২. সীহনাদৰগ্গো

১. সীহনাদসুত্তং

১১. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘ৰুত্থো মে, ভন্তে, সাৰত্থিযং ৰস্সাৰাসো. ইচ্ছামহং, ভন্তে, জনপদচারিকং পক্কমিতু’’ন্তি. ‘‘যস্সদানি ত্ৰং, সারিপুত্ত, কালং মঞ্ঞসী’’তি. অথ খো আযস্মা সারিপুত্তো উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো অঞ্ঞতরো ভিক্খু অচিরপক্কন্তে আযস্মন্তে সারিপুত্তে ভগৰন্তং এতদৰোচ – ‘‘আযস্মা মং, ভন্তে, সারিপুত্তো আসজ্জ অপ্পটিনিস্সজ্জ চারিকং পক্কন্তো’’তি. অথ খো ভগৰা অঞ্ঞতরং ভিক্খুং আমন্তেসি – ‘‘এহি ত্ৰং, ভিক্খু, মম ৰচনেন সারিপুত্তং আমন্তেহি – ‘সত্থা তং, আৰুসো সারিপুত্ত, আমন্তেতী’’’তি. ‘‘এৰং, ভন্তে’’তি খো সো ভিক্খু ভগৰতো পটিস্সুত্ৰা যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং এতদৰোচ – ‘‘সত্থা তং, আৰুসো সারিপুত্ত, আমন্তেতী’’তি. ‘‘এৰমাৰুসো’’তি খো আযস্মা সারিপুত্তো তস্স ভিক্খুনো পচ্চস্সোসি.

তেন খো পন সমযেন আযস্মা চ মহামোগ্গল্লানো [মহামোগ্গলানো (ক.)] আযস্মা চ আনন্দো অৰাপুরণং [অপাপুরণং (স্যা. ক.)] আদায ৰিহারে আহিণ্ডন্তি [ৰিহারেন ৰিহারং অন্ৰাহিণ্ডন্তি (সী. পী.), ৰিহারং আহিণ্ডন্তি (স্যা.)] – ‘‘অভিক্কমথাযস্মন্তো, অভিক্কমথাযস্মন্তো! ইদানাযস্মা সারিপুত্তো ভগৰতো সম্মুখা সীহনাদং নদিস্সতী’’তি. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সারিপুত্তং ভগৰা এতদৰোচ – ‘‘ইধ তে, সারিপুত্ত, অঞ্ঞতরো সব্রহ্মচারী খীযনধম্মং আপন্নো – ‘আযস্মা মং, ভন্তে, সারিপুত্তো আসজ্জ অপ্পটিনিস্সজ্জচারিকং পক্কন্তো’’’তি.

‘‘যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, পথৰিযং সুচিম্পি নিক্খিপন্তি অসুচিম্পি নিক্খিপন্তি গূথগতম্পি নিক্খিপন্তি মুত্তগতম্পি নিক্খিপন্তি খেল়গতম্পি নিক্খিপন্তি পুব্বগতম্পি নিক্খিপন্তি লোহিতগতম্পি নিক্খিপন্তি, ন চ তেন পথৰী অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং, ভন্তে, পথৰীসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, আপস্মিং সুচিম্পি ধোৰন্তি অসুচিম্পি ধোৰন্তি গূথগতম্পি… মুত্তগতম্পি… খেল়গতম্পি… পুব্বগতম্পি… লোহিতগতম্পি ধোৰন্তি, ন চ তেন আপো অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং, ভন্তে, আপোসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, তেজো সুচিম্পি ডহতি অসুচিম্পি ডহতি গূথগতম্পি… মুত্তগতম্পি… খেল়গতম্পি… পুব্বগতম্পি… লোহিতগতম্পি ডহতি, ন চ তেন তেজো অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং, ভন্তে, তেজোসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, ৰাযো সুচিম্পি উপৰাযতি অসুচিম্পি উপৰাযতি গূথগতম্পি… মুত্তগতম্পি… খেল়গতম্পি… পুব্বগতম্পি… লোহিতগতম্পি উপৰাযতি, ন চ তেন ৰাযো অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং, ভন্তে, ৰাযোসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, রজোহরণং সুচিম্পি পুঞ্ছতি অসুচিম্পি পুঞ্ছতি গূথগতম্পি… মুত্তগতম্পি… খেল়গতম্পি… পুব্বগতম্পি… লোহিতগতম্পি পুঞ্ছতি, ন চ তেন রজোহরণং অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং, ভন্তে, রজোহরণসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, চণ্ডালকুমারকো ৰা চণ্ডালকুমারিকা ৰা কল়োপিহত্থো নন্তকৰাসী গামং ৰা নিগমং ৰা পৰিসন্তো নীচচিত্তংযেৰ উপট্ঠপেত্ৰা পৰিসতি; এৰমেৰং খো অহং, ভন্তে, চণ্ডালকুমারকচণ্ডালকুমারিকাসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, উসভো ছিন্নৰিসাণো সূরতো সুদন্তো সুৰিনীতো রথিযায রথিযং সিঙ্ঘাটকেন সিঙ্ঘাটকং অন্ৰাহিণ্ডন্তো ন কিঞ্চি হিংসতি পাদেন ৰা ৰিসাণেন ৰা; এৰমেৰং খো অহং, ভন্তে, উসভছিন্নৰিসাণসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, ইত্থী ৰা পুরিসো ৰা দহরো যুৰা মণ্ডনকজাতিকো সীসংন্হাতো অহিকুণপেন ৰা কুক্কুরকুণপেন ৰা মনুস্সকুণপেন ৰা কণ্ঠে আসত্তেন অট্টীযেয্য হরাযেয্য জিগুচ্ছেয্য; এৰমেৰং খো অহং, ভন্তে, ইমিনা পূতিকাযেন অট্টীযামি হরাযামি জিগুচ্ছামি. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, পুরিসো মেদকথালিকং পরিহরেয্য ছিদ্দাৰছিদ্দং উগ্ঘরন্তং পগ্ঘরন্তং; এৰমেৰং খো অহং, ভন্তে, ইমং কাযং পরিহরামি ছিদ্দাৰছিদ্দং উগ্ঘরন্তং পগ্ঘরন্তং. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্যা’’তি.

অথ খো সো ভিক্খু উট্ঠাযাসনা একংসং উত্তরাসঙ্গং করিত্ৰা ভগৰতো পাদেসু সিরসা নিপতিত্ৰা ভগৰন্তং এতদৰোচ – ‘‘অচ্চযো মং, ভন্তে, অচ্চগমা যথাবালং যথামূল়্হং যথাঅকুসলং, যো অহং আযস্মন্তং সারিপুত্তং অসতা তুচ্ছা মুসা অভূতেন অব্ভাচিক্খিং. তস্স মে, ভন্তে, ভগৰা অচ্চযং অচ্চযতো পটিগ্গণ্হতু আযতিং সংৰরাযা’’তি. ‘‘তগ্ঘ তং [ত্ৰং (সী. পী.)], ভিক্খু, অচ্চযো অচ্চগমা যথাবালং যথামূল়্হং যথাঅকুসলং, যো ত্ৰং সারিপুত্তং অসতা তুচ্ছা মুসা অভূতেন অব্ভাচিক্খি. যতো চ খো ত্ৰং, ভিক্খু, অচ্চযং অচ্চযতো দিস্ৰা যথাধম্মং পটিকরোসি, তং তে মযং পটিগ্গণ্হাম. ৰুড্ঢিহেসা, ভিক্খু, অরিযস্স ৰিনযে যো অচ্চযং অচ্চযতো দিস্ৰা যথাধম্মং পটিকরোতি আযতিং সংৰরং আপজ্জতী’’তি.

অথ খো ভগৰা আযস্মন্তং সারিপুত্তং আমন্তেসি – ‘‘খম, সারিপুত্ত, ইমস্স মোঘপুরিসস্স, পুরা তস্স তত্থেৰ সত্তধা মুদ্ধা ফলতী’’তি [ফলিস্সতীতি (ক. সী. স্যা. পী. ক.) অট্ঠকথাসু পন ‘‘ফলতীতি’’ ইত্ৰেৰ দিস্সতি]. ‘‘খমামহং, ভন্তে, তস্স আযস্মতো সচে মং সো আযস্মা এৰমাহ – ‘খমতু চ মে সো আযস্মা’’’তি. পঠমং.

২. সউপাদিসেসসুত্তং

১২. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো আযস্মা সারিপুত্তো পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পাৰিসি. অথ খো আযস্মতো সারিপুত্তস্স এতদহোসি – ‘‘অতিপ্পগো খো তাৰ সাৰত্থিযং পিণ্ডায চরিতুং, যংনূনাহং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্য’’ন্তি. অথ খো আযস্মা সারিপুত্তো যেন অঞ্ঞতিত্থিযানং পরিব্বাজকানং আরামো তেনুপসঙ্কমি; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি.

তেন খো পন সমযেন তেসং অঞ্ঞতিত্থিযানং পরিব্বাজকানং সন্নিসিন্নানং সন্নিপতিতানং অযমন্তরাকথা উদপাদি – ‘‘যো হি কোচি, আৰুসো, সউপাদিসেসো কালং করোতি, সব্বো সো অপরিমুত্তো নিরযা অপরিমুত্তো তিরচ্ছানযোনিযা অপরিমুত্তো পেত্তিৰিসযা অপরিমুত্তো অপাযদুগ্গতিৰিনিপাতা’’তি. অথ খো আযস্মা সারিপুত্তো তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দি নপ্পটিক্কোসি. অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কামি – ‘‘ভগৰতো সন্তিকে এতস্স ভাসিতস্স অত্থং আজানিস্সামী’’তি. অথ খো আযস্মা সারিপুত্তো সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো ভগৰন্তং এতদৰোচ –

‘‘ইধাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পাৰিসিং. তস্স ময্হং, ভন্তে, এতদহোসি – ‘অতিপ্পগো খো তাৰ সাৰত্থিযং পিণ্ডায চরিতুং; যংনূনাহং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্য’ন্তি. অথ খো অহং, ভন্তে, যেন অঞ্ঞতিত্থিযানং পরিব্বাজকানং আরামো তেনুপসঙ্কমিং; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদিং. সম্মোদনীযং কথং সারণীযং ৰীতিসারেত্ৰা একমন্তং নিসীদিং. তেন খো পন সমযেন তেসং অঞ্ঞতিত্থিযানং পরিব্বাজকানং সন্নিসিন্নানং সন্নিপতিতানং অযমন্তরাকথা উদপাদি – ‘যো হি কোচি, আৰুসো, সউপাদিসেসো কালং করোতি, সব্বো সো অপরিমুত্তো নিরযা অপরিমুত্তো তিরচ্ছানযোনিযা অপরিমুত্তো পেত্তিৰিসযা অপরিমুত্তো অপাযদুগ্গতিৰিনিপাতা’তি. অথ খো অহং, ভন্তে, তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দিং নপ্পটিক্কোসিং. অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কমিং – ‘ভগৰতো সন্তিকে এতস্স ভাসিতস্স অত্থং আজানিস্সামী’’’তি.

‘‘কে চ [কেচি (স্যা. পী.), তে চ (ক.)], সারিপুত্ত, অঞ্ঞতিত্থিযা পরিব্বাজকা বালা অব্যত্তা, কে চ [কেচি (স্যা. পী. ক.) অ. নি. ৬.৪৪ পাল়িযা সংসন্দেতব্বং] সউপাদিসেসং ৰা ‘সউপাদিসেসো’তি জানিস্সন্তি, অনুপাদিসেসং ৰা ‘অনুপাদিসেসো’তি জানিস্সন্তি’’!

‘‘নৰযিমে, সারিপুত্ত, পুগ্গলা সউপাদিসেসা কালং কুরুমানা পরিমুত্তা নিরযা পরিমুত্তা তিরচ্ছানযোনিযা পরিমুত্তা পেত্তিৰিসযা পরিমুত্তা অপাযদুগ্গতিৰিনিপাতা. কতমে নৰ? ইধ, সারিপুত্ত, একচ্চো পুগ্গলো সীলেসু পরিপূরকারী হোতি, সমাধিস্মিং পরিপূরকারী, পঞ্ঞায মত্তসো কারী. সো পঞ্চন্নং ওরম্ভাগিযানং সংযোজনানং পরিক্খযা অন্তরাপরিনিব্বাযী হোতি. অযং, সারিপুত্ত, পঠমো পুগ্গলো সউপাদিসেসো কালং কুরুমানো পরিমুত্তো নিরযা পরিমুত্তো তিরচ্ছানযোনিযা পরিমুত্তো পেত্তিৰিসযা পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং পরিপূরকারী, পঞ্ঞায মত্তসো কারী. সো পঞ্চন্নং ওরম্ভাগিযানং সংযোজনানং পরিক্খযা উপহচ্চপরিনিব্বাযী হোতি…পে… অসঙ্খারপরিনিব্বাযী হোতি…পে… সসঙ্খারপরিনিব্বাযী হোতি…পে… উদ্ধংসোতো হোতি অকনিট্ঠগামী. অযং, সারিপুত্ত, পঞ্চমো পুগ্গলো সউপাদিসেসো কালং কুরুমানো পরিমুত্তো নিরযা পরিমুত্তো তিরচ্ছানযোনিযা পরিমুত্তো পেত্তিৰিসযা পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতি, সকিদেৰ ইমং লোকং আগন্ত্ৰা দুক্খস্সন্তং করোতি. অযং, সারিপুত্ত, ছট্ঠো পুগ্গলো সউপাদিসেসো কালং কুরুমানো পরিমুত্তো নিরযা…পে… পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো তিণ্ণং সংযোজনানং পরিক্খযা একবীজী হোতি, একংযেৰ মানুসকং ভৰং নিব্বত্তেত্ৰা দুক্খস্সন্তং করোতি. অযং, সারিপুত্ত, সত্তমো পুগ্গলো সউপাদিসেসো কালং কুরুমানো পরিমুত্তো নিরযা…পে… পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো তিণ্ণং সংযোজনানং পরিক্খযা কোলংকোলো হোতি, দ্ৰে ৰা তীণি ৰা কুলানি সন্ধাৰিত্ৰা সংসরিত্ৰা দুক্খস্সন্তং করোতি. অযং, সারিপুত্ত, অট্ঠমো পুগ্গলো সউপাদিসেসো কালং কুরুমানো পরিমুত্তো নিরযা…পে… পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো তিণ্ণং সংযোজনানং পরিক্খযা সত্তক্খত্তুপরমো হোতি, সত্তক্খত্তুপরমং দেৰে চ মনুস্সে চ সন্ধাৰিত্ৰা সংসরিত্ৰা দুক্খস্সন্তং করোতি. অযং, সারিপুত্ত, নৰমো পুগ্গলো সউপাদিসেসো কালং কুরুমানো পরিমুত্তো নিরযা পরিমুত্তো তিরচ্ছানযোনিযা পরিমুত্তো পেত্তিৰিসযা পরিমুত্তো অপাযদুগ্গতিৰিনিপাতা.

‘‘কে চ, সারিপুত্ত, অঞ্ঞতিত্থিযা পরিব্বাজকা বালা অব্যত্তা, কে চ সউপাদিসেসং ৰা ‘সউপাদিসেসো’তি জানিস্সন্তি, অনুপাদিসেসং ৰা ‘অনুপাদিসেসো’তি জানিস্সন্তি! ইমে খো, সারিপুত্ত, নৰ পুগ্গলা সউপাদিসেসা কালং কুরুমানা পরিমুত্তা নিরযা পরিমুত্তা তিরচ্ছানযোনিযা পরিমুত্তা পেত্তিৰিসযা পরিমুত্তা অপাযদুগ্গতিৰিনিপাতা. ন তাৰাযং, সারিপুত্ত, ধম্মপরিযাযো পটিভাসি ভিক্খূনং ভিক্খুনীনং উপাসকানং উপাসিকানং. তং কিস্স হেতু? মাযিমং ধম্মপরিযাযং সুত্ৰা পমাদং আহরিংসূতি [আহরিংসু (সী. পী.)]. অপি চ মযা [অপি চাযং (?)], সারিপুত্ত, ধম্মপরিযাযো পঞ্হাধিপ্পাযেন ভাসিতো’’তি. দুতিযং.

৩. কোট্ঠিকসুত্তং

১৩. অথ খো আযস্মা মহাকোট্ঠিকো [মহাকোট্ঠিতো (সী. স্যা. পী.)] যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা মহাকোট্ঠিকো আযস্মন্তং সারিপুত্তং এতদৰোচ – ‘‘কিং নু খো, আৰুসো সারিপুত্ত, ‘যং কম্মং দিট্ঠধম্মৰেদনীযং, তং মে কম্মং সম্পরাযৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং সুখৰেদনীযং [সুখৰেদনিযং (ক.) ম. নি. ৩.৮ পস্সিতব্বং], তং মে কম্মং দুক্খৰেদনীযং [দুক্খৰেদনিযং (ক.)] হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং পনাৰুসো, সারিপুত্ত, ‘যং কম্মং দুক্খৰেদনীযং, তং মে কম্মং সুখৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং পরিপক্কৰেদনীযং, তং মে কম্মং অপরিপক্কৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং পনাৰুসো সারিপুত্ত, ‘যং কম্মং অপরিপক্কৰেদনীযং, তং মে কম্মং পরিপক্কৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং বহুৰেদনীযং, তং মে কম্মং অপ্পৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং পনাৰুসো সারিপুত্ত, ‘যং কম্মং অপ্পৰেদনীযং, তং মে কম্মং বহুৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং ৰেদনীযং, তং মে কম্মং অৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং পনাৰুসো সারিপুত্ত, ‘যং কম্মং অৰেদনীযং, তং মে কম্মং ৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘‘কিং নু খো, আৰুসো সারিপুত্ত, যং কম্মং দিট্ঠধম্মৰেদনীযং তং মে কম্মং সম্পরাযৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং সম্পরাযৰেদনীযং তং মে কম্মং দিট্ঠধম্মৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং নু খো, আৰুসো সারিপুত্ত, যং কম্মং সুখৰেদনীযং তং মে কম্মং দুক্খৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং দুক্খৰেদনীযং তং মে কম্মং সুখৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং নু খো, আৰুসো সারিপুত্ত, যং কম্মং পরিপক্কৰেদনীযং তং মে কম্মং অপরিপক্কৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং অপরিপক্কৰেদনীযং তং মে কম্মং পরিপক্কৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং নু খো, আৰুসো সারিপুত্ত, যং কম্মং বহুৰেদনীযং তং মে কম্মং অপ্পৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং অপ্পৰেদনীযং তং মে কম্মং বহুৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং নু খো, আৰুসো সারিপুত্ত, যং কম্মং ৰেদনীযং তং মে কম্মং অৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং অৰেদনীযং তং মে কম্মং ৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি. অথ কিমত্থং চরহাৰুসো, ভগৰতি ব্রহ্মচরিযং ৰুস্সতী’’তি?

‘‘যং খ্ৰস্স [যং খো (ক.)], আৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং, তস্স ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতী’’তি [ৰুস্সতি (স্যা.)]. (‘‘কিং পনস্সাৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং, যস্স ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতী’’তি?) [( ) স্যা. ক. পোত্থকেসু নত্থি] ‘‘‘ইদং দুক্খ’ন্তি খ্ৰস্স [খো যং (ক.)], আৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং. তস্স ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতি. অযং ‘দুক্খসমুদযো’তি খ্ৰস্স, আৰুসো…পে… ‘অযং দুক্খনিরোধো’তি খ্ৰস্স, আৰুসো…পে… ‘অযং দুক্খনিরোধগামিনী পটিপদা’তি খ্ৰস্স, আৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং. তস্স ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতি. ইদং খ্ৰস্স [ইতি খো যং (ক.)], আৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং. তস্স [যস্স (?)] ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতী’’তি. ততিযং.

৪. সমিদ্ধিসুত্তং

১৪. অথ খো আযস্মা সমিদ্ধি যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সমিদ্ধিং আযস্মা সারিপুত্তো এতদৰোচ – ‘‘কিমারম্মণা, সমিদ্ধি, পুরিসস্স সঙ্কপ্পৰিতক্কা উপ্পজ্জন্তী’’তি? ‘‘নামরূপারম্মণা, ভন্তে’’তি. ‘‘তে পন, সমিদ্ধি, ক্ৰ নানত্তং গচ্ছন্তী’’তি? ‘‘ধাতূসু, ভন্তে’’তি. ‘‘তে পন, সমিদ্ধি, কিংসমুদযা’’তি? ‘‘ফস্সসমুদযা, ভন্তে’’তি. ‘‘তে পন, সমিদ্ধি, কিংসমোসরণা’’তি? ‘‘ৰেদনাসমোসরণা, ভন্তে’’তি. ‘‘তে পন, সমিদ্ধি, কিংপমুখা’’তি? ‘‘সমাধিপ্পমুখা, ভন্তে’’তি. ‘‘তে পন, সমিদ্ধি, কিংঅধিপতেয্যা’’তি? ‘‘সতাধিপতেয্যা, ভন্তে’’তি. ‘‘তে পন, সমিদ্ধি, কিংউত্তরা’’তি? ‘‘পঞ্ঞুত্তরা, ভন্তে’’তি. ‘‘তে পন, সমিদ্ধি, কিংসারা’’তি? ‘‘ৰিমুত্তিসারা, ভন্তে’’তি. ‘‘তে পন, সমিদ্ধি, কিংওগধা’’তি? ‘‘অমতোগধা, ভন্তে’’তি.

‘‘‘কিমারম্মণা, সমিদ্ধি, পুরিসস্স সঙ্কপ্পৰিতক্কা উপ্পজ্জন্তী’তি, ইতি পুট্ঠো সমানো ‘নামরূপারম্মণা, ভন্তে’তি ৰদেসি. ‘তে পন, সমিদ্ধি, ক্ৰ নানত্তং গচ্ছন্তী’তি, ইতি পুট্ঠো সমানো ‘ধাতূসু, ভন্তে’তি ৰদেসি. ‘তে পন, সমিদ্ধি, কিংসমুদযা’তি, ইতি পুট্ঠো সমানো ‘ফস্সসমুদযা, ভন্তে’তি ৰদেসি. ‘তে পন, সমিদ্ধি, কিংসমোসরণা’তি, ইতি পুট্ঠো সমানো ‘ৰেদনাসমোসরণা, ভন্তে’তি ৰদেসি. ‘তে পন, সমিদ্ধি, কিংপমুখা’তি, ইতি পুট্ঠো সমানো ‘সমাধিপ্পমুখা, ভন্তে’তি ৰদেসি. ‘তে পন, সমিদ্ধি, কিংঅধিপতেয্যা’তি, ইতি পুট্ঠো সমানো ‘সতাধিপতেয্যা, ভন্তে’তি ৰদেসি. ‘তে পন, সমিদ্ধি, কিংউত্তরা’তি, ইতি পুট্ঠো সমানো ‘পঞ্ঞুত্তরা, ভন্তে’তি ৰদেসি. ‘তে পন, সমিদ্ধি, কিংসারা’তি, ইতি পুট্ঠো সমানো ‘ৰিমুত্তিসারা, ভন্তে’তি ৰদেসি. ‘তে পন, সমিদ্ধি, কিংওগধা’তি, ইতি পুট্ঠো সমানো ‘অমতোগধা, ভন্তে’তি ৰদেসি. সাধু সাধু, সমিদ্ধি! সাধু খো ত্ৰং, সমিদ্ধি, পুট্ঠো [পঞ্হং (সী. স্যা. পী.)] পুট্ঠো ৰিস্সজ্জেসি, তেন চ মা মঞ্ঞী’’তি. চতুত্থং.

৫. গণ্ডসুত্তং

১৫. ‘‘সেয্যথাপি, ভিক্খৰে, গণ্ডো অনেকৰস্সগণিকো. তস্সস্সু গণ্ডস্স নৰ ৰণমুখানি নৰ অভেদনমুখানি. ততো যং কিঞ্চি পগ্ঘরেয্য – অসুচিযেৰ পগ্ঘরেয্য, দুগ্গন্ধংযেৰ পগ্ঘরেয্য, জেগুচ্ছিযংযেৰ [জেগুচ্ছিযেৰ (ক.)] পগ্ঘরেয্য; যং কিঞ্চি পসৰেয্য – অসুচিযেৰ পসৰেয্য, দুগ্গন্ধংযেৰ পসৰেয্য, জেগুচ্ছিযংযেৰ পসৰেয্য.

‘‘গণ্ডোতি খো, ভিক্খৰে, ইমস্সেতং চাতুমহাভূতিকস্স [চাতুম্মহাভূতিকস্স (সী. স্যা. পী.)] কাযস্স অধিৰচনং মাতাপেত্তিকসম্ভৰস্স ওদনকুম্মাসূপচযস্স অনিচ্চুচ্ছাদনপরিমদ্দনভেদনৰিদ্ধংসনধম্মস্স. তস্সস্সু গণ্ডস্স নৰ ৰণমুখানি নৰ অভেদনমুখানি. ততো যং কিঞ্চি পগ্ঘরতি – অসুচিযেৰ পগ্ঘরতি, দুগ্গন্ধংযেৰ পগ্ঘরতি, জেগুচ্ছিযংযেৰ পগ্ঘরতি; যং কিঞ্চি পসৰতি – অসুচিযেৰ পসৰতি, দুগ্গন্ধংযেৰ পসৰতি, জেগুচ্ছিযংযেৰ পসৰতি. তস্মাতিহ, ভিক্খৰে, ইমস্মিং কাযে নিব্বিন্দথা’’তি. পঞ্চমং.

৬. সঞ্ঞাসুত্তং

১৬. ‘‘নৰযিমা, ভিক্খৰে, সঞ্ঞা ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানা. কতমা নৰ? অসুভসঞ্ঞা, মরণসঞ্ঞা, আহারে পটিকূলসঞ্ঞা [পটিক্কূলসঞ্ঞা (সী. স্যা. পী.)], সব্বলোকে অনভিরতসঞ্ঞা [অনভিরতিসঞ্ঞা (ক.) অ. নি. ৫.১২১-১২২], অনিচ্চসঞ্ঞা, অনিচ্চে দুক্খসঞ্ঞা, দুক্খে অনত্তসঞ্ঞা, পহানসঞ্ঞা, ৰিরাগসঞ্ঞা – ইমা খো, ভিক্খৰে, নৰ সঞ্ঞা, ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানা’’তি. ছট্ঠং.

৭. কুলসুত্তং

১৭. ‘‘নৰহি, ভিক্খৰে, অঙ্গেহি সমন্নাগতং কুলং অনুপগন্ত্ৰা ৰা নালং উপগন্তুং, উপগন্ত্ৰা ৰা নালং নিসীদিতুং. কতমেহি নৰহি? ন মনাপেন পচ্চুট্ঠেন্তি, ন মনাপেন অভিৰাদেন্তি, ন মনাপেন আসনং দেন্তি, সন্তমস্স পরিগুহন্তি, বহুকম্পি থোকং দেন্তি, পণীতম্পি লূখং দেন্তি, অসক্কচ্চং দেন্তি নো সক্কচ্চং, ন উপনিসীদন্তি ধম্মস্সৰনায, ভাসিতমস্স ন সুস্সূসন্তি. ইমেহি খো, ভিক্খৰে, নৰহঙ্গেহি সমন্নাগতং কুলং অনুপগন্ত্ৰা ৰা নালং উপগন্তুং উপগন্ত্ৰা ৰা নালং নিসীদিতুং.

‘‘নৰহি, ভিক্খৰে, অঙ্গেহি সমন্নাগতং কুলং অনুপগন্ত্ৰা ৰা অলং উপগন্তুং, উপগন্ত্ৰা ৰা অলং নিসীদিতুং. কতমেহি নৰহি? মনাপেন পচ্চুট্ঠেন্তি, মনাপেন অভিৰাদেন্তি, মনাপেন আসনং দেন্তি, সন্তমস্স ন পরিগুহন্তি, বহুকম্পি বহুকং দেন্তি, পণীতম্পি পণীতং দেন্তি, সক্কচ্চং দেন্তি নো অসক্কচ্চং, উপনিসীদন্তি ধম্মস্সৰনায, ভাসিতমস্স সুস্সূসন্তি. ইমেহি খো, ভিক্খৰে, নৰহঙ্গেহি সমন্নাগতং কুলং অনুপগন্ত্ৰা ৰা অলং উপগন্তুং, উপগন্ত্ৰা ৰা অলং নিসীদিতু’’ন্তি. সত্তমং.

৮. নৰঙ্গুপোসথসুত্তং

১৮. ‘‘নৰহি, ভিক্খৰে, অঙ্গেহি সমন্নাগতো উপোসথো উপৰুত্থো মহপ্ফলো হোতি মহানিসংসো মহাজুতিকো মহাৰিপ্ফারো. কথং উপৰুত্থো চ, ভিক্খৰে, নৰহঙ্গেহি সমন্নাগতো উপোসথো মহপ্ফলো হোতি মহানিসংসো মহাজুতিকো মহাৰিপ্ফারো? ইধ, ভিক্খৰে, অরিযসাৰকো ইতি পটিসঞ্চিক্খতি – ‘যাৰজীৰং অরহন্তো পাণাতিপাতং পহায পাণাতিপাতা পটিৰিরতা নিহিতদণ্ডা নিহিতসত্থা লজ্জী দযাপন্না সব্বপাণভূতহিতানুকম্পিনো ৰিহরন্তি; অহম্পজ্জ ইমঞ্চ রত্তিং ইমঞ্চ দিৰসং পাণাতিপাতং পহায পাণাতিপাতা পটিৰিরতো নিহিতদণ্ডো নিহিতসত্থো লজ্জী দযাপন্নো সব্বপাণভূতহিতানুকম্পী ৰিহরামি. ইমিনাপঙ্গেন [ইমিনাপি অঙ্গেন (ক. সী.)] অরহতং অনুকরোমি; উপোসথো চ মে উপৰুত্থো ভৰিস্সতী’তি. ইমিনা পঠমেন অঙ্গেন সমন্নাগতো হোতি…পে. ….

‘‘‘যাৰজীৰং অরহন্তো উচ্চাসযনমহাসযনং পহায উচ্চাসযনমহাসযনা পটিৰিরতা নীচসেয্যং কপ্পেন্তি – মঞ্চকে ৰা তিণসন্থারকে ৰা; অহম্পজ্জ ইমঞ্চ রত্তিং ইমঞ্চ দিৰসং উচ্চাসযনমহাসযনং পহায উচ্চাসযনমহাসযনা পটিৰিরতো নীচসেয্যং কপ্পেমি – মঞ্চকে ৰা তিণসন্থারকে ৰা. ইমিনাপঙ্গেন অরহতং অনুকরোমি; উপোসথো চ মে উপৰুত্থো ভৰিস্সতী’তি. ইমিনা অট্ঠমেন অঙ্গেন সমন্নাগতো হোতি.

‘‘মেত্তাসহগতেন চেতসা একং দিসং ফরিত্ৰা ৰিহরতি, তথা দুতিযং তথা ততিযং তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন [অব্যাপজ্ঝেন (ক.), অব্যাবজ্ঝেন (?)] ফরিত্ৰা ৰিহরতি. ইমিনা নৰমেন অঙ্গেন সমন্নাগতো হোতি. এৰং উপৰুত্থো খো, ভিক্খৰে, নৰহঙ্গেহি সমন্নাগতো উপোসথো মহপ্ফলো হোতি মহানিসংসো মহাজুতিকো মহাৰিপ্ফারো’’তি. অট্ঠমং.

৯. দেৰতাসুত্তং

১৯. ‘‘ইমঞ্চ, ভিক্খৰে, রত্তিং সম্বহুলা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেনাহং তেনুপসঙ্কমিংসু; উপসঙ্কমিত্ৰা মং অভিৰাদেত্ৰা একমন্তং অট্ঠংসু. একমন্তং ঠিতা খো, ভিক্খৰে, তা দেৰতা মং এতদৰোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগারানি. তে মযং, ভন্তে, পচ্চুট্ঠিম্হ, নো চ খো অভিৰাদিম্হ. তা মযং, ভন্তে, অপরিপুণ্ণকম্মন্তা ৰিপ্পটিসারিনিযো পচ্চানুতাপিনিযো হীনং কাযং উপপন্না’’’তি.

‘‘অপরাপি মং, ভিক্খৰে, সম্বহুলা দেৰতা উপসঙ্কমিত্ৰা এতদৰোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগারানি. তে মযং, ভন্তে, পচ্চুট্ঠিম্হ অভিৰাদিম্হ [পচ্চুট্ঠিম্হ চ অভিৰাদিম্হ চ (স্যা.)], নো চ তেসং আসনং অদম্হ. তা মযং, ভন্তে, অপরিপুণ্ণকম্মন্তা ৰিপ্পটিসারিনিযো পচ্চানুতাপিনিযো হীনং কাযং উপপন্না’’’তি.

‘‘অপরাপি মং, ভিক্খৰে, সম্বহুলা দেৰতা উপসঙ্কমিত্ৰা এতদৰোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগারানি. তে মযং, ভন্তে, পচ্চুট্ঠিম্হ অভিৰাদিম্হ [পচ্চুট্ঠিম্হ চ অভিৰাদিম্হ চ (স্যা.)] আসনং [আসনঞ্চ (সী. স্যা.)] অদম্হ, নো চ খো যথাসত্তি যথাবলং সংৰিভজিম্হ…পে… যথাসত্তি যথাবলং [যথাবলং চ (?)] সংৰিভজিম্হ, নো চ খো উপনিসীদিম্হ ধম্মস্সৰনায…পে… উপনিসীদিম্হ [উপনিসীদিম্হ চ (স্যা.)] ধম্মস্সৰনায, নো চ খো ওহিতসোতা ধম্মং সুণিম্হ…পে… ওহিতসোতা চ ধম্মং সুণিম্হ, নো চ খো সুত্ৰা ধম্মং ধারযিম্হ…পে… সুত্ৰা চ ধম্মং ধারযিম্হ, নো চ খো ধাতানং ধম্মানং অত্থং উপপরিক্খিম্হ…পে… ধাতানঞ্চ ধম্মানং অত্থং উপপরিক্খিম্হ, নো চ খো অত্থমঞ্ঞায ধম্মমঞ্ঞায ধম্মানুধম্মং পটিপজ্জিম্হ. তা মযং, ভন্তে, অপরিপুণ্ণকম্মন্তা ৰিপ্পটিসারিনিযো পচ্চানুতাপিনিযো হীনং কাযং উপপন্না’’’তি.

‘‘অপরাপি মং, ভিক্খৰে, সম্বহুলা দেৰতা উপসঙ্কমিত্ৰা এতদৰোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগারানি. তে মযং, ভন্তে, পচ্চুট্ঠিম্হ অভিৰাদিম্হ [পচ্চুট্ঠিম্হ চ অভিৰাদিম্হ চ (স্যা.)], আসনং [আসনঞ্চ (সী. স্যা.)] অদম্হ, যথাসত্তি যথাবলং [যথাবলং চ (?)] সংৰিভজিম্হ, উপনিসীদিম্হ [উপনিসীদিম্হ চ (স্যা.)] ধম্মস্সৰনায, ওহিতসোতা চ ধম্মং সুণিম্হ, সুত্ৰা চ ধম্মং ধারযিম্হ, ধাতানঞ্চ ধম্মানং অত্থং উপপরিক্খিম্হ, অত্থমঞ্ঞায ধম্মমঞ্ঞায ধম্মানুধম্মং [ধম্মানুধম্মঞ্চ (?)] পটিপজ্জিম্হ. তা মযং, ভন্তে, পরিপুণ্ণকম্মন্তা অৰিপ্পটিসারিনিযো অপচ্চানুতাপিনিযো পণীতং কাযং উপপন্না’তি. এতানি, ভিক্খৰে, রুক্খমূলানি এতানি সুঞ্ঞাগারানি. ঝাযথ, ভিক্খৰে, মা পমাদত্থ, মা পচ্ছা ৰিপ্পটিসারিনো অহুৰত্থ সেয্যথাপি তা পুরিমিকা দেৰতা’’তি. নৰমং.

১০. ৰেলামসুত্তং

২০. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –

‘‘অপি নু তে, গহপতি, কুলে দানং দীযতী’’তি? ‘‘দীযতি মে, ভন্তে, কুলে দানং; তঞ্চ খো লূখং কণাজকং বিল়ঙ্গদুতিয’’ন্তি. ‘‘লূখঞ্চেপি [লূখং ৰাপি (স্যা.), লূখঞ্চাপি (ক.)], গহপতি, দানং দেতি পণীতং ৰা; তঞ্চ অসক্কচ্চং দেতি, অচিত্তীকত্ৰা [অচিত্তিং কত্ৰা (ক.), অপচিত্তিং কত্ৰা (স্যা.), অচিত্তিকত্ৰা (পী.)] দেতি, অসহত্থা দেতি, অপৰিদ্ধং [অপৰিট্ঠং (স্যা.)] দেতি, অনাগমনদিট্ঠিকো দেতি. যত্থ যত্থ তস্স তস্স দানস্স ৰিপাকো নিব্বত্ততি, ন উল়ারায ভত্তভোগায চিত্তং নমতি, ন উল়ারায ৰত্থভোগায চিত্তং নমতি, ন উল়ারায যানভোগায চিত্তং নমতি, ন উল়ারেসু পঞ্চসু কামগুণেসু ভোগায চিত্তং নমতি. যেপিস্স তে হোন্তি পুত্তাতি ৰা দারাতি ৰা দাসাতি ৰা পেস্সাতি ৰা কম্মকরাতি ৰা, তেপি ন সুস্সূসন্তি ন সোতং ওদহন্তি ন অঞ্ঞা চিত্তং উপট্ঠপেন্তি. তং কিস্স হেতু? এৰঞ্হেতং [এৰঞ্চেতং (স্যা. ক.)], গহপতি, হোতি অসক্কচ্চং কতানং কম্মানং ৰিপাকো’’.

‘‘লূখঞ্চেপি, গহপতি, দানং দেতি পণীতং ৰা; তঞ্চ সক্কচ্চং দেতি, চিত্তীকত্ৰা দেতি, সহত্থা দেতি, অনপৰিদ্ধং দেতি, আগমনদিট্ঠিকো দেতি. যত্থ যত্থ তস্স তস্স দানস্স ৰিপাকো নিব্বত্ততি, উল়ারায ভত্তভোগায চিত্তং নমতি, উল়ারায ৰত্থভোগায চিত্তং নমতি, উল়ারায যানভোগায চিত্তং নমতি, উল়ারেসু পঞ্চসু কামগুণেসু ভোগায চিত্তং নমতি. যেপিস্স তে হোন্তি পুত্তাতি ৰা দারাতি ৰা দাসাতি ৰা পেস্সাতি ৰা কম্মকরাতি ৰা, তেপি সুস্সূসন্তি সোতং ওদহন্তি অঞ্ঞা চিত্তং উপট্ঠপেন্তি. তং কিস্স হেতু? এৰঞ্হেতং, গহপতি, হোতি সক্কচ্চং কতানং কম্মানং ৰিপাকো.

‘‘ভূতপুব্বং, গহপতি, ৰেলামো নাম ব্রাহ্মণো অহোসি. সো এৰরূপং দানং অদাসি মহাদানং. চতুরাসীতি সুৰণ্ণপাতিসহস্সানি অদাসি রূপিযপূরানি, চতুরাসীতি রূপিযপাতিসহস্সানি অদাসি সুৰণ্ণপূরানি, চতুরাসীতি কংসপাতিসহস্সানি অদাসি হিরঞ্ঞপূরানি, চতুরাসীতি হত্থিসহস্সানি অদাসি সোৰণ্ণালঙ্কারানি সোৰণ্ণধজানি হেমজালপ্পটিচ্ছন্নানি [হেমজালসঞ্ছন্নানি (সী. পী.)], চতুরাসীতি রথসহস্সানি অদাসি সীহচম্মপরিৰারানি ব্যগ্ঘচম্মপরিৰারানি দীপিচম্মপরিৰারানি পণ্ডুকম্বলপরিৰারানি সোৰণ্ণালঙ্কারানি সোৰণ্ণধজানি হেমজালপ্পটিচ্ছন্নানি, চতুরাসীতি ধেনুসহস্সানি অদাসি দুকূলসন্ধনানি [দুকূলসন্দস্সনানি (সী.), দুকূলসণ্ঠনানি (স্যা.), দুকূলসন্থনানি (পী.), দুহসন্দনানি (দী. নি. ২.২৬৩), দুকূলসন্দনানি (তত্থ পাঠন্তরং)] কংসূপধারণানি, চতুরাসীতি কঞ্ঞাসহস্সানি অদাসি আমুত্তমণিকুণ্ডলাযো [আমুক্কমণিকুণ্ডলাযো (?)], চতুরাসীতি পল্লঙ্কসহস্সানি অদাসি গোনকত্থতানি পটিকত্থতানি পটলিকত্থতানি কদলিমিগপৰরপচ্চত্থরণানি সউত্তরচ্ছদানি উভতোলোহিতকূপধানানি, চতুরাসীতি ৰত্থকোটিসহস্সানি অদাসি খোমসুখুমানং কোসেয্যসুখুমানং কম্বলসুখুমানং কপ্পাসিকসুখুমানং, কো পন ৰাদো অন্নস্স পানস্স খজ্জস্স ভোজ্জস্স লেয্যস্স পেয্যস্স, নজ্জো মঞ্ঞে ৰিস্সন্দন্তি [ৰিস্সন্দতি (সী. পী.)].

‘‘সিযা খো পন তে, গহপতি, এৰমস্স – ‘অঞ্ঞো নূন তেন সমযেন ৰেলামো ব্রাহ্মণো অহোসি, সো [যো (?)] তং দানং অদাসি মহাদান’ন্তি. ন খো পনেতং, গহপতি, এৰং দট্ঠব্বং. অহং তেন সমযেন ৰেলামো ব্রাহ্মণো অহোসিং. অহং তং দানং অদাসিং মহাদানং. তস্মিং খো পন, গহপতি, দানে ন কোচি দক্খিণেয্যো অহোসি, ন তং কোচি দক্খিণং ৰিসোধেতি.

‘‘যং, গহপতি, ৰেলামো ব্রাহ্মণো দানং অদাসি মহাদানং, যো চেকং দিট্ঠিসম্পন্নং ভোজেয্য, ইদং ততো মহপ্ফলতরং.

( ) [(যঞ্চ গহপতি ৰেলামো ব্রাহ্মণো দানং অদাসি মহাদানং) (সী. পী.)] ‘‘যো চ সতং দিট্ঠিসম্পন্নানং ভোজেয্য, যো চেকং সকদাগামিং ভোজেয্য, ইদং ততো মহপ্ফলতরং.

( ) [(যঞ্চ গহপতি ৰেলামো ব্রাহ্মণো দানং অদাসি মহাদানং) (সী. পী.)] ‘‘যো চ সতং সকদাগামীনং ভোজেয্য, যো চেকং অনাগামিং ভোজেয্য…পে… যো চ সতং অনাগামীনং ভোজেয্য, যো চেকং অরহন্তং ভোজেয্য… যো চ সতং অরহন্তানং ভোজেয্য, যো চেকং পচ্চেকবুদ্ধং ভোজেয্য … যো চ সতং পচ্চেকবুদ্ধানং ভোজেয্য, যো চ তথাগতং অরহন্তং সম্মাসম্বুদ্ধং ভোজেয্য… যো চ বুদ্ধপ্পমুখং ভিক্খুসঙ্ঘং ভোজেয্য… যো চ চাতুদ্দিসং সঙ্ঘং উদ্দিস্স ৰিহারং কারাপেয্য… যো চ পসন্নচিত্তো বুদ্ধঞ্চ ধম্মঞ্চ সঙ্ঘঞ্চ সরণং গচ্ছেয্য… যো চ পসন্নচিত্তো সিক্খাপদানি সমাদিযেয্য – পাণাতিপাতা ৰেরমণিং, অদিন্নাদানা ৰেরমণিং, কামেসুমিচ্ছাচারা ৰেরমণিং, মুসাৰাদা ৰেরমণিং, সুরামেরযমজ্জপমাদট্ঠানা ৰেরমণিং, যো চ অন্তমসো গন্ধোহনমত্তম্পি [গন্ধূহনমত্তম্পি (সী.), গদ্দূহনমত্তম্পি (স্যা. পী.) ম. নি. ৩.২১১] মেত্তচিত্তং ভাৰেয্য, ( ) [(যো চ অচ্ছরাসঙ্ঘাতমত্তম্পি অনিচ্চসঞ্ঞং ভাৰেয্য) (ক.)] ইদং ততো মহপ্ফলতরং.

‘‘যঞ্চ, গহপতি, ৰেলামো ব্রাহ্মণো দানং অদাসি মহাদানং, যো চেকং দিট্ঠিসম্পন্নং ভোজেয্য… যো চ সতং দিট্ঠিসম্পন্নানং ভোজেয্য, যো চেকং সকদাগামিং ভোজেয্য… যো চ সতং সকদাগামীনং ভোজেয্য, যো চেকং অনাগামিং ভোজেয্য… যো চ সতং অনাগামীনং ভোজেয্য, যো চেকং অরহন্তং ভোজেয্য… যো চ সতং অরহন্তানং ভোজেয্য, যো চেকং পচ্চেকবুদ্ধং ভোজেয্য… যো চ সতং পচ্চেকবুদ্ধানং ভোজেয্য, যো চ তথাগতং অরহন্তং সম্মাসম্বুদ্ধং ভোজেয্য… যো চ বুদ্ধপ্পমুখং ভিক্খুসঙ্ঘং ভোজেয্য, যো চ চাতুদ্দিসং সঙ্ঘং উদ্দিস্স ৰিহারং কারাপেয্য… যো চ পসন্নচিত্তো বুদ্ধঞ্চ ধম্মঞ্চ সঙ্ঘঞ্চ সরণং গচ্ছেয্য, যো চ পসন্নচিত্তো সিক্খাপদানি সমাদিযেয্য – পাণাতিপাতা ৰেরমণিং… সুরামেরযমজ্জপমাদট্ঠানা ৰেরমণিং, যো চ অন্তমসো গন্ধোহনমত্তম্পি মেত্তচিত্তং ভাৰেয্য, যো চ অচ্ছরাসঙ্ঘাতমত্তম্পি অনিচ্চসঞ্ঞং ভাৰেয্য, ইদং ততো মহপ্ফলতর’’ন্তি. দসমং.

সীহনাদৰগ্গো দুতিযো.