৪. দানৰগ্গো

১. পঠমদানসুত্তং

৩১. [দী. নি. ৩.৩৩৬] ‘‘অট্ঠিমানি, ভিক্খৰে, দানানি. কতমানি অট্ঠ? আসজ্জ দানং দেতি, ভযা দানং দেতি, ‘অদাসি মে’তি দানং দেতি, ‘দস্সতি মে’তি দানং দেতি, ‘সাহু দান’ন্তি দানং দেতি, ‘অহং পচামি, ইমে ন পচন্তি; নারহামি পচন্তো অপচন্তানং দানং অদাতু’ন্তি দানং দেতি, ‘ইমং মে দানং দদতো কল্যাণো কিত্তিসদ্দো অব্ভুগ্গচ্ছতী’তি দানং দেতি, চিত্তালঙ্কারচিত্তপরিক্খারত্থং দানং দেতি. ইমানি খো, ভিক্খৰে, অট্ঠ দানানী’’তি. পঠমং.

২. দুতিযদানসুত্তং

৩২. [কথা. ৪৮০] ‘‘সদ্ধা হিরিযং কুসলঞ্চ দানং,

ধম্মা এতে সপ্পুরিসানুযাতা;

এতঞ্হি মগ্গং দিৰিযং ৰদন্তি,

এতেন হি গচ্ছতি দেৰলোক’’ন্তি. দুতিযং;

৩. দানৰত্থুসুত্তং

৩৩. ‘‘অট্ঠিমানি, ভিক্খৰে, দানৰত্থূনি. কতমানি অট্ঠ? ছন্দা দানং দেতি, দোসা দানং দেতি, মোহা দানং দেতি, ভযা দানং দেতি, ‘দিন্নপুব্বং কতপুব্বং পিতুপিতামহেহি, নারহামি পোরাণং কুলৰংসং হাপেতু’ন্তি দানং দেতি, ‘ইমাহং দানং দত্ৰা কাযস্স ভেদা পরং মরণা সুগতিং সগ্গং লোকং উপপজ্জিস্সামী’তি দানং দেতি, ‘ইমং মে দানং দদতো চিত্তং পসীদতি, অত্তমনতা সোমনস্সং উপজাযতী’তি দানং দেতি, চিত্তালঙ্কারচিত্তপরিক্খারত্থং দানং দেতি. ইমানি খো, ভিক্খৰে, অট্ঠ দানৰত্থূনী’’তি. ততিযং.

৪. খেত্তসুত্তং

৩৪. ‘‘অট্ঠঙ্গসমন্নাগতে, ভিক্খৰে, খেত্তে বীজং ৰুত্তং ন মহপ্ফলং হোতি ন মহস্সাদং ন ফাতিসেয্যং [ন ফাতিসেয্যন্তি (সী. স্যা. ক.), ন ফাতিসেয্যা (কত্থচি)]. কথং অট্ঠঙ্গসমন্নাগতে? ইধ, ভিক্খৰে, খেত্তং উন্নামনিন্নামি চ হোতি, পাসাণসক্খরিকঞ্চ হোতি, ঊসরঞ্চ হোতি, ন চ গম্ভীরসিতং হোতি, ন আযসম্পন্নং হোতি, ন অপাযসম্পন্নং হোতি, ন মাতিকাসম্পন্নং হোতি, ন মরিযাদসম্পন্নং হোতি. এৰং অট্ঠঙ্গসমন্নাগতে, ভিক্খৰে, খেত্তে বীজং ৰুত্তং ন মহপ্ফলং হোতি ন মহস্সাদং ন ফাতিসেয্যং.

‘‘এৰমেৰং খো, ভিক্খৰে, অট্ঠঙ্গসমন্নাগতেসু সমণব্রাহ্মণেসু দানং দিন্নং ন মহপ্ফলং হোতি ন মহানিসংসং ন মহাজুতিকং ন মহাৰিপ্ফারং. কথং অট্ঠঙ্গসমন্নাগতেসু? ইধ, ভিক্খৰে, সমণব্রাহ্মণা মিচ্ছাদিট্ঠিকা হোন্তি, মিচ্ছাসঙ্কপ্পা, মিচ্ছাৰাচা, মিচ্ছাকম্মন্তা, মিচ্ছাআজীৰা, মিচ্ছাৰাযামা, মিচ্ছাসতিনো, মিচ্ছাসমাধিনো. এৰং অট্ঠঙ্গসমন্নাগতেসু, ভিক্খৰে, সমণব্রাহ্মণেসু দানং দিন্নং ন মহপ্ফলং হোতি ন মহানিসংসং ন মহাজুতিকং ন মহাৰিপ্ফারং.

‘‘অট্ঠঙ্গসমন্নাগতে, ভিক্খৰে, খেত্তে বীজং ৰুত্তং মহপ্ফলং হোতি মহস্সাদং ফাতিসেয্যং. কথং অট্ঠঙ্গসমন্নাগতে? ইধ, ভিক্খৰে, খেত্তং অনুন্নামানিন্নামি চ হোতি, অপাসাণসক্খরিকঞ্চ হোতি, অনূসরঞ্চ হোতি, গম্ভীরসিতং হোতি, আযসম্পন্নং হোতি, অপাযসম্পন্নং হোতি, মাতিকাসম্পন্নং হোতি, মরিযাদসম্পন্নং হোতি. এৰং অট্ঠঙ্গসমন্নাগতে, ভিক্খৰে, খেত্তে বীজং ৰুত্তং মহপ্ফলং হোতি মহস্সাদং ফাতিসেয্যং.

‘‘এৰমেৰং খো, ভিক্খৰে, অট্ঠঙ্গসমন্নাগতেসু সমণব্রাহ্মণেসু দানং দিন্নং মহপ্ফলং হোতি মহানিসংসং মহাজুতিকং মহাৰিপ্ফারং. কথং অট্ঠঙ্গসমন্নাগতেসু? ইধ, ভিক্খৰে, সমণব্রাহ্মণা সম্মাদিট্ঠিকা হোন্তি, সম্মাসঙ্কপ্পা, সম্মাৰাচা, সম্মাকম্মন্তা, সম্মাআজীৰা, সম্মাৰাযামা, সম্মাসতিনো, সম্মাসমাধিনো. এৰং অট্ঠঙ্গসমন্নাগতেসু, ভিক্খৰে, সমণব্রাহ্মণেসু দানং দিন্নং মহপ্ফলং হোতি মহানিসংসং মহাজুতিকং মহাৰিপ্ফার’’ন্তি.

‘‘যথাপি খেত্তে সম্পন্নে, পৰুত্তা বীজসম্পদা;

দেৰে সম্পাদযন্তম্হি [সঞ্জাযন্তম্হি (ক.)], হোতি ধঞ্ঞস্স সম্পদা.

‘‘অনীতিসম্পদা হোতি, ৰিরূল়্হী ভৰতি সম্পদা;

ৰেপুল্লসম্পদা হোতি, ফলং ৰে হোতি সম্পদা.

‘‘এৰং সম্পন্নসীলেসু, দিন্না ভোজনসম্পদা;

সম্পদানং উপনেতি, সম্পন্নং হিস্স তং কতং.

‘‘তস্মা সম্পদমাকঙ্খী, সম্পন্নত্থূধ পুগ্গলো;

সম্পন্নপঞ্ঞে সেৰেথ, এৰং ইজ্ঝন্তি সম্পদা.

‘‘ৰিজ্জাচরণসম্পন্নে, লদ্ধা চিত্তস্স সম্পদং;

করোতি কম্মসম্পদং, লভতি চত্থসম্পদং.

‘‘লোকং ঞত্ৰা যথাভূতং, পপ্পুয্য দিট্ঠিসম্পদং;

মগ্গসম্পদমাগম্ম, যাতি সম্পন্নমানসো.

‘‘ওধুনিত্ৰা মলং সব্বং, পত্ৰা নিব্বানসম্পদং;

মুচ্চতি সব্বদুক্খেহি, সা হোতি সব্বসম্পদা’’তি. চতুত্থং;

৫. দানূপপত্তিসুত্তং

৩৫. [দী. নি. ৩.৩৩৭] ‘‘অট্ঠিমা, ভিক্খৰে, দানূপপত্তিযো. কতমা অট্ঠ? ইধ, ভিক্খৰে, একচ্চো দানং দেতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. সো যং দেতি তং পচ্চাসীসতি [পচ্চাসিংসতি (সী. স্যা. কং. পী.)]. সো পস্সতি খত্তিযমহাসালে ৰা ব্রাহ্মণমহাসালে ৰা গহপতিমহাসালে ৰা পঞ্চহি কামগুণেহি সমপ্পিতে সমঙ্গীভূতে পরিচারযমানে. তস্স এৰং হোতি – ‘অহো ৰতাহং কাযস্স ভেদা পরং মরণা খত্তিযমহাসালানং ৰা ব্রাহ্মণমহাসালানং ৰা গহপতিমহাসালানং ৰা সহব্যতং উপপজ্জেয্য’ন্তি! সো তং চিত্তং দহতি, তং চিত্তং অধিট্ঠাতি, তং চিত্তং ভাৰেতি. তস্স তং চিত্তং হীনে ৰিমুত্তং [হীনেধিমুত্তং (স্যা. পী.) ৰিমুত্তন্তি অধিমুত্তং, ৰিমুত্তন্তি ৰা ৰিস্সট্ঠং (টীকাসংৰণ্ণনা)], উত্তরি অভাৰিতং, তত্রূপপত্তিযা সংৰত্ততি. কাযস্স ভেদা পরং মরণা খত্তিযমহাসালানং ৰা ব্রাহ্মণমহাসালানং ৰা গহপতিমহাসালানং ৰা সহব্যতং উপপজ্জতি. তঞ্চ খো সীলৰতো ৰদামি, নো দুস্সীলস্স. ইজ্ঝতি, ভিক্খৰে, সীলৰতো চেতোপণিধি ৰিসুদ্ধত্তা.

‘‘ইধ পন, ভিক্খৰে, একচ্চো দানং দেতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. সো যং দেতি তং পচ্চাসীসতি. তস্স সুতং হোতি – ‘চাতুমহারাজিকা [চাতুম্মহারাজিকা (সী. স্যা. কং. পী.)] দেৰা দীঘাযুকা ৰণ্ণৰন্তো সুখবহুলা’তি. তস্স এৰং হোতি – ‘অহো ৰতাহং কাযস্স ভেদা পরং মরণা চাতুমহারাজিকানং দেৰানং সহব্যতং উপপজ্জেয্য’ন্তি. সো তং চিত্তং দহতি, তং চিত্তং অধিট্ঠাতি, তং চিত্তং ভাৰেতি. তস্স তং চিত্তং হীনে ৰিমুত্তং, উত্তরি অভাৰিতং, তত্রূপপত্তিযা সংৰত্ততি. কাযস্স ভেদা পরং মরণা চাতুমহারাজিকানং দেৰানং সহব্যতং উপপজ্জতি. তঞ্চ খো সীলৰতো ৰদামি, নো দুস্সীলস্স. ইজ্ঝতি, ভিক্খৰে, সীলৰতো চেতোপণিধি ৰিসুদ্ধত্তা.

‘‘ইধ পন, ভিক্খৰে, একচ্চো দানং দেতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. সো যং দেতি তং পচ্চাসীসতি. তস্স সুতং হোতি – তাৰতিংসা দেৰা…পে… যামা দেৰা… তুসিতা দেৰা… নিম্মানরতী দেৰা… পরনিম্মিতৰসৰত্তী দেৰা দীঘাযুকা ৰণ্ণৰন্তো সুখবহুলাতি. তস্স এৰং হোতি – ‘অহো ৰতাহং কাযস্স ভেদা পরং মরণা পরনিম্মিতৰসৰত্তীনং দেৰানং সহব্যতং উপপজ্জেয্য’ন্তি. সো তং চিত্তং দহতি, তং চিত্তং অধিট্ঠাতি, তং চিত্তং ভাৰেতি. তস্স তং চিত্তং হীনে ৰিমুত্তং, উত্তরি অভাৰিতং, তত্রূপপত্তিযা সংৰত্ততি. কাযস্স ভেদা পরং মরণা পরনিম্মিতৰসৰত্তীনং দেৰানং সহব্যতং উপপজ্জতি. তঞ্চ খো সীলৰতো ৰদামি, নো দুস্সীলস্স. ইজ্ঝতি, ভিক্খৰে, সীলৰতো চেতোপণিধি ৰিসুদ্ধত্তা.

‘‘ইধ পন, ভিক্খৰে, একচ্চো দানং দেতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. সো যং দেতি তং পচ্চাসীসতি. তস্স সুতং হোতি – ‘ব্রহ্মকাযিকা দেৰা দীঘাযুকা ৰণ্ণৰন্তো সুখবহুলা’তি. তস্স এৰং হোতি – ‘অহো ৰতাহং কাযস্স ভেদা পরং মরণা ব্রহ্মকাযিকানং দেৰানং সহব্যতং উপপজ্জেয্য’ন্তি. সো তং চিত্তং দহতি, তং চিত্তং অধিট্ঠাতি, তং চিত্তং ভাৰেতি. তস্স তং চিত্তং হীনে ৰিমুত্তং, উত্তরি অভাৰিতং, তত্রূপপত্তিযা সংৰত্ততি. কাযস্স ভেদা পরং মরণা ব্রহ্মকাযিকানং দেৰানং সহব্যতং উপপজ্জতি. তঞ্চ খো সীলৰতো ৰদামি, নো দুস্সীলস্স; ৰীতরাগস্স, নো সরাগস্স. ইজ্ঝতি, ভিক্খৰে, সীলৰতো চেতোপণিধি ৰীতরাগত্তা. ইমা খো, ভিক্খৰে, অট্ঠ দানূপপত্তিযো’’তি. পঞ্চমং.

৬. পুঞ্ঞকিরিযৰত্থুসুত্তং

৩৬. ‘‘তীণিমানি, ভিক্খৰে, পুঞ্ঞকিরিযৰত্থূনি. কতমানি তীণি? দানমযং পুঞ্ঞকিরিযৰত্থু [পুঞ্ঞকিরিযৰত্থুং (সী. পী.) এৰমুপরিপি], সীলমযং পুঞ্ঞকিরিযৰত্থু, ভাৰনামযং পুঞ্ঞকিরিযৰত্থু. ইধ, ভিক্খৰে, একচ্চস্স দানমযং পুঞ্ঞকিরিযৰত্থু পরিত্তং কতং হোতি, সীলমযং পুঞ্ঞকিরিযৰত্থু পরিত্তং কতং হোতি, ভাৰনামযং পুঞ্ঞকিরিযৰত্থুং [পুঞ্ঞকিরিযৰত্থু (স্যা.)] নাভিসম্ভোতি. সো কাযস্স ভেদা পরং মরণা মনুস্সদোভগ্যং উপপজ্জতি.

‘‘ইধ পন, ভিক্খৰে, একচ্চস্স দানমযং পুঞ্ঞকিরিযৰত্থু মত্তসো কতং হোতি, সীলমযং পুঞ্ঞকিরিযৰত্থু মত্তসো কতং হোতি, ভাৰনামযং পুঞ্ঞকিরিযৰত্থুং নাভিসম্ভোতি. সো কাযস্স ভেদা পরং মরণা মনুস্সসোভগ্যং উপপজ্জতি.

‘‘ইধ পন, ভিক্খৰে, একচ্চস্স দানমযং পুঞ্ঞকিরিযৰত্থু অধিমত্তং কতং হোতি, সীলমযং পুঞ্ঞকিরিযৰত্থু অধিমত্তং কতং হোতি, ভাৰনামযং পুঞ্ঞকিরিযৰত্থুং নাভিসম্ভোতি. সো কাযস্স ভেদা পরং মরণা চাতুমহারাজিকানং দেৰানং সহব্যতং উপপজ্জতি. তত্র, ভিক্খৰে, চত্তারো মহারাজানো দানমযং পুঞ্ঞকিরিযৰত্থুং অতিরেকং করিত্ৰা, সীলমযং পুঞ্ঞকিরিযৰত্থুং অতিরেকং করিত্ৰা, চাতুমহারাজিকে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহি.

‘‘ইধ পন, ভিক্খৰে, একচ্চস্স দানমযং পুঞ্ঞকিরিযৰত্থু অধিমত্তং কতং হোতি, সীলমযং পুঞ্ঞকিরিযৰত্থু অধিমত্তং কতং হোতি, ভাৰনামযং পুঞ্ঞকিরিযৰত্থুং নাভিসম্ভোতি. সো কাযস্স ভেদা পরং মরণা পরনিম্মিতৰসৰত্তীনং দেৰানং সহব্যতং উপপজ্জতি. তত্র, ভিক্খৰে, ৰসৰত্তী দেৰপুত্তো দানমযং পুঞ্ঞকিরিযৰত্থুং অতিরেকং করিত্ৰা, সীলমযং পুঞ্ঞকিরিযৰত্থুং অতিরেকং করিত্ৰা, পরনিম্মিতৰসৰত্তীদেৰে দসহি ঠানেহি অধিগণ্হাতি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি, দিব্বেহি সদ্দেহি, দিব্বেহি গন্ধেহি, দিব্বেহি রসেহি, দিব্বেহি ফোট্ঠব্বেহি. ইমানি খো, ভিক্খৰে, তীণি পুঞ্ঞকিরিযৰত্থূনী’’তি. ছট্ঠং.

৭. সপ্পুরিসদানসুত্তং

৩৭. ‘‘অট্ঠিমানি, ভিক্খৰে, সপ্পুরিসদানানি. কতমানি অট্ঠ? সুচিং দেতি, পণীতং দেতি, কালেন দেতি, কপ্পিযং দেতি, ৰিচেয্য দেতি, অভিণ্হং দেতি, দদং চিত্তং পসাদেতি, দত্ৰা অত্তমনো হোতি. ইমানি খো, ভিক্খৰে, অট্ঠ সপ্পুরিসদানানী’’তি.

‘‘সুচিং পণীতং কালেন, কপ্পিযং পানভোজনং;

অভিণ্হং দদাতি দানং, সুখেত্তেসু [সুখেত্তে (সী. পী.)] ব্রহ্মচারিসু.

‘‘নেৰ [ন চ (সী. পী.)] ৰিপ্পটিসারিস্স, চজিত্ৰা আমিসং বহুং;

এৰং দিন্নানি দানানি, ৰণ্ণযন্তি ৰিপস্সিনো.

‘‘এৰং যজিত্ৰা মেধাৰী, সদ্ধো মুত্তেন চেতসা;

অব্যাবজ্ঝং [অব্যাপজ্ঝং (ক.) অ. নি. ৪.৪০; ৬.৩৭] সুখং লোকং, পণ্ডিতো উপপজ্জতী’’তি. সত্তমং;

৮. সপ্পুরিসসুত্তং

৩৮. ‘‘সপ্পুরিসো, ভিক্খৰে, কুলে জাযমানো বহুনো জনস্স অত্থায হিতায সুখায হোতি – মাতাপিতূনং অত্থায হিতায সুখায হোতি, পুত্তদারস্স অত্থায হিতায সুখায হোতি, দাসকম্মকরপোরিসস্স অত্থায হিতায সুখায হোতি, মিত্তামচ্চানং অত্থায হিতায সুখায হোতি, পুব্বপেতানং অত্থায হিতায সুখায হোতি, রঞ্ঞো অত্থায হিতায সুখায হোতি, দেৰতানং অত্থায হিতায সুখায হোতি, সমণব্রাহ্মণানং অত্থায হিতায সুখায হোতি.

‘‘সেয্যথাপি, ভিক্খৰে, মহামেঘো সব্বসস্সানি সম্পাদেন্তো বহুনো জনস্স অত্থায হিতায সুখায [হিতায…পে… (স্যা. ক.)] হোতি; এৰমেৰং খো, ভিক্খৰে, সপ্পুরিসো কুলে জাযমানো বহুনো জনস্স অত্থায হিতায সুখায হোতি – মাতাপিতূনং অত্থায হিতায সুখায হোতি, পুত্তদারস্স অত্থায হিতায সুখায হোতি, দাসকম্মকরপোরিসস্স অত্থায হিতায সুখায হোতি, মিত্তামচ্চানং অত্থায হিতায সুখায হোতি, পুব্বপেতানং অত্থায হিতায সুখায হোতি, রঞ্ঞো অত্থায হিতায সুখায হোতি, দেৰতানং অত্থায হিতায সুখায হোতি, সমণব্রাহ্মণানং অত্থায হিতায সুখায হোতী’’তি.

‘‘বহূনং [বহুন্নং (সী. পী.)] ৰত অত্থায, সপ্পঞ্ঞো ঘরমাৰসং;

মাতরং পিতরং পুব্বে, রত্তিন্দিৰমতন্দিতো.

‘‘পূজেতি সহধম্মেন, পুব্বেকতমনুস্সরং;

অনাগারে পব্বজিতে, অপচে ব্রহ্মচারযো [ব্রহ্মচারিনো (স্যা.)].

‘‘নিৰিট্ঠসদ্ধো পূজেতি, ঞত্ৰা ধম্মে চ পেসলো [পেসলে (ক.)];

রঞ্ঞো হিতো দেৰহিতো, ঞাতীনং সখিনং হিতো.

‘‘সব্বেসং [সব্বেসু (ক.)] সো [স (স্যা. পী. ক.)] হিতো হোতি, সদ্ধম্মে সুপ্পতিট্ঠিতো;

ৰিনেয্য মচ্ছেরমলং, স লোকং ভজতে সিৰ’’ন্তি. অট্ঠমং;

৯. অভিসন্দসুত্তং

৩৯. ‘‘অট্ঠিমে, ভিক্খৰে, পুঞ্ঞাভিসন্দা কুসলাভিসন্দা সুখস্সাহারা সোৰগ্গিকা সুখৰিপাকা সগ্গসংৰত্তনিকা, ইট্ঠায কন্তায মনাপায হিতায সুখায সংৰত্তন্তি. কতমে অট্ঠ? ইধ, ভিক্খৰে, অরিযসাৰকো বুদ্ধং সরণং গতো হোতি. অযং, ভিক্খৰে, পঠমো পুঞ্ঞাভিসন্দো কুসলাভিসন্দো সুখস্সাহারো সোৰগ্গিকো সুখৰিপাকো সগ্গসংৰত্তনিকো, ইট্ঠায কন্তায মনাপায হিতায সুখায সংৰত্ততি.

‘‘পুন চপরং, ভিক্খৰে, অরিযসাৰকো ধম্মং সরণং গতো হোতি. অযং, ভিক্খৰে, দুতিযো পুঞ্ঞাভিসন্দো…পে… সংৰত্ততি.

‘‘পুন চপরং, ভিক্খৰে, অরিযসাৰকো সঙ্ঘং সরণং গতো হোতি. অযং, ভিক্খৰে, ততিযো পুঞ্ঞাভিসন্দো কুসলাভিসন্দো সুখস্সাহারো সোৰগ্গিকো সুখৰিপাকো সগ্গসংৰত্তনিকো, ইট্ঠায কন্তায মনাপায হিতায সুখায সংৰত্ততি.

[কথা. ৪৮০] ‘‘পঞ্চিমানি, ভিক্খৰে, দানানি মহাদানানি অগ্গঞ্ঞানি রত্তঞ্ঞানি ৰংসঞ্ঞানি পোরাণানি অসংকিণ্ণানি অসংকিণ্ণপুব্বানি, ন সংকিযন্তি ন সংকিযিস্সন্তি, অপ্পটিকুট্ঠানি [অপ্পতিকুট্ঠানি (সী.)] সমণেহি ব্রাহ্মণেহি ৰিঞ্ঞূহি. কতমানি পঞ্চ? ইধ, ভিক্খৰে, অরিযসাৰকো পাণাতিপাতং পহায পাণাতিপাতা পটিৰিরতো হোতি. পাণাতিপাতা পটিৰিরতো, ভিক্খৰে, অরিযসাৰকো অপরিমাণানং সত্তানং অভযং দেতি, অৰেরং দেতি, অব্যাবজ্ঝং [অব্যাপজ্ঝং (ক.) এৰমুপরিপি] দেতি. অপরিমাণানং সত্তানং অভযং দত্ৰা অৰেরং দত্ৰা অব্যাবজ্ঝং দত্ৰা অপরিমাণস্স অভযস্স অৰেরস্স অব্যাবজ্ঝস্স ভাগী হোতি. ইদং, ভিক্খৰে, পঠমং দানং মহাদানং অগ্গঞ্ঞং রত্তঞ্ঞং ৰংসঞ্ঞং পোরাণং অসংকিণ্ণং অসংকিণ্ণপুব্বং, ন সংকিযতি ন সংকিযিস্সতি, অপ্পটিকুট্ঠং সমণেহি ব্রাহ্মণেহি ৰিঞ্ঞূহি. অযং, ভিক্খৰে, চতুত্থো পুঞ্ঞাভিসন্দো কুসলাভিসন্দো সুখস্সাহারো সোৰগ্গিকো সুখৰিপাকো সগ্গসংৰত্তনিকো, ইট্ঠায কন্তায মনাপায হিতায সুখায সংৰত্ততি.

‘‘পুন চপরং, ভিক্খৰে, অরিযসাৰকো অদিন্নাদানং পহায অদিন্নাদানা পটিৰিরতো হোতি…পে… কামেসুমিচ্ছাচারং পহায কামেসুমিচ্ছাচারা পটিৰিরতো হোতি…পে… মুসাৰাদং পহায মুসাৰাদা পটিৰিরতো হোতি…পে… সুরামেরযমজ্জপমাদট্ঠানং পহায সুরামেরযমজ্জপমাদট্ঠানা পটিৰিরতো হোতি. সুরামেরযমজ্জপমাদট্ঠানা পটিৰিরতো, ভিক্খৰে, অরিযসাৰকো অপরিমাণানং সত্তানং অভযং দেতি অৰেরং দেতি অব্যাবজ্ঝং দেতি. অপরিমাণানং সত্তানং অভযং দত্ৰা অৰেরং দত্ৰা অব্যাবজ্ঝং দত্ৰা, অপরিমাণস্স অভযস্স অৰেরস্স অব্যাবজ্ঝস্স ভাগী হোতি. ইদং, ভিক্খৰে, পঞ্চমং দানং মহাদানং অগ্গঞ্ঞং রত্তঞ্ঞং ৰংসঞ্ঞং পোরাণং অসংকিণ্ণং অসংকিণ্ণপুব্বং, ন সংকিযতি ন সংকিযিস্সতি, অপ্পটিকুট্ঠং সমণেহি ব্রাহ্মণেহি ৰিঞ্ঞূহি. অযং খো, ভিক্খৰে, অট্ঠমো পুঞ্ঞাভিসন্দো কুসলাভিসন্দো সুখস্সাহারো সোৰগ্গিকো সুখৰিপাকো সগ্গসংৰত্তনিকো, ইট্ঠায কন্তায মনাপায হিতায সুখায সংৰত্ততি. ইমে খো, ভিক্খৰে, অট্ঠ পুঞ্ঞাভিসন্দা কুসলাভিসন্দা সুখস্সাহারা সোৰগ্গিকা সুখৰিপাকা সগ্গসংৰত্তনিকা, ইট্ঠায কন্তায মনাপায হিতায সুখায সংৰত্তন্তী’’তি. নৰমং.

১০. দুচ্চরিতৰিপাকসুত্তং

৪০. ‘‘পাণাতিপাতো, ভিক্খৰে, আসেৰিতো ভাৰিতো বহুলীকতো নিরযসংৰত্তনিকো তিরচ্ছানযোনিসংৰত্তনিকো পেত্তিৰিসযসংৰত্তনিকো. যো সব্বলহুসো [সব্বলহুসোতি সব্বলহুকো (স্যা. অট্ঠ.)] পাণাতিপাতস্স ৰিপাকো, মনুস্সভূতস্স অপ্পাযুকসংৰত্তনিকো হোতি.

‘‘অদিন্নাদানং, ভিক্খৰে, আসেৰিতং ভাৰিতং বহুলীকতং নিরযসংৰত্তনিকং তিরচ্ছানযোনিসংৰত্তনিকং পেত্তিৰিসযসংৰত্তনিকং. যো সব্বলহুসো অদিন্নাদানস্স ৰিপাকো, মনুস্সভূতস্স ভোগব্যসনসংৰত্তনিকো হোতি.

‘‘কামেসুমিচ্ছাচারো, ভিক্খৰে, আসেৰিতো ভাৰিতো বহুলীকতো নিরযসংৰত্তনিকো তিরচ্ছানযোনিসংৰত্তনিকো পেত্তিৰিসযসংৰত্তনিকো. যো সব্বলহুসো কামেসুমিচ্ছাচারস্স ৰিপাকো, মনুস্সভূতস্স সপত্তৰেরসংৰত্তনিকো হোতি.

‘‘মুসাৰাদো, ভিক্খৰে, আসেৰিতো ভাৰিতো বহুলীকতো নিরযসংৰত্তনিকো তিরচ্ছানযোনিসংৰত্তনিকো পেত্তিৰিসযসংৰত্তনিকো. যো সব্বলহুসো মুসাৰাদস্স ৰিপাকো, মনুস্সভূতস্স অভূতব্ভক্খানসংৰত্তনিকো হোতি.

‘‘পিসুণা, ভিক্খৰে, ৰাচা আসেৰিতা ভাৰিতা বহুলীকতা নিরযসংৰত্তনিকা তিরচ্ছানযোনিসংৰত্তনিকা পেত্তিৰিসযসংৰত্তনিকা. যো সব্বলহুসো পিসুণায ৰাচায ৰিপাকো, মনুস্সভূতস্স মিত্তেহি ভেদনসংৰত্তনিকো হোতি.

‘‘ফরুসা, ভিক্খৰে, ৰাচা আসেৰিতা ভাৰিতা বহুলীকতা নিরযসংৰত্তনিকা তিরচ্ছানযোনিসংৰত্তনিকা পেত্তিৰিসযসংৰত্তনিকা. যো সব্বলহুসো ফরুসায ৰাচায ৰিপাকো, মনুস্সভূতস্স অমনাপসদ্দসংৰত্তনিকো হোতি.

‘‘সম্ফপ্পলাপো, ভিক্খৰে, আসেৰিতো ভাৰিতো বহুলীকতো নিরযসংৰত্তনিকো তিরচ্ছানযোনিসংৰত্তনিকো পেত্তিৰিসযসংৰত্তনিকো. যো সব্বলহুসো সম্ফপ্পলাপস্স ৰিপাকো, মনুস্সভূতস্স অনাদেয্যৰাচাসংৰত্তনিকো হোতি.

‘‘সুরামেরযপানং, ভিক্খৰে, আসেৰিতং ভাৰিতং বহুলীকতং নিরযসংৰত্তনিকং তিরচ্ছানযোনিসংৰত্তনিকং পেত্তিৰিসযসংৰত্তনিকং. যো সব্বলহুসো সুরামেরযপানস্স ৰিপাকো, মনুস্সভূতস্স উম্মত্তকসংৰত্তনিকো হোতী’’তি. দসমং.

দানৰগ্গো চতুত্থো.