৬. আখ্যাতকপ্প

পঠমকণ্ড

(ক)

আখ্যাতসাগরমথজ্জতনীতরঙ্গং,

ধাতুজ্জলং ৰিকরণাগমকালমীনং;

লোপানুবন্ধরিযমত্থৰিভাগতীরং,

ধীরা তরন্তি কৰিনো পুথুবুদ্ধিনাৰা.

(খ)

ৰিচিত্তসঙ্খারপরিক্খিতং ইমং,

আখ্যাতসদ্দং ৰিপুলং অসেসতো;

পণম্য সম্বুদ্ধমনন্তগোচরং,

সুগোচরং যং ৰদতো সুণাথ মে.

(গ)

অধিকারে মঙ্গলে চেৰ, নিপ্ফন্নে চাৰধারণে;

অনন্তরে চ পাদানে, অথসদ্দো পৰত্ততি.

৪১৬. , ৪২৯. অথ পুব্বানি ৰিভত্তীনং ছ পরস্সপদানি.

অথ সব্বাসং ৰিভত্তীনং যানি যানি পুব্বকানি ছ পদানি, তানি তানি পরস্সপদসঞ্ঞানি হোন্তি.

তং যথা? তি অন্তি, সি থ, মি ম.

পরস্সপদমিচ্চনেন ক্ৰত্থো? কত্তরি পরস্সপদং.

৪০৭. , ৪৩৯. পরাণ্যত্তনোপদানি.

সব্বাসং ৰিভত্তীনং যানি যানি পরানি ছ পদানি. তানি তানি অত্তনোপদসঞ্ঞানি হোন্তি.

তং যথা? তে অন্তে, সে ৰ্হে, এ ম্হে.

অত্তনোপদমিচ্চনেন ক্ৰত্থো? অত্তনোপদানি ভাৰে চ কম্মনি.

৪০৮. , ৪৩১. দ্ৰে দ্ৰে পঠম মজ্ঝিমুত্তমপুরিসা.

তাসং সব্বাসং ৰিভত্তীনং পরস্সপদানং, অত্তনোপদানঞ্চ দ্ৰে দ্ৰে পদানি পঠমমজ্ঝিমুত্তমপুরিসসঞ্ঞানি হোন্তি.

তং যথা? তি অন্তি ইতি পঠমপুরিসা, সি থ ইতি মজ্ঝিমপুরিসা, মি ম ইতি উত্তমপুরিসা. অত্তনোপদানম্পি তে অন্তে ইতি পঠমপুরিসা, সে ৰ্হে ইতি মজ্ঝিমপুরিসা, এ ম্হে ইতি উত্তমপুরিসা. এৰং সব্বত্থ.

পঠমমজ্ঝিমুত্তমপুরিসমিচ্চনেন ক্ৰত্থো? নামম্হি পযুজ্জমানেপি তুল্যাধিকরণে পঠমো, তুম্হে মজ্ঝিমো, অম্হে উত্তমো.

৪০৯. , ৪৪১. সব্বেসমেকাভিধানে পরো পুরিসো.

সব্বেসং তিণ্ণং পঠমমজ্ঝিমুত্তম পুরিসানং একাভিধানে পরো পুরিসো গহেতব্বো.

সো চ পঠতি, ত্ৰঞ্চ পঠসি, তুম্হে পঠথ. সো চ পচতি, ত্ৰঞ্চ পচসি. তুম্হে পচথ. এৰং সেসাসু ৰিভত্তীসু পরো পুরিসো যোজেতব্বো.

৪১০. , ৪৩২. নামম্হি পযুজ্জমানেপি তুল্যাধিকরণে পঠমো.

নামম্হি পযুজ্জমানেপি অপ্পযুজ্জমানেপি তুল্যাধিকরণে পঠমপুরিসো হোতি.

সো গচ্ছতি, তে গচ্ছন্তি.

অপ্পযুজ্জমানেপি – গচ্ছতি, গচ্ছন্তি.

তুল্যাধিকরণেতি কিমত্থং? তেন হঞ্ঞসে ত্ৰং দেৰদত্তেন.

৪১১. , ৪৩৬. তুম্হে মজ্ঝিমো.

তুম্হে পযুজ্জমানেপি অপ্পযুজ্জমানেপি তুল্যাধিকরণে মজ্ঝিমপুরিসো হোতি.

ত্ৰং যাসি, তুম্হে যাথ.

অপ্পযুজ্জমানেপি – যাসি, যাথ.

তুল্যাধিকরণেতি কিমত্থং? তযা পচ্চতে ওদনো.

৪১২. , ৪৩৭. অম্হে উত্তমো.

অম্হে পযুজ্জমানেপি অপ্পযুজ্জমানেপি তুল্যাধিকরণে উত্তমপুরিসো হোতি.

অহং যজামি, মযং যজাম.

অপ্পযুজ্জমানেপি – যজামি, যজাম.

তুল্যাধিকরণেতি কিমত্থং? মযা ইজ্জতে বুদ্ধো.

৪১৩. , ৪২৭. কালে.

‘‘কালে’’ ইচ্চেতং অধিকারত্থং ৰেদিতব্বং.

৪১৪. , ৪২৮. ৰত্তমানা পচ্চুপ্পন্নে.

পচ্চুপ্পন্নে কালে ৰত্তমানাৰিভত্তি হোতি.

পাটলিপুত্তং গচ্ছতি, সাৰত্থিং পৰিসতি.

৪১৫. , ৪৫১. আণত্যা সিট্ঠে’নুত্তকালে পঞ্চমী.

আণত্যত্থে চ আসীসত্থে চ অনুত্তকালে পঞ্চমী ৰিভত্তি হোতি.

করোতু কুসলং, সুখং তে হোতু.

৪১৬. , ৪৫৪. অনুমতিপরিকপ্পত্থেসু সত্তমী.

অনুমত্যত্থে চ পরিকপ্পত্থে চ অনুত্তকালে সত্তমী ৰিভত্তি হোতি.

ত্ৰং গচ্ছেয্যাসি, কিমহং করেয্যামি.

৪১৭. , ৪৬০. অপচ্চক্খে পরোক্খাতীতে.

অপচ্চক্খে অতীতে কালে পরোক্খাৰিভত্তি হোতি.

সুপিনে কিলমাহ, এৰং কিল পোরাণাহু.

৪১৮. , ৪৫৬. হিয্যোপভুতি পচ্চক্খে হিয্যত্তনী.

হিয্যোপভুতি অতীতে কালে পচ্চক্খে ৰা অপচ্চক্খে ৰা হিয্যত্তনী ৰিভত্তি হোতি.

সো অগমা মগ্গং, তে অগমূ মগ্গং.

৪১৯. , ৪৬৯. সমীপে’জ্জতনী.

অজ্জপ্পভুতি অতীতে কালে পচ্চক্খে ৰা অপচ্চক্খে ৰা সমীপে অজ্জতনীৰিভত্তি হোতি.

সো মগ্গং অগমী, তে মগ্গং অগমুং.

৪২০. , ৪৭১. মাযোগে সব্বকালে চ.

হিয্যত্তনীঅজ্জতনীইচ্চেতা ৰিভত্তিযো যদা মাযোগা, তদা সব্বকালে চ হোন্তি.

মা গমা, মা ৰচা, মা গমী, মা ৰচী.

চগ্গহণেন পঞ্চমীৰিভত্তিপি হোতি. মা গচ্ছাহি.

৪২১. , ৪৭৩. অনাগতে ভৰিস্সন্তী.

অনাগতে কালে ভৰিস্সন্তী ৰিভত্তি হোতি.

সো গচ্ছিস্সতি, করিস্সতি. তে গচ্ছিস্সন্তি, করিস্সন্তি.

৪২২. , ৪৭৫. ক্রিযাতিপন্নে’তীতে কালাতিপত্তি.

ক্রিযাতিপন্নমত্তে অতীতে কালে কালাতিপত্তি ৰিভত্তি হোতি.

সো চে তং যানং অলভিস্সা, অগচ্ছিস্সা. তে চে তং যানং অলভিস্সংসু, অগচ্ছিস্সংসু.

৪২৩. , ৪২৬. ৰত্তমানা তি অন্তি, সি থ, মি ম, তে অন্তে, সে ৰ্হে, এ ম্হে.

ৰত্তমানা ইচ্চেসা সঞ্ঞা হোতি তি অন্তি, সি থ, মি ম, তে অন্তে, সে ৰ্হে, এ ম্হে ইচ্চেতেসং দ্ৰাদসন্নং পদানং.

ৰত্তমানা ইচ্চনেন ক্ৰত্থো? ৰত্তমানা পচ্চুপ্পন্নে.

৪২৪. , ৪৫০. পঞ্চমী তু অন্তু, হিথ, মিম, তং অন্তং, স্সু ৰ্হো, এ আমসে.

পঞ্চমীইচ্চেসা সঞ্ঞা হোতি তু অন্তু, হি থ, মিম, তং অন্তং, স্সু ৰ্হো, এ আমসে ইচ্চেতেসং দ্ৰাদসন্নং পদানং.

পঞ্চমীইচ্চনেন ক্ৰত্থো? আণত্যাসিট্ঠে, নুত্তকালে পঞ্চমী.

৪২৫. , ৪৫৩. সত্তমী এয্য এয্যুং, এয্যা সি এয্যা থ, এয্যামি এয্যাম, এথ এরং, এথো এয্যাৰ্হো, এয্যং এয্যাম্হে.

সত্তমী ইচ্চেসা সঞ্ঞা হোতি এয্য এয্যুং, এয্যাসি এয্যাথ, এয্যামি এয্যাম, এথ এরং, এথো, এয্যাৰ্হো, এয্যং এয্যাম্হে ইচ্চেতেসং দ্ৰাদসন্নং পদানং.

সত্তমী ইচ্চনেন ক্ৰত্থো? অনুমতিপরিকপ্পত্থেসু সত্তমী.

৪২৬. , ৪৫৯. পরোক্খা অউ এত্থ, অংম্হ, ত্থরে, ত্থো ৰ্হো, ইং ম্হে.

পরোক্খা ইচ্চেসা সঞ্ঞা হোতি অ উ, এত্থ, অং ম্হ, ত্থ রে ত্থো ৰ্হো, ইং ম্হে ইচ্চেতেসং দ্ৰাদসন্নং পদানং.

পরোক্খা ইচ্চনেন ক্ৰত্থো? অপচ্চক্খে পরোক্খাতীতে.

৪২৭. , ৪৫৫. হিয্যত্তনী আঊ, ওত্থ, অংম্হা, ত্থত্থুং, সে ৰ্হং, ইং ম্হসে.

হিয্যত্তনী ইচ্চেসা সঞ্ঞা হোতি আ ঊ, ও ত্থ, অং ম্হা, ত্থ ত্থুং, সে ৰ্হং, ইং ম্হসে ইচ্চেতেসং দ্ৰাদসন্নং পদানং.

হিয্যত্তনী ইচ্চনেন ক্ৰত্থো? হিয্যোপভুতি পচ্চক্খে হিয্যত্তনী.

৪২৮. , ৪৬৮. অজ্জতনী ঈ উং, ও ত্থ, ইং ম্হা, আ ঊ, সে ৰ্হং, অং ম্হে.

অজ্জতনী ইচ্চেসা সঞ্ঞা হোতি ঈ উং, ও ত্থ, ইংম্হা, আ ঊ, সেৰ্হং, অং ম্হে ইচ্চেতেসং দ্ৰাদসন্নং পদানং.

অজ্জতনী ইচ্চনেন ক্ৰত্থো? সমীপেজ্জতনী.

৪২৯. , ৪৭২. ভৰিস্সন্তী স্সতি স্সন্তি, স্সসি স্সথ, স্সামি স্সাম, স্সতে স্সন্তে, স্সসে স্সৰ্হে, স্সং স্সাম্হে.

ভৰিস্সন্তী ইচ্চেসা সঞ্ঞা হোতি স্সতি স্সন্তি, স্সসি স্সথ, স্সামি স্সাম, স্সতে স্সন্তে, স্সসে স্সৰ্হে, স্সং স্সাম্হে ইচ্চেতেসং দ্ৰাদসন্নং পদানং.

ভৰিস্সন্তী ইচ্চনেন ক্ৰত্থো? অনাগতে ভৰিস্সন্তী.

৪৩০. , ৩৭৩. কালাতিপত্তি স্সা স্সংসু, স্সে স্সথ, স্সং স্সাম্হা, স্সথ সিস্সু, স্সসে স্সৰ্হে, স্সিং স্সাম্হসে.

কালাতিপত্তি ইচ্চেসা সঞ্ঞা হোতি স্সা স্সংসু, স্সে স্সথ, স্সং স্সাম্হা, স্সথ স্সিসু, স্সসে স্সৰ্হে, স্সিং স্সাম্হসে ইচ্চেতেসং দ্ৰাদসন্নং পদানং.

কালাতিপত্তি ইচ্চনেন ক্ৰত্থো? ক্রিযাতিপন্নে’ তীতে কালাতিপত্তি.

৪৩১. , ৪৫৮. হিয্যত্তনী সত্তমী পঞ্চমী ৰত্তমানা সব্বধাতুকং.

হিয্যত্তনাদযো চতস্সো ৰিভত্তিযো সব্বধাতুক সঞ্ঞা হোন্তি.

অগমা, গচ্ছেয্য, গচ্ছতু, গচ্ছতি.

সব্বধাতুক ইচ্চনেন ক্ৰত্থো? ইকারাগমো অসব্বধাতুকম্হি.

ইতি আখ্যাতকপ্পে পঠমো কণ্ডো.

দুতিযকণ্ড

৪৩২. , ৩৬২. ধাতুলিঙ্গেহি পরা পচ্চযা.

ধাতুলিঙ্গইচ্চেতেহি পরা পচ্চযা হোন্তি.

করোতি, গচ্ছতি. যো কোচি করোতি, তং অঞ্ঞো ‘‘করোহি করোহি’’ ইচ্চেৰং ব্রৰীতি, অথ ৰা করোন্তং পযোজযতি = কারেতি. সঙ্ঘো পব্বতমিৰ অত্তানমাচরতি = পব্বতাযতি. তল়াকং সমুদ্দমিৰ অত্তানমাচরতি = সমুদ্দাযতি, সদ্দো চিচ্চিটমিৰ অত্তানমাচরতি = চিচ্চিটাযতি, ৰসিট্ঠস্স অপচ্চং ৰাসিট্ঠো. এৰমঞ্ঞেপি যোজেতব্বা.

৪৩৩. , ৫২৮. তিজ গুপ কিত মানে হি খ ছ সা ৰা.

তিজ গুপ কিত মানু ইচ্চেতেহি ধাতূহি খ ছ স ইচ্চেতে পচ্চযা হোন্তি ৰা.

তিতিক্খতি, জিগুচ্ছতি, তিকিচ্ছতি, ৰীমংসতি.

ৰাতি কিমত্থং? তেজতি, গোপতি, মানেতি.

৪৩৪. , ৫৩৪. ভুজ ঘস হর সু পাদীহি তুমিচ্ছত্থেসু.

ভুজ ঘস হর সু পাইচ্চেৰমাদীহি ধাতূহি তুমিচ্ছত্থেসু খ ছ সইচ্চেতে পচ্চযা হোন্তি ৰা.

ভোত্তুমিচ্ছতি=বুভুক্খতি, ঘসিতুমিচ্ছতি=জিঘচ্ছতি, হরিতুমিচ্ছতি=জিগীসতি, সোতুমিচ্ছতি=সুস্সুসতি, পাতুমিচ্ছতি=পিৰাসতি.

ৰাতি কিমত্থং? ভোত্তুমিচ্ছতি.

তুমিচ্ছত্থেসূতি কিমত্থং? ভুঞ্জতি.

৪৩৫. , ৫৩৬. আয নামতো কত্তূপমানাদাচারে.

নামতো কত্তূপমানা আচারত্থে আযপচ্চযো হোতি.

সঙ্ঘো পব্বতমিৰ অত্তানমাচরতি = পব্বতাযতি, তল়াকং সমুদ্দমিৰ অত্তানমাচরতি = সমুদ্দাযতি, সদ্দো চিচ্চিটমিৰ অত্তানমাচরতি = চিচ্চিটাযতি. এৰমঞ্ঞেপি যোজেতব্বা.

৪৩৬. , ৫৩৭. ঈযূপমানা চ.

নামতো উপমানা আচারত্থে চ ঈযপচ্চযো হোতি.

অছত্তং ছত্তমিৰ আচরতি =ছত্তীযতি, অপুত্তং পুত্তমিৰ আচরতি=পুত্তীযতি.

উপমানাতি কিমত্থং? ধম্মং আচরতি.

আচারেতি কিমত্থং? অছত্তং ছত্তমিৰ রক্খতি. এৰমঞ্ঞেপি যোজেতব্বা.

৪৩৭. , ৫৩৮. নামম্হা’ত্তিচ্ছত্থে.

নামম্হা অত্তনো ইচ্ছত্থে ঈযপচ্চযো হোতি.

অত্তনো পত্তমিচ্ছতি = পত্তীযতি. এৰং ৰত্থীযতি, পরিক্খারীযতি, চীৰরীযতি, ধনীযতি, ঘটীযতি.

অত্তিচ্ছত্থেতি কিমত্থং? অঞ্ঞস্স পত্তমিচ্ছতি. এৰমঞ্ঞেপি যোজেতব্বা.

৪৩৮. , ৫৪০. ধাতূহি ণে ণয ণাপে ণাপযা কারিতানি হেত্ৰত্থে.

সব্বেহি ধাতূহি ণেণয ণাপে ণাপযইচ্চেতে পচ্চযা হোন্তি কারিতসঞ্ঞা চ হেত্ৰত্থে.

যো কোচি করোতি, তং অঞ্ঞো ‘‘করোহি করোহি’’ ইচ্চেৰং ব্রৰীতি, অথ ৰা করোন্তং পযোজযতি = কারেতি, কারযতি, কারাপেতি, কারা পযতি. যে কেচি করোন্তি, তে অঞ্ঞে ‘‘করোথ করোথ’’ ইচ্চেৰং ব্রুৰন্তি = কারেন্তি, কারযন্তি, কারাপেন্তি, কারাপযন্তি. যো কোচি পচতি, তং অঞ্ঞো ‘‘পচাহি পচাহি’’ইচ্চেৰং ব্রৰীতি, অথ ৰা পচন্তং পযোজযতি = পাচেতি, পাচযতি, পাচাপেতি, পাচাপযতি. যে কেচি পচন্তি, তে অঞ্ঞে ‘‘পচথ পচথ’’ ইচ্চেৰং ব্রুৰন্তি = পাচেন্তি, পাচযন্তি, পাচাপেন্তি. পাচাপযন্তি. এৰং ভণেতি, ভণযতি, ভণাপেতি, ভণাপযতি. ভণেন্তি, ভণযন্তি, ভণাপেন্তি, ভণাপযন্তি. তথরিৰ অঞ্ঞেপি যোজেতব্বা.

হেত্ৰত্থেতি কিমত্থং? করোতি, পচতি.

অত্থগ্গহণেন অলপচ্চযো হোতি, জোতলতি.

৪৩৯. , ৫৩৯. ধাতুরূপে নামস্মা ণযো চ.

তস্মা নামস্মা ণযপচ্চযো হোতি কারিতসঞ্ঞো চ ধাতুরূপে সতি.

হত্থিনা অতিক্কমতি মগ্গং = অতিহত্থযতি, ৰীণায উপগাযতি গীতং = উপৰীণযতি, দল়্হং করোতি ৰীরিযং = দল়্হযতি, ৰিসুদ্ধা হোতি রত্তি = ৰিসুদ্ধযতি.

চগ্গহণেন আর আলইচ্চেতে পচ্চযা হোন্তি. সন্তং করোতি = সন্তারতি, উপক্কমং করোতি = উপক্কমালতি.

৪৪০. , ৪৪৫. ভাৰকম্মেসু যো.

সব্বেহি ধাতূহি ভাৰকম্মেসু যপচ্চযো হোতি.

ঠীযতে, বুজ্ঝতে, পচ্চতে, লব্ভতে, করীযতে, যুজ্জতে, উচ্চতে.

ভাৰকম্মেসূতি কিমত্থং? করোতি, পচতি, পঠতি.

৪৪১. , ৪৪৭. তস্স চৰগ্গযকারৰকারত্তং সধাত্ৰন্তস্স.

তস্স যপচ্চযস্স চৰগ্গযকারৰকারত্তং হোতি ধাতূনং অন্তেন সহ যথাসম্ভৰং.

ৰুচ্চতে, ৰুচ্চন্তে, উচ্চতে, উচ্চন্তে, পচ্চতে, পচ্চন্তে. মজ্জতে, মজ্জন্তে, যুজ্জতে, যুজ্জন্তে. বুজ্ঝতে, বুজ্ঝন্তে, কুজ্ঝতে, কুজ্ঝন্তে, উজ্ঝতে, উজ্ঝন্তে. হঞ্ঞতে, হঞ্ঞন্তে. কয্যতে, কয্যন্তে. দিব্বতে, দিব্বন্তে.

৪৪২. , ৪৪৮. ইৰণ্ণাগমো ৰা.

সব্বেহি ধাতূহি যম্হি পচ্চযে, পরে ইৰণ্ণাগমো হোতি ৰা.

করীযতে, করীযতি, গচ্ছীযতে, গচ্ছীযতি.

ৰাতি কিমত্থং? কয্যতে.

৪৪৩. , ৪৪৯. পুব্বরূপঞ্চ.