দ্ৰাদসম পরিচ্ছেদ

নানাদেসপসাদো

১. থেরো মোগ্গলিপুত্তো সো, জিনসাসন জোতকো;

নিট্ঠাপেত্ৰান সংগীতিং, পেক্খমানো অনাগতং.

২. সাসনস্স পতিট্ঠানং, পচ্চন্তেসু অৰেক্খিয;

পেসেসি কত্তিকে মাসে, তেতে থেরে তহিং তহিং.

৩. থেরং কস্মীরগন্ধারং, মজ্ঝন্তিকমপেসযি;

অপেসযী মহাদেৰ-ত্থেরং মহিসমণ্ডলং.

৪. ৰনৰাসিং অপেসযি, থেরং রক্খিতনামকং;

তথা’পরন্তকং যোন-ধম্মরক্খিতনামকং.

৫. মহারট্ঠং মহাধম্ম-রক্খিতত্থের নামকং;

মহারক্খিত থেরং তং, যোন লোকমপেসযি.

৬. পেসেসি মজ্ঝিমং থেরং, হিমৰন্তপদেসকং;

সুৰণ্ণভূমিং থেরে দ্ৰে, সোণমুত্তর মেৰ চ.

৭. মহামহিন্দত্থেরং তং, থের ইট্টিযমুত্তিযং;

সম্বলং ভদ্দসালঞ্চ, সকে সদ্ধিৰিহারিকে.

৮. লংকাদীপে মনুঞ্ঞম্হি, মনুঞ্ঞং জিনসাসনং;

পতিট্ঠাপেথ তুম্হে’তি, পঞ্চ থেরে অপেসযি.

৯. তদা কস্মীরগন্ধারে, পক্কং সস্সং মহিদ্ধিকো;

অরৰালো নাগরাজা, ৰস্সং করকসঞ্ঞিতং.

১০. ৰস্সা পেত্ৰা সমুদ্দস্মিং, সব্বং খিপতিদারুণো;

তত্র মজ্ঝন্তিকত্থেরো, খিপ্পং গন্ত্ৰা ৰিহাযসা.

১১. অরৰালদহেৰারি-পিট্ঠে চঙ্কমনাদিকে;

অকাসি দিস্ৰা তংনাগা, রুট্ঠারঞ্ঞো নিৰেদযুং.

১২. নাগরাজা’থরুট্ঠো সো, ৰিৰিধা ভিসিকা’করি;

ৰাতা মহন্তা ৰাযন্তি, মেঘো গজ্জতি ৰস্সতি.

১৩. ফলন্ত্য’সনিযো ৰিজ্জু, নিচ্ছরন্তি ততো ততো;

মহিরুহা পব্বতানং, কূটানি পপতন্তি চ.

১৪. ৰিরূপরূপা নাগা চ, ভিংসাপেন্তি সমন্ততো;

সযং ধুপাযতি জলতি, অক্কোসন্তো অনেকধা.

১৫. সব্বং তং ইদ্ধিযা থেরো, পটিবাহিয ভিংসনং;

অৰোচ নাগরাজং তং, দস্সেন্তো বলমুত্তমং.

১৬. সদেৰ কোপি চে লোকো, আগন্ত্ৰা তাসযেয্য মং;

ন মে পটিবলো অস্স, জনেতুং ভযভেরৰং.

১৭. সচে’পি ত্ৰং মহিং সব্বং, সসমুদ্দং সপব্বতং;

উক্খিপিত্ৰা মহানাগ, খিপেয্যাসি মমো’পরি.

১৮. নেৰ মে সক্কুণেয্যাসি, জনেতুং ভযভেরৰং;

অঞ্ঞদত্থু তৰে‘ৰ’স্স, ৰিঘাতো উরগাধিপ.

১৯. তংসুত্ৰা নিম্মদস্স’স্স, থেরো ধম্মমদেসযি;

ততো সরণসীলেসু, নাগরাজা পতিট্ঠহি.

২০. তথেৰ চতুরাসীতি-সহস্সানি ভুজঙ্গমা;

হিমৰন্তেৰ গন্ধব্বা, যক্খা কুম্ভণ্ডকা বহূ.

২১. পণ্ডকো নাম যক্খো তু, সদ্ধিংহারিত যক্খিযা;

পঞ্চসতেহি পুত্তেহি, ফলং পাপুণি আদিকং.

২২. ‘‘মা’’দানি কোধং জনিযিত্থ, ইতো উদ্ধং যথাপুরে;

সসঘাতঞ্চ মা’কত্থ, সুখকামাহি পাণিনো.

২৩. করোথ মেত্তং সত্তেসু, ৰসন্তু মনুজা সুখং;

ইতি তেনা’নুসিট্ঠা তে, তথেৰ পটিপজ্জিসুং.

২৪. ততো রতনপল্লঙ্কে, থেরং সো উরগাধিপো;

নিসীদাপিয অট্ঠাসি, বীজমানো তদন্তিকে.

২৫. তদা কস্মীরগন্ধার-ৰাসিনো মনুজা’গতা;

নাগরাজস্স পূজত্থং, মন্ত্ৰা থেরং মহিদ্ধিকং.

২৬. থেরমেৰা’ভি ৰাদেত্ৰা, একমন্তং নিসীদিসুং;

তেসং ধম্মমদেসেসি, থেরো আসিৰিসোপমং.

২৭. অসীতিযা সহস্সানং, ধম্মাভিসমযো অহু;

সতসহস্স পুরিসা, পব্বজুং থেরসন্তিকে.

২৮. ততোপ্পভুপতি কস্মির-গন্ধারং তে ইদানিপি;

আসুং কাসাৰ পজ্জোতা, ৰত্থুত্তযপরাযনা.

২৯. গন্ত্ৰা মহাদেৰত্থেরো, দেসং মহিসমণ্ডলং;

সুত্তন্তং দেৰদূতং সো, কথেসি জনমজ্ঝগো.

৩০. চত্তালীস সহস্সানি, ধম্মচক্খুং ৰিসোধযুং;

চত্তালীস সহস্সানি, পব্বজিংসু তদন্তিকে.

৩১. গন্ত্ৰা’থ রক্খিতত্থেরো, ৰনৰাসিং নভে ঠিতো;

সংযুত্তমনমতগ্গং, কথেসি জনমজ্ঝগো.

৩২. সট্ঠি নরসহস্সানং, ধম্মাভিসমযো অহু;

সত্ততিংস সহস্সানি, পব্বজিংসু তদন্তিকে.

৩৩. ৰিহারানং পঞ্চসতং, তস্মিংদেসে পতিট্ঠহি;

পতিট্ঠাপেসি তত্থেৰং, থেরো সো জিনসাসনং.

৩৪. গন্ত্ৰা’পরন্তকং থেরো, যোনকো ধম্মরক্খিতো;

অগ্গিক্খন্ধোপমং সুত্তং, কথেত্ৰা জনমজ্ঝগো.

৩৫. সত্ততিংস সহস্সানি, পাণে তত্থ সমাগতে;

ধম্মামতমপাযেসি, ধম্মা ধম্মেসু কোৰিদো.

৩৬. পুরিসানঞ্চ সহস্সঞ্চ, ইত্থিযো চ ততো’ধিকা;

খত্তিযানং কুলাযেৰ, নিক্খমিত্ৰান পব্বজুং.

৩৭. মহারট্ঠমিসী গন্ত্ৰা, সো মহাধম্মরক্খিতো;

মহানারদকস্সপৰ্হং, জাতকং কথযী তহিং.

৩৮. মগ্গফলং পাপুণিংসু, চতুরাসীতি সহস্সকা;

তেরসন্তু সহস্সানি, পব্বজিংসু তদন্তিকে.

৩৯. গন্ত্ৰান যোনৰিসযং, সো মহাধম্মরক্খিতো ইসি;

কাল়কারাম সুত্তন্তং, কথেসি জনমজ্ঝগো.

৪০. পাণসত সহস্সানি, সহস্সানি চ সত্ততি;

মগ্গফলং পাপুণিংসু, দস সহস্সানি পব্বজুং.

৪১. গন্ত্ৰা চতূহি থেরেহি, দেসেসি মজ্ঝিমো ইসি;

হিমৰন্তপদেসস্মিং, ধম্মচক্কপৰত্তনং.

৪২. মগ্গফলপাপুণিংসু, অসীতিপাণ কোটিযো;

ৰিসুং তে পঞ্চরট্ঠানি, পঞ্চথেরা পসাদযুং.

৪৩. পুরিসসতসহস্সানি, একেকস্সেৰ সন্তিকে;

পব্বজিংসু পসাদেন, সম্মাসম্বুদ্ধ সাসনে.

৪৪. সদ্ধিং উত্তরথেরেন, সোণত্থেরো মহিদ্ধিকো;

সুৰণ্ণভূমিং অগমা, তস্মিং তু সমযে পন.

৪৫. জাতে জাতে রাজগেহে, দারকে রুদ্দরক্খসী;

সমুদ্দতো নিক্খমিত্ৰা, ভক্খিত্ৰা পন গচ্ছতি.

৪৬. তস্মিং খণে রাজগেহে,

জাতো হোতি কুমারকো;

থেরে মনুস্সা পস্সিত্ৰা,

রক্খসানং সহাযকা.

৪৭. ইতি চিন্তিয মারেতুং, সা যুৰা উপসঙ্কমুং;

‘‘কিমেতন্তি’’চ পুচ্ছিত্ৰা, থেরং তে এৰ মাহুতে.

৪৮. সমণা মযং হিমৰন্তা, ন রক্খসি সহাযকা;

রক্খসী সা সপরিসা, নিক্খন্তা হোতি সাগরা.

৪৯. তং দিস্ৰান মহারাৰং, ৰিরৰিংসু মহাজনা;

দিগুণে রক্খসে থেরো, মাপযিত্ৰা ভযানকে.

৫০. তং রক্খসিং সপরিসং, পরিক্খিপি সমন্ততো;

ইদং ইমেহি উদ্ধন্তি, মন্ত্ৰা ভীতা পলাযিসা.

৫১. তস্স দেসস্স আরক্খং, ঠপেত্ৰান সমন্ততো;

তস্মিং সমাগমে থেরো, ব্রহ্মজালমদেসযি.

৫২. সরণেসু চ সীলেসু, অট্ঠংসু বহৰো জনা;

সট্ঠিযা তু সহস্সানং, ধম্মাভিসমযো অহু.

৫৩. অড্ঢুড্ঢানি সহস্সানি, পব্বজুং কুলদারকা;

পব্বজিংসু দিযড্ঢন্তু, সহস্সং কুলধীতরো.

৫৪. ততোপ্পভুতি সঞ্জাতে, রাজগেহে কুমারকে;

নামং করিংসু রাজানো, সোণুত্তর সনামকে.

৫৫. মহাজনস্সাপি জিনস্স কড্ঢনং;

ৰিহায পত্তং অমতং সুখম্পিতে;

করিংসু লোকস্স হিতং তহিং তহিং;

ভৰেয্য যো লোকহিতে পমাদৰাতি.

সুজনপ্পসাদ সংৰেগত্থায কতে মহাৰংসে

নানাদেসপসাদো নাম দ্ৰাদসমো পরিচ্ছেদো.