১. অভিঞ্ঞাসুত্তং

২৫৪. ‘‘চত্তারোমে, ভিক্খৰে, ধম্মা. কতমে চত্তারো? অত্থি, ভিক্খৰে, ধম্মা অভিঞ্ঞা পরিঞ্ঞেয্যা; অত্থি, ভিক্খৰে, ধম্মা অভিঞ্ঞা পহাতব্বা; অত্থি, ভিক্খৰে, ধম্মা অভিঞ্ঞা ভাৰেতব্বা; অত্থি, ভিক্খৰে, ধম্মা অভিঞ্ঞা সচ্ছিকাতব্বা.

‘‘কতমে চ, ভিক্খৰে, ধম্মা অভিঞ্ঞা পরিঞ্ঞেয্যা? পঞ্চুপাদানক্খন্ধা [পঞ্চুপাদানক্খন্ধাতিস্স ৰচনীযং (ক.)] – ইমে ৰুচ্চন্তি, ভিক্খৰে, ধম্মা অভিঞ্ঞা পরিঞ্ঞেয্যা.

‘‘কতমে চ, ভিক্খৰে, ধম্মা অভিঞ্ঞা পহাতব্বা? অৰিজ্জা চ ভৰতণ্হা চ – ইমে ৰুচ্চন্তি, ভিক্খৰে, ধম্মা অভিঞ্ঞা পহাতব্বা.

‘‘কতমে চ, ভিক্খৰে, ধম্মা অভিঞ্ঞা ভাৰেতব্বা? সমথো চ ৰিপস্সনা চ – ইমে ৰুচ্চন্তি, ভিক্খৰে, ধম্মা অভিঞ্ঞা ভাৰেতব্বা.

‘‘কতমে চ, ভিক্খৰে, ধম্মা অভিঞ্ঞা সচ্ছিকাতব্বা? ৰিজ্জা চ ৰিমুত্তি চ – ইমে ৰুচ্চন্তি, ভিক্খৰে, ধম্মা অভিঞ্ঞা সচ্ছিকাতব্বা. ইমে খো, ভিক্খৰে, চত্তারো ধম্মা’’তি. পঠমং.