৬. দুতিযসম্পদাসুত্তং

৭৬. ‘‘অট্ঠিমা, ভিক্খৰে, সম্পদা. কতমা অট্ঠ? উট্ঠানসম্পদা, আরক্খসম্পদা, কল্যাণমিত্ততা, সমজীৰিতা, সদ্ধাসম্পদা, সীলসম্পদা, চাগসম্পদা, পঞ্ঞাসম্পদা. কতমা চ, ভিক্খৰে, উট্ঠানসম্পদা? ইধ, ভিক্খৰে, কুলপুত্তো যেন কম্মট্ঠানেন জীৰিতং কপ্পেতি – যদি কসিযা যদি ৰণিজ্জায যদি গোরক্খেন যদি ইস্সত্তেন যদি রাজপোরিসেন যদি সিপ্পঞ্ঞতরেন – তত্থ দক্খো হোতি অনলসো, তত্রুপাযায ৰীমংসায সমন্নাগতো, অলং কাতুং অলং সংৰিধাতুন্তি. অযং ৰুচ্চতি, ভিক্খৰে, উট্ঠানসম্পদা.

‘‘কতমা চ, ভিক্খৰে, আরক্খসম্পদা? ইধ, ভিক্খৰে, কুলপুত্তস্স ভোগা হোন্তি উট্ঠানৰীরিযাধিগতা বাহাবলপরিচিতা সেদাৰক্খিত্তা ধম্মিকা ধম্মলদ্ধা তে আরক্খেন গুত্তিযা সম্পাদেতি – ‘কিন্তি মে ভোগে নেৰ রাজানো হরেয্যুং, ন চোরা হরেয্যুং, ন অগ্গি ডহেয্য, ন উদকং ৰহেয্য, ন অপ্পিযা দাযাদা হরেয্যু’ন্তি. অযং ৰুচ্চতি, ভিক্খৰে, আরক্খসম্পদা.

‘‘কতমা চ, ভিক্খৰে, কল্যাণমিত্ততা? ইধ, ভিক্খৰে, কুলপুত্তো যস্মিং গামে ৰা নিগমে ৰা পটিৰসতি, তত্থ যে তে হোন্তি গহপতী ৰা গহপতিপুত্তা ৰা দহরা ৰা ৰুদ্ধসীলিনো ৰুদ্ধা ৰা ৰুদ্ধসীলিনো সদ্ধাসম্পন্না সীলসম্পন্না চাগসম্পন্না পঞ্ঞাসম্পন্না, তেহি সদ্ধিং সন্তিট্ঠতি সল্লপতি সাকচ্ছং সমাপজ্জতি; যথারূপানং সদ্ধাসম্পন্নানং সদ্ধাসম্পদং অনুসিক্খতি, যথারূপানং সীলসম্পন্নানং সীলসম্পদং অনুসিক্খতি, যথারূপানং চাগসম্পন্নানং চাগসম্পদং অনুসিক্খতি, যথারূপানং পঞ্ঞাসম্পন্নানং পঞ্ঞাসম্পদং অনুসিক্খতি. অযং ৰুচ্চতি, ভিক্খৰে, কল্যাণমিত্ততা.

‘‘কতমা চ, ভিক্খৰে, সমজীৰিতা? ইধ, ভিক্খৰে, কুলপুত্তো আযঞ্চ ভোগানং ৰিদিত্ৰা ৰযঞ্চ ভোগানং ৰিদিত্ৰা সমং জীৰিকং কপ্পেতি নাচ্চোগাল়্হং নাতিহীনং – ‘এৰং মে আযো ৰযং পরিযাদায ঠস্সতি, ন চ মে ৰযো আযং পরিযাদায ঠস্সতী’তি. সেয্যথাপি, ভিক্খৰে, তুলাধারো ৰা তুলাধারন্তেৰাসী ৰা তুলং পগ্গহেত্ৰা জানাতি – ‘এত্তকেন ৰা ওনতং, এত্তকেন ৰা উন্নত’ন্তি; এৰমেৰং খো, ভিক্খৰে, কুলপুত্তো আযঞ্চ ভোগানং ৰিদিত্ৰা ৰযঞ্চ ভোগানং ৰিদিত্ৰা সমং জীৰিকং কপ্পেতি নাচ্চোগাল়্হং নাতিহীনং – ‘এৰং মে আযো ৰযং পরিযাদায ঠস্সতি, ন চ মে ৰযো আযং পরিযাদায ঠস্সতী’তি. সচাযং, ভিক্খৰে, কুলপুত্তো অপ্পাযো সমানো উল়ারং জীৰিকং কপ্পেতি, তস্স ভৰন্তি ৰত্তারো ‘উদুম্বরখাদী ৰাযং কুলপুত্তো ভোগে খাদতী’তি. সচে পনাযং, ভিক্খৰে, কুলপুত্তো মহাযো সমানো কসিরং জীৰিকং কপ্পেতি, তস্স ভৰন্তি ৰত্তারো – ‘অজেট্ঠমরণং ৰাযং কুলপুত্তো মরিস্সতী’তি. যতো চ খোযং, ভিক্খৰে, কুলপুত্তো আযঞ্চ ভোগানং ৰিদিত্ৰা ৰযঞ্চ ভোগানং ৰিদিত্ৰা সমং জীৰিকং কপ্পেতি নাচ্চোগাল়্হং নাতিহীনং – ‘এৰং মে আযো ৰযং পরিযাদায ঠস্সতি, ন চ মে ৰযো আযং পরিযাদায ঠস্সতী’তি. অযং ৰুচ্চতি, ভিক্খৰে, সমজীৰিতা.

‘‘কতমা চ ভিক্খৰে, সদ্ধাসম্পদা? ইধ, ভিক্খৰে, কুলপুত্তো সদ্ধো হোতি, সদ্দহতি তথাগতস্স বোধিং – ‘ইতিপি সো ভগৰা…পে… সত্থা দেৰমনুস্সানং বুদ্ধো ভগৰা’তি. অযং ৰুচ্চতি, ভিক্খৰে, সদ্ধাসম্পদা.

‘‘কতমা চ, ভিক্খৰে, সীলসম্পদা? ইধ, ভিক্খৰে, কুলপুত্তো পাণাতিপাতা পটিৰিরতো হোতি…পে… সুরামেরযমজ্জপমাদট্ঠানা পটিৰিরতো হোতি. অযং ৰুচ্চতি, ভিক্খৰে, সীলসম্পদা.

‘‘কতমা চ, ভিক্খৰে, চাগসম্পদা? ইধ, ভিক্খৰে, কুলপুত্তো ৰিগতমলমচ্ছেরেন চেতসা অগারং অজ্ঝাৰসতি…পে… যাচযোগো দানসংৰিভাগরতো. অযং ৰুচ্চতি, ভিক্খৰে, চাগসম্পদা.

‘‘কতমা চ, ভিক্খৰে, পঞ্ঞাসম্পদা? ইধ, ভিক্খৰে, কুলপুত্তো পঞ্ঞৰা হোতি…পে… সম্মা দুক্খক্খযগামিনিযা. অযং ৰুচ্চতি, ভিক্খৰে, পঞ্ঞাসম্পদা. ইমা খো, ভিক্খৰে, অট্ঠ সম্পদা’’তি.

‘‘উট্ঠাতা কম্মধেয্যেসু, অপ্পমত্তো ৰিধানৰা;

সমং কপ্পেতি জীৰিকং, সম্ভতং অনুরক্খতি.

‘‘সদ্ধো সীলেন সম্পন্নো, ৰদঞ্ঞূ ৰীতমচ্ছরো;

নিচ্চং মগ্গং ৰিসোধেতি, সোত্থানং সম্পরাযিকং.

‘‘ইচ্চেতে অট্ঠ ধম্মা চ, সদ্ধস্স ঘরমেসিনো;

অক্খাতা সচ্চনামেন, উভযত্থ সুখাৰহা.

‘‘দিট্ঠধম্মহিতত্থায, সম্পরাযসুখায চ;

এৰমেতং গহট্ঠানং, চাগো পুঞ্ঞং পৰড্ঢতী’’তি. ছট্ঠং;