৩. ৰজ্জিসত্তকৰগ্গো

১. সারন্দদসুত্তং

২১. এৰং মে সুতং – একং সমযং ভগৰা ৰেসালিযং ৰিহরতি সারন্দদে চেতিযে. অথ খো সম্বহুলা লিচ্ছৰী যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্নে খো তে লিচ্ছৰী ভগৰা এতদৰোচ – ‘‘সত্ত ৰো, লিচ্ছৰী, অপরিহানিযে [অপরিহানীযে (ক.)] ধম্মে দেসেস্সামি. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে লিচ্ছৰী ভগৰতো পচ্চস্সোসুং. ভগৰা এতদৰোচ –

‘‘কতমে চ, লিচ্ছৰী, সত্ত অপরিহানিযা ধম্মা? যাৰকীৰঞ্চ, লিচ্ছৰী, ৰজ্জী অভিণ্হং সন্নিপাতা ভৰিস্সন্তি সন্নিপাতবহুলা; ৰুদ্ধিযেৰ, লিচ্ছৰী, ৰজ্জীনং পাটিকঙ্খা, নো পরিহানি.

‘‘যাৰকীৰঞ্চ, লিচ্ছৰী, ৰজ্জী সমগ্গা সন্নিপতিস্সন্তি, সমগ্গা ৰুট্ঠহিস্সন্তি, সমগ্গা ৰজ্জিকরণীযানি করিস্সন্তি; ৰুদ্ধিযেৰ, লিচ্ছৰী, ৰজ্জীনং পাটিকঙ্খা, নো পরিহানি.

‘‘যাৰকীৰঞ্চ, লিচ্ছৰী, ৰজ্জী অপঞ্ঞত্তং ন পঞ্ঞাপেস্সন্তি, পঞ্ঞত্তং ন সমুচ্ছিন্দিস্সন্তি, যথাপঞ্ঞত্তে পোরাণে ৰজ্জিধম্মে সমাদায ৰত্তিস্সন্তি; ৰুদ্ধিযেৰ, লিচ্ছৰী, ৰজ্জীনং পাটিকঙ্খা, নো পরিহানি.

‘‘যাৰকীৰঞ্চ, লিচ্ছৰী, ৰজ্জী যে তে ৰজ্জীনং ৰজ্জিমহল্লকা তে সক্করিস্সন্তি গরুং করিস্সন্তি মানেস্সন্তি পূজেস্সন্তি, তেসঞ্চ সোতব্বং মঞ্ঞিস্সন্তি; ৰুদ্ধিযেৰ, লিচ্ছৰী, ৰজ্জীনং পাটিকঙ্খা, নো পরিহানি.

‘‘যাৰকীৰঞ্চ, লিচ্ছৰী, ৰজ্জী যা তা কুলিত্থিযো কুলকুমারিযো তা ন ওকস্স পসয্হ ৰাসেস্সন্তি; ৰুদ্ধিযেৰ, লিচ্ছৰী, ৰজ্জীনং পাটিকঙ্খা, নো পরিহানি.

‘‘যাৰকীৰঞ্চ, লিচ্ছৰী, ৰজ্জী যানি তানি ৰজ্জীনং ৰজ্জিচেতিযানি অব্ভন্তরানি চেৰ বাহিরানি চ তানি সক্করিস্সন্তি গরুং করিস্সন্তি মানেস্সন্তি পূজেস্সন্তি, তেসঞ্চ দিন্নপুব্বং কতপুব্বং ধম্মিকং বলিং নো পরিহাপেস্সন্তি; ৰুদ্ধিযেৰ, লিচ্ছৰী, ৰজ্জীনং পাটিকঙ্খা, নো পরিহানি.

‘‘যাৰকীৰঞ্চ, লিচ্ছৰী, ৰজ্জীনং অরহন্তেসু ধম্মিকা রক্খাৰরণগুত্তি সুসংৰিহিতা ভৰিস্সতি – ‘কিন্তি অনাগতা চ অরহন্তো ৰিজিতং আগচ্ছেয্যুং, আগতা চ অরহন্তো ৰিজিতে ফাসুং ৰিহরেয্যু’ন্তি; ৰুদ্ধিযেৰ, লিচ্ছৰী, ৰজ্জীনং পাটিকঙ্খা, নো পরিহানি.

‘‘যাৰকীৰঞ্চ, লিচ্ছৰী, ইমে সত্ত অপরিহানিযা ধম্মা ৰজ্জীসু ঠস্সন্তি [ৰত্তিস্সন্তি (ক.)], ইমেসু চ সত্তসু অপরিহানিযেসু ধম্মেসু ৰজ্জী সন্দিস্সিস্সন্তি [সন্দিস্সন্তি (সী. পী. ক.)]; ৰুদ্ধিযেৰ, লিচ্ছৰী, ৰজ্জীনং পাটিকঙ্খা, নো পরিহানী’’তি. পঠমং.

২. ৰস্সকারসুত্তং

২২. এৰং মে সুতং – একং সমযং ভগৰা রাজগহে ৰিহরতি গিজ্ঝকূটে পব্বতে. তেন খো পন সমযেন রাজা মাগধো অজাতসত্তু ৰেদেহিপুত্তো ৰজ্জী অভিযাতুকামো হোতি. সো এৰমাহ – ‘‘অহং হিমে ৰজ্জী এৰংমহিদ্ধিকে এৰংমহানুভাৰে উচ্ছেচ্ছামি [উচ্ছেজ্জিস্সামি (স্যা.), উচ্ছিজ্জিস্সামি (ক.)], ৰজ্জী ৰিনাসেস্সামি, ৰজ্জী অনযব্যসনং আপাদেস্সামী’’তি [আপাদেস্সামি ৰজ্জীতি (ক.) দী. নি. ২.১৩১].

অথ খো রাজা মাগধো অজাতসত্তু ৰেদেহিপুত্তো ৰস্সকারং ব্রাহ্মণং মাগধমহামত্তং আমন্তেসি – ‘‘এহি ত্ৰং, ব্রাহ্মণ, যেন ভগৰা তেনুপসঙ্কম; উপসঙ্কমিত্ৰা মম ৰচনেন ভগৰতো পাদে সিরসা ৰন্দাহি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছ – ‘রাজা, ভন্তে, মাগধো অজাতসত্তু ৰেদেহিপুত্তো ভগৰতো পাদে সিরসা ৰন্দতি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’তি. এৰঞ্চ ৰদেহি – ‘রাজা, ভন্তে, মাগধো অজাতসত্তু ৰেদেহিপুত্তো ৰজ্জী অভিযাতুকামো. সো এৰমাহ – ‘অহং হিমে ৰজ্জী এৰংমহিদ্ধিকে এৰংমহানুভাৰে উচ্ছেচ্ছামি, ৰজ্জী ৰিনাসেস্সামি, ৰজ্জী অনযব্যসনং আপাদেস্সামী’তি. যথা তে ভগৰা ব্যাকরোতি, তং সাধুকং উগ্গহেত্ৰা মম আরোচেয্যাসি. ন হি তথাগতা ৰিতথং ভণন্তী’’তি.

‘‘এৰং, ভো’’তি খো ৰস্সকারো ব্রাহ্মণো মাগধমহামত্তো রঞ্ঞো মাগধস্স অজাতসত্তুস্স ৰেদেহিপুত্তস্স পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ৰস্সকারো ব্রাহ্মণো মাগধমহামত্তো ভগৰন্তং এতদৰোচ – ‘‘রাজা, ভো গোতম, মাগধো অজাতসত্তু ৰেদেহিপুত্তো ভোতো গোতমস্স পাদে সিরসা ৰন্দতি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতি. রাজা [এৰঞ্চ ৰদেতি রাজা (সী. ক.)], ভো গোতম, মাগধো অজাতসত্তু ৰেদেহিপুত্তো ৰজ্জী অভিযাতুকামো. সো এৰমাহ – ‘অহং হিমে ৰজ্জী এৰংমহিদ্ধিকে এৰংমহানুভাৰে উচ্ছেচ্ছামি, ৰজ্জী ৰিনাসেস্সামি, ৰজ্জী অনযব্যসনং আপাদেস্সামী’’’তি.

তেন খো পন সমযেন আযস্মা আনন্দো ভগৰতো পিট্ঠিতো ঠিতো হোতি ভগৰন্তং বীজযমানো [ৰীজমানো (সী. স্যা.)]. অথ খো ভগৰা আযস্মন্তং আনন্দং আমন্তেসি – ‘‘কিন্তি তে, আনন্দ, সুতং – ‘ৰজ্জী অভিণ্হং সন্নিপাতা সন্নিপাতবহুলা’’’তি? ‘‘সুতং মেতং, ভন্তে – ‘ৰজ্জী অভিণ্হং সন্নিপাতা সন্নিপাতবহুলা’’’তি. ‘‘যাৰকীৰঞ্চ, আনন্দ, ৰজ্জী অভিণ্হং সন্নিপাতা ভৰিস্সন্তি সন্নিপাতবহুলা; ৰুদ্ধিযেৰ, আনন্দ, ৰজ্জীনং পাটিকঙ্খা, নো পরিহানি.

‘‘কিন্তি তে, আনন্দ, সুতং – ‘ৰজ্জী সমগ্গা সন্নিপতন্তি, সমগ্গা ৰুট্ঠহন্তি, সমগ্গা ৰজ্জিকরণীযানি করোন্তী’’’তি? ‘‘সুতং মেতং, ভন্তে – ‘ৰজ্জী সমগ্গা সন্নিপতন্তি, সমগ্গা ৰুট্ঠহন্তি, সমগ্গা ৰজ্জিকরণীযানি করোন্তী’’’তি. ‘‘যাৰকীৰঞ্চ, আনন্দ, ৰজ্জী সমগ্গা সন্নিপতিস্সন্তি, সমগ্গা ৰুট্ঠহিস্সন্তি, সমগ্গা ৰজ্জিকরণীযানি করিস্সন্তি; ৰুদ্ধিযেৰ, আনন্দ, ৰজ্জীনং পাটিকঙ্খা, নো পরিহানি.

‘‘কিন্তি তে, আনন্দ, সুতং – ‘ৰজ্জী অপঞ্ঞত্তং ন পঞ্ঞাপেন্তি, পঞ্ঞত্তং ন সমুচ্ছিন্দন্তি, যথাপঞ্ঞত্তে পোরাণে ৰজ্জিধম্মে সমাদায ৰত্তন্তী’’’তি? ‘‘সুতং মেতং, ভন্তে – ‘ৰজ্জী অপঞ্ঞত্তং ন পঞ্ঞাপেন্তি, পঞ্ঞত্তং ন সমুচ্ছিন্দন্তি, যথাপঞ্ঞত্তে পোরাণে ৰজ্জিধম্মে সমাদায ৰত্তন্তী’’’তি. ‘‘যাৰকীৰঞ্চ, আনন্দ, ৰজ্জী অপঞ্ঞত্তং ন পঞ্ঞাপেস্সন্তি, পঞ্ঞত্তং ন সমুচ্ছিন্দিস্সন্তি, যথাপঞ্ঞত্তে পোরাণে ৰজ্জিধম্মে সমাদায ৰত্তিস্সন্তি; ৰুদ্ধিযেৰ, আনন্দ, ৰজ্জীনং পাটিকঙ্খা, নো পরিহানি.

‘‘কিন্তি তে, আনন্দ, সুতং – ‘ৰজ্জী যে তে ৰজ্জীনং ৰজ্জিমহল্লকা তে সক্করোন্তি গরুং করোন্তি মানেন্তি পূজেন্তি, তেসঞ্চ সোতব্বং মঞ্ঞন্তী’’’তি? ‘‘সুতং মেতং, ভন্তে – ‘ৰজ্জী যে তে ৰজ্জীনং ৰজ্জিমহল্লকা তে সক্করোন্তি গরুং করোন্তি মানেন্তি পূজেন্তি, তেসঞ্চ সোতব্বং মঞ্ঞন্তী’’’তি. ‘‘যাৰকীৰঞ্চ, আনন্দ, ৰজ্জী যে তে ৰজ্জীনং ৰজ্জিমহল্লকা তে সক্করিস্সন্তি গরুং করিস্সন্তি মানেস্সন্তি পূজেস্সন্তি, তেসঞ্চ সোতব্বং মঞ্ঞিস্সন্তি; ৰুদ্ধিযেৰ, আনন্দ, ৰজ্জীনং পাটিকঙ্খা, নো পরিহানি.

‘‘কিন্তি তে, আনন্দ, সুতং – ‘ৰজ্জী যা তা কুলিত্থিযো কুলকুমারিযো তা ন ওকস্স পসয্হ ৰাসেন্তী’’’তি? ‘‘সুতং মেতং, ভন্তে – ‘ৰজ্জী যা তা কুলিত্থিযো কুলকুমারিযো তা ন ওকস্স পসয্হ ৰাসেন্তী’’’তি. ‘‘যাৰকীৰঞ্চ, আনন্দ, ৰজ্জী যা তা কুলিত্থিযো কুলকুমারিযো তা ন ওকস্স পসয্হ ৰাসেস্সন্তি; ৰুদ্ধিযেৰ, আনন্দ, ৰজ্জীনং পাটিকঙ্খা, নো পরিহানি.

‘‘কিন্তি তে, আনন্দ, সুতং – ‘ৰজ্জী যানি তানি ৰজ্জীনং ৰজ্জিচেতিযানি অব্ভন্তরানি চেৰ বাহিরানি চ তানি সক্করোন্তি গরুং করোন্তি মানেন্তি পূজেন্তি, তেসঞ্চ দিন্নপুব্বং কতপুব্বং ধম্মিকং বলিং নো পরিহাপেন্তী’’’তি? ‘‘সুতং মেতং, ভন্তে – ‘ৰজ্জী যানি তানি ৰজ্জীনং ৰজ্জিচেতিযানি অব্ভন্তরানি চেৰ বাহিরানি চ তানি সক্করোন্তি গরুং করোন্তি মানেন্তি পূজেন্তি, তেসঞ্চ দিন্নপুব্বং কতপুব্বং ধম্মিকং বলিং নো পরিহাপেন্তী’’’তি. ‘‘যাৰকীৰঞ্চ, আনন্দ, ৰজ্জী যানি তানি ৰজ্জীনং ৰজ্জিচেতিযানি অব্ভন্তরানি চেৰ বাহিরানি চ তানি সক্করিস্সন্তি গরুং করিস্সন্তি মানেস্সন্তি পূজেস্সন্তি, তেসঞ্চ দিন্নপুব্বং কতপুব্বং ধম্মিকং বলিং নো পরিহাপেস্সন্তি; ৰুদ্ধিযেৰ, আনন্দ, ৰজ্জীনং পাটিকঙ্খা, নো পরিহানি.

‘‘কিন্তি তে, আনন্দ, সুতং – ‘ৰজ্জীনং অরহন্তেসু ধম্মিকা রক্খাৰরণগুত্তি সুসংৰিহিতা – কিন্তি অনাগতা চ অরহন্তো ৰিজিতং আগচ্ছেয্যুং, আগতা চ অরহন্তো ৰিজিতে ফাসুং ৰিহরেয্যু’’’ন্তি? ‘‘সুতং মেতং, ভন্তে – ‘ৰজ্জীনং অরহন্তেসু ধম্মিকা রক্খাৰরণগুত্তি সুসংৰিহিতা ভৰিস্সতি – কিন্তি অনাগতা চ অরহন্তো ৰিজিতং আগচ্ছেয্যুং, আগতা চ অরহন্তো ৰিজিতে ফাসুং ৰিহরেয্যু’’’ন্তি. ‘‘যাৰকীৰঞ্চ, আনন্দ, ৰজ্জীনং অরহন্তেসু ধম্মিকা রক্খাৰরণগুত্তি সুসংৰিহিতা ভৰিস্সতি – ‘কিন্তি অনাগতা চ অরহন্তো ৰিজিতং আগচ্ছেয্যুং, আগতা চ অরহন্তো ৰিজিতে ফাসুং ৰিহরেয্যু’ন্তি; ৰুদ্ধিযেৰ, আনন্দ, ৰজ্জীনং পাটিকঙ্খা, নো পরিহানী’’তি.

অথ খো ভগৰা ৰস্সকারং ব্রাহ্মণং মাগধমহামত্তং আমন্তেসি – ‘‘একমিদাহং, ব্রাহ্মণ, সমযং ৰেসালিযং ৰিহরামি সারন্দদে চেতিযে. তত্রাহং, ব্রাহ্মণ, ৰজ্জীনং ইমে সত্ত অপরিহানিযে ধম্মে দেসেসিং. যাৰকীৰঞ্চ, ব্রাহ্মণ, ইমে সত্ত অপরিহানিযা ধম্মা ৰজ্জীসু ঠস্সন্তি, ইমেসু চ সত্তসু অপরিহানিযেসু ধম্মেসু ৰজ্জী সন্দিস্সিস্সন্তি; ৰুদ্ধিযেৰ, ব্রাহ্মণ, ৰজ্জীনং পাটিকঙ্খা, নো পরিহানী’’তি.

‘‘একমেকেনপি [একমেকেনপি তেন খো (ক.) দী. নি. ২.১৩৫] ভো, গোতম, অপরিহানিযেন ধম্মেন সমন্নাগতানং ৰজ্জীনং ৰুদ্ধিযেৰ পাটিকঙ্খা, নো পরিহানি; কো পন ৰাদো সত্তহি অপরিহানিযেহি ধম্মেহি! অকরণীযা চ, ভো গোতম, ৰজ্জী রঞ্ঞা মাগধেন অজাতসত্তুনা ৰেদেহিপুত্তেন যদিদং যুদ্ধস্স, অঞ্ঞত্র উপলাপনায [উপলাপনা (ক. সী. ক.)], অঞ্ঞত্র মিথুভেদা. হন্দ চ দানি মযং, ভো গোতম, গচ্ছাম, বহুকিচ্চা মযং বহুকরণীযা’’তি. ‘‘যস্সদানি ত্ৰং, ব্রাহ্মণ, কালং মঞ্ঞসী’’তি. অথ খো ৰস্সকারো ব্রাহ্মণো মাগধমহামত্তো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা পক্কামীতি. দুতিযং.

৩. পঠমসত্তকসুত্তং

২৩. এৰং মে সুতং – একং সমযং ভগৰা রাজগহে ৰিহরতি গিজ্ঝকূটে পব্বতে. তত্র খো ভগৰা ভিক্খূ আমন্তেসি – ‘‘সত্ত ৰো, ভিক্খৰে, অপরিহানিযে ধম্মে দেসেস্সামি. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমে চ, ভিক্খৰে, সত্ত অপরিহানিযা ধম্মা? যাৰকীৰঞ্চ, ভিক্খৰে, ভিক্খূ অভিণ্হং সন্নিপাতা ভৰিস্সন্তি সন্নিপাতবহুলা; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ সমগ্গা সন্নিপতিস্সন্তি, সমগ্গা ৰুট্ঠহিস্সন্তি, সমগ্গা সঙ্ঘকরণীযানি করিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ অপঞ্ঞত্তং ন পঞ্ঞাপেস্সন্তি, পঞ্ঞত্তং ন সমুচ্ছিন্দিস্সন্তি, যথাপঞ্ঞত্তেসু সিক্খাপদেসু সমাদায ৰত্তিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ যে তে ভিক্খূ থেরা রত্তঞ্ঞূ চিরপব্বজিতা সঙ্ঘপিতরো সঙ্ঘপরিণাযকা তে সক্করিস্সন্তি গরুং করিস্সন্তি মানেস্সন্তি পূজেস্সন্তি, তেসঞ্চ সোতব্বং মঞ্ঞিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ উপ্পন্নায তণ্হায পোনোভৰিকায ন ৰসং গচ্ছিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ আরঞ্ঞকেসু সেনাসনেসু সাপেক্খা ভৰিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ পচ্চত্তঞ্ঞেৰ সতিং উপট্ঠাপেস্সন্তি – ‘কিন্তি অনাগতা চ পেসলা সব্রহ্মচারী আগচ্ছেয্যুং, আগতা চ পেসলা সব্রহ্মচারী ফাসুং ৰিহরেয্যু’ন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ইমে সত্ত অপরিহানিযা ধম্মা ভিক্খূসু ঠস্সন্তি, ইমেসু চ সত্তসু অপরিহানিযেসু ধম্মেসু ভিক্খূ সন্দিস্সিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানী’’তি. ততিযং.

৪. দুতিযসত্তকসুত্তং

২৪. [দী. নি. ২.১৩৮] ‘‘সত্ত ৰো, ভিক্খৰে, অপরিহানিযে ধম্মে দেসেস্সামি. তং সুণাথ, সাধুকং মনসি করোথ…পে… কতমে চ, ভিক্খৰে, সত্ত অপরিহানিযা ধম্মা?

যাৰকীৰঞ্চ, ভিক্খৰে, ভিক্খূ ন কম্মারামা ভৰিস্সন্তি, ন কম্মরতা, ন কম্মারামতং অনুযুত্তা; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ ন ভস্সারামা ভৰিস্সন্তি…পে… ন নিদ্দারামা ভৰিস্সন্তি… ন সঙ্গণিকারামা ভৰিস্সন্তি… ন পাপিচ্ছা ভৰিস্সন্তি ন পাপিকানং ইচ্ছানং ৰসং গতা… ন পাপমিত্তা ভৰিস্সন্তি ন পাপসহাযা ন পাপসম্পৰঙ্কা… ন ওরমত্তকেন ৰিসেসাধিগমেন অন্তরাৰোসানং আপজ্জিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

৫. ততিযসত্তকসুত্তং

২৫. ‘‘সত্ত ৰো, ভিক্খৰে, অপরিহানিযে ধম্মে দেসেস্সামি. তং সুণাথ, সাধুকং মনসি করোথ…পে… কতমে চ, ভিক্খৰে, সত্ত অপরিহানিযা ধম্মা? যাৰকীৰঞ্চ, ভিক্খৰে, ভিক্খূ সদ্ধা ভৰিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ হিরিমন্তো [হিরীমা (সী.), হিরিমনা (দী. নি. ২.১৩৮)] ভৰিস্সন্তি…পে… ওত্তপ্পিনো [ওত্তাপীনো (সী.)] ভৰিস্সন্তি… বহুস্সুতা ভৰিস্সন্তি… আরদ্ধৰীরিযা ভৰিস্সন্তি… সতিমন্তো ভৰিস্সন্তি… পঞ্ঞৰন্তো ভৰিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি. ‘‘যাৰকীৰঞ্চ, ভিক্খৰে, ইমে সত্ত অপরিহানিযা ধম্মা ভিক্খূসু ঠস্সন্তি, ইমেসু চ সত্তসু অপরিহানিযেসু ধম্মেসু ভিক্খূ সন্দিস্সিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানী’’তি. পঞ্চমং.

৬. বোজ্ঝঙ্গসুত্তং

২৬. ‘‘সত্ত ৰো, ভিক্খৰে, অপরিহানিযে ধম্মে দেসেস্সামি. তং সুণাথ, সাধুকং মনসি করোথ…পে… কতমে চ, ভিক্খৰে, সত্ত অপরিহানিযা ধম্মা? যাৰকীৰঞ্চ, ভিক্খৰে, ভিক্খূ সতিসম্বোজ্ঝঙ্গং ভাৰেস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ ধম্মৰিচযসম্বোজ্ঝঙ্গং ভাৰেস্সন্তি…পে… ৰীরিযসম্বোজ্ঝঙ্গং ভাৰেস্সন্তি… পীতিসম্বোজ্ঝঙ্গং ভাৰেস্সন্তি… পস্সদ্ধিসম্বোজ্ঝঙ্গং ভাৰেস্সন্তি… সমাধিসম্বোজ্ঝঙ্গং ভাৰেস্সন্তি… উপেক্খাসম্বোজ্ঝঙ্গং ভাৰেস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি. ‘‘যাৰকীৰঞ্চ, ভিক্খৰে, ইমে সত্ত অপরিহানিযা ধম্মা ভিক্খূসু ঠস্সন্তি, ইমেসু চ সত্তসু অপরিহানিযেসু ধম্মেসু ভিক্খূ সন্দিস্সিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানী’’তি. ছট্ঠং.

৭. সঞ্ঞাসুত্তং

২৭. ‘‘সত্ত ৰো, ভিক্খৰে, অপরিহানিযে ধম্মে দেসেস্সামি. তং সুণাথ, সাধুকং মনসি করোথ…পে…. কতমে চ, ভিক্খৰে, সত্ত অপরিহানিযা ধম্মা? যাৰকীৰঞ্চ, ভিক্খৰে, ভিক্খূ অনিচ্চসঞ্ঞং ভাৰেস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি.

‘‘যাৰকীৰঞ্চ, ভিক্খৰে, ভিক্খূ অনত্তসঞ্ঞং ভাৰেস্সন্তি…পে… অসুভসঞ্ঞং ভাৰেস্সন্তি… আদীনৰসঞ্ঞং ভাৰেস্সন্তি… পহানসঞ্ঞং ভাৰেস্সন্তি… ৰিরাগসঞ্ঞং ভাৰেস্সন্তি… নিরোধসঞ্ঞং ভাৰেস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানি. ‘‘যাৰকীৰঞ্চ, ভিক্খৰে, ইমে সত্ত অপরিহানিযা ধম্মা ভিক্খূসু ঠস্সন্তি, ইমেসু চ সত্তসু অপরিহানিযেসু ধম্মেসু, ভিক্খূ সন্দিস্সিস্সন্তি; ৰুদ্ধিযেৰ, ভিক্খৰে, ভিক্খূনং পাটিকঙ্খা, নো পরিহানী’’তি [দী. নি. ২.১৩৮]. সত্তমং.

৮. পঠমপরিহানিসুত্তং

২৮. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘সত্তিমে, ভিক্খৰে, ধম্মা সেখস্স ভিক্খুনো পরিহানায সংৰত্তন্তি. কতমে সত্ত? কম্মারামতা, ভস্সারামতা, নিদ্দারামতা, সঙ্গণিকারামতা, ইন্দ্রিযেসু অগুত্তদ্ৰারতা, ভোজনে অমত্তঞ্ঞুতা, সন্তি খো পন সঙ্ঘে সঙ্ঘকরণীযানি; তত্র সেখো ভিক্খু [তত্র ভিক্খু (সী. স্যা.)] ইতি পটিসঞ্চিক্খতি – ‘সন্তি খো পন সঙ্ঘে থেরা [খো সংঘত্থেরা (ক.)] রত্তঞ্ঞূ চিরপব্বজিতা ভারৰাহিনো, তে [ন তে (ক.)] তেন পঞ্ঞাযিস্সন্তী’তি অত্তনা তেসু যোগং [অত্তনা ৰোযোগং (সী. স্যা.)] আপজ্জতি. ইমে খো, ভিক্খৰে, সত্ত ধম্মা সেখস্স ভিক্খুনো পরিহানায সংৰত্তন্তি.

‘‘সত্তিমে, ভিক্খৰে, ধম্মা সেখস্স ভিক্খুনো অপরিহানায সংৰত্তন্তি. কতমে সত্ত? ন কম্মারামতা, ন ভস্সারামতা, ন নিদ্দারামতা, ন সঙ্গণিকারামতা, ইন্দ্রিযেসু গুত্তদ্ৰারতা, ভোজনে মত্তঞ্ঞুতা, সন্তি খো পন সঙ্ঘে সঙ্ঘকরণীযানি; তত্র সেখো ভিক্খু ইতি পটিসঞ্চিক্খতি – ‘সন্তি খো পন সঙ্ঘে থেরা রত্তঞ্ঞূ চিরপব্বজিতা ভারৰাহিনো, তে তেন পঞ্ঞাযিস্সন্তী’তি অত্তনা ন তেসু যোগং আপজ্জতি. ইমে খো, ভিক্খৰে, সত্ত ধম্মা সেখস্স ভিক্খুনো অপরিহানায সংৰত্তন্তী’’তি. অট্ঠমং.

৯. দুতিযপরিহানিসুত্তং

২৯. ‘‘সত্তিমে, ভিক্খৰে, ধম্মা উপাসকস্স পরিহানায সংৰত্তন্তি. কতমে সত্ত? ভিক্খুদস্সনং হাপেতি, সদ্ধম্মস্সৰনং পমজ্জতি, অধিসীলে ন সিক্খতি, অপ্পসাদবহুলো হোতি, ভিক্খূসু থেরেসু চেৰ নৰেসু চ মজ্ঝিমেসু চ উপারম্ভচিত্তো ধম্মং সুণাতি রন্ধগৰেসী, ইতো বহিদ্ধা দক্খিণেয্যং গৰেসতি, তত্থ চ পুব্বকারং করোতি. ইমে খো, ভিক্খৰে, সত্ত ধম্মা উপাসকস্স পরিহানায সংৰত্তন্তি.

‘‘সত্তিমে, ভিক্খৰে, ধম্মা উপাসকস্স অপরিহানায সংৰত্তন্তি. কতমে সত্ত? ভিক্খুদস্সনং ন হাপেতি, সদ্ধম্মস্সৰনং নপ্পমজ্জতি, অধিসীলে সিক্খতি, পসাদবহুলো হোতি, ভিক্খূসু থেরেসু চেৰ নৰেসু চ মজ্ঝিমেসু চ অনুপারম্ভচিত্তো ধম্মং সুণাতি ন রন্ধগৰেসী, ন ইতো বহিদ্ধা দক্খিণেয্যং গৰেসতি, ইধ চ পুব্বকারং করোতি. ইমে খো, ভিক্খৰে, সত্ত ধম্মা উপাসকস্স অপরিহানায সংৰত্তন্তী’’তি. ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘দস্সনং ভাৰিতত্তানং, যো হাপেতি উপাসকো;

সৰনঞ্চ অরিযধম্মানং, অধিসীলে ন সিক্খতি.

‘‘অপ্পসাদো চ ভিক্খূসু, ভিয্যো ভিয্যো পৰড্ঢতি;

উপারম্ভকচিত্তো চ, সদ্ধম্মং সোতুমিচ্ছতি.

‘‘ইতো চ বহিদ্ধা অঞ্ঞং, দক্খিণেয্যং গৰেসতি;

তত্থেৰ চ পুব্বকারং, যো করোতি উপাসকো.

‘‘এতে খো পরিহানিযে, সত্ত ধম্মে সুদেসিতে;

উপাসকো সেৰমানো, সদ্ধম্মা পরিহাযতি.

‘‘দস্সনং ভাৰিতত্তানং, যো ন হাপেতি উপাসকো;

সৰনঞ্চ অরিযধম্মানং, অধিসীলে চ সিক্খতি.

‘‘পসাদো চস্স ভিক্খূসু, ভিয্যো ভিয্যো পৰড্ঢতি;

অনুপারম্ভচিত্তো চ, সদ্ধম্মং সোতুমিচ্ছতি.

‘‘ন ইতো বহিদ্ধা অঞ্ঞং, দক্খিণেয্যং গৰেসতি;

ইধেৰ চ পুব্বকারং, যো করোতি উপাসকো.

‘‘এতে খো অপরিহানিযে, সত্ত ধম্মে সুদেসিতে;

উপাসকো সেৰমানো, সদ্ধম্মা ন পরিহাযতী’’তি. নৰমং;

১০. ৰিপত্তিসুত্তং

৩০. সত্তিমা, ভিক্খৰে, উপাসকস্স ৰিপত্তিযো…পে… সত্তিমা, ভিক্খৰে, উপাসকস্স সম্পদা…পে…. দসমং.

১১. পরাভৰসুত্তং

৩১. ‘‘সত্তিমে, ভিক্খৰে, উপাসকস্স পরাভৰা…পে… সত্তিমে, ভিক্খৰে, উপাসকস্স সম্ভৰা. কতমে সত্ত? ভিক্খুদস্সনং ন হাপেতি, সদ্ধম্মস্সৰনং নপ্পমজ্জতি, অধিসীলে সিক্খতি, পসাদবহুলো হোতি, ভিক্খূসু থেরেসু চেৰ নৰেসু চ মজ্ঝিমেসু চ অনুপারম্ভচিত্তো ধম্মং সুণাতি ন রন্ধগৰেসী, ন ইতো বহিদ্ধা দক্খিণেয্যং গৰেসতি, ইধ চ পুব্বকারং করোতি. ইমে খো, ভিক্খৰে, সত্ত উপাসকস্স সম্ভৰাতি.