৮. দুতিযবলসুত্তং

২৮. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সারিপুত্তং ভগৰা এতদৰোচ – ‘‘কতি নু খো, সারিপুত্ত, খীণাসৰস্স ভিক্খুনো বলানি, যেহি বলেহি সমন্নাগতো খীণাসৰো ভিক্খু আসৰানং খযং পটিজানাতি – ‘খীণা মে আসৰা’’’তি? ‘‘অট্ঠ, ভন্তে, খীণাসৰস্স ভিক্খুনো বলানি, যেহি বলেহি সমন্নাগতো খীণাসৰো ভিক্খু আসৰানং খযং পটিজানাতি – ‘খীণা মে আসৰা’’’তি.

‘‘কতমানি অট্ঠ? [অ. নি. ১০.৯০; পটি. ম. ২.৪৪] ইধ, ভন্তে, খীণাসৰস্স ভিক্খুনো অনিচ্চতো সব্বে সঙ্খারা যথাভূতং সম্মপ্পঞ্ঞায সুদিট্ঠা হোন্তি. যম্পি, ভন্তে, খীণাসৰস্স ভিক্খুনো অনিচ্চতো সব্বে সঙ্খারা যথাভূতং সম্মপ্পঞ্ঞায সুদিট্ঠা হোন্তি, ইদম্পি, ভন্তে, খীণাসৰস্স ভিক্খুনো বলং হোতি, যং বলং আগম্ম খীণাসৰো ভিক্খু আসৰানং খযং পটিজানাতি – ‘খীণা মে আসৰা’’’তি.

‘‘পুন চপরং, ভন্তে, খীণাসৰস্স ভিক্খুনো অঙ্গারকাসূপমা কামা যথাভূতং সম্মপ্পঞ্ঞায সুদিট্ঠা হোন্তি. যম্পি, ভন্তে, খীণাসৰস্স ভিক্খুনো অঙ্গারকাসূপমা কামা যথাভূতং সম্মপ্পঞ্ঞায সুদিট্ঠা হোন্তি, ইদম্পি, ভন্তে, খীণাসৰস্স ভিক্খুনো বলং হোতি, যং বলং আগম্ম খীণাসৰো ভিক্খু আসৰানং খযং পটিজানাতি – ‘খীণা মে আসৰা’’’তি.

‘‘পুন চপরং, ভন্তে, খীণাসৰস্স ভিক্খুনো ৰিৰেকনিন্নং চিত্তং হোতি ৰিৰেকপোণং ৰিৰেকপব্ভারং ৰিৰেকট্ঠং নেক্খম্মাভিরতং ব্যন্তিভূতং সব্বসো আসৰট্ঠানিযেহি ধম্মেহি. যম্পি, ভন্তে, খীণাসৰস্স ভিক্খুনো ৰিৰেকনিন্নং চিত্তং হোতি ৰিৰেকপোণং ৰিৰেকপব্ভারং ৰিৰেকট্ঠং নেক্খম্মাভিরতং ব্যন্তিভূতং সব্বসো আসৰট্ঠানিযেহি ধম্মেহি, ইদম্পি, ভন্তে, খীণাসৰস্স ভিক্খুনো বলং হোতি, যং বলং আগম্ম খীণাসৰো ভিক্খু আসৰানং খযং পটিজানাতি – ‘খীণা মে আসৰা’’’তি.

‘‘পুন চপরং, ভন্তে, খীণাসৰস্স ভিক্খুনো চত্তারো সতিপট্ঠানা ভাৰিতা হোন্তি সুভাৰিতা. যম্পি, ভন্তে, খীণাসৰস্স ভিক্খুনো চত্তারো সতিপট্ঠানা ভাৰিতা হোন্তি সুভাৰিতা, ইদম্পি, ভন্তে, খীণাসৰস্স ভিক্খুনো বলং হোতি, যং বলং আগম্ম খীণাসৰো ভিক্খু আসৰানং খযং পটিজানাতি – ‘খীণা মে আসৰা’’’তি.

‘‘পুন চপরং, ভন্তে, খীণাসৰস্স ভিক্খুনো চত্তারো ইদ্ধিপাদা ভাৰিতা হোন্তি সুভাৰিতা…পে… পঞ্চিন্দ্রিযানি ভাৰিতানি হোন্তি সুভাৰিতানি…পে… সত্ত বোজ্ঝঙ্গা ভাৰিতা হোন্তি সুভাৰিতা…পে… অরিযো অট্ঠঙ্গিকো মগ্গো ভাৰিতো হোতি সুভাৰিতো. যম্পি, ভন্তে, খীণাসৰস্স ভিক্খুনো অরিযো অট্ঠঙ্গিকো মগ্গো ভাৰিতো হোতি সুভাৰিতো, ইদম্পি, ভন্তে, খীণাসৰস্স ভিক্খুনো বলং হোতি, যং বলং আগম্ম খীণাসৰো ভিক্খু আসৰানং খযং পটিজানাতি – ‘খীণা মে আসৰা’’’তি.

‘‘ইমানি খো, ভন্তে, অট্ঠ খীণাসৰস্স ভিক্খুনো বলানি, যেহি বলেহি সমন্নাগতো খীণাসৰো ভিক্খু আসৰানং খযং পটিজানাতি – ‘খীণা মে আসৰা’’’তি. অট্ঠমং.