একাদসম পরিচ্ছেদ

দেৰানংপিযতিস্সাভিসেকো

১. তস্সচ্চযে তস্স সুতো, মুটসিৰো’তি ৰিস্সুতো;

সুৰণ্ণপালিযা পুত্তো, পত্তো রজ্জমনাকুলং.

২. মহামেঘৰনুয্যানং, নামনুগগুণোদিতং;

ফলপুপ্ফতরুপেতং, সো রাজা কারযি সুভং.

৩. উয্যানঠানগ্গহণে, মহামেঘো অকালজো;

পাৰস্সিতেন উয্যানং, মহামেঘৰনং অহু.

৪. সট্ঠিৰস্সানি মুটসিৰো, রাজা রাজ্জমকারযি;

অনুরাধে পুরৰরে, লংকা ভুৰদনে সুভে.

৫. তস্স পুত্তা দসা’হেসুং, অঞ্ঞমঞ্ঞহিতেসিনো;

দুৰে ধীতা চা’নুকুলা, কুলানুচ্ছৰিকা অহূ.

৬. দেৰানং পিযতিস্সোতি, ৰিস্সুতো দুতিযো সুতো;

তেসু ভাতূসু সব্বেসু, পুঞ্ঞাপঞ্ঞাধিকো অহু.

৭. দেৰানং পিযতিস্সো সো, রাজা’সি পিতুঅচ্চযে;

তস্সা’ভিসেকেন সমং, বহূন’চ্ছরিযান’হুং.

৮. লংকাদীপম্হি সকলে, নিধযো রতনানি চ;

অন্তোঠিতানি উগ্গন্ত্ৰা, পথৰীতলমারুহুং.

৯. লংকাদীপসমীপম্হি, ভিন্ননাৰাগতানি চ;

তত্রজাতানি চ থলং, রতনানি সমারুহুং.

১০. ছাতপব্বতপাদম্হি, তিস্সো চ ৰেল়ুযট্ঠিযো;

জাতারথপতোদেন, সমানা পরিমাণতো.

১১. তাসু একালতাযট্ঠি, রজতা’ভা তহিং লতা;

সুৰণ্ণাৰণ্ণারুচিরা, দিস্সন্তেতা মনোরমা.

১২. একা কুসুমা যট্ঠীতু, কুসুমানি তহিং পন;

নানানি নানাৰণ্ণানি, দিস্সন্তে’তি ফুটানি চ.

১৩. একাসকুণযট্ঠিতু, তহিং পক্খিমিগা বহূ;

নানা চ নানাৰণ্ণা চ, সজীৰা ৰিয দিস্সরে.

১৪. ভযগজরথামলকা, ৰলযঙ্গুলিৰেঠকা;

ককুধফলাপাকতিকা, ইচ্চেতা অট্ঠজাতিযো.

১৫. মুত্তাসমুদা উগ্গন্ত্ৰা, তীরে ৰট্টি ৰিয ঠিতা;

দেৰানং পিযতিস্সস্স, সব্বং পুঞ্ঞৰিজম্ভিতং.

১৬. ইন্দনীলং ৰেল়ুরিযং, লোহিতঙ্কমণিধি’মে;

রজতানি পনে’তানি, মুত্তা তা তাৰযট্ঠিযো.

১৭. সত্তহব্ভন্তরেযেৰ, রঞ্ঞো সন্তিকমাহরুং;

তানি দিস্ৰা পতীতো সো, রাজা ইতি ৰিচিন্তযি.

১৮. রতনানি অনগ্ঘানি, ধম্মাসোকো ইমানিমে;

সহাযো’রহতেনা’ঞ্ঞো, তস্স দস্সং ইমান’তো.

১৯. দেৰানং পিযতিস্সো চ, ধম্মাসোকো চ তে ইমে;

দ্ৰে অদিট্ঠসহাযাহি, চিরপ্পভুতি ভূপতি.

২০. ভাগিনেয্যং মহারিট্ঠং, অমচ্চং পমুখং ততো;

দিজং অমচ্চং গণতং, রাজা তে চতুরো জনে.

২১. দূতো কত্ৰান পাহেসি, বলোঘপরিৰারিতে;

গাহা পেত্ৰা অনগ্ঘানি, রতনানি ইমানি সো.

২২. মণিজাতী চ তিস্সো তা, তিস্সো চ রথযট্ঠিযো;

সঙ্খঞ্চ দক্খিণাৰত্তং, মুত্তা জাতী চ অট্ঠ তা.

২৩. আরুয্হ জম্বুকোলম্হি, নাৰং সত্তদিনেন তে;

সুখেন তিত্থং লদ্ধান, সত্তাহেন ততো পুন.

২৪. পাটলিপুত্তং গন্ত্ৰান, ধম্মাসোকস্স রাজিনো;

অদংসু পণ্ণাকারেতে, দিস্ৰা তানি পসীদি সো.

২৫. রতনানি’দিসানেত্থ, নত্থি মে ইতি চিন্তিয;

অদা সেনাপতিট্ঠানং, তুট্ঠো’রিট্ঠস্স ভূপতি.

২৬. পোরোহিচ্চব্রাহ্মণস্স, দণ্ডনাযতং পন;

অদাসি তস্সা’মচ্চস্স, সেট্ঠিত্তং গণকস্স তু.

২৭. তেসং অনপ্পকে ভোগে, দত্ৰা ৰাসঘরানি চ;

মহামচ্চেহি মন্তেন্তো, পস্সিত্ৰা পটিপাভতং.

২৮. ৰালবীজনী মুণ্হিসং, খগ্গং ছত্তঞ্চ পাদুকং;

মোল়িং ৰতং সপামঙ্গং, ভিঙ্কারং হরিচন্দনং.

২৯. অধোৰিমং ৰত্থকোটিং, মহগ্ঘং হত্থপুঞ্ছনিং;

নাগা’হটং অঞ্জনঞ্চ, অরুণাভঞ্চ মত্তিকং.

৩০. অনোতত্তোদকঞ্চেৰ, গঙ্গাসলিলমেৰ চ;

সঙ্খঞ্চ নন্দিযাৰট্টং, ৰড্ঢমানং কুমারিকং.

৩১. হেমভোজনকণ্ডঞ্চ, সিৰিকঞ্চ মহারহং;

হরীটকং আমলকং, মহগ্ঘং অমতোসধং.

৩২. সুকাহটানং সালীনং, সট্ঠিৰাহসতানি চ;

অভিসেকো পকরণং, পরিৰারৰিসেসিতং.

৩৩. দত্ৰা কালে ভহাযস্স, পণ্ণাকারে নরিস্সরো;

দূতে পাহেসিসদ্ধম্ম-পণ্ণাকারমিমম্পিচ.

৩৪. অহং বুদ্ধঞ্চ ধম্মঞ্চ, সঙ্ঘঞ্চ সরণং গতো;

উপাসকত্তং দেসেসিং, সক্যপুত্তস্স সাসনে.

৩৫. ত্ৰম্পিমানি রতনানি, উত্তমানি নরুত্তম;

চিত্তং পসাদযিত্ৰান, সদ্ধায সরণং ৰজ.

৩৬. ‘‘করোথ মে সহাযস্স, অভিসেকং পুনো’’ ইতি;

ৰত্ৰা সহযা’মচ্চেতে, সক্করিত্ৰা চ পেসযি.

৩৭. পঞ্চমাসে ৰসিত্ৰান, তে মচ্চা’তিৰসক্কতা;

ৰেসাখসুক্খপক্খাদি-দিনে দূতা ৰিনিগ্গতা.

৩৮. তামলিত্তিযমারুয্হ, নাৰং তেজম্বুকোলকে;

ওরুয্হ কূপং পস্সিংসু, পত্ৰা দ্ৰাদসিযং ইধ.

৩৯. অদংসু পণ্ণাকারে তে, দূতা লংকাদীপস্সতে;

তেসং মহন্তং সক্কারং, লংকাপতি অকারযি.

৪০. তে মগ্গসিরমাসস্স, আদিচন্দোদযেজিনে;

অভিসিত্তঞ্চ লংকিন্দং, অমচ্চা সামিভত্তিনো.

৪১. ধম্মাসোকস্স ৰচনং, ৰত্ৰা সামি হিতেরতা;

পুনোপি অভিসিঞ্চিংসু, লংকাহিতসুখেরতং.

৪২. ৰেসাখে নরপতি পুণ্ণমাযমেৰং;

দেৰানং পিযৰচনো পগূল়নামো;

লংকাযং পৰীততপীতি উস্সৰাযং;

অত্তানং জনসুখদো’ভিসেচযী সোতি.

সুজনপ্পসাদসংৰেগত্থায কতে মহাৰংসে

দেৰানংপিযতিস্সাভিসেকোনাম

একাদসমো পরিচ্ছেদো.