৮. সুদত্তসুত্তং

৫৮. অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –

‘‘ভোজনং, গহপতি, দদমানো অরিযসাৰকো পটিগ্গাহকানং চত্তারি ঠানানি দেতি. কতমানি চত্তারি? আযুং দেতি, ৰণ্ণং দেতি, সুখং দেতি, বলং দেতি. আযুং খো পন দত্ৰা আযুস্স ভাগী হোতি দিব্বস্স ৰা মানুসস্স ৰা. ৰণ্ণং দত্ৰা… সুখং দত্ৰা… বলং দত্ৰা বলস্স ভাগী হোতি দিব্বস্স ৰা মানুসস্স ৰা. ভোজনং, গহপতি, দদমানো অরিযসাৰকো পটিগ্গাহকানং ইমানি চত্তারি ঠানানি দেতী’’তি.

[মহাৰ. ২৮২] ‘‘যো সঞ্ঞতানং পরদত্তভোজিনং,

কালেন সক্কচ্চ দদাতি ভোজনং;

চত্তারি ঠানানি অনুপ্পৰেচ্ছতি,

আযুঞ্চ ৰণ্ণঞ্চ সুখং বলঞ্চ.

‘‘সো আযুদাযী ৰণ্ণদাযী [সো আযুদাযী বলদাযী (সী. পী.), আযুদাযী বলদাযী (স্যা. কং.)], সুখং বলং দদো [সুখং ৰণ্ণং দদো (সী. স্যা. কং. পী.), সুখবলদদো (ক.)] নরো;

দীঘাযু যসৰা হোতি, যত্থ যত্থূপপজ্জতী’’তি. অট্ঠমং;