৪. পরিসাসুত্তং

৯৬. ‘‘তিস্সো ইমা, ভিক্খৰে, পরিসা. কতমা তিস্সো? অগ্গৰতী পরিসা, ৰগ্গা পরিসা, সমগ্গা পরিসা.

‘‘কতমা চ, ভিক্খৰে, অগ্গৰতী পরিসা? ইধ, ভিক্খৰে, যস্সং পরিসাযং থেরা ভিক্খূ ন বাহুলিকা হোন্তি ন সাথলিকা, ওক্কমনে নিক্খিত্তধুরা পৰিৰেকে পুব্বঙ্গমা, ৰীরিযং আরভন্তি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায, তেসং পচ্ছিমা জনতা দিট্ঠানুগতিং আপজ্জতি. সাপি হোতি ন বাহুলিকা ন সাথলিকা ওক্কমনে নিক্খিত্তধুরা পৰিৰেকে পুব্বঙ্গমা, ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায. অযং ৰুচ্চতি, ভিক্খৰে, অগ্গৰতী পরিসা.

‘‘কতমা চ, ভিক্খৰে, ৰগ্গা পরিসা? ইধ, ভিক্খৰে, যস্সং পরিসাযং ভিক্খূ ভণ্ডনজাতা কলহজাতা ৰিৰাদাপন্না অঞ্ঞমঞ্ঞং মুখসত্তীহি ৰিতুদন্তা ৰিহরন্তি, অযং ৰুচ্চতি, ভিক্খৰে, ৰগ্গা পরিসা.

‘‘কতমা চ, ভিক্খৰে, সমগ্গা পরিসা? ইধ, ভিক্খৰে, যস্সং পরিসাযং ভিক্খূ সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরন্তি, অযং ৰুচ্চতি, ভিক্খৰে, সমগ্গা পরিসা.

‘‘যস্মিং, ভিক্খৰে, সমযে ভিক্খূ সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরন্তি, বহুং, ভিক্খৰে, ভিক্খূ তস্মিং সমযে পুঞ্ঞং পসৰন্তি. ব্রহ্মং, ভিক্খৰে, ৰিহারং তস্মিং সমযে ভিক্খূ ৰিহরন্তি, যদিদং মুদিতায চেতোৰিমুত্তিযা. পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদিযতি, সুখিনো চিত্তং সমাধিযতি.

‘‘সেয্যথাপি, ভিক্খৰে, উপরিপব্বতে থুল্লফুসিতকে দেৰে ৰস্সন্তে তং উদকং যথানিন্নং পৰত্তমানং পব্বতকন্দরপদরসাখা পরিপূরেতি, পব্বতকন্দরপদরসাখা পরিপূরা কুসোব্ভে [কুস্সুম্ভে (সী. পী.), কুসুম্ভে (স্যা. কং. ক.)] পরিপূরেন্তি, কুসোব্ভা পরিপূরা মহাসোব্ভে পরিপূরেন্তি, মহাসোব্ভা পরিপূরা কুন্নদিযো পরিপূরেন্তি, কুন্নদিযো পরিপূরা মহানদিযো পরিপূরেন্তি, মহানদিযো পরিপূরা সমুদ্দং [সমুদ্দসাগরে (ক.)] পরিপূরেন্তি.

‘‘এৰমেৰং খো, ভিক্খৰে, যস্মিং সমযে ভিক্খূ সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরন্তি, বহুং, ভিক্খৰে, ভিক্খূ তস্মিং সমযে পুঞ্ঞং পসৰন্তি. ব্রহ্মং, ভিক্খৰে, ৰিহারং তস্মিং সমযে ভিক্খূ ৰিহরন্তি, যদিদং মুদিতায চেতোৰিমুত্তিযা. পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদিযতি, সুখিনো চিত্তং সমাধিযতি. ইমা খো, ভিক্খৰে, তিস্সো পরিসা’’তি. চতুত্থং.