২. পাটিভোগসুত্তং

১৮২. [কথা. ৬২৪] ‘‘চতুন্নং, ভিক্খৰে, ধম্মানং নত্থি কোচি পাটিভোগো – সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং.

‘‘কতমেসং চতুন্নং? ‘জরাধম্মং মা জীরী’তি নত্থি কোচি পাটিভোগো – সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং; ‘ব্যাধিধম্মং মা ব্যাধিযী’তি নত্থি কোচি পাটিভোগো – সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং; ‘মরণধম্মং মা মীযী’তি নত্থি কোচি পাটিভোগো – সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং; ‘যানি খো পন তানি পুব্বে অত্তনা কতানি পাপকানি কম্মানি সংকিলেসিকানি পোনোভৰিকানি সদরানি দুক্খৰিপাকানি আযতিং জাতিজরামরণিকানি, তেসং ৰিপাকো মা নিব্বত্তী’তি নত্থি কোচি পাটিভোগো – সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং.

‘‘ইমেসং খো, ভিক্খৰে, চতুন্নং ধম্মানং নত্থি কোচি পাটিভোগো – সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মি’’ন্তি. দুতিযং.