৪. চোরসুত্তং

৮৪. ‘‘অট্ঠহি, ভিক্খৰে, অঙ্গেহি সমন্নাগতো মহাচোরো খিপ্পং পরিযাপজ্জতি, ন চিরট্ঠিতিকো হোতি. কতমেহি অট্ঠহি? অপ্পহরন্তস্স পহরতি, অনৰসেসং আদিযতি, ইত্থিং হনতি, কুমারিং দূসেতি, পব্বজিতং ৰিলুম্পতি, রাজকোসং ৰিলুম্পতি, অচ্চাসন্নে কম্মং করোতি, ন চ নিধানকুসলো হোতি. ইমেহি খো, ভিক্খৰে, অট্ঠহঙ্গেহি সমন্নাগতো মহাচোরো খিপ্পং পরিযাপজ্জতি, ন চিরট্ঠিতিকো হোতি.

‘‘অট্ঠহি, ভিক্খৰে, অঙ্গেহি সমন্নাগতো মহাচোরো ন খিপ্পং পরিযাপজ্জতি, চিরট্ঠিতিকো হোতি. কতমেহি অট্ঠহি? ন অপ্পহরন্তস্স পহরতি, ন অনৰসেসং আদিযতি, ন ইত্থিং হনতি, ন কুমারিং দূসেতি, ন পব্বজিতং ৰিলুম্পতি, ন রাজকোসং ৰিলুম্পতি, ন অচ্চাসন্নে কম্মং করোতি, নিধানকুসলো চ হোতি. ইমেহি খো, ভিক্খৰে, অট্ঠহঙ্গেহি সমন্নাগতো মহাচোরো ন খিপ্পং পরিযাপজ্জতি, চিরট্ঠিতিকো হোতী’’তি. চতুত্থং.