলা’হ মহীপতি;

‘‘পব্বজিস্সাম দেৰা’’তি, রাজা থেরমৰোচ সো.

২০. পব্বাজেথ ইমাযো’’তি, থেরো আহ মহীপতিং;

‘‘ন কপ্পতি মহারাজ, পব্বাজেতুং থিযো হিনো.

২১. অত্থি পাটলিপুত্তস্মিং, ভিক্খুনী মে কনিট্ঠিকা;

সঙ্ঘমিত্তাতি নামেন, ৰিস্সুতা সা বহুস্সুতা.

২২. নরিন্দসমণিন্দস্স, মহাবোধিদুমিন্দতো;

দক্খিণং সাখমাদায, তথা ভিক্খুনিযো ৰরা.

২৩. আগচ্ছতূ’তি পেসেহি, রঞ্ঞো নো পিতু সন্তিকং;

পব্বাজেস্সতি সা থেরী, আগতা ইত্থিযো ইমা.

২৪. ‘‘সাধু’’তি ৰত্ৰা গণ্হিত্ৰা, রাজা ভিঙ্কারমুত্তমং;

‘‘মহামেঘৰনুয্যানং, দম্মি সঙ্ঘস্সি’মং ইতি.

২৫. মহিন্দথেরস্স করে, দক্খিণোদকমা’কিরী;

মহিযা পতিতে তোযে, অকম্পিত্থ মহা মহী.

২৬. ‘‘তস্মা কম্পতি ভূমী’’তি, ভূমিপালো অপুচ্ছি তং;

পতিট্ঠিতত্তা দীপম্হি, সাসনস্সা’তি সো ব্রৰি.

২৭. থেরস্স উপনামেসি, জাতিপুপ্ফানি জাতিমা;

থেরো রাজঘরং গন্ত্ৰা, তস্স দক্খিণতো ঠিতো.

২৮. রুক্খম্হি পিচুলে অট্ঠ, পুপ্ফমুট্ঠী সমোকিরী;

তত্থাপি পুথৰী কম্পি, পুট্ঠো তস্সা’হ কারণং.

২৯. অহোসি তিণ্ণং বুদ্ধানং, কালে’পি ইধ মালকো;

নরিন্দসঙ্ঘকম্মত্থং, ভৰিস্সতি ইদানিপি.

৩০. রাজগেহা উত্তরতো, চারুপোক্খরণিং অগা;

তত্তকা নেৰ পুপ্ফানি, থেরো তত্থাপি ওকিরি.

৩১. তত্থা’পি পুথুৰী কম্পি, পুট্ঠো তস্সা’হ কারণং;

‘‘জন্তঘর পোক্খরণী, অযং হেস্সতি ভূমিপ’’.

৩২. তস্সেৰ রাজগেহস্স, গন্ত্ৰান দ্ৰারকোট্ঠকং;

তত্তকেহে’ৰ পুপ্ফেহি, তং ঠানং পূজযী ইসি.

৩৩. তত্থাপি পুথুৰীকম্পি, হট্ঠলোমো অতীৰসো;

রাজা তং কারণং পুচ্ছি, থেরো তস্সা’হ কারণং.

৩৪. ইমম্হি কপ্পে বুদ্ধানং, তিণ্ণন্নং বোধিরুক্খতো;

আনেত্ৰা দক্খিণাসাখা, রোপিতা ইধ ভূমিপ.

৩৫. তথাগতস্স অম্হাকং, বোধিসাখাপি দক্খিণা;

ইমস্মিংযেৰ ঠানম্হি, পতিট্ঠিস্সতি ভূমিপ.

৩৬. ততো’গমা মহাথেরো, মহামুচলমালকং;

তত্তকানেৰ পুপ্ফানি, তস্মিং ঠানে সমোকিরি.

৩৭. তথাপি পুথৰী কম্পি, পুট্ঠো তস্সা’হ কারণং;

সঙ্ঘস্সু পোসথা গারং, ইধ হেস্সতি ভূমিপ.

৩৮. পঞ্হম্বমালকট্ঠানং, ততো’গমা মহীপতি;

সুপক্কং অম্বপক্কঞ্চ, ৰণ্ণগন্ধরসুত্তমং.

৩৯. মহন্তং উপনামেসি, রঞ্ঞো উয্যানপালকো;

তং থেরস্সুপনামেসি, রাজা অতিমনোরমং.

৪০. থেরো নিসীদনাকারং, দস্সেসি জনতা হিতো;

অত্থরাপেসি তত্থেৰ, রাজা অত্থরণং ৰরং.

৪১. অদা তত্থ নিসিন্নস্স, থেরস্সম্বং মহীপতি;

থেরো তং পরিভুঞ্জিত্ৰা, রোপনত্থায রাজিনো.

৪২. অম্বট্ঠিকং অদা রাজা, তং সযং তত্থ রোপযি;

হত্থে তস্সোপরিথেরো, ধোৰি তস্স ৰিরুল়্হিযা.

৪৩. তং খণংযেৰ বীজম্হা, তম্হা নিক্খম্ম অঙ্কুরো;

কমেনা’তি মহারুক্খো, পত্তপক্কধরো অহু.

৪৪. তং পাটিহারিযং দিস্ৰা, পরিসা সা সরাজিকা;

নমস্সমানা অট্ঠাসি, থেরে হত্থতনুরুহা.

৪৫. থেরো তদা পুপ্ফমুট্ঠি, অট্ঠ তত্থ সমোকিরি;

তথাপি পুথৰীকম্পি, পুট্ঠো তস্সা’হ কারণং.

৪৬. সঙ্ঘস্সপ্পন্নলাভানং, অনেকেসং নরাধিপ;

সঙ্গম্মভাজনঠানং, ইদং ঠানং ভৰিস্সতি.

৪৭. ততো গন্ত্ৰা চতুস্সাল-ঠানং তত্থ সমোকিরি;

তত্তকানেৰ পুপ্ফানি, কম্পি তত্থাপি মেদিনী.

৪৮. তং কম্পকারণং পুচ্ছি, রাজা থেরো ৰিযাকরি;

তিণ্ণন্নং পুব্ববুদ্ধানং, রাজুয্যান পটিগ্গহে.

৪৯. দান ৰত্থুনা’হটানি, দীপৰাসীহি সব্বতো;

ইধ ঠপেত্ৰা ভোজেসুং, সসঙ্ঘে সুগতে তযো.

৫০. ইদানি পন এত্থেৰ, চতুস্সালা ভৰিস্সতি;

সঙ্ঘস্স ইধ ভত্তগ্গং, ভৰিস্সতি নরাধিপ.

৫১. মহথূপঠিতঠানং, ঠানাঠানৰিদূততো;

অগমাসি মহাথেরো, মহিন্দো দীপদীপনো.

৫২. তদা অন্তোপরিক্খেপে, রাজুয্যানস্স খুদ্দিকা;

ককুধৰ্হা অহু ৰাপী, তস্সো’পরি জলন্তিকে.

৫৩. থূপারহং থলঠানং, অহু থেরে তহিং গতে;

রঞ্ঞো চম্পকপুপ্ফানং, পুটকান’ট্ঠ আহরুং.

৫৪. তানি চম্পকপুপ্ফানি, রাজা থেরস্সু’পানযি;

থেরো চম্পকপুপ্ফেহি, তেহি পূজেসি তং ফলং.

৫৫. তত্থাপি পুথৰী কম্পি, রাজা তং কম্পকারণং;

পুচ্ছি থেরো’নু পুব্বেন, আহতং কম্পকারণং.

৫৬. ইদং ঠানং মহারাজ, চতুবুদ্ধ নিসেৰিতং;

থূপারহং হিতত্থায, সুখত্থায চ পাণিনং.

৫৭. ইমম্হি কপ্পে পঠমং, ককুসন্ধো জিনো অহু;

সব্ব ধম্মৰিদূ সত্থা, সব্বলোকানুকম্পকো.

৫৮. মহাতিত্থৰ্হযং আসি, মহামেঘৰনং ইদং;

নগরং অভযং নাম, পুরত্থিমদিসায’হু.

৫৯. কদম্ব নদিযা পারে, তত্থ রাজা’ভযো অহু;

ওজদীপোতি নামেন, অযং দীপো তদাঅহু.

৬০. রক্খসেহি জনস্সে’ত্থ, রোগো পজ্জরকো অহু;

ককুসন্ধো দসবলো, দিস্ৰান তদুপদ্দৰং.

৬১. তং গন্ত্ৰা সত্তৰিনযং, পৰত্তিং সাসনস্স চ;

কাতুং ইমস্মিং দীপস্মিং, করুণা বলচোদিতো.

৬২. চত্তালীসসহস্সেহি, তাদীহি পরিৰারিতো;

নভসা’গম্ম অট্ঠাসি, দেৰকূটম্হি পব্বতে.

৬৩. সম্বুদ্ধস্সা’নুভাৰেন, রোগো পজ্জরকো ইধ;

উপসন্তো মহারাজ, দীপম্হি সকলে তদা.

৬৪. কত্থ ঠিতো অধিট্ঠাসি, নরিস্সর মুনিস্সরো;

সব্বে মং অজ্জ পস্সন্তু, ওজদীপম্হি মানুসা.

৬৫. আগন্তুকামা সব্বেৰ, মনুস্সা মম সন্তিকং;

আগচ্ছন্তু অকিচ্ছেন, খিপ্পঞ্চাপি মহামুনি.

৬৬. ওভাসযন্তং মুনিন্দং তং, ওভাসন্তঞ্চ পব্বতং;

রাজা চ নাগরা চেৰ, দিস্ৰা খিপ্পং উপাগমুং.

৬৭. দেৰতা বলিদানত্থং, মনুস্সা চ তহিং গতা;

দেৰতা ইতি মঞ্ঞিংসু, সসঙ্ঘং লোকনাযকং.

৬৮. রাজা সো মুনিরাজং তং, অতিহট্ঠো’ভি ৰাদিয;

নিমন্তযিত্ৰা ভত্তেন, আনেত্ৰা পুরসন্তি কং.

৬৯. সসঙ্ঘস্স মুনিন্দস্স, নিসজ্জারহমুত্তমং;

রমণীযমিদং ঠান-মসম্বাধন্তি চিন্তিয.

৭০. কারিতে মণ্ডপে রম্মে, পল্লঙ্কেসু ৰরে সুতং;

নিসীদাপেসি সম্বুদ্ধং, সসঙ্ঘং ইধ ভূপতি.

৭১. নিসিন্নম্পি চ পস্সন্তা, সসঙ্ঘং লোকনাযকং;

দীপে মনুস্সা আনেসুং, পণ্ণাকারে সমন্ততো.

৭২. অত্তনো খজ্জভোজ্জেহি, তেহি তেহা’ভতেহি চ;

সন্তপ্পেসি সসঙ্ঘং তং, রাজা সো লোকনাযকং.

৭৩. ইধেৰ পচ্ছাভত্তং তং, নিসিন্নস্স জিনস্স সো;

মহা তিত্থকমুয্যানং, রাজা’দা দক্খিণং ৰরং.

৭৪. অকালপুপ্ফা লঙ্কারে, মহাতিত্থৰনে তদা;

পটিগ্গহিতে বুদ্ধেন, অকম্পিত্থ মহামহী.