৩. ছল়ভিজাতিসুত্তং

৫৭. একং সমযং ভগৰা রাজগহে ৰিহরতি গিজ্ঝকূটে পব্বতে. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘পূরণেন, ভন্তে, কস্সপেন ছল়ভিজাতিযো পঞ্ঞত্তা – কণ্হাভিজাতি পঞ্ঞত্তা, নীলাভিজাতি পঞ্ঞত্তা, লোহিতাভিজাতি পঞ্ঞত্তা, হলিদ্দাভিজাতি পঞ্ঞত্তা, সুক্কাভিজাতি পঞ্ঞত্তা, পরমসুক্কাভিজাতি পঞ্ঞত্তা.

‘‘তত্রিদং, ভন্তে, পূরণেন কস্সপেন কণ্হাভিজাতি পঞ্ঞত্তা, ওরব্ভিকা সূকরিকা সাকুণিকা মাগৰিকা লুদ্দা মচ্ছঘাতকা চোরা চোরঘাতকা বন্ধনাগারিকা যে ৰা পনঞ্ঞেপি কেচি কুরূরকম্মন্তা.

‘‘তত্রিদং, ভন্তে, পূরণেন কস্সপেন নীলাভিজাতি পঞ্ঞত্তা, ভিক্খূ কণ্টকৰুত্তিকা যে ৰা পনঞ্ঞেপি কেচি কম্মৰাদা ক্রিযৰাদা.

‘‘তত্রিদং, ভন্তে, পূরণেন কস্সপেন লোহিতাভিজাতি পঞ্ঞত্তা, নিগণ্ঠা একসাটকা.

‘‘তত্রিদং, ভন্তে, পূরণেন কস্সপেন হলিদ্দাভিজাতি পঞ্ঞত্তা, গিহী ওদাতৰসনা অচেলকসাৰকা.

‘‘তত্রিদং, ভন্তে, পূরণেন কস্সপেন সুক্কাভিজাতি পঞ্ঞত্তা, আজীৰকা আজীৰকিনিযো.

‘‘তত্রিদং, ভন্তে, পূরণেন কস্সপেন পরমসুক্কাভিজাতি পঞ্ঞত্তা, নন্দো ৰচ্ছো কিসো সংকিচ্চো মক্খলি গোসালো. পূরণেন, ভন্তে, কস্সপেন ইমা ছল়ভিজাতিযো পঞ্ঞত্তা’’তি.

‘‘কিং পনানন্দ, পূরণস্স কস্সপস্স সব্বো লোকো এতদব্ভনুজানাতি ইমা ছল়ভিজাতিযো পঞ্ঞাপেতু’’ন্তি? ‘‘নো হেতং, ভন্তে’’. ‘‘সেয্যথাপি, আনন্দ, পুরিসো দলিদ্দো অস্সকো অনাল়্হিকো, তস্স অকামকস্স বিলং ওলগ্গেয্যুং – ‘ইদং তে, অম্ভো পুরিস, মংসঞ্চ খাদিতব্বং, মূলঞ্চ অনুপ্পদাতব্ব’ন্তি. এৰমেৰং খো, আনন্দ, পূরণেন কস্সপেন অপ্পটিঞ্ঞায এতেসং সমণব্রাহ্মণানং ইমা ছল়ভিজাতিযো পঞ্ঞত্তা, যথা তং বালেন অব্যত্তেন অখেত্তঞ্ঞুনা অকুসলেন.

‘‘অহং খো পনানন্দ, ছল়ভিজাতিযো পঞ্ঞাপেমি. তং সুণাহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো আযস্মা আনন্দো ভগৰতো পচ্চস্সোসি. ভগৰা এতদৰোচ – ‘‘কতমা চানন্দ, ছল়ভিজাতিযো? ইধানন্দ, একচ্চো কণ্হাভিজাতিযো সমানো কণ্হং ধম্মং অভিজাযতি. ইধ পনানন্দ, একচ্চো কণ্হাভিজাতিযো সমানো সুক্কং ধম্মং অভিজাযতি. ইধ পনানন্দ, একচ্চো কণ্হাভিজাতিযো সমানো অকণ্হং অসুক্কং নিব্বানং অভিজাযতি. ইধ পনানন্দ, একচ্চো সুক্কাভিজাতিযো সমানো কণ্হং ধম্মং অভিজাযতি. ইধ পনানন্দ, একচ্চো সুক্কাভিজাতিযো সমানো সুক্কং ধম্মং অভিজাযতি. ইধ পনানন্দ, একচ্চো সুক্কাভিজাতিযো সমানো অকণ্হং অসুক্কং নিব্বানং অভিজাযতি.

‘‘কথঞ্চানন্দ, কণ্হাভিজাতিযো সমানো কণ্হং ধম্মং অভিজাযতি? ইধানন্দ, একচ্চো নীচে কুলে পচ্চাজাতো হোতি – চণ্ডালকুলে ৰা নেসাদকুলে ৰা ৰেনকুলে [ৰেণকুলে (সব্বত্থ)] ৰা রথকারকুলে ৰা পুক্কুসকুলে ৰা, দলিদ্দে অপ্পন্নপানভোজনে কসিরৰুত্তিকে, যত্থ কসিরেন ঘাসচ্ছাদো লব্ভতি. সো চ হোতি দুব্বণ্ণো দুদ্দসিকো ওকোটিমকো বৰ্হাবাধো কাণো ৰা কুণী ৰা খঞ্জো ৰা পক্খহতো ৰা, ন লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. এৰং খো, আনন্দ, কণ্হাভিজাতিযো সমানো কণ্হং ধম্মং অভিজাযতি.

‘‘কথঞ্চানন্দ, কণ্হাভিজাতিযো সমানো সুক্কং ধম্মং অভিজাযতি? ইধানন্দ, একচ্চো নীচে কুলে পচ্চাজাতো হোতি – চণ্ডালকুলে ৰা…পে… সেয্যাৰসথপদীপেয্যস্স. সো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. সো কাযেন সুচরিতং চরিত্ৰা, ৰাচায সুচরিতং চরিত্ৰা, মনসা সুচরিতং চরিত্ৰা কাযস্স ভেদা পরং মরণা সুগতিং সগ্গং লোকং উপপজ্জতি. এৰং খো, আনন্দ, কণ্হাভিজাতিযো সমানো সুক্কং ধম্মং অভিজাযতি.

‘‘কথঞ্চানন্দ, কণ্হাভিজাতিযো সমানো অকণ্হং অসুক্কং নিব্বানং অভিজাযতি? ইধানন্দ, একচ্চো নীচে কুলে পচ্চাজাতো হোতি – চণ্ডালকুলে ৰা…পে… সো চ হোতি দুব্বণ্ণো দুদ্দসিকো ওকোটিমকো. সো কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজতি. সো এৰং পব্বজিতো সমানো পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে, চতূসু সতিপট্ঠানেসু সুপ্পতিট্ঠিতচিত্তো, সত্ত বোজ্ঝঙ্গে যথাভূতং ভাৰেত্ৰা অকণ্হং অসুক্কং নিব্বানং অভিজাযতি. এৰং খো, আনন্দ, কণ্হাভিজাতিযো সমানো অকণ্হং অসুক্কং নিব্বানং অভিজাযতি.

‘‘কথঞ্চানন্দ, সুক্কাভিজাতিযো সমানো কণ্হং ধম্মং অভিজাযতি? ইধানন্দ, একচ্চো উচ্চে কুলে পচ্চাজাতো হোতি – খত্তিযমহাসালকুলে ৰা ব্রাহ্মণমহাসালকুলে ৰা গহপতিমহাসালকুলে ৰা, অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে. সো চ হোতি অভিরূপো দস্সনীযো পাসাদিকো পরমায ৰণ্ণপোক্খরতায সমন্নাগতো, লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি. সো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. এৰং খো, আনন্দ, সুক্কাভিজাতিযো সমানো কণ্হং ধম্মং অভিজাযতি.

‘‘কথঞ্চানন্দ, সুক্কাভিজাতিযো সমানো সুক্কং ধম্মং অভিজাযতি? ইধানন্দ, একচ্চো উচ্চে কুলে পচ্চাজাতো হোতি – খত্তিযমহাসালকুলে ৰা…পে… সেয্যাৰসথপদীপেয্যস্স. সো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. সো কাযেন সুচরিতং চরিত্ৰা, ৰাচায সুচরিতং চরিত্ৰা, মনসা সুচরিতং চরিত্ৰা কাযস্স ভেদা পরং মরণা সুগতিং সগ্গং লোকং উপপজ্জতি. এৰং খো, আনন্দ, সুক্কাভিজাতিযো সমানো সুক্কং ধম্মং অভিজাযতি.

‘‘কথঞ্চানন্দ, সুক্কাভিজাতিযো সমানো অকণ্হং অসুক্কং নিব্বানং অভিজাযতি? ইধানন্দ, একচ্চো উচ্চে কুলে পচ্চাজাতো হোতি – খত্তিযমহাসালকুলে ৰা ব্রাহ্মণমহাসালকুলে ৰা গহপতিমহাসালকুলে ৰা, অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে. সো চ হোতি অভিরূপো দস্সনীযো পাসাদিকো পরমায ৰণ্ণপোক্খরতায সমন্নাগতো, লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজতি. সো এৰং পব্বজিতো সমানো পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে, চতূসু সতিপট্ঠানেসু সুপ্পতিট্ঠিতচিত্তো, সত্ত বোজ্ঝঙ্গে যথাভূতং ভাৰেত্ৰা অকণ্হং অসুক্কং নিব্বানং অভিজাযতি. এৰং খো, আনন্দ, সুক্কাভিজাতিযো সমানো অকণ্হং অসুক্কং নিব্বানং অভিজাযতি. ইমা খো, আনন্দ, ছল়ভিজাতিযো’’তি. ততিযং.