৩. নিস্সারণীযসুত্তং

১৩. ‘‘ছযিমা, ভিক্খৰে, নিস্সারণীযা ধাতুযো. কতমা ছ? ইধ, ভিক্খৰে, ভিক্খু এৰং ৰদেয্য – ‘মেত্তা হি খো মে চেতোৰিমুত্তি ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা; অথ চ পন মে ব্যাপাদো চিত্তং পরিযাদায তিট্ঠতী’তি. সো ‘মা হেৰ’ন্তিস্স ৰচনীযো – ‘মাযস্মা, এৰং অৰচ; মা ভগৰন্তং অব্ভাচিক্খি, ন হি সাধু ভগৰতো অব্ভক্খানং, ন হি ভগৰা এৰং ৰদেয্য. অট্ঠানমেতং, আৰুসো, অনৰকাসো যং মেত্তায চেতোৰিমুত্তিযা ভাৰিতায বহুলীকতায যানীকতায ৰত্থুকতায অনুট্ঠিতায পরিচিতায সুসমারদ্ধায; অথ চ পনস্স ব্যাপাদো চিত্তং পরিযাদায ঠস্সতি [ঠস্সতীতি (সব্বত্থ) দী. নি. ৩.৩২৬ পস্সিতব্বং], নেতং ঠানং ৰিজ্জতি. নিস্সরণঞ্হেতং, আৰুসো, ব্যাপাদস্স যদিদং মেত্তাচেতোৰিমুত্তী’’’তি [মেত্তাচেতোৰিমুত্তি (সব্বত্থ)].

‘‘ইধ পন, ভিক্খৰে, ভিক্খু এৰং ৰদেয্য – ‘করুণা হি খো মে চেতোৰিমুত্তি ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা; অথ চ পন মে ৰিহেসা চিত্তং পরিযাদায তিট্ঠতী’তি. সো ‘মা হেৰ’ন্তিস্স ৰচনীযো – ‘মাযস্মা, এৰং অৰচ; মা ভগৰন্তং অব্ভাচিক্খি, ন হি সাধু ভগৰতো অব্ভক্খানং, ন হি ভগৰা এৰং ৰদেয্য. অট্ঠানমেতং, আৰুসো, অনৰকাসো যং করুণায চেতোৰিমুত্তিযা ভাৰিতায বহুলীকতায যানীকতায ৰত্থুকতায অনুট্ঠিতায পরিচিতায সুসমারদ্ধায; অথ চ পনস্স ৰিহেসা চিত্তং পরিযাদায ঠস্সতি, নেতং ঠানং ৰিজ্জতি. নিস্সরণঞ্হেতং, আৰুসো, ৰিহেসায যদিদং করুণাচেতোৰিমুত্তী’’’তি.

‘‘ইধ পন, ভিক্খৰে, ভিক্খু এৰং ৰদেয্য – ‘মুদিতা হি খো মে চেতোৰিমুত্তি ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা; অথ চ পন মে অরতি চিত্তং পরিযাদায তিট্ঠতী’তি. সো ‘মা হেৰ’ন্তিস্স ৰচনীযো – ‘মাযস্মা, এৰং অৰচ; মা ভগৰন্তং অব্ভাচিক্খি, ন হি সাধু ভগৰতো অব্ভক্খানং, ন হি ভগৰা এৰং ৰদেয্য. অট্ঠানমেতং, আৰুসো, অনৰকাসো যং মুদিতায চেতোৰিমুত্তিযা ভাৰিতায বহুলীকতায যানীকতায ৰত্থুকতায অনুট্ঠিতায পরিচিতায সুসমারদ্ধায; অথ চ পনস্স অরতি চিত্তং পরিযাদায ঠস্সতি, নেতং ঠানং ৰিজ্জতি. নিস্সরণঞ্হেতং, আৰুসো, অরতিযা যদিদং মুদিতাচেতোৰিমুত্তী’’’তি.

‘‘ইধ পন, ভিক্খৰে, ভিক্খু এৰং ৰদেয্য – ‘উপেক্খা হি খো মে চেতোৰিমুত্তি ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা; অথ চ পন মে রাগো চিত্তং পরিযাদায তিট্ঠতী’তি. সো ‘মা হেৰ’ন্তিস্স ৰচনীযো – ‘মাযস্মা, এৰং অৰচ; মা ভগৰন্তং অব্ভাচিক্খি, ন হি সাধু ভগৰতো অব্ভক্খানং, ন হি ভগৰা এৰং ৰদেয্য. অট্ঠানমেতং, আৰুসো, অনৰকাসো যং উপেক্খায চেতোৰিমুত্তিযা ভাৰিতায বহুলীকতায যানীকতায ৰত্থুকতায অনুট্ঠিতায পরিচিতায সুসমারদ্ধায; অথ চ পনস্স রাগো চিত্তং পরিযাদায ঠস্সতি, নেতং ঠানং ৰিজ্জতি. নিস্সরণঞ্হেতং, আৰুসো, রাগস্স যদিদং উপেক্খাচেতোৰিমুত্তী’’’তি.

‘‘ইধ পন, ভিক্খৰে, ভিক্খু এৰং ৰদেয্য – ‘অনিমিত্তা হি খো মে চেতোৰিমুত্তি ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা; অথ চ পন মে নিমিত্তানুসারি ৰিঞ্ঞাণং হোতী’তি. সো ‘মা হেৰ’ন্তিস্স ৰচনীযো – ‘মাযস্মা, এৰং অৰচ; মা ভগৰন্তং অব্ভাচিক্খি, ন হি সাধু ভগৰতো অব্ভক্খানং, ন হি ভগৰা এৰং ৰদেয্য. অট্ঠানমেতং, আৰুসো, অনৰকাসো যং অনিমিত্তায চেতোৰিমুত্তিযা ভাৰিতায বহুলীকতায যানীকতায ৰত্থুকতায অনুট্ঠিতায পরিচিতায সুসমারদ্ধায; অথ চ পনস্স নিমিত্তানুসারি ৰিঞ্ঞাণং ভৰিস্সতি, নেতং ঠানং ৰিজ্জতি. নিস্সরণঞ্হেতং, আৰুসো, সব্বনিমিত্তানং যদিদং অনিমিত্তাচেতোৰিমুত্তী’’’তি.

‘‘ইধ পন ভিক্খৰে, ভিক্খু এৰং ৰদেয্য – ‘অস্মীতি খো মে ৰিগতং [ৰিগতে (স্যা.)], অযমহমস্মীতি চ [অযং চকারো দী. নি. ৩.৩২৬ নত্থি] ন সমনুপস্সামি; অথ চ পন মে ৰিচিকিচ্ছাকথংকথাসল্লং চিত্তং পরিযাদায তিট্ঠতী’তি. সো ‘মা হেৰ’ন্তিস্স ৰচনীযো – ‘মাযস্মা, এৰং অৰচ; মা ভগৰন্তং অব্ভাচিক্খি, ন হি সাধু ভগৰতো অব্ভক্খানং, ন হি ভগৰা এৰং ৰদেয্য. অট্ঠানমেতং, আৰুসো, অনৰকাসো যং অস্মীতি ৰিগতে অযমহমস্মীতি চ ন সমনুপস্সতো; অথ চ পনস্স ৰিচিকিচ্ছাকথংকথাসল্লং চিত্তং পরিযাদায ঠস্সতি, নেতং ঠানং ৰিজ্জতি. নিস্সরণঞ্হেতং, আৰুসো, ৰিচিকিচ্ছাকথংকথাসল্লস্স যদিদং অস্মীতি মানসমুগ্ঘাতো’তি. ইমা খো, ভিক্খৰে, ছ নিস্সারণীযা ধাতুযো’’তি. ততিযং.