১. পঠমউগ্গসুত্তং

২১. একং সমযং ভগৰা ৰেসালিযং ৰিহরতি মহাৰনে কূটাগারসালাযং. তত্র খো ভগৰা ভিক্খূ আমন্তেসি ‘‘অট্ঠহি, ভিক্খৰে, অচ্ছরিযেহি অব্ভুতেহি ধম্মেহি [অব্ভুতধম্মেহি (স্যা. ক.)] সমন্নাগতং উগ্গং গহপতিং ৰেসালিকং ধারেথা’’তি. ইদমৰোচ ভগৰা. ইদং ৰত্ৰান সুগতো উট্ঠাযাসনা ৰিহারং পাৰিসি.

অথ খো অঞ্ঞতরো ভিক্খু পুব্বণ্হসমযং নিৰাসেত্ৰা পত্তচীৰরমাদায যেন উগ্গস্স গহপতিনো ৰেসালিকস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো উগ্গো গহপতি ৰেসালিকো যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং অভিৰাদেত্ৰা একমন্তং নিসীদি. একমন্তং নিসিন্নং খো উগ্গং গহপতিং ৰেসালিকং সো ভিক্খু এতদৰোচ –

‘‘অট্ঠহি খো ত্ৰং, গহপতি, অচ্ছরিযেহি অব্ভুতেহি ধম্মেহি সমন্নাগতো ভগৰতা ব্যাকতো. কতমে তে, গহপতি, অট্ঠ অচ্ছরিযা অব্ভুতা ধম্মা, যেহি ত্ৰং সমন্নাগতো ভগৰতা ব্যাকতো’’তি? ‘‘ন খো অহং, ভন্তে, জানামি – কতমেহি অট্ঠহি অচ্ছরিযেহি অব্ভুতেহি ধম্মেহি সমন্নাগতো ভগৰতা ব্যাকতোতি. অপি চ, ভন্তে, যে মে অট্ঠ অচ্ছরিযা অব্ভুতা ধম্মা সংৰিজ্জন্তি, তং সুণোহি, সাধুকং মনসি করোহি; ভাসিস্সামী’’তি. ‘‘এৰং, গহপতী’’তি খো সো ভিক্খু উগ্গস্স গহপতিনো ৰেসালিকস্স পচ্চস্সোসি. উগ্গো গহপতি ৰেসালিকো এতদৰোচ – ‘‘যদাহং, ভন্তে, ভগৰন্তং পঠমং দূরতোৰ অদ্দসং; সহ দস্সনেনেৰ মে, ভন্তে, ভগৰতো চিত্তং পসীদি. অযং খো মে, ভন্তে, পঠমো অচ্ছরিযো অব্ভুতো ধম্মো সংৰিজ্জতি’’.

‘‘সো খো অহং, ভন্তে, পসন্নচিত্তো ভগৰন্তং পযিরুপাসিং. তস্স মে ভগৰা অনুপুব্বিং কথং কথেসি, সেয্যথিদং – দানকথং সীলকথং সগ্গকথং; কামানং আদীনৰং ওকারং সংকিলেসং, নেক্খম্মে আনিসংসং পকাসেসি. যদা মং ভগৰা অঞ্ঞাসি কল্লচিত্তং মুদুচিত্তং ৰিনীৰরণচিত্তং উদগ্গচিত্তং পসন্নচিত্তং, অথ যা বুদ্ধানং সামুক্কংসিকা ধম্মদেসনা তং পকাসেসি – দুক্খং, সমুদযং, নিরোধং, মগ্গং. সেয্যথাপি নাম সুদ্ধং ৰত্থং অপগতকাল়কং সম্মদেৰ রজনং পটিগ্গণ্হেয্য; এৰমেৰং খো মে তস্মিংযেৰ আসনে ৰিরজং ৰীতমলং ধম্মচক্খুং উদপাদি – ‘যং কিঞ্চি সমুদযধম্মং, সব্বং তং নিরোধধম্ম’ন্তি. সো খো অহং, ভন্তে, দিট্ঠধম্মো পত্তধম্মো ৰিদিতধম্মো পরিযোগাল়্হধম্মো তিণ্ণৰিচিকিচ্ছো ৰিগতকথংকথো ৰেসারজ্জপ্পত্তো অপরপ্পচ্চযো সত্থুসাসনে তত্থেৰ বুদ্ধঞ্চ ধম্মঞ্চ সঙ্ঘঞ্চ সরণং অগমাসিং, ব্রহ্মচরিযপঞ্চমানি চ সিক্খাপদানি সমাদিযিং. অযং খো মে, ভন্তে, দুতিযো অচ্ছরিযো অব্ভুতো ধম্মো সংৰিজ্জতি.

‘‘তস্স ময্হং, ভন্তে, চতস্সো কোমারিযো পজাপতিযো অহেসুং. অথ খ্ৰাহং, ভন্তে, যেন তা পজাপতিযো তেনুপসঙ্কমিং; উপসঙ্কমিত্ৰা তা পজাপতিযো এতদৰচং – ‘মযা খো, ভগিনিযো, ব্রহ্মচরিযপঞ্চমানি সিক্খাপদানি সমাদিন্নানি [সমাদিণ্ণানি (সী. ক.)]. যা ইচ্ছতি সা ইধেৰ ভোগে চ ভুঞ্জতু পুঞ্ঞানি চ করোতু, সকানি ৰা ঞাতিকুলানি গচ্ছতু. হোতি ৰা পন পুরিসাধিপ্পাযো, কস্স ৰো দম্মী’তি? এৰং ৰুত্তে সা, ভন্তে, জেট্ঠা পজাপতি মং এতদৰোচ – ‘ইত্থন্নামস্স মং, অয্যপুত্ত, পুরিসস্স দেহী’তি. অথ খো অহং, ভন্তে, তং পুরিসং পক্কোসাপেত্ৰা ৰামেন হত্থেন পজাপতিং গহেত্ৰা দক্খিণেন হত্থেন ভিঙ্গারং গহেত্ৰা তস্স পুরিসস্স ওণোজেসিং. কোমারিং খো পনাহং, ভন্তে, দারং পরিচ্চজন্তো নাভিজানামি চিত্তস্স অঞ্ঞথত্তং. অযং খো মে, ভন্তে, ততিযো অচ্ছরিযো অব্ভুতো ধম্মো সংৰিজ্জতি.

‘‘সংৰিজ্জন্তি খো পন মে, ভন্তে, কুলে ভোগা. তে চ খো অপ্পটিৰিভত্তা সীলৰন্তেহি কল্যাণধম্মেহি. অযং খো মে, ভন্তে, চতুত্থো অচ্ছরিযো অব্ভুতো ধম্মো সংৰিজ্জতি.

‘‘যং খো পনাহং, ভন্তে, ভিক্খুং পযিরুপাসামি; সক্কচ্চংযেৰ পযিরুপাসামি, নো অসক্কচ্চং. অযং খো মে, ভন্তে, পঞ্চমো অচ্ছরিযো অব্ভুতো ধম্মো সংৰিজ্জতি.

‘‘সো চে, ভন্তে, মে আযস্মা ধম্মং দেসেতি; সক্কচ্চংযেৰ সুণোমি, নো অসক্কচ্চং. নো চে মে সো আযস্মা ধম্মং দেসেতি, অহমস্স ধম্মং দেসেমি. অযং খো মে, ভন্তে ছট্ঠো অচ্ছরিযো অব্ভুতো ধম্মো সংৰিজ্জতি.

‘‘অনচ্ছরিযং খো পন মং, ভন্তে, দেৰতা উপসঙ্কমিত্ৰা আরোচেন্তি – ‘স্ৰাক্খাতো, গহপতি, ভগৰতা ধম্মো’তি. এৰং ৰুত্তে অহং, ভন্তে, তা দেৰতা এৰং ৰদামি – ‘ৰদেয্যাথ ৰা এৰং খো তুম্হে দেৰতা নো ৰা ৰদেয্যাথ, অথ খো স্ৰাক্খাতো ভগৰতা ধম্মো’তি. ন খো পনাহং, ভন্তে, অভিজানামি ততোনিদানং চিত্তস্স উন্নতিং [উণ্ণতিং (ক.) ধ. স. ১১২১; ৰিভ. ৮৪৩, ৮৪৫ পস্সিতব্বং] – ‘মং ৰা দেৰতা উপসঙ্কমন্তি, অহং ৰা দেৰতাহি সদ্ধিং সল্লপামী’তি. অযং খো মে, ভন্তে, সত্তমো অচ্ছরিযো অব্ভুতো ধম্মো সংৰিজ্জতি.

‘‘যানিমানি, ভন্তে, ভগৰতা দেসিতানি পঞ্চোরম্ভাগিযানি সংযোজনানি, নাহং তেসং কিঞ্চি অত্তনি অপ্পহীনং সমনুপস্সামি. অযং খো মে, ভন্তে, অট্ঠমো অচ্ছরিযো অব্ভুতো ধম্মো সংৰিজ্জতি. ইমে খো মে, ভন্তে, অট্ঠ অচ্ছরিযা অব্ভুতা ধম্মা সংৰিজ্জন্তি. ন চ খো অহং জানামি – কতমেহি চাহং [কতমেহিপহং (সী.), কতমেহিপাহং (পী. ক.)] অট্ঠহি অচ্ছরিযেহি অব্ভুতেহি ধম্মেহি সমন্নাগতো ভগৰতা ব্যাকতো’’তি.

অথ খো সো ভিক্খু উগ্গস্স গহপতিনো ৰেসালিকস্স নিৰেসনে পিণ্ডপাতং গহেত্ৰা উট্ঠাযাসনা পক্কামি. অথ খো সো ভিক্খু পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু যাৰতকো অহোসি উগ্গেন গহপতিনা ৰেসালিকেন সদ্ধিং কথাসল্লাপো, তং সব্বং ভগৰতো আরোচেসি.

‘‘সাধু সাধু, ভিক্খু! যথা তং উগ্গো গহপতি ৰেসালিকো সম্মা ব্যাকরমানো ব্যাকরেয্য, ইমেহেৰ খো, ভিক্খু, অট্ঠহি অচ্ছরিযেহি অব্ভুতেহি ধম্মেহি সমন্নাগতো উগ্গো গহপতি ৰেসালিকো মযা ব্যাকতো. ইমেহি চ পন, ভিক্খু, অট্ঠহি অচ্ছরিযেহি অব্ভুতেহি ধম্মেহি সমন্নাগতং উগ্গং গহপতিং ৰেসালিকং ধারেহী’’তি. পঠমং.