৫. অরক্খেয্যসুত্তং

৫৮. ‘‘চত্তারিমানি, ভিক্খৰে, তথাগতস্স অরক্খেয্যানি, তীহি চ অনুপৰজ্জো. কতমানি চত্তারি তথাগতস্স অরক্খেয্যানি? পরিসুদ্ধকাযসমাচারো, ভিক্খৰে, তথাগতো; নত্থি তথাগতস্স কাযদুচ্চরিতং যং তথাগতো রক্খেয্য – ‘মা মে ইদং পরো অঞ্ঞাসী’তি. পরিসুদ্ধৰচীসমাচারো, ভিক্খৰে, তথাগতো; নত্থি তথাগতস্স ৰচীদুচ্চরিতং যং তথাগতো রক্খেয্য – ‘মা মে ইদং পরো অঞ্ঞাসী’তি. পরিসুদ্ধমনোসমাচারো, ভিক্খৰে, তথাগতো; নত্থি তথাগতস্স মনোদুচ্চরিতং যং তথাগতো রক্খেয্য – ‘মা মে ইদং পরো অঞ্ঞাসী’তি. পরিসুদ্ধাজীৰো, ভিক্খৰে, তথাগতো; নত্থি তথাগতস্স মিচ্ছাআজীৰো যং তথাগতো রক্খেয্য – ‘মা মে ইদং পরো অঞ্ঞাসী’তি. ইমানি চত্তারি তথাগতস্স অরক্খেয্যানি.

‘‘কতমেহি তীহি অনুপৰজ্জো? স্ৰাক্খাতধম্মো, ভিক্খৰে, তথাগতো. তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতি – ‘ইতিপি ত্ৰং ন স্ৰাক্খাতধম্মো’তি. নিমিত্তমেতং, ভিক্খৰে, ন সমনুপস্সামি. এতমহং [এতংপহং (সী. স্যা.)], ভিক্খৰে, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘সুপঞ্ঞত্তা খো পন মে, ভিক্খৰে, সাৰকানং নিব্বানগামিনী পটিপদা. যথাপটিপন্না মম সাৰকা আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি. তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতি – ‘ইতিপি তে ন সুপঞ্ঞত্তা সাৰকানং নিব্বানগামিনী পটিপদা. যথাপটিপন্না তৰ সাৰকা আসৰানং খযা…পে… সচ্ছিকত্ৰা উপসম্পজ্জ ৰিহরন্তী’তি. নিমিত্তমেতং, ভিক্খৰে, ন সমনুপস্সামি. এতমহং, ভিক্খৰে, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘অনেকসতা খো পন মে, ভিক্খৰে, সাৰকপরিসা আসৰানং খযা…পে… সচ্ছিকত্ৰা উপসম্পজ্জ ৰিহরন্তি. তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতি – ‘ইতিপি তে ন অনেকসতা সাৰকপরিসা আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’তি. নিমিত্তমেতং, ভিক্খৰে, ন সমনুপস্সামি. এতমহং, ভিক্খৰে, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি. ইমেহি তীহি অনুপৰজ্জো.

‘‘ইমানি খো, ভিক্খৰে, চত্তারি তথাগতস্স অরক্খেয্যানি, ইমেহি চ তীহি অনুপৰজ্জো’’তি. পঞ্চমং.