৪. দুতিযসোৰচস্সতাসুত্তং

৩৫. ‘‘ইমং, ভিক্খৰে, রত্তিং অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা…পে… ‘সত্তিমে, ভন্তে, ধম্মা ভিক্খুনো অপরিহানায সংৰত্তন্তি. কতমে সত্ত? সত্থুগারৰতা, ধম্মগারৰতা, সঙ্ঘগারৰতা, সিক্খাগারৰতা, সমাধিগারৰতা, সোৰচস্সতা, কল্যাণমিত্ততা. ইমে খো, ভন্তে, সত্ত ধম্মা ভিক্খুনো অপরিহানায সংৰত্তন্তী’তি. ইদমৰোচ, ভিক্খৰে, সা দেৰতা. ইদং ৰত্ৰা মং অভিৰাদেত্ৰা পদক্খিণং কত্ৰা তত্থেৰন্তরধাযী’’তি.

এৰং ৰুত্তে আযস্মা সারিপুত্তো ভগৰন্তং এতদৰোচ – ‘‘ইমস্স খো অহং, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামি. ইধ, ভন্তে, ভিক্খু অত্তনা চ সত্থুগারৰো হোতি, সত্থুগারৰতায চ ৰণ্ণৰাদী. যে চঞ্ঞে ভিক্খূ ন সত্থুগারৰা তে চ সত্থুগারৰতায সমাদপেতি. যে চঞ্ঞে ভিক্খূ সত্থুগারৰা তেসঞ্চ ৰণ্ণং ভণতি ভূতং তচ্ছং কালেন. অত্তনা চ ধম্মগারৰো হোতি…পে… সঙ্ঘগারৰো হোতি… সিক্খাগারৰো হোতি… সমাধিগারৰো হোতি… সুৰচো হোতি… কল্যাণমিত্তো হোতি, কল্যাণমিত্ততায চ ৰণ্ণৰাদী. যে চঞ্ঞে ভিক্খূ ন কল্যাণমিত্তা তে চ কল্যাণমিত্ততায সমাদপেতি. যে চঞ্ঞে ভিক্খূ কল্যাণমিত্তা তেসঞ্চ ৰণ্ণং ভণতি ভূতং তচ্ছং কালেনাতি. ইমস্স খো অহং, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামী’’তি.

‘‘সাধু সাধু, সারিপুত্ত! সাধু খো ত্ৰং, সারিপুত্ত, ইমস্স মযা সংখিত্তেন ভাসিতস্স এৰং ৰিত্থারেন অত্থং আজানাসি. ইধ, সারিপুত্ত, ভিক্খু অত্তনা চ সত্থুগারৰো হোতি, সত্থুগারৰতায চ ৰণ্ণৰাদী. যে চঞ্ঞে ভিক্খূ ন সত্থুগারৰা তে চ সত্থুগারৰতায সমাদপেতি. যে চঞ্ঞে ভিক্খূ সত্থুগারৰা তেসঞ্চ ৰণ্ণং ভণতি ভূতং তচ্ছং কালেন. অত্তনা চ ধম্মগারৰো হোতি…পে… সঙ্ঘগারৰো হোতি… সিক্খাগারৰো হোতি… সমাধিগারৰো হোতি… সুৰচো হোতি… কল্যাণমিত্তো হোতি, কল্যাণমিত্ততায চ ৰণ্ণৰাদী. যে চঞ্ঞে ভিক্খূ ন কল্যাণমিত্তা তে চ কল্যাণমিত্ততায সমাদপেতি. যে চঞ্ঞে ভিক্খূ কল্যাণমিত্তা তেসঞ্চ ৰণ্ণং ভণতি ভূতং তচ্ছং কালেনাতি. ইমস্স খো, সারিপুত্ত, মযা সংখিত্তেন ভাসিতস্স এৰং ৰিত্থারেন অত্থো দট্ঠব্বো’’তি. চতুত্থং.