৬. অনুরুদ্ধসুত্তং

৪৬. একং সমযং ভগৰা কোসম্বিযং ৰিহরতি ঘোসিতারামে. তেন খো পন সমযেন আযস্মা অনুরুদ্ধো দিৰাৰিহারং গতো হোতি পটিসল্লীনো. অথ খো সম্বহুলা মনাপকাযিকা দেৰতা যেনাযস্মা অনুরুদ্ধো তেনুপসঙ্কমিংসু; উপসঙ্কমিত্ৰা আযস্মন্তং অনুরুদ্ধং অভিৰাদেত্ৰা একমন্তং অট্ঠংসু. একমন্তং ঠিতা খো তা দেৰতা আযস্মন্তং অনুরুদ্ধং এতদৰোচুং – ‘‘মযং, ভন্তে অনুরুদ্ধ, মনাপকাযিকা নাম দেৰতা তীসু ঠানেসু ইস্সরিযং কারেম ৰসং ৰত্তেম. মযং, ভন্তে অনুরুদ্ধ, যাদিসকং ৰণ্ণং আকঙ্খাম তাদিসকং ৰণ্ণং ঠানসো পটিলভাম; যাদিসকং সরং আকঙ্খাম তাদিসকং সরং ঠানসো পটিলভাম; যাদিসকং সুখং আকঙ্খাম তাদিসকং সুখং ঠানসো পটিলভাম. মযং, ভন্তে অনুরুদ্ধ, মনাপকাযিকা নাম দেৰতা ইমেসু তীসু ঠানেসু ইস্সরিযং কারেম ৰসং ৰত্তেমা’’তি.

অথ খো আযস্মতো অনুরুদ্ধস্স এতদহোসি – ‘‘অহো ৰতিমা দেৰতা সব্বাৰ নীলা অস্সু নীলৰণ্ণা নীলৰত্থা নীলালঙ্কারা’’তি. অথ খো তা দেৰতা আযস্মতো অনুরুদ্ধস্স চিত্তমঞ্ঞায সব্বাৰ নীলা অহেসুং নীলৰণ্ণা নীলৰত্থা নীলালঙ্কারা.

অথ খো আযস্মতো অনুরুদ্ধস্স এতদহোসি – ‘‘অহো ৰতিমা দেৰতা সব্বাৰ পীতা অস্সু…পে… সব্বাৰ লোহিতকা অস্সু… সব্বাৰ ওদাতা অস্সু ওদাতৰণ্ণা ওদাতৰত্থা ওদাতালঙ্কারা’’তি. অথ খো তা দেৰতা আযস্মতো অনুরুদ্ধস্স চিত্তমঞ্ঞায সব্বাৰ ওদাতা অহেসুং ওদাতৰণ্ণা ওদাতৰত্থা ওদাতালঙ্কারা.

অথ খো তা দেৰতা একা চ [কো (সী.), একাৰ (স্যা. পী.)] গাযি একা চ [একা পন (সী.), একাৰ (স্যা. পী.)] নচ্চি একা চ [একা (সী.), একাৰ (স্যা. পী.)] অচ্ছরং ৰাদেসি. সেয্যথাপি নাম পঞ্চঙ্গিকস্স তূরিযস্স [তুরিযস্স (সী. স্যা. পী.)] সুৰিনীতস্স সুপ্পটিপতাল়িতস্স কুসলেহি সুসমন্নাহতস্স সদ্দো হোতি ৰগ্গু চ রজনীযো চ কমনীযো চ পেমনীযো চ মদনীযো চ; এৰমেৰং তাসং দেৰতানং অলঙ্কারানং সদ্দো হোতি ৰগ্গু চ রজনীযো চ কমনীযো চ পেমনীযো চ মদনীযো চ. অথ খো আযস্মা অনুরুদ্ধো ইন্দ্রিযানি ওক্খিপি.

অথ খো তা দেৰতা ‘‘ন খ্ৰয্যো অনুরুদ্ধো সাদিযতী’’তি [সাদযতীতি (সদ্দনীতিধাতুমালা)] তত্থেৰন্তরধাযিংসু. অথ খো আযস্মা অনুরুদ্ধো সাযন্হসমযং পটিসল্লানা ৰুট্ঠিতো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা অনুরুদ্ধো ভগৰন্তং এতদৰোচ –

‘‘ইধাহং, ভন্তে, দিৰাৰিহারং গতো হোমি পটিসল্লীনো. অথ খো, ভন্তে, সম্বহুলা মনাপকাযিকা দেৰতা যেনাহং তেনুপসঙ্কমিংসু; উপসঙ্কমিত্ৰা মং অভিৰাদেত্ৰা একমন্তং অট্ঠংসু. একমন্তং ঠিতা খো, ভন্তে, তা দেৰতা মং এতদৰোচুং – ‘মযং, ভন্তে অনুরুদ্ধ, মনাপকাযিকা নাম দেৰতা তীসু ঠানেসু ইস্সরিযং কারেম ৰসং ৰত্তেম. মযং, ভন্তে অনুরুদ্ধ, যাদিসকং ৰণ্ণং আকঙ্খাম তাদিসকং ৰণ্ণং ঠানসো পটিলভাম; যাদিসকং সরং আকঙ্খাম তাদিসকং সরং ঠানসো পটিলভাম; যাদিসকং সুখং আকঙ্খাম তাদিসকং সুখং ঠানসো পটিলভাম. মযং, ভন্তে অনুরুদ্ধ, মনাপকাযিকা নাম দেৰতা ইমেসু তীসু ঠানেসু ইস্সরিযং কারেম ৰসং ৰত্তেমা’তি. তস্স ময্হং, ভন্তে, এতদহোসি – ‘অহো ৰতিমা দেৰতা সব্বাৰ নীলা অস্সু নীলৰণ্ণা নীলৰত্থা নীলালঙ্কারা’তি. অথ খো, ভন্তে, তা দেৰতা মম চিত্তমঞ্ঞায সব্বাৰ নীলা অহেসুং নীলৰণ্ণা নীলৰত্থা নীলালঙ্কারা.

‘‘তস্স ময্হং, ভন্তে, এতদহোসি – ‘অহো ৰতিমা দেৰতা সব্বাৰ পীতা অস্সু…পে… সব্বাৰ লোহিতকা অস্সু…পে… সব্বাৰ ওদাতা অস্সু ওদাতৰণ্ণা ওদাতৰত্থা ওদাতালঙ্কারা’তি. অথ খো, ভন্তে, তা দেৰতা মম চিত্তমঞ্ঞায সব্বাৰ ওদাতা অহেসুং ওদাতৰণ্ণা ওদাতৰত্থা ওদাতালঙ্কারা.

‘‘অথ খো, ভন্তে, তা দেৰতা একা চ গাযি একা চ নচ্চি একা চ অচ্ছরং ৰাদেসি. সেয্যথাপি নাম পঞ্চঙ্গিকস্স তূরিযস্স সুৰিনীতস্স সুপ্পটিপতাল়িতস্স কুসলেহি সুসমন্নাহতস্স সদ্দো হোতি ৰগ্গু চ রজনীযো চ কমনীযো চ পেমনীযো চ মদনীযো চ; এৰমেৰং তাসং দেৰতানং অলঙ্কারানং সদ্দো হোতি ৰগ্গু চ রজনীযো চ কমনীযো চ পেমনীযো চ মদনীযো চ. অথ খ্ৰাহং, ভন্তে, ইন্দ্রিযানি ওক্খিপিং.

‘‘অথ খো, ভন্তে, তা দেৰতা ‘ন খ্ৰয্যো অনুরুদ্ধো সাদিযতী’তি তত্থেৰন্তরধাযিংসু. কতিহি নু খো, ভন্তে, ধম্মেহি সমন্নাগতো মাতুগামো কাযস্স ভেদা পরং মরণা মনাপকাযিকানং দেৰানং সহব্যতং উপপজ্জতী’’তি?

‘‘অট্ঠহি খো, অনুরুদ্ধ, ধম্মেহি সমন্নাগতো মাতুগামো কাযস্স ভেদা পরং মরণা মনাপকাযিকানং দেৰানং সহব্যতং উপপজ্জতি. কতমেহি অট্ঠহি? ইধ, অনুরুদ্ধ, মাতুগামো যস্স মাতাপিতরো ভত্তুনো দেন্তি অত্থকামা হিতেসিনো অনুকম্পকা অনুকম্পং উপাদায তস্স হোতি পুব্বুট্ঠাযিনী পচ্ছানিপাতিনী কিঙ্কারপটিস্সাৰিনী মনাপচারিনী পিযৰাদিনী.

‘‘যে তে ভত্তু গরুনো [গুরুনো (ক.)] হোন্তি – মাতাতি ৰা পিতাতি ৰা সমণব্রাহ্মণাতি ৰা – তে সক্করোতি, গরুং করোতি [গরুকরোতি (সী. স্যা. পী.)], মানেতি, পূজেতি, অব্ভাগতে চ আসনোদকেন পটিপূজেতি.

‘‘যে তে ভত্তু অব্ভন্তরা কম্মন্তা – উণ্ণাতি ৰা কপ্পাসাতি ৰা – তত্থ দক্খা হোতি অনলসা তত্রুপাযায [তত্রূপাযায (সী.), অ. নি. ৪.৩৫; ১১.১৪] ৰীমংসায সমন্নাগতা অলং কাতুং অলং সংৰিধাতুং.

‘‘যো সো ভত্তু অব্ভন্তরো অন্তোজনো – দাসাতি ৰা পেস্সাতি ৰা কম্মকরাতি ৰা – তেসং কতঞ্চ কততো জানাতি অকতঞ্চ অকততো জানাতি, গিলানকানঞ্চ বলাবলং জানাতি খাদনীযং ভোজনীযঞ্চস্স পচ্চংসেন [পচ্চযেন (স্যা.), পচ্চত্তংসেন (ক.) অ. নি. ৫.৩৩] সংৰিভজতি.

‘‘যং ভত্তু আহরতি ধনং ৰা ধঞ্ঞং ৰা জাতরূপং ৰা তং আরক্খেন গুত্তিযা সম্পাদেতি, তত্থ চ হোতি অধুত্তী অথেনী অসোণ্ডী অৰিনাসিকা.

‘‘উপাসিকা খো পন হোতি বুদ্ধং সরণং গতা ধম্মং সরণং গতা সঙ্ঘং সরণং গতা.

‘‘সীলৰতী খো পন হোতি – পাণাতিপাতা পটিৰিরতা, অদিন্নাদানা পটিৰিরতা, কামেসুমিচ্ছাচারা পটিৰিরতা, মুসাৰাদা পটিৰিরতা, সুরামেরযমজ্জপমাদট্ঠানা পটিৰিরতা.

‘‘চাগৰতী খো পন হোতি. ৰিগতমলমচ্ছেরেন চেতসা অগারং অজ্ঝাৰসতি মুত্তচাগা [মুত্তচাগী (স্যা.)] পযতপাণিনী [পযতপাণি (সী.), পযতপাণী (স্যা. পী. ক.)] ৰোস্সগ্গরতা যাচযোগা দানসংৰিভাগরতা.

‘‘ইমেহি খো, অনুরুদ্ধ, অট্ঠহি ধম্মেহি সমন্নাগতো মাতুগামো কাযস্স ভেদা পরং মরণা মনাপকাযিকানং দেৰানং সহব্যতং উপপজ্জতী’’তি.

‘‘যো নং ভরতি সব্বদা, নিচ্চং আতাপি উস্সুকো;

তং সব্বকামদং [তং সব্বকামহরং (সী. স্যা. পী.) সব্বকামহরং (অ. নি. ৫.৩৩] পোসং, ভত্তারং নাতিমঞ্ঞতি.

‘‘ন চাপি সোত্থি ভত্তারং, ইস্সাৰাদেন রোসযে;

ভত্তু চ গরুনো সব্বে, পটিপূজেতি পণ্ডিতা.

‘‘উট্ঠাহিকা [উট্ঠাযিকা (ক.)] অনলসা, সঙ্গহিতপরিজ্জনা;

ভত্তু মনাপং চরতি, সম্ভতং অনুরক্খতি.

‘‘যা এৰং ৰত্ততি নারী, ভত্তু ছন্দৰসানুগা;

মনাপা নাম তে [মনাপকাযিকা (সী. ক.)] দেৰা, যত্থ সা উপপজ্জতী’’তি. ছট্ঠং;