১০. খত্তিযসুত্তং

৫২. অথ খো জাণুস্সোণি [জাণুসোণি (ক.)] ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো জাণুস্সোণি ব্রাহ্মণো ভগৰন্তং এতদৰোচ –

‘‘খত্তিযা, ভো গোতম, কিংঅধিপ্পাযা, কিংউপৰিচারা, কিংঅধিট্ঠানা, কিংঅভিনিৰেসা, কিংপরিযোসানা’’তি? ‘‘খত্তিযা খো, ব্রাহ্মণ, ভোগাধিপ্পাযা পঞ্ঞূপৰিচারা বলাধিট্ঠানা পথৰীভিনিৰেসা ইস্সরিযপরিযোসানা’’তি.

‘‘ব্রাহ্মণা পন, ভো গোতম, কিংঅধিপ্পাযা, কিংউপৰিচারা, কিংঅধিট্ঠানা, কিংঅভিনিৰেসা, কিংপরিযোসানা’’তি? ‘‘ব্রাহ্মণা খো, ব্রাহ্মণ, ভোগাধিপ্পাযা পঞ্ঞূপৰিচারা মন্তাধিট্ঠানা যঞ্ঞাভিনিৰেসা ব্রহ্মলোকপরিযোসানা’’তি.

‘‘গহপতিকা পন, ভো গোতম, কিংঅধিপ্পাযা, কিংউপৰিচারা, কিংঅধিট্ঠানা, কিংঅভিনিৰেসা, কিংপরিযোসানা’’তি? ‘‘গহপতিকা খো, ব্রাহ্মণ, ভোগাধিপ্পাযা পঞ্ঞূপৰিচারা সিপ্পাধিট্ঠানা কম্মন্তাভিনিৰেসা নিট্ঠিতকম্মন্তপরিযোসানা’’তি.

‘‘ইত্থী পন, ভো গোতম, কিংঅধিপ্পাযা, কিংউপৰিচারা, কিংঅধিট্ঠানা, কিংঅভিনিৰেসা, কিংপরিযোসানা’’তি? ‘‘ইত্থী খো, ব্রাহ্মণ, পুরিসাধিপ্পাযা অলঙ্কারূপৰিচারা পুত্তাধিট্ঠানা অসপতীভিনিৰেসা ইস্সরিযপরিযোসানা’’তি.

‘‘চোরা পন, ভো গোতম, কিংঅধিপ্পাযা, কিংউপৰিচারা, কিংঅধিট্ঠানা, কিংঅভিনিৰেসা, কিংপরিযোসানা’’তি? ‘‘চোরা খো, ব্রাহ্মণ, আদানাধিপ্পাযা গহনূপৰিচারা সত্থাধিট্ঠানা অন্ধকারাভিনিৰেসা অদস্সনপরিযোসানা’’তি.

‘‘সমণা পন, ভো গোতম, কিংঅধিপ্পাযা, কিংউপৰিচারা, কিংঅধিট্ঠানা, কিংঅভিনিৰেসা, কিংপরিযোসানা’’তি? ‘‘সমণা খো, ব্রাহ্মণ, খন্তিসোরচ্চাধিপ্পাযা পঞ্ঞূপৰিচারা সীলাধিট্ঠানা আকিঞ্চঞ্ঞাভিনিৰেসা [অকিঞ্চনাভিনিৰেসা (স্যা. ক.)] নিব্বানপরিযোসানা’’তি.

‘‘অচ্ছরিযং, ভো গোতম, অব্ভুতং, ভো গোতম! খত্তিযানম্পি ভৰং গোতমো জানাতি অধিপ্পাযঞ্চ উপৰিচারঞ্চ অধিট্ঠানঞ্চ অভিনিৰেসঞ্চ পরিযোসানঞ্চ. ব্রাহ্মণানম্পি ভৰং গোতমো জানাতি…পে… গহপতীনম্পি ভৰং গোতমো জানাতি… ইত্থীনম্পি ভৰং গোতমো জানাতি… চোরানম্পি ভৰং গোতমো জানাতি … সমণানম্পি ভৰং গোতমো জানাতি অধিপ্পাযঞ্চ উপৰিচারঞ্চ অধিট্ঠানঞ্চ অভিনিৰেসঞ্চ পরিযোসানঞ্চ. অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. দসমং.