১০. কুসীতারম্ভৰত্থুসুত্তং

৮০. [দি. নি. ৩.৩৩৪, ৩৫৮] ‘‘অট্ঠিমানি, ভিক্খৰে, কুসীতৰত্থূনি. কতমানি অট্ঠ? ইধ, ভিক্খৰে, ভিক্খুনা কম্মং কত্তব্বং হোতি. তস্স এৰং হোতি – ‘কম্মং খো মে কত্তব্বং ভৰিস্সতি. কম্মং খো পন মে করোন্তস্স কাযো কিলমিস্সতি. হন্দাহং নিপজ্জামী’তি. সো নিপজ্জতি, ন ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. ইদং, ভিক্খৰে, পঠমং কুসীতৰত্থু.

‘‘পুন চপরং, ভিক্খৰে, ভিক্খুনা কম্মং কতং হোতি. তস্স এৰং হোতি – ‘অহং খো কম্মং অকাসিং. কম্মং খো পন মে করোন্তস্স কাযো কিলন্তো. হন্দাহং নিপজ্জামী’তি. সো নিপজ্জতি, ন ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. ইদং, ভিক্খৰে, দুতিযং কুসীতৰত্থু.

‘‘পুন চপরং, ভিক্খৰে, ভিক্খুনা মগ্গো গন্তব্বো হোতি. তস্স এৰং হোতি – ‘মগ্গো মে গন্তব্বো ভৰিস্সতি. মগ্গং খো পন মে গচ্ছন্তস্স কাযো কিলমিস্সতি. হন্দাহং নিপজ্জামী’তি. সো নিপজ্জতি, ন ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. ইদং, ভিক্খৰে, ততিযং কুসীতৰত্থু.

‘‘পুন চপরং, ভিক্খৰে, ভিক্খুনা মগ্গো গতো হোতি. তস্স এৰং হোতি – ‘অহং খো মগ্গং অগমাসিং. মগ্গং খো পন মে গচ্ছন্তস্স কাযো কিলন্তো. হন্দাহং নিপজ্জামী’তি. সো নিপজ্জতি, ন ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. ইদং ভিক্খৰে, চতুত্থং কুসীতৰত্থু.

‘‘পুন চপরং, ভিক্খৰে, ভিক্খু গামং ৰা নিগমং ৰা পিণ্ডায চরন্তো ন লভতি লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স এৰং হোতি – ‘অহং খো গামং ৰা নিগমং ৰা পিণ্ডায চরন্তো নালত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স মে কাযো কিলন্তো অকম্মঞ্ঞো. হন্দাহং নিপজ্জামী’তি. সো নিপজ্জতি, ন ৰীরিযং আরভতি…পে… ইদং, ভিক্খৰে, পঞ্চমং কুসীতৰত্থু.

‘‘পুন চপরং, ভিক্খৰে, ভিক্খু গামং ৰা নিগমং ৰা পিণ্ডায চরন্তো লভতি লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স এৰং হোতি – ‘অহং খো গামং ৰা নিগমং ৰা পিণ্ডায চরন্তো অলত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স মে কাযো গরুকো অকম্মঞ্ঞো মাসাচিতং মঞ্ঞে. হন্দাহং নিপজ্জামী’তি. সো নিপজ্জতি, ন ৰীরিযং আরভতি…পে… ইদং, ভিক্খৰে, ছট্ঠং কুসীতৰত্থু.

‘‘পুন চপরং, ভিক্খৰে, ভিক্খুনো উপ্পন্নো হোতি অপ্পমত্তকো আবাধো. তস্স এৰং হোতি – ‘উপ্পন্নো খো মে অযং অপ্পমত্তকো আবাধো অত্থি কপ্পো নিপজ্জিতুং. হন্দাহং নিপজ্জামী’তি. সো নিপজ্জতি, ন ৰীরিযং আরভতি…পে… ইদং, ভিক্খৰে, সত্তমং কুসীতৰত্থু.

‘‘পুন চপরং, ভিক্খৰে, ভিক্খু গিলানা ৰুট্ঠিতো [অ. নি. ৬.১৬ সুত্তৰণ্ণনা টীকা ওলোকেতব্বা] হোতি অচিরৰুট্ঠিতো গেলঞ্ঞা. তস্স এৰং হোতি – ‘অহং খো গিলানা ৰুট্ঠিতো অচিরৰুট্ঠিতো গেলঞ্ঞা. তস্স মে কাযো দুব্বলো অকম্মঞ্ঞো. হন্দাহং নিপজ্জামী’তি. সো নিপজ্জতি, ন ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. ইদং, ভিক্খৰে, অট্ঠমং কুসীতৰত্থু. ইমানি খো, ভিক্খৰে, অট্ঠ কুসীতৰত্থূনি.

[দী. নি. ৩.৩৩৫, ৩৫৮] ‘‘অট্ঠিমানি, ভিক্খৰে, আরম্ভৰত্থূনি. কতমানি অট্ঠ? ইধ, ভিক্খৰে, ভিক্খুনা কম্মং কত্তব্বং হোতি. তস্স এৰং হোতি – ‘কম্মং খো মে কত্তব্বং ভৰিস্সতি. কম্মং খো মযা করোন্তেন ন সুকরং বুদ্ধানং সাসনং মনসি কাতুং. হন্দাহং পটিকচ্চেৰ ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’তি. সো ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. ইদং, ভিক্খৰে, পঠমং আরম্ভৰত্থু.

‘‘পুন চপরং, ভিক্খৰে, ভিক্খুনা কম্মং কতং হোতি. তস্স এৰং হোতি – ‘অহং খো কম্মং অকাসিং. কম্মং খো পনাহং করোন্তো নাসক্খিং বুদ্ধানং সাসনং মনসি কাতুং. হন্দাহং ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’তি. সো ৰীরিযং আরভতি. ইদং, ভিক্খৰে, দুতিযং আরম্ভৰত্থু.

‘‘পুন চপরং, ভিক্খৰে, ভিক্খুনা মগ্গো গন্তব্বো হোতি. তস্স এৰং হোতি – মগ্গো খো মে গন্তব্বো ভৰিস্সতি. মগ্গং খো পন মে গচ্ছন্তেন ন সুকরং বুদ্ধানং সাসনং মনসি কাতুং. হন্দাহং ৰীরিযং…পে… ইদং, ভিক্খৰে, ততিযং আরম্ভৰত্থু.

‘‘পুন চপরং, ভিক্খৰে, ভিক্খুনা মগ্গো গতো হোতি. তস্স এৰং হোতি – অহং খো মগ্গং অগমাসিং. মগ্গং খো পনাহং গচ্ছন্তো নাসক্খিং বুদ্ধানং সাসনং মনসি কাতুং. হন্দাহং ৰীরিযং আরভামি…পে… ইদং, ভিক্খৰে, চতুত্থং আরম্ভৰত্থু.

‘‘পুন চপরং, ভিক্খৰে, ভিক্খু গামং ৰা নিগমং ৰা পিণ্ডায চরন্তো ন লভতি লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স এৰং হোতি – অহং খো গামং ৰা নিগমং ৰা পিণ্ডায চরন্তো নালত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স মে কাযো লহুকো কম্মঞ্ঞো. হন্দাহং ৰীরিযং আরভামি…পে… ইদং, ভিক্খৰে, পঞ্চমং আরম্ভৰত্থু.

‘‘পুন চপরং, ভিক্খৰে, ভিক্খু গামং ৰা নিগমং ৰা পিণ্ডায চরন্তো লভতি লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স এৰং হোতি – অহং খো গামং ৰা নিগমং ৰা পিণ্ডায চরন্তো অলত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং. তস্স মে কাযো বলৰা কম্মঞ্ঞো. হন্দাহং ৰীরিযং আরভামি…পে… ইদং, ভিক্খৰে, ছট্ঠং আরম্ভৰত্থু.

‘‘পুন চপরং, ভিক্খৰে, ভিক্খুনো উপ্পন্নো হোতি অপ্পমত্তকো আবাধো. তস্স এৰং হোতি – উপ্পন্নো খো মে অযং অপ্পমত্তকো আবাধো. ঠানং খো পনেতং ৰিজ্জতি যং মে আবাধো পৰড্ঢেয্য. হন্দাহং পটিকচ্চেৰ ৰীরিযং আরভামি…পে… ইদং, ভিক্খৰে, সত্তমং আরম্ভৰত্থু.

‘‘পুন চপরং, ভিক্খৰে, ভিক্খু গিলানা ৰুট্ঠিতো হোতি অচিরৰুট্ঠিতো গেলঞ্ঞা. তস্স এৰং হোতি – ‘অহং খো গিলানা ৰুট্ঠিতো অচিরৰুট্ঠিতো গেলঞ্ঞা. ঠানং খো পনেতং ৰিজ্জতি যং মে আবাধো পচ্চুদাৰত্তেয্য. হন্দাহং পটিকচ্চেৰ ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’তি. সো ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. ইদং, ভিক্খৰে, অট্ঠমং আরম্ভৰত্থু. ইমানি খো, ভিক্খৰে, অট্ঠ আরম্ভৰত্থূনী’’তি. দসমং.

যমকৰগ্গো ততিযো.