৭. পত্তনিকুজ্জনসুত্তং

৮৭. [চূল়ৰ. ২৬৫] ‘‘অট্ঠহি, ভিক্খৰে, অঙ্গেহি সমন্নাগতস্স উপাসকস্স আকঙ্খমানো সঙ্ঘো পত্তং নিক্কুজ্জেয্য [নিকুজ্জেয্য (ক.)]. কতমেহি অট্ঠহি? ভিক্খূনং অলাভায পরিসক্কতি, ভিক্খূনং অনত্থায পরিসক্কতি, ভিক্খূনং অৰাসায [অনাৰাসায (সী. স্যা.)] পরিসক্কতি, ভিক্খূ অক্কোসতি পরিভাসতি, ভিক্খূ ভিক্খূহি ভেদেতি [ৰিভেদেতি (বহূসু)], বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি. ইমেহি খো, ভিক্খৰে, অট্ঠহঙ্গেহি সমন্নাগতস্স উপাসকস্স আকঙ্খমানো সঙ্ঘো পত্তং নিক্কুজ্জেয্য.

‘‘অট্ঠহি, ভিক্খৰে, অঙ্গেহি সমন্নাগতস্স উপাসকস্স আকঙ্খমানো সঙ্ঘো পত্তং উক্কুজ্জেয্য. কতমেহি অট্ঠহি? ন ভিক্খূনং অলাভায পরিসক্কতি, ন ভিক্খূনং অনত্থায পরিসক্কতি, ন ভিক্খূনং অৰাসায পরিসক্কতি, ন ভিক্খূ অক্কোসতি পরিভাসতি, ন ভিক্খূ ভিক্খূহি ভেদেতি, বুদ্ধস্স ৰণ্ণং ভাসতি, ধম্মস্স ৰণ্ণং ভাসতি, সঙ্ঘস্স ৰণ্ণং ভাসতি. ইমেহি খো, ভিক্খৰে, অট্ঠহঙ্গেহি সমন্নাগতস্স উপাসকস্স আকঙ্খমানো সঙ্ঘো পত্তং উক্কুজ্জেয্যা’’তি. সত্তমং.