৭. সপ্পুরিসদানসুত্তং

৩৭. ‘‘অট্ঠিমানি, ভিক্খৰে, সপ্পুরিসদানানি. কতমানি অট্ঠ? সুচিং দেতি, পণীতং দেতি, কালেন দেতি, কপ্পিযং দেতি, ৰিচেয্য দেতি, অভিণ্হং দেতি, দদং চিত্তং পসাদেতি, দত্ৰা অত্তমনো হোতি. ইমানি খো, ভিক্খৰে, অট্ঠ সপ্পুরিসদানানী’’তি.

‘‘সুচিং পণীতং কালেন, কপ্পিযং পানভোজনং;

অভিণ্হং দদাতি দানং, সুখেত্তেসু [সুখেত্তে (সী. পী.)] ব্রহ্মচারিসু.

‘‘নেৰ [ন চ (সী. পী.)] ৰিপ্পটিসারিস্স, চজিত্ৰা আমিসং বহুং;

এৰং দিন্নানি দানানি, ৰণ্ণযন্তি ৰিপস্সিনো.

‘‘এৰং যজিত্ৰা মেধাৰী, সদ্ধো মুত্তেন চেতসা;

অব্যাবজ্ঝং [অব্যাপজ্ঝং (ক.) অ. নি. ৪.৪০; ৬.৩৭] সুখং লোকং, পণ্ডিতো উপপজ্জতী’’তি. সত্তমং;