১. অচ্চাযিকসুত্তং

৯৩. ‘‘তীণিমানি, ভিক্খৰে, কস্সকস্স গহপতিস্স অচ্চাযিকানি করণীযানি. কতমানি তীণি? ইধ, ভিক্খৰে, কস্সকো গহপতি সীঘং সীঘং খেত্তং সুকট্ঠং করোতি সুমতিকতং. সীঘং সীঘং খেত্তং সুকট্ঠং করিত্ৰা সুমতিকতং সীঘং সীঘং বীজানি পতিট্ঠাপেতি. সীঘং সীঘং বীজানি পতিট্ঠাপেত্ৰা সীঘং সীঘং উদকং অভিনেতিপি অপনেতিপি. ইমানি খো, ভিক্খৰে, তীণি কস্সকস্স গহপতিস্স অচ্চাযিকানি করণীযানি. তস্স খো তং, ভিক্খৰে, কস্সকস্স গহপতিস্স নত্থি সা ইদ্ধি ৰা আনুভাৰো ৰা – ‘অজ্জেৰ মে ধঞ্ঞানি জাযন্তু, স্ৰেৰ গব্ভীনি হোন্তু, উত্তরস্ৰেৰ পচ্চন্তূ’তি. অথ খো, ভিক্খৰে, হোতি সো সমযো যং তস্স কস্সকস্স গহপতিস্স তানি ধঞ্ঞানি উতুপরিণামীনি জাযন্তিপি গব্ভীনিপি হোন্তি পচ্চন্তিপি.

‘‘এৰমেৰং খো, ভিক্খৰে, তীণিমানি ভিক্খুস্স অচ্চাযিকানি করণীযানি. কতমানি তীণি? অধিসীলসিক্খাসমাদানং, অধিচিত্তসিক্খাসমাদানং, অধিপঞ্ঞাসিক্খাসমাদানং – ইমানি খো, ভিক্খৰে, তীণি ভিক্খুস্স অচ্চাযিকানি করণীযানি. তস্স খো তং, ভিক্খৰে, ভিক্খুনো নত্থি সা ইদ্ধি ৰা অনুভাৰো ৰা – ‘অজ্জেৰ মে অনুপাদায আসৰেহি চিত্তং ৰিমুচ্চতু স্ৰে ৰা উত্তরস্ৰে ৰা’তি. অথ খো, ভিক্খৰে, হোতি সো সমযো যং তস্স ভিক্খুনো অধিসীলম্পি সিক্খতো অধিচিত্তম্পি সিক্খতো অধিপঞ্ঞম্পি সিক্খতো অনুপাদায আসৰেহি চিত্তং ৰিমুচ্চতি.

‘‘তস্মাতিহ, ভিক্খৰে, এৰং সিক্খিতব্বং – ‘তিব্বো নো ছন্দো ভৰিস্সতি অধিসীলসিক্খাসমাদানে, তিব্বো ছন্দো ভৰিস্সতি অধিচিত্তসিক্খাসমাদানে, তিব্বো ছন্দো ভৰিস্সতি অধিপঞ্ঞাসিক্খাসমাদানে’তি. এৰঞ্হি ৰো, ভিক্খৰে, সিক্খিতব্ব’’ন্তি. পঠমং.