৮. পচলাযমানসুত্তং

৬১. এৰং মে সুতং – একং সমযং ভগৰা ভগ্গেসু ৰিহরতি সুসুমারগিরে ভেসকল়াৰনে মিগদাযে. তেন খো পন সমযেন আযস্মা মহামোগ্গল্লানো মগধেসু কল্লৰাল়পুত্তগামে [কল্লৰালমুত্তগামে (স্যা.)] পচলাযমানো নিসিন্নো হোতি. অদ্দসা খো ভগৰা দিব্বেন চক্খুনা ৰিসুদ্ধেন অতিক্কন্তমানুসকেন আযস্মন্তং মহামোগ্গল্লানং মগধেসু কল্লৰাল়পুত্তগামে পচলাযমানং নিসিন্নং. দিস্ৰা – সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য, এৰমেৰং – ভগ্গেসু সুসুমারগিরে ভেসকল়াৰনে মিগদাযে অন্তরহিতো মগধেসু কল্লৰাল়পুত্তগামে আযস্মতো মহামোগ্গল্লানস্স সম্মুখে পাতুরহোসি. নিসীদি ভগৰা পঞ্ঞত্তে আসনে. নিসজ্জ খো ভগৰা আযস্মন্তং মহামোগ্গল্লানং এতদৰোচ –

‘‘পচলাযসি নো ত্ৰং, মোগ্গল্লান, পচলাযসি নো ত্ৰং, মোগ্গল্লানা’’তি? ‘‘এৰং, ভন্তে’’. ‘‘তস্মাতিহ, মোগ্গল্লান, যথাসঞ্ঞিস্স তে ৰিহরতো তং মিদ্ধং ওক্কমতি, তং সঞ্ঞং মা মনসাকাসি [মা মনসিকাসি (সী.), মনসি করেয্যাসি (স্যা.), মনসাকাসি (ক.)], তং সঞ্ঞং মা বহুলমকাসি [তং সঞ্ঞং বহুলং করেয্যাসি (স্যা.), তং সঞ্ঞং বহুলমকাসি (ক.)]. ঠানং খো পনেতং, মোগ্গল্লান, ৰিজ্জতি যং তে এৰং ৰিহরতো তং মিদ্ধং পহীযেথ’’.

‘‘নো চে তে এৰং ৰিহরতো তং মিদ্ধং পহীযেথ, ততো ত্ৰং, মোগ্গল্লান, যথাসুতং যথাপরিযত্তং ধম্মং চেতসা অনুৰিতক্কেয্যাসি অনুৰিচারেয্যাসি, মনসা অনুপেক্খেয্যাসি. ঠানং খো পনেতং ৰিজ্জতি যং তে এৰং ৰিহরতো তং মিদ্ধং পহীযেথ.

‘‘নো চে তে এৰং ৰিহরতো তং মিদ্ধং পহীযেথ, ততো ত্ৰং, মোগ্গল্লান, যথাসুতং যথাপরিযত্তং ধম্মং ৰিত্থারেন সজ্ঝাযং করেয্যাসি. ঠানং খো পনেতং ৰিজ্জতি যং তে এৰং ৰিহরতো তং মিদ্ধং পহীযেথ.

‘‘নো চে তে এৰং ৰিহরতো তং মিদ্ধং পহীযেথ, ততো ত্ৰং, মোগ্গল্লান, উভো কণ্ণসোতানি আৰিঞ্ছেয্যাসি [আৰিঞ্জেয্যাসি (সী. স্যা.)], পাণিনা গত্তানি অনুমজ্জেয্যাসি. ঠানং খো পনেতং ৰিজ্জতি যং তে এৰং ৰিহরতো তং মিদ্ধং পহীযেথ.

‘‘নো চে তে এৰং ৰিহরতো তং মিদ্ধং পহীযেথ, ততো ত্ৰং, মোগ্গল্লান, উট্ঠাযাসনা উদকেন অক্খীনি অনুমজ্জিত্ৰা [পনিঞ্জিত্ৰা (ক.)] দিসা অনুৰিলোকেয্যাসি, নক্খত্তানি তারকরূপানি উল্লোকেয্যাসি. ঠানং খো পনেতং ৰিজ্জতি যং তে এৰং ৰিহরতো তং মিদ্ধং পহীযেথ.

‘‘নো চে তে এৰং ৰিহরতো তং মিদ্ধং পহীযেথ, ততো ত্ৰং, মোগ্গল্লান, আলোকসঞ্ঞং মনসি করেয্যাসি, দিৰাসঞ্ঞং অধিট্ঠহেয্যাসি – যথা দিৰা তথা রত্তিং যথা রত্তিং তথা দিৰা. ইতি ৰিৰটেন [ৰিৰট্টেন (স্যা.), মিদ্ধৰিগতেন (ক.)] চেতসা অপরিযোনদ্ধেন সপ্পভাসং চিত্তং ভাৰেয্যাসি. ঠানং খো পনেতং ৰিজ্জতি যং তে এৰং ৰিহরতো তং মিদ্ধং পহীযেথ.

‘‘নো চে তে এৰং ৰিহরতো তং মিদ্ধং পহীযেথ, ততো ত্ৰং, মোগ্গল্লান, পচ্ছাপুরেসঞ্ঞী [পচ্ছাপুরে তথাসঞ্ঞী (কত্থচি)] চঙ্কমং অধিট্ঠহেয্যাসি অন্তোগতেহি ইন্দ্রিযেহি অবহিগতেন মানসেন. ঠানং খো পনেতং ৰিজ্জতি যং তে এৰং ৰিহরতো তং মিদ্ধং পহীযেথ.

‘‘নো চে তে এৰং ৰিহরতো তং মিদ্ধং পহীযেথ, ততো ত্ৰং, মোগ্গল্লান, দক্খিণেন পস্সেন সীহসেয্যং কপ্পেয্যাসি পাদে পাদং অচ্চাধায সতো সম্পজানো উট্ঠানসঞ্ঞং মনসি করিত্ৰা. পটিবুদ্ধেন চ [পটিবুদ্ধেনেৰ (স্যা.)] তে, মোগ্গল্লান, খিপ্পঞ্ঞেৰ পচ্চুট্ঠাতব্বং – ‘ন সেয্যসুখং ন পস্সসুখং ন মিদ্ধসুখং অনুযুত্তো ৰিহরিস্সামী’তি. এৰঞ্হি তে, মোগ্গল্লান, সিক্খিতব্বং.

‘‘তস্মাতিহ, মোগ্গল্লান, এৰং সিক্খিতব্বং – ‘ন উচ্চাসোণ্ডং পগ্গহেত্ৰা কুলানি উপসঙ্কমিস্সামী’তি. এৰঞ্হি তে, মোগ্গল্লান, সিক্খিতব্বং. সচে, মোগ্গল্লান, ভিক্খু উচ্চাসোণ্ডং পগ্গহেত্ৰা কুলানি উপসঙ্কমতি, সন্তি হি, মোগ্গল্লান, কুলেসু কিচ্চকরণীযানি. যেহি মনুস্সা আগতং ভিক্খুং ন মনসি করোন্তি, তত্র ভিক্খুস্স এৰং হোতি – ‘কোসু নাম ইদানি মং ইমস্মিং কুলে পরিভিন্দি, ৰিরত্তরূপা দানিমে মযি মনুস্সা’তি. ইতিস্স অলাভেন মঙ্কুভাৰো, মঙ্কুভূতস্স উদ্ধচ্চং, উদ্ধতস্স অসংৰরো, অসংৰুতস্স আরা চিত্তং সমাধিম্হা.

‘‘তস্মাতিহ, মোগ্গল্লান, এৰং সিক্খিতব্বং – ‘ন ৰিগ্গাহিককথং কথেস্সামী’তি. এৰঞ্হি তে, মোগ্গল্লান, সিক্খিতব্বং. ৰিগ্গাহিকায, মোগ্গল্লান, কথায সতি কথাবাহুল্লং পাটিকঙ্খং, কথাবাহুল্লে সতি উদ্ধচ্চং, উদ্ধতস্স অসংৰরো, অসংৰুতস্স আরা চিত্তং সমাধিম্হা [নাহং মোগ্গলান সব্বেহেৰ সমগ্গং ৰণ্ণযামি গহট্ঠেহি. পব্বজিতেহি খো অহং মোগ্গল্লান সমগ্গং ৰণ্ণযামি (ক.)]. নাহং, মোগ্গল্লান, সব্বেহেৰ সংসগ্গং ৰণ্ণযামি. ন পনাহং, মোগ্গল্লান, সব্বেহেৰ সংসগ্গং ন ৰণ্ণযামি. সগহট্ঠপব্বজিতেহি খো অহং, মোগ্গল্লান, সংসগ্গং ন ৰণ্ণযামি [নাহং মোগ্গল্লান সব্বেহেৰ সমগ্গং ৰণ্ণযামি গহট্ঠেহি, পব্বজিতেহি খো অহং মোগ্গল্লান সমগ্গং ৰণ্ণযামি (ক.)]. যানি চ খো তানি সেনাসনানি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি [মনুস্সরাহসেয্যকানি (সী. স্যা.)] পটিসল্লানসারুপ্পানি তথারূপেহি সেনাসনেহি সংসগ্গং [সমগ্গং (ক.)] ৰণ্ণযামী’’তি.

এৰং ৰুত্তে আযস্মা মহামোগ্গল্লানো ভগৰন্তং এতদৰোচ – ‘‘কিত্তাৰতা নু খো, ভন্তে, ভিক্খু সংখিত্তেন তণ্হাসঙ্খযৰিমুত্তো হোতি অচ্চন্তনিট্ঠো অচ্চন্তযোগক্খেমী অচ্চন্তব্রহ্মচারী অচ্চন্তপরিযোসানো সেট্ঠো দেৰমনুস্সান’’ন্তি?

‘‘ইধ, মোগ্গল্লান, ভিক্খুনো সুতং হোতি – ‘সব্বে ধম্মা নালং অভিনিৰেসাযা’তি; এৰঞ্চেতং, মোগ্গল্লান, ভিক্খুনো সুতং হোতি – ‘সব্বে ধম্মা নালং অভিনিৰেসাযা’তি. সো সব্বং ধম্মং অভিজানাতি, সব্বং ধম্মং অভিঞ্ঞায সব্বং ধম্মং পরিজানাতি. সব্বং ধম্মং পরিঞ্ঞায যংকিঞ্চি ৰেদনং ৰেদিযতি সুখং ৰা দুক্খং ৰা অদুক্খমসুখং ৰা. সো তাসু ৰেদনাসু অনিচ্চানুপস্সী ৰিহরতি, ৰিরাগানুপস্সী ৰিহরতি, নিরোধানুপস্সী ৰিহরতি, পটিনিস্সগ্গানুপস্সী ৰিহরতি. সো তাসু ৰেদনাসু অনিচ্চানুপস্সী ৰিহরন্তো ৰিরাগানুপস্সী ৰিহরন্তো নিরোধানুপস্সী ৰিহরন্তো পটিনিস্সগ্গানুপস্সী ৰিহরন্তো ন কিঞ্চি [ন চ কিঞ্চি (সী. স্যা. ক.) ম. নি. ১.৩৯০ পস্সিতব্বং] লোকে উপাদিযতি, অনুপাদিযং ন পরিতস্সতি, অপরিতস্সং পচ্চত্তংযেৰ পরিনিব্বাযতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি. এত্তাৰতা খো, মোগ্গল্লান, ভিক্খু সংখিত্তেন তণ্হাসঙ্খযৰিমুত্তো হোতি অচ্চন্তনিট্ঠো অচ্চন্তযোগক্খেমী অচ্চন্তব্রহ্মচারী অচ্চন্তপরিযোসানো সেট্ঠো দেৰমনুস্সান’’ন্তি. অট্ঠমং.