(২৫) ৫. আপত্তিভযৰগ্গো

১. সঙ্ঘভেদকসুত্তং

২৪৩. একং সমযং ভগৰা কোসম্বিযং ৰিহরতি ঘোসিতারামে. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং আনন্দং ভগৰা এতদৰোচ – ‘‘অপি নু তং, আনন্দ, অধিকরণং ৰূপসন্ত’’ন্তি? ‘‘কুতো তং, ভন্তে, অধিকরণং ৰূপসমিস্সতি [ৰূপসম্মিস্সতি (?)]! আযস্মতো, ভন্তে, অনুরুদ্ধস্স বাহিযো নাম সদ্ধিৰিহারিকো কেৰলকপ্পং সঙ্ঘভেদায ঠিতো. তত্রাযস্মা অনুরুদ্ধো ন একৰাচিকম্পি ভণিতব্বং মঞ্ঞতী’’তি.

‘‘কদা পনানন্দ, অনুরুদ্ধো সঙ্ঘমজ্ঝে অধিকরণেসু [অধিকরণেসু তেসু (ক.)] ৰোযুঞ্জতি! ননু, আনন্দ, যানি কানিচি অধিকরণানি উপ্পজ্জন্তি, সব্বানি তানি তুম্হে চেৰ ৰূপসমেথ সারিপুত্তমোগ্গল্লানা চ.

‘‘চত্তারোমে, আনন্দ, অত্থৰসে সম্পস্সমানো পাপভিক্খু সঙ্ঘভেদেন নন্দতি. কতমে চত্তারো? ইধানন্দ, পাপভিক্খু দুস্সীলো হোতি পাপধম্মো অসুচি সঙ্কস্সরসমাচারো পটিচ্ছন্নকম্মন্তো অস্সমণো সমণপটিঞ্ঞো অব্রহ্মচারী ব্রহ্মচারিপটিঞ্ঞো অন্তোপূতি অৰস্সুতো কসম্বুজাতো. তস্স এৰং হোতি – ‘সচে খো মং ভিক্খূ জানিস্সন্তি – দুস্সীলো পাপধম্মো অসুচি সঙ্কস্সরসমাচারো পটিচ্ছন্নকম্মন্তো অস্সমণো সমণপটিঞ্ঞো অব্রহ্মচারী ব্রহ্মচারিপটিঞ্ঞো অন্তোপূতি অৰস্সুতো কসম্বুজাতোতি, সমগ্গা মং সন্তা নাসেস্সন্তি; ৰগ্গা পন মং ন নাসেস্সন্তী’তি. ইদং, আনন্দ, পঠমং অত্থৰসং সম্পস্সমানো পাপভিক্খু সঙ্ঘভেদেন নন্দতি.

‘‘পুন চপরং, আনন্দ, পাপভিক্খু মিচ্ছাদিট্ঠিকো হোতি, অন্তগ্গাহিকায দিট্ঠিযা সমন্নাগতো. তস্স এৰং হোতি – ‘সচে খো মং ভিক্খূ জানিস্সন্তি – মিচ্ছাদিট্ঠিকো অন্তগ্গাহিকায দিট্ঠিযা সমন্নাগতোতি, সমগ্গা মং সন্তা নাসেস্সন্তি; ৰগ্গা পন মং ন নাসেস্সন্তী’তি. ইদং, আনন্দ, দুতিযং অত্থৰসং সম্পস্সমানো পাপভিক্খু সঙ্ঘভেদেন নন্দতি.

‘‘পুন চপরং, আনন্দ, পাপভিক্খু মিচ্ছাআজীৰো হোতি, মিচ্ছাআজীৰেন জীৰিকং [জীৰিতং (স্যা. কং. পী. ক.)] কপ্পেতি. তস্স এৰং হোতি – ‘সচে খো মং ভিক্খূ জানিস্সন্তি – মিচ্ছাআজীৰো মিচ্ছাআজীৰেন জীৰিকং কপ্পেতীতি, সমগ্গা মং সন্তা নাসেস্সন্তি; ৰগ্গা পন মং ন নাসেস্সন্তী’তি. ইদং, আনন্দ, ততিযং অত্থৰসং সম্পস্সমানো পাপভিক্খু সঙ্ঘভেদেন নন্দতি.

‘‘পুন চপরং, আনন্দ, পাপভিক্খু লাভকামো হোতি সক্কারকামো অনৰঞ্ঞত্তিকামো. তস্স এৰং হোতি – ‘সচে খো মং ভিক্খূ জানিস্সন্তি – লাভকামো সক্কারকামো অনৰঞ্ঞত্তিকামোতি, সমগ্গা মং সন্তা ন সক্করিস্সন্তি ন গরুং করিস্সন্তি ন মানেস্সন্তি ন পূজেস্সন্তি; ৰগ্গা পন মং সক্করিস্সন্তি গরুং করিস্সন্তি মানেস্সন্তি পূজেস্সন্তী’তি. ইদং, আনন্দ, চতুত্থং অত্থৰসং সম্পস্সমানো পাপভিক্খু সঙ্ঘভেদেন নন্দতি. ইমে খো, আনন্দ, চত্তারো অত্থৰসে সম্পস্সমানো পাপভিক্খু সঙ্ঘভেদেন নন্দতী’’তি. পঠমং.

২. আপত্তিভযসুত্তং

২৪৪. ‘‘চত্তারিমানি, ভিক্খৰে, আপত্তিভযানি. কতমানি চত্তারি? সেয্যথাপি, ভিক্খৰে, চোরং আগুচারিং গহেত্ৰা রঞ্ঞো দস্সেয্যুং – ‘অযং তে, দেৰ, চোরো আগুচারী. ইমস্স দেৰো দণ্ডং পণেতূ’তি. তমেনং রাজা এৰং ৰদেয্য – ‘গচ্ছথ, ভো, ইমং পুরিসং দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা খরস্সরেন পণৰেন রথিকায রথিকং সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খামেত্ৰা দক্খিণতো নগরস্স সীসং ছিন্দথা’তি. তমেনং রঞ্ঞো পুরিসা দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা খরস্সরেন পণৰেন রথিকায রথিকং সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খামেত্ৰা দক্খিণতো নগরস্স সীসং ছিন্দেয্যুং. তত্রঞ্ঞতরস্স থলট্ঠস্স পুরিসস্স এৰমস্স – ‘পাপকং ৰত, ভো, অযং পুরিসো কম্মং অকাসি গারয্হং সীসচ্ছেজ্জং. যত্র হি নাম রঞ্ঞো পুরিসা দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা খরস্সরেন পণৰেন রথিকায রথিকং সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খামেত্ৰা দক্খিণতো নগরস্স সীসং ছিন্দিস্সন্তি! সো ৰতস্সাহং [সো ৰতস্সাযং (সী.)] এৰরূপং পাপকম্মং [পাপং কম্মং (সী. পী.)] ন করেয্যং [ন করেয্য (সী.) দী. নি. ১.১৮৩ পাল়িযা তদট্ঠকথায চ সংসন্দেতব্বং] গারয্হং সীসচ্ছেজ্জ’ন্তি. এৰমেৰং খো, ভিক্খৰে, যস্স কস্সচি ভিক্খুস্স ৰা ভিক্খুনিযা ৰা এৰং তিব্বা ভযসঞ্ঞা পচ্চুপট্ঠিতা হোতি পারাজিকেসু ধম্মেসু. তস্সেতং পাটিকঙ্খং – অনাপন্নো ৰা পারাজিকং ধম্মং ন আপজ্জিস্সতি, আপন্নো ৰা পারাজিকং ধম্মং যথাধম্মং পটিকরিস্সতি.

‘‘সেয্যথাপি, ভিক্খৰে, পুরিসো কাল়ৰত্থং [কাল়কং ৰত্থং (সী. স্যা. কং. পী.)] পরিধায কেসে পকিরিত্ৰা মুসলং খন্ধে আরোপেত্ৰা মহাজনকাযং উপসঙ্কমিত্ৰা এৰং ৰদেয্য – ‘অহং, ভন্তে, পাপকম্মং অকাসিং গারয্হং মোসল্লং, যেন মে আযস্মন্তো অত্তমনা হোন্তি তং করোমী’তি. তত্রঞ্ঞতরস্স থলট্ঠস্স পুরিসস্স এৰমস্স – ‘পাপকং ৰত, ভো, অযং পুরিসো কম্মং অকাসি গারয্হং মোসল্লং. যত্র হি নাম কাল়ৰত্থং পরিধায কেসে পকিরিত্ৰা মুসলং খন্ধে আরোপেত্ৰা মহাজনকাযং উপসঙ্কমিত্ৰা এৰং ৰক্খতি – ‘অহং, ভন্তে, পাপকম্মং অকাসিং গারয্হং মোসল্লং, যেন মে আযস্মন্তো অত্তমনা হোন্তি তং করোমীতি. সো ৰতস্সাহং এৰরূপং পাপকম্মং ন করেয্যং গারয্হং মোসল্ল’ন্তি. এৰমেৰং খো, ভিক্খৰে, যস্স কস্সচি ভিক্খুস্স ৰা ভিক্খুনিযা ৰা এৰং তিব্বা ভযসঞ্ঞা পচ্চুপট্ঠিতা হোতি সঙ্ঘাদিসেসেসু ধম্মেসু, তস্সেতং পাটিকঙ্খং – অনাপন্নো ৰা সঙ্ঘাদিসেসং ধম্মং ন আপজ্জিস্সতি, আপন্নো ৰা সঙ্ঘাদিসেসং ধম্মং যথাধম্মং পটিকরিস্সতি.

‘‘সেয্যথাপি, ভিক্খৰে, পুরিসো কাল়ৰত্থং পরিধায কেসে পকিরিত্ৰা ভস্মপুটং [অস্সপুটং (সী. স্যা. কং. পী.)] খন্ধে আরোপেত্ৰা মহাজনকাযং উপসঙ্কমিত্ৰা এৰং ৰদেয্য – ‘অহং, ভন্তে, পাপকম্মং অকাসিং গারয্হং ভস্মপুটং. যেন মে আযস্মন্তো অত্তমনা হোন্তি তং করোমী’তি. তত্রঞ্ঞতরস্স থলট্ঠস্স পুরিসস্স এৰমস্স – ‘পাপকং ৰত, ভো, অযং পুরিসো কম্মং অকাসি গারয্হং ভস্মপুটং. যত্র হি নাম কাল়ৰত্থং পরিধায কেসে পকিরিত্ৰা ভস্মপুটং খন্ধে আরোপেত্ৰা মহাজনকাযং উপসঙ্কমিত্ৰা এৰং ৰক্খতি – অহং, ভন্তে, পাপকম্মং অকাসিং গারয্হং ভস্মপুটং; যেন মে আযস্মন্তো অত্তমনা হোন্তি তং করোমীতি. সো ৰতস্সাহং এৰরূপং পাপকম্মং ন করেয্যং গারয্হং ভস্মপুট’ন্তি. এৰমেৰং খো, ভিক্খৰে, যস্স কস্সচি ভিক্খুস্স ৰা ভিক্খুনিযা ৰা এৰং তিব্বা ভযসঞ্ঞা পচ্চুপট্ঠিতা হোতি পাচিত্তিযেসু ধম্মেসু, তস্সেতং পাটিকঙ্খং – অনাপন্নো ৰা পাচিত্তিযং ধম্মং ন আপজ্জিস্সতি, আপন্নো ৰা পাচিত্তিযং ধম্মং যথাধম্মং পটিকরিস্সতি.

‘‘সেয্যথাপি, ভিক্খৰে, পুরিসো কাল়ৰত্থং পরিধায কেসে পকিরিত্ৰা মহাজনকাযং উপসঙ্কমিত্ৰা এৰং ৰদেয্য – ‘অহং, ভন্তে, পাপকম্মং অকাসিং গারয্হং উপৰজ্জং. যেন মে আযস্মন্তো অত্তমনা হোন্তি তং করোমী’তি. তত্রঞ্ঞতরস্স থলট্ঠস্স পুরিসস্স এৰমস্স – ‘পাপকং ৰত, ভো, অযং পুরিসো কম্মং অকাসি গারয্হং উপৰজ্জং. যত্র হি নাম কাল়ৰত্থং পরিধায কেসে পকিরিত্ৰা মহাজনকাযং উপসঙ্কমিত্ৰা এৰং ৰক্খতি – অহং, ভন্তে, পাপকম্মং অকাসিং গারয্হং উপৰজ্জং; যেন মে আযস্মন্তো অত্তমনা হোন্তি তং করোমীতি. সো ৰতস্সাহং এৰরূপং পাপকম্মং ন করেয্যং গারয্হং উপৰজ্জ’ন্তি. এৰমেৰং খো, ভিক্খৰে, যস্স কস্সচি ভিক্খুস্স ৰা ভিক্খুনিযা ৰা এৰং তিব্বা ভযসঞ্ঞা পচ্চুপট্ঠিতা হোতি পাটিদেসনীযেসু ধম্মেসু, তস্সেতং পাটিকঙ্খং – অনাপন্নো ৰা পাটিদেসনীযং ধম্মং ন আপজ্জিস্সতি, আপন্নো ৰা পাটিদেসনীযং ধম্মং যথাধম্মং পটিকরিস্সতি. ইমানি খো, ভিক্খৰে, চত্তারি আপত্তিভযানী’’তি. দুতিযং.

৩. সিক্খানিসংসসুত্তং

২৪৫. ‘‘সিক্খানিসংসমিদং, ভিক্খৰে, ব্রহ্মচরিযং ৰুস্সতি পঞ্ঞুত্তরং ৰিমুত্তিসারং সতাধিপতেয্যং. কথঞ্চ, ভিক্খৰে, সিক্খানিসংসং হোতি? ইধ, ভিক্খৰে, মযা সাৰকানং আভিসমাচারিকা সিক্খা পঞ্ঞত্তা অপ্পসন্নানং পসাদায পসন্নানং ভিয্যোভাৰায. যথা যথা, ভিক্খৰে, মযা সাৰকানং আভিসমাচারিকা সিক্খা পঞ্ঞত্তা অপ্পসন্নানং পসাদায পসন্নানং ভিয্যোভাৰায তথা তথা সো তস্সা সিক্খায অখণ্ডকারী হোতি অচ্ছিদ্দকারী অসবলকারী অকম্মাসকারী, সমাদায সিক্খতি সিক্খাপদেসু.

‘‘পুন চপরং, ভিক্খৰে, মযা সাৰকানং আদিব্রহ্মচরিযিকা সিক্খা পঞ্ঞত্তা সব্বসো সম্মা দুক্খক্খযায. যথা যথা, ভিক্খৰে, মযা সাৰকানং আদিব্রহ্মচরিযিকা সিক্খা পঞ্ঞত্তা সব্বসো সম্মা দুক্খক্খযায তথা তথা সো তস্সা সিক্খায অখণ্ডকারী হোতি অচ্ছিদ্দকারী অসবলকারী অকম্মাসকারী, সমাদায সিক্খতি সিক্খাপদেসু. এৰং খো, ভিক্খৰে, সিক্খানিসংসং হোতি.

‘‘কথঞ্চ, ভিক্খৰে, পঞ্ঞুত্তরং হোতি? ইধ, ভিক্খৰে, মযা সাৰকানং ধম্মা দেসিতা সব্বসো সম্মা দুক্খক্খযায. যথা যথা, ভিক্খৰে, মযা সাৰকানং ধম্মা দেসিতা সব্বসো সম্মা দুক্খক্খযায তথা তথাস্স তে ধম্মা পঞ্ঞায সমৰেক্খিতা হোন্তি. এৰং খো, ভিক্খৰে, পঞ্ঞুত্তরং হোতি.

‘‘কথঞ্চ, ভিক্খৰে, ৰিমুত্তিসারং হোতি? ইধ, ভিক্খৰে, মযা সাৰকানং ধম্মা দেসিতা সব্বসো সম্মা দুক্খক্খযায. যথা যথা, ভিক্খৰে, মযা সাৰকানং ধম্মা দেসিতা সব্বসো সম্মা দুক্খক্খযায তথা তথাস্স তে ধম্মা ৰিমুত্তিযা ফুসিতা হোন্তি. এৰং খো, ভিক্খৰে, ৰিমুত্তিসারং হোতি.

‘‘কথঞ্চ, ভিক্খৰে, সতাধিপতেয্যং হোতি? ‘ইতি অপরিপূরং ৰা আভিসমাচারিকং সিক্খং পরিপূরেস্সামি, পরিপূরং ৰা আভিসমাচারিকং সিক্খং তত্থ তত্থ পঞ্ঞায অনুগ্গহেস্সামী’তি – অজ্ঝত্তংযেৰ সতি সূপট্ঠিতা হোতি. ‘ইতি অপরিপূরং ৰা আদিব্রহ্মচরিযিকং সিক্খং পরিপূরেস্সামি, পরিপূরং ৰা আদিব্রহ্মচরিযিকং সিক্খং তত্থ তত্থ পঞ্ঞায অনুগ্গহেস্সামী’তি – অজ্ঝত্তংযেৰ সতি সূপট্ঠিতা হোতি. ‘ইতি অসমৰেক্খিতং ৰা ধম্মং পঞ্ঞায সমৰেক্খিস্সামি, সমৰেক্খিতং ৰা ধম্মং তত্থ তত্থ পঞ্ঞায অনুগ্গহেস্সামী’তি – অজ্ঝত্তংযেৰ সতি সূপট্ঠিতা হোতি. ‘ইতি অফুসিতং ৰা ধম্মং ৰিমুত্তিযা ফুসিস্সামি, ফুসিতং ৰা ধম্মং তত্থ তত্থ পঞ্ঞায অনুগ্গহেস্সামী’তি – অজ্ঝত্তংযেৰ সতি সূপট্ঠিতা হোতি. এৰং খো, ভিক্খৰে, সতাধিপতেয্যং হোতি. ‘সিক্খানিসংসমিদং, ভিক্খৰে, ব্রহ্মচরিযং ৰুস্সতি পঞ্ঞুত্তরং ৰিমুত্তিসারং সতাধিপতেয্য’ন্তি, ইতি যং তং ৰুত্তং ইদমেতং পটিচ্চ ৰুত্ত’’ন্তি. ততিযং.

৪. সেয্যাসুত্তং

২৪৬. ‘‘চতস্সো ইমা, ভিক্খৰে, সেয্যা. কতমা চতস্সো? পেতসেয্যা, কামভোগিসেয্যা, সীহসেয্যা, তথাগতসেয্যা. কতমা চ, ভিক্খৰে, পেতসেয্যা? যেভুয্যেন, ভিক্খৰে, পেতা উত্তানা সেন্তি; অযং ৰুচ্চতি, ভিক্খৰে, পেতসেয্যা.

‘‘কতমা চ, ভিক্খৰে, কামভোগিসেয্যা? যেভুয্যেন, ভিক্খৰে, কামভোগী ৰামেন পস্সেন সেন্তি; অযং ৰুচ্চতি, ভিক্খৰে, কামভোগিসেয্যা.

‘‘কতমা চ, ভিক্খৰে, সীহসেয্যা? সীহো, ভিক্খৰে, মিগরাজা দক্খিণেন পস্সেন সেয্যং কপ্পেতি, পাদে পাদং অচ্চাধায, অন্তরসত্থিম্হি নঙ্গুট্ঠং অনুপক্খিপিত্ৰা. সো পটিবুজ্ঝিত্ৰা পুরিমং কাযং অব্ভুন্নামেত্ৰা পচ্ছিমং কাযং অনুৰিলোকেতি. সচে, ভিক্খৰে, সীহো মিগরাজা কিঞ্চি পস্সতি কাযস্স ৰিক্খিত্তং ৰা ৰিসটং ৰা, তেন, ভিক্খৰে, সীহো মিগরাজা অনত্তমনো হোতি. সচে পন, ভিক্খৰে, সীহো মিগরাজা ন কিঞ্চি পস্সতি কাযস্স ৰিক্খিত্তং ৰা ৰিসটং ৰা, তেন, ভিক্খৰে, সীহো মিগরাজা অত্তমনো হোতি. অযং ৰুচ্চতি, ভিক্খৰে, সীহসেয্যা.

‘‘কতমা চ, ভিক্খৰে, তথাগতসেয্যা? ইধ, ভিক্খৰে, তথাগতো ৰিৰিচ্চেৰ কামেহি…পে… চতুত্থং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, তথাগতসেয্যা. ইমা খো, ভিক্খৰে, চতস্সো সেয্যা’’তি. চতুত্থং.

৫. থূপারহসুত্তং

২৪৭. ‘‘চত্তারোমে, ভিক্খৰে, থূপারহা. কতমে চত্তারো? তথাগতো অরহং সম্মাসম্বুদ্ধো থূপারহো, পচ্চেকবুদ্ধো থূপারহো, তথাগতসাৰকো থূপারহো, রাজা চক্কৰত্তী থূপারহো – ইমে খো, ভিক্খৰে, চত্তারো থূপারহা’’তি. পঞ্চমং.

৬. পঞ্ঞাৰুদ্ধিসুত্তং

২৪৮. ‘‘চত্তারোমে, ভিক্খৰে, ধম্মা পঞ্ঞাৰুদ্ধিযা সংৰত্তন্তি. কতমে চত্তারো? সপ্পুরিসসংসেৰো, সদ্ধম্মসৰনং, যোনিসোমনসিকারো, ধম্মানুধম্মপ্পটিপত্তি – ইমে খো, ভিক্খৰে, চত্তারো ধম্মা পঞ্ঞাৰুদ্ধিযা সংৰত্তন্তী’’তি. ছট্ঠং.

৭. বহুকারসুত্তং

২৪৯. ‘‘চত্তারোমে, ভিক্খৰে, ধম্মা মনুস্সভূতস্স বহুকারা হোন্তি. কতমে চত্তারো? সপ্পুরিসসংসেৰো, সদ্ধম্মসৰনং, যোনিসোমনসিকারো, ধম্মানুধম্মপ্পটিপত্তি – ইমে খো, ভিক্খৰে, চত্তারো ধম্মা মনুস্সভূতস্স বহুকারা হোন্তী’’তি. সত্তমং.

৮. পঠমৰোহারসুত্তং

২৫০. ‘‘চত্তারোমে, ভিক্খৰে, অনরিযৰোহারা. কতমে চত্তারো? অদিট্ঠে দিট্ঠৰাদিতা, অসুতে সুতৰাদিতা, অমুতে মুতৰাদিতা, অৰিঞ্ঞাতে ৰিঞ্ঞাতৰাদিতা – ইমে খো, ভিক্খৰে, চত্তারো অনরিযৰোহারা’’তি. অট্ঠমং.

৯. দুতিযৰোহারসুত্তং

২৫১. ‘‘চত্তারোমে, ভিক্খৰে, অরিযৰোহারা. কতমে চত্তারো? অদিট্ঠে অদিট্ঠৰাদিতা, অসুতে অসুতৰাদিতা, অমুতে অমুতৰাদিতা, অৰিঞ্ঞাতে অৰিঞ্ঞাতৰাদিতা – ইমে খো, ভিক্খৰে, চত্তারো অরিযৰোহারা’’তি. নৰমং.

১০. ততিযৰোহারসুত্তং

২৫২. ‘‘চত্তারোমে, ভিক্খৰে, অনরিযৰোহারা. কতমে চত্তারো? দিট্ঠে অদিট্ঠৰাদিতা, সুতে অসুতৰাদিতা, মুতে অমুতৰাদিতা, ৰিঞ্ঞাতে অৰিঞ্ঞাতৰাদিতা – ইমে খো, ভিক্খৰে, চত্তারো অনরিযৰোহারা’’তি. দসমং.

১১. চতুত্থৰোহারসুত্তং

২৫৩. ‘‘চত্তারোমে, ভিক্খৰে, অরিযৰোহারা. কতমে চত্তারো? দিট্ঠে দিট্ঠৰাদিতা, সুতে সুতৰাদিতা, মুতে মুতৰাদিতা, ৰিঞ্ঞাতে ৰিঞ্ঞাতৰাদিতা – ইমে খো, ভিক্খৰে, চত্তারো অরিযৰোহারা’’তি. একাদসমং.

আপত্তিভযৰগ্গো পঞ্চমো.