নমো তস্স ভগৰতো অরহতো সম্মাসম্বুদ্ধস্স

জিনালঙ্কার

পণামদীপনীগাথা

১. যো লোকত্থায বুদ্ধো ধনসুতভরিযাঅঙ্গজীৰে চজিত্ৰা পূরেত্ৰা আরমিযো তিদসমনুপমে বোধিপক্খীযধম্মে,

পত্ৰা বোধিং ৰিসুদ্ধং সকলগুণদদং সেট্ঠভূতো তিলোকে,

কত্ৰা দুক্খস্স অন্তং কতসুভজনতং দুক্খতো মোচযিত্থ.

২. নত্ৰানাহং জিনন্তং সমুপচিতসুভং সব্বলোকেকবন্ধুং,

নাহু যেনপি তুল্যো কুসলমহিমতো উত্তমো ভূতলোকে তস্সেৰাযং উৰিম্হং সুৰিপুলমমলং বোধিসম্ভারভূতং,

হেতুং হেত্ৰানুরূপং সুগতগতফলং ভাসতো মে সুণাথ.

যোগাৰচরসম্পত্তিদীপনীগাথা

৩. জাতো যো নৰমে খণে সুতধরো সীলেন সুদ্ধিন্দ্রিযো সংসারং অযতো ভৰক্কযকরং দিস্ৰা সিৰং খেমতো,

তং সম্পাপকমগ্গদেসকমুনিং সম্পূজযন্তো ততো উদ্ধানুস্সতিভাৰনাদিকমতো সম্পাদযে তং সিৰং.

ৰত্থুৰিসোধনীগাথা

৪. বুদ্ধোতি কো বুদ্ধগুণো তি কো সো,

অচিন্তযাদিত্তমুপাগতো যো;

অনঞ্ঞসাধারণভূতমত্থং,

অকাসি কিং সো কিমৰোচ বুদ্ধো.

৫. ৰিসুদ্ধখন্ধসন্তানো বুদ্ধোতি নিযমো কতো,

খন্ধসন্তানসুদ্ধী তু গুণোতি নিযমো কতো.

৬. অকাসি কিচ্চানি দিনেসু পঞ্চ,

পসাদযঞ্চিদ্ধিবলেন সেন;

জনানসেসং চরিযানুকূলং,

ঞত্ৰানৰোচানুসযপ্পহানং.

অনঞ্ঞসাধারণদীপনীগাথা

৭. অব্ভুগ্গতা যস্স গুণা অনন্তা,

তিবুদ্ধখেত্তেকদিৰাকরোতি;

জানাতি সো লোকমিমং পরঞ্চ,

সচেতনঞ্চেৰ অচেতনঞ্চ;

সকস্স সন্তানগতং পরেসং,

ব্যতীতমপ্পত্তকমত্রভূতং.

৮. অনন্তসত্তেসু চ লোকধাতুসু,

একোৰ সব্বেপি সমা ন তেন;

দিসাসু পুব্বাদিসু চক্কৰাল়া,

সহস্সসঙ্খাযপি অপ্পমেয্যা;

যে তেসু দেৰা মনুজা চ ব্রহ্মা,

একত্থ সঙ্গম্ম হি মন্তযন্তা.

৯. অনাদিকালাগতনামরূপিনং,

যথাসকং হেতুফলত্তৰুত্তিনং;

তব্ভাৰভাৰিত্তমসম্ভুণন্তা,

নানাৰিপল্লাসমনুপৰিট্ঠা.

১০. কম্মপ্পৰত্তিঞ্চ ফলপ্পৰত্তিং,

একত্তনানত্তনিরীহধম্মতং;

ৰিঞ্ঞত্তিসন্তানঘনেন ছন্নতো,

সিৰঞ্জসং নো ভণিতুং সমত্থা.

১১. একো ৰ সো সন্তিকরো পভঙ্করো,

সঙ্খায ঞেয্যানি অসেসিতানি;

তেসঞ্হি মজ্ঝে পরমাসম্ভীৰদং,

সিৰঞ্জসং দীপযিতুং সমত্থো.

১২. সো গোতমো সক্যসুতো মুনিন্দো,

সব্বস্স লোকস্স পদীপভূতো;

অনন্তসত্তে ভৰবন্ধনম্হা,

মোচেসি কারুঞ্ঞফলানুপেক্খী.

অভিনীহারদীপনীগাথা

১৩. ৰদেথ তস্সীধ অনপ্পকং গুণং,

ন তেন তুল্যো পরমো চ ৰিজ্জতি;

কিং তং গুণং তং সদিসেন দিন্নং,

সযংকতং কিন্নু অধিচ্চলদ্ধং.

১৪. নাধিচ্চলদ্ধং ন চ পুব্ববুদ্ধা,

ব্রহ্মাদিনং সম্মুতিযা বহূনং;

সযংকতেনেৰ অনোপমেন,

দানাদিনা লদ্ধমিদং ৰিপাকং.

১৫. ইতো চতুন্নং অসঙ্খিযানং,

সতংসহস্সানধিকানমত্থকে;

কপ্পে অতীতম্হি সুমেধতাপসো,

ৰেহাযসং গচ্ছতি ইদ্ধিযা তদা.

১৬. দিপঙ্করো নাম জিনো সসঙ্ঘো,

রম্মং পুরং যাতি ৰিরোচমানো;

মনুস্সদেৰেহিভিপূজিযন্তো,

সহস্সরংসি ৰিয ভাণুমা নভে.

১৭. তস্সঞ্জসং কাতুবহুস্সহানং,

বুদ্ধোতি সুত্ৰা সুমনো পতীতো;

মমজ্জ দেহং পনিমস্স দত্ৰা,

বুদ্ধো অহং হেস্সমনাগতেদিসো.

১৮. তস্মিঞ্জসে কন্দরতম্হি পঙ্কে,

কত্ৰান সেতুং সযি সো সদেহং;

বুদ্ধো অযং গচ্ছতু পিট্ঠিযা মমং,

বোধিস্সচে হেস্সতি মে অনাগতে.

১৯. উস্সীসকং যাতি জিনো হি তস্স,

অজ্ঝাসযো সিজ্ঝতিমস্সনাগতে;

ঞত্ৰান ব্যাকাসি অসেসতো হি,

বুদ্ধো অযং হেস্সতিনাগতেসু.

২০. সুত্ৰান পত্তো ৰ মহাভিসেকং,

লদ্ধং ৰ বোধিং সমনুস্সরন্তো;

পূজেত্ৰা যাতে মুনিদেৰমানুসে,

উট্ঠায সো সম্মসি পারমী দস.

২১. দল়্হং গহেত্ৰা সমতিংসপারমী,

সিক্খত্তযঞ্চস্স জিনস্স সন্তিকে;

কাতুং সমত্থো পি ভৰস্স পারং,

সত্তেসু কারুঞ্ঞবলা ভৰং গতো.

২২. উপ্পন্নুপ্পন্নকে সো জিনৰরমতুলে পূজযিত্ৰা অসেসং বুদ্ধো এসো হি ওসো ভৰতি নিযমতো ব্যাকতো তেহি তেহি তেসং তেসং জিনানং অচনমনুপমং পূজযিত্ৰা সিরেন,

তং তং দুক্খং সহিত্ৰা সকলগুণদদং পারমী পূরযিত্থ.

বোধিসম্ভারদীপনীগাথা

২৩. সো দুক্খখিন্নজনদস্সনদুক্খখিন্নো,

কারুঞ্ঞমেৰ জনতায অকাসি নিচ্চং;

তেসং হি মোচনমুপাযমিদন্তি ঞত্ৰা,

তাদীপরাধমপি অত্তনি রোপযী সো.

২৪. দানাদিনেকৰরপারমিসাগরেসু,

ওগাল়্হতাযপি পদুট্ঠজনেন দিন্নং;

দুক্খং তথা অতিমহন্ততরম্পি কিঞ্চি,

নাঞ্ঞাসি সত্তহিতমেৰেঅ গৰেসযন্তো.

২৫. ছেত্ৰান সীসং হি সকং দদন্তো,

মংসং পচিত্ৰান সকং দদন্তো;

সো চত্তগত্তো পণিধানকালে,

দুট্ঠস্স কিং দুস্সতি ছেদনেন.

২৬. এৰং অনন্তমপি জাতিসতেসু দুক্খং,

পত্ৰান সত্তহিতমেৰ গৰেসযন্তো;

দীপঙ্করে গহিতসীলসমাধিপঞ্ঞং,

পালেসি যাৰ সকবোধিতলে সুনিট্ঠো.

২৭. যদাভিনীহারমকা সুমেধো,

যদা চ মদ্দিং অদদা সিৰিন্দো;

এত্থন্তরে জাতিসু কিঞ্চিপেকং,

নিরত্থকং নো অগমাসি তস্স.

২৮. মহাসমুদ্দে জলবিন্দুতোপি,

তদন্ত্রে জাতি অনপ্পকা ৰ;

নিরন্তরং পূরিতপারমীনং,

কথং পমাণং উপমা কুহিং ৰা.

২৯. যো মগ্গপস্সে মধুরম্ববীজং,

ছাযাফলত্থায মহাজনানং;

রোপেসি তস্মিং হি খণেৰ তেন,

ছাযাফলে পুঞ্ঞমলদ্ধমুদ্ধং.

৩০. তথেৰ সংসারপথে জনানং,

হিতায অত্তনমভিরোপিতক্খণে;

সিদ্ধং ৰ পুঞ্ঞূপরি তস্স তস্মিং,

ধনঙ্গজীৰং পি হরন্তি যে যে.

৩১. সো সাগরে জলধিকং রুহিরং অদাসি,

ভূমাপরাজিয সমংসমদাসি দানং;

মেরুপ্পমাণমধিকঞ্চ সমোল়িসীসং,

খে তারকাধিকতরং নযনং অদাসি.

গব্ভোক্কন্তিদীপনীগাথা

৩২. গম্ভীরপানদানাদিসাগরেসু হি থামসা;

তরন্তো মদ্দিদানেন নিট্ঠাপেত্ৰান পারমী.

৩৩. ৰসন্তো তুসীতে কাযে বোধিপরিপাকমাগম্ম;

আযাচনায চ দেৰানং মাতুগব্ভমুপাগমি.

৩৪. সতো চ সম্পজানো চ মাতুকুচ্ছিম্হি ওক্কমি;

তস্স ওক্কন্তিযং সব্বা দসসহস্সী পকম্পিত্থ.

৩৫. ততো পুব্বনিমিত্তানি দ্ৰত্তিংসানি তদা সিযুং;

তুট্ঠহট্ঠা ৰ সা মাতা পুত্তং পস্সতি কুচ্ছিযং.

ৰিজাযনমঙ্গলদীপনীগাথা

৩৬. সা পুণ্ণগব্ভা দসমাসতো পরং,

গন্ত্ৰান ফুল্লং ৰরলুম্বিনীৰনং;

ঠিতা গহেত্ৰা ৰরসালসাখং,

ৰিজাযি তং পুত্তৰরং সুখেন.

৩৭. তদা সহস্সীদসলোকধাতুসু,

দেৰা চ নাগা অসুরা চ যক্খা;

নানাদিসা মঙ্গলচক্কৰাল়ং,

সুমঙ্গলং মঙ্গলমাগমিংসু.

৩৮. অনেকসাখঞ্চ সহস্সমণ্ডলং,

ছত্তং মরূ ধারযুমন্তলিক্খে;

সুৰণ্ণদণ্ডা ৰিপতন্তি চামরা,

খজ্জিংসু ভেরী চ নদিংসু সঙ্খা.