৭. পঠমপটিসম্ভিদাসুত্তং

৩৮. ‘‘সত্তহি, ভিক্খৰে, ধম্মেহি সমন্নাগতো ভিক্খু নচিরস্সেৰ চতস্সো পটিসম্ভিদা সযং অভিঞ্ঞা সচ্ছিকত্ৰা উপসম্পজ্জ ৰিহরেয্য. কতমেহি সত্তহি? ইধ, ভিক্খৰে, ভিক্খু ‘ইদং মে চেতসো লীনত্ত’ন্তি যথাভূতং পজানাতি; অজ্ঝত্তং সংখিত্তং ৰা চিত্তং ‘অজ্ঝত্তং মে সংখিত্তং চিত্ত’ন্তি যথাভূতং পজানাতি; বহিদ্ধা ৰিক্খিত্তং ৰা চিত্তং ‘বহিদ্ধা মে ৰিক্খিত্তং চিত্ত’ন্তি যথাভূতং পজানাতি; তস্স ৰিদিতা ৰেদনা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি; ৰিদিতা সঞ্ঞা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি; ৰিদিতা ৰিতক্কা উপ্পজ্জন্তি, ৰিদিতা উপট্ঠহন্তি, ৰিদিতা অব্ভত্থং গচ্ছন্তি; সপ্পাযাসপ্পাযেসু খো পনস্স ধম্মেসু হীনপ্পণীতেসু কণ্হসুক্কসপ্পতিভাগেসু নিমিত্তং সুগ্গহিতং হোতি সুমনসিকতং সূপধারিতং সুপ্পটিৰিদ্ধং পঞ্ঞায. ইমেহি খো, ভিক্খৰে, সত্তহি ধম্মেহি সমন্নাগতো ভিক্খু নচিরস্সেৰ চতস্সো পটিসম্ভিদা সযং অভিঞ্ঞা সচ্ছিকত্ৰা উপসম্পজ্জ ৰিহরেয্যা’’তি. সত্তমং.