২. কাযসক্খীসুত্তং

৪৩. ‘‘‘কাযসক্খী কাযসক্খী’তি, আৰুসো, ৰুচ্চতি. কিত্তাৰতা নু খো, আৰুসো, কাযসক্খী ৰুত্তো ভগৰতা’’তি? ‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. যথা যথা চ তদাযতনং তথা তথা নং কাযেন ফুসিত্ৰা ৰিহরতি. এত্তাৰতাপি খো, আৰুসো, কাযসক্খী ৰুত্তো ভগৰতা পরিযাযেন.

‘‘পুন চপরং, আৰুসো, ভিক্খু ৰিতক্কৰিচারানং ৰূপসমা…পে… দুতিযং ঝানং… ততিযং ঝানং… চতুত্থং ঝানং উপসম্পজ্জ ৰিহরতি. যথা যথা চ তদাযতনং তথা তথা নং কাযেন ফুসিত্ৰা ৰিহরতি. এত্তাৰতাপি খো, আৰুসো, কাযসক্খী ৰুত্তো ভগৰতা পরিযাযেন.

‘‘পুন চপরং, আৰুসো, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. যথা যথা চ তদাযতনং তথা তথা নং কাযেন ফুসিত্ৰা ৰিহরতি. এত্তাৰতাপি খো, আৰুসো, কাযসক্খী ৰুত্তো ভগৰতা পরিযাযেন…পে….

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. যথা যথা চ তদাযতনং তথা তথা নং কাযেন ফুসিত্ৰা ৰিহরতি. এত্তাৰতাপি খো, আৰুসো, কাযসক্খী ৰুত্তো ভগৰতা নিপ্পরিযাযেনা’’তি. দুতিযং.