(২২) ২. সামঞ্ঞৰগ্গো

২২১. ‘‘দসহি, ভিক্খৰে, ধম্মেহি সমন্নাগতো যথাভতং নিক্খিত্তো এৰং নিরযে. কতমেহি দসহি? পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, পিসুণৰাচো হোতি, ফরুসৰাচো হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠিকো হোতি – ইমেহি খো, ভিক্খৰে, দসহি ধম্মেহি সমন্নাগতো যথাভতং নিক্খিত্তো এৰং নিরযে.

‘‘দসহি, ভিক্খৰে, ধম্মেহি সমন্নাগতো যথাভতং নিক্খিত্তো এৰং সগ্গে. কতমেহি দসহি? পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠিকো হোতি – ইমেহি খো, ভিক্খৰে, দসহি ধম্মেহি সমন্নাগতো যথাভতং নিক্খিত্তো এৰং সগ্গে’’তি.

২২২. ‘‘ৰীসতিযা, ভিক্খৰে, ধম্মেহি সমন্নাগতো যথাভতং নিক্খিত্তো এৰং নিরযে. কতমেহি ৰীসতিযা? অত্তনা চ পাণাতিপাতী হোতি, পরঞ্চ পাণাতিপাতে সমাদপেতি; অত্তনা চ অদিন্নাদাযী হোতি, পরঞ্চ অদিন্নাদানে সমাদপেতি; অত্তনা চ কামেসুমিচ্ছাচারী হোতি, পরঞ্চ কামেসুমিচ্ছাচারে সমাদপেতি; অত্তনা চ মুসাৰাদী হোতি, পরঞ্চ মুসাৰাদে সমাদপেতি; অত্তনা চ পিসুণৰাচো হোতি, পরঞ্চ পিসুণায ৰাচায সমাদপেতি; অত্তনা চ ফরুসৰাচো হোতি, পরঞ্চ ফরুসায ৰাচায সমাদপেতি; অত্তনা চ সম্ফপ্পলাপী হোতি, পরঞ্চ সম্ফপ্পলাপে সমাদপেতি; অত্তনা চ অভিজ্ঝালু হোতি, পরঞ্চ অভিজ্ঝায সমাদপেতি; অত্তনা চ ব্যাপন্নচিত্তো হোতি, পরঞ্চ ব্যাপাদে সমাদপেতি; অত্তনা চ মিচ্ছাদিট্ঠিকো হোতি, পরঞ্চ মিচ্ছাদিট্ঠিযা সমাদপেতি – ইমেহি খো, ভিক্খৰে, ৰীসতিযা ধম্মেহি সমন্নাগতো যথাভতং নিক্খিত্তো এৰং নিরযে.

‘‘ৰীসতিযা, ভিক্খৰে, ধম্মেহি সমন্নাগতো যথাভতং নিক্খিত্তো এৰং সগ্গে. কতমেহি ৰীসতিযা? অত্তনা চ পাণাতিপাতা পটিৰিরতো হোতি, পরঞ্চ পাণাতিপাতা ৰেরমণিযা সমাদপেতি; অত্তনা চ অদিন্নাদানা পটিৰিরতো হোতি, পরঞ্চ অদিন্নাদানা ৰেরমণিযা সমাদপেতি; অত্তনা চ কামেসুমিচ্ছাচারা পটিৰিরতো হোতি, পরঞ্চ কামেসুমিচ্ছাচারা ৰেরমণিযা সমাদপেতি; অত্তনা চ মুসাৰাদা পটিৰিরতো হোতি, পরঞ্চ মুসাৰাদা ৰেরমণিযা সমাদপেতি; অত্তনা চ পিসুণায ৰাচায পটিৰিরতো হোতি, পরঞ্চ পিসুণায ৰাচায ৰেরমণিযা সমাদপেতি; অত্তনা চ ফরুসায ৰাচায পটিৰিরতো হোতি, পরঞ্চ ফরুসায ৰাচায ৰেরমণিযা সমাদপেতি; অত্তনা চ সম্ফপ্পলাপা পটিৰিরতো হোতি, পরঞ্চ সম্ফপ্পলাপা ৰেরমণিযা সমাদপেতি; অত্তনা চ অনভিজ্ঝালু হোতি, পরঞ্চ অনভিজ্ঝায সমাদপেতি; অত্তনা চ অব্যাপন্নচিত্তো হোতি, পরঞ্চ অব্যাপাদে সমাদপেতি; অত্তনা চ সম্মাদিট্ঠিকো হোতি, পরঞ্চ সম্মাদিট্ঠিযা সমাদপেতি – ইমেহি খো, ভিক্খৰে, ৰীসতিযা ধম্মেহি সমন্নাগতো যথাভতং নিক্খিত্তো এৰং সগ্গে’’তি.

২২৩. ‘‘তিংসায, ভিক্খৰে, ধম্মেহি সমন্নাগতো যথাভতং নিক্খিত্তো এৰং নিরযে. কতমেহি তিংসায? অত্তনা চ পাণাতিপাতী হোতি, পরঞ্চ পাণাতিপাতে সমাদপেতি, পাণাতিপাতে চ সমনুঞ্ঞো হোতি; অত্তনা চ অদিন্নাদাযী হোতি, পরঞ্চ অদিন্নাদানে সমাদপেতি, অদিন্নাদানে চ সমনুঞ্ঞো হোতি; অত্তনা চ কামেসুমিচ্ছাচারী হোতি, পরঞ্চ কামেসুমিচ্ছাচারে সমাদপেতি, কামেসুমিচ্ছাচারে চ সমনুঞ্ঞো হোতি; অত্তনা চ মুসাৰাদী হোতি, পরঞ্চ মুসাৰাদে সমাদপেতি, মুসাৰাদে চ সমনুঞ্ঞো হোতি; অত্তনা চ পিসুণৰাচো হোতি, পরঞ্চ পিসুণায ৰাচায সমাদপেতি, পিসুণায ৰাচায চ সমনুঞ্ঞো হোতি; অত্তনা চ ফরুসৰাচো হোতি, পরঞ্চ ফরুসায ৰাচায সমাদপেতি, ফরুসায ৰাচায চ সমনুঞ্ঞো হোতি; অত্তনা চ সম্ফপ্পলাপী হোতি, পরঞ্চ সম্ফপ্পলাপে সমাদপেতি, সম্ফপ্পলাপে চ সমনুঞ্ঞো হোতি; অত্তনা চ অভিজ্ঝালু হোতি, পরঞ্চ অভিজ্ঝায সমাদপেতি, অভিজ্ঝায চ সমনুঞ্ঞো হোতি; অত্তনা চ ব্যাপন্নচিত্তো হোতি, পরঞ্চ ব্যাপাদে সমাদপেতি, ব্যাপাদে চ সমনুঞ্ঞো হোতি; অত্তনা চ মিচ্ছাদিট্ঠিকো হোতি, পরঞ্চ মিচ্ছাদিট্ঠিযা সমাদপেতি, মিচ্ছাদিট্ঠিযা চ সমনুঞ্ঞো হোতি – ইমেহি খো, ভিক্খৰে, তিংসায ধম্মেহি সমন্নাগতো যথাভতং নিক্খিত্তো এৰং নিরযে.

‘‘তিংসায, ভিক্খৰে, ধম্মেহি সমন্নাগতো যথাভতং নিক্খিত্তো এৰং সগ্গে. কতমেহি তিংসায? অত্তনা চ পাণাতিপাতা পটিৰিরতো হোতি, পরঞ্চ পাণাতিপাতা ৰেরমণিযা সমাদপেতি, পাণাতিপাতা ৰেরমণিযা চ সমনুঞ্ঞো হোতি; অত্তনা চ অদিন্নাদানা পটিৰিরতো হোতি, পরঞ্চ অদিন্নাদানা ৰেরমণিযা সমাদপেতি, অদিন্নাদানা ৰেরমণিযা চ সমনুঞ্ঞো হোতি; অত্তনা চ কামেসুমিচ্ছাচারা পটিৰিরতো হোতি, পরঞ্চ কামেসুমিচ্ছাচারা ৰেরমণিযা সমাদপেতি, কামেসুমিচ্ছাচারা ৰেরমণিযা চ সমনুঞ্ঞো হোতি; অত্তনা চ মুসাৰাদা পটিৰিরতো হোতি, পরঞ্চ মুসাৰাদা ৰেরমণিযা সমাদপেতি, মুসাৰাদা ৰেরমণিযা চ সমনুঞ্ঞো হোতি; অত্তনা চ পিসুণায ৰাচায পটিৰিরতো হোতি, পরঞ্চ পিসুণায ৰাচায ৰেরমণিযা সমাদপেতি, পিসুণায ৰাচায ৰেরমণিযা চ সমনুঞ্ঞো হোতি; অত্তনা চ ফরুসায ৰাচায পটিৰিরতো হোতি, পরঞ্চ ফরুসায ৰাচায ৰেরমণিযা সমাদপেতি, ফরুসায ৰাচায ৰেরমণিযা চ সমনুঞ্ঞো হোতি; অত্তনা চ সম্ফপ্পলাপা পটিৰিরতো হোতি, পরঞ্চ সম্ফপ্পলাপা ৰেরমণিযা সমাদপেতি, সম্ফপ্পলাপা ৰেরমণিযা চ সমনুঞ্ঞো হোতি; অত্তনা চ অনভিজ্ঝালু হোতি, পরঞ্চ অনভিজ্ঝায সমাদপেতি, অনভিজ্ঝায চ সমনুঞ্ঞো হোতি; অত্তনা চ অব্যাপন্নচিত্তো হোতি, পরঞ্চ অব্যাপাদে সমাদপেতি, অব্যাপাদে চ সমনুঞ্ঞো হোতি; অত্তনা চ সম্মাদিট্ঠিকো হোতি, পরঞ্চ সম্মাদিট্ঠিযা সমাদপেতি, সম্মাদিট্ঠিযা চ সমনুঞ্ঞো হোতি – ইমেহি খো, ভিক্খৰে, তিংসায ধম্মেহি সমন্নাগতো যথাভতং নিক্খিত্তো এৰং সগ্গে’’তি.

২২৪. ‘‘চত্তারীসায, ভিক্খৰে, ধম্মেহি সমন্নাগতো যথাভতং নিক্খিত্তো এৰং নিরযে. কতমেহি চত্তারীসায? অত্তনা চ পাণাতিপাতী হোতি, পরঞ্চ পাণাতিপাতে সমাদপেতি, পাণাতিপাতে চ সমনুঞ্ঞো হোতি, পাণাতিপাতস্স চ ৰণ্ণং ভাসতি; অত্তনা চ অদিন্নাদাযী হোতি, পরঞ্চ অদিন্নাদানে সমাদপেতি, অদিন্নাদানে চ সমনুঞ্ঞো হোতি, অদিন্নাদানস্স চ ৰণ্ণং ভাসতি; অত্তনা চ কামেসুমিচ্ছাচারী হোতি, পরঞ্চ কামেসুমিচ্ছাচারে সমাদপেতি, কামেসুমিচ্ছাচারে চ সমনুঞ্ঞো হোতি, কামেসুমিচ্ছাচারস্স চ ৰণ্ণং ভাসতি; অত্তনা চ মুসাৰাদী হোতি, পরঞ্চ মুসাৰাদে সমাদপেতি, মুসাৰাদে চ সমনুঞ্ঞো হোতি, মুসাৰাদস্স চ ৰণ্ণং ভাসতি; অত্তনা চ পিসুণৰাচো হোতি, পরঞ্চ পিসুণায ৰাচায সমাদপেতি, পিসুণায ৰাচায চ সমনুঞ্ঞো হোতি, পিসুণায ৰাচায চ ৰণ্ণং ভাসতি; অত্তনা চ ফরুসৰাচো হোতি, পরঞ্চ ফরুসায ৰাচায সমাদপেতি, ফরুসায ৰাচায চ সমনুঞ্ঞো হোতি, ফরুসায ৰাচায চ ৰণ্ণং ভাসতি; অত্তনা চ সম্ফপ্পলাপী হোতি, পরঞ্চ সম্ফপ্পলাপে সমাদপেতি, সম্ফপ্পলাপে চ সমনুঞ্ঞো হোতি, সম্ফপ্পলাপস্স চ ৰণ্ণং ভাসতি; অত্তনা চ অভিজ্ঝালু হোতি, পরঞ্চ অভিজ্ঝায সমাদপেতি, অভিজ্ঝায চ সমনুঞ্ঞো হোতি, অভিজ্ঝায চ ৰণ্ণং ভাসতি; অত্তনা চ ব্যাপন্নচিত্তো হোতি, পরঞ্চ ব্যাপাদে সমাদপেতি, ব্যাপাদে চ সমনুঞ্ঞো হোতি, ব্যাপাদস্স চ ৰণ্ণং ভাসতি; অত্তনা চ মিচ্ছাদিট্ঠিকো হোতি, পরঞ্চ মিচ্ছাদিট্ঠিযা সমাদপেতি, মিচ্ছাদিট্ঠিযা চ সমনুঞ্ঞো হোতি, মিচ্ছাদিট্ঠিযা চ ৰণ্ণং ভাসতি – ইমেহি খো, ভিক্খৰে, চত্তারীসায ধম্মেহি সমন্নাগতো যথাভতং নিক্খিত্তো এৰং নিরযে.

‘‘চত্তারীসায, ভিক্খৰে, ধম্মেহি সমন্নাগতো যথাভতং নিক্খিত্তো এৰং সগ্গে. কতমেহি চত্তারীসায? অত্তনা চ পাণাতিপাতা পটিৰিরতো হোতি, পরঞ্চ পাণাতিপাতা ৰেরমণিযা সমাদপেতি, পাণাতিপাতা ৰেরমণিযা চ সমনুঞ্ঞো হোতি, পাণাতিপাতা ৰেরমণিযা চ ৰণ্ণং ভাসতি; অত্তনা চ অদিন্নাদানা পটিৰিরতো হোতি, পরঞ্চ অদিন্নাদানা ৰেরমণিযা সমাদপেতি, অদিন্নাদানা ৰেরমণিযা চ সমনুঞ্ঞো হোতি, অদিন্নাদানা ৰেরমণিযা চ ৰণ্ণং ভাসতি; অত্তনা চ কামেসুমিচ্ছাচারা পটিৰিরতো হোতি, পরঞ্চ কামেসুমিচ্ছাচারা ৰেরমণিযা সমাদপেতি, কামেসুমিচ্ছাচারা ৰেরমণিযা চ সমনুঞ্ঞো হোতি, কামেসুমিচ্ছাচারা ৰেরমণিযা চ ৰণ্ণং ভাসতি; অত্তনা চ মুসাৰাদা পটিৰিরতো হোতি, পরঞ্চ মুসাৰাদা ৰেরমণিযা সমাদপেতি, মুসাৰাদা ৰেরমণিযা চ সমনুঞ্ঞো হোতি, মুসাৰাদা ৰেরমণিযা চ ৰণ্ণং ভাসতি; অত্তনা চ পিসুণায ৰাচায পটিৰিরতো হোতি, পরঞ্চ পিসুণায ৰাচায ৰেরমণিযা সমাদপেতি, পিসুণায ৰাচায ৰেরমণিযা চ সমনুঞ্ঞো হোতি, পিসুণায ৰাচায ৰেরমণিযা চ ৰণ্ণং ভাসতি; অত্তনা চ ফরুসায ৰাচায পটিৰিরতো হোতি, পরঞ্চ ফরুসায ৰাচায ৰেরমণিযা চ সমাদপেতি, ফরুসায ৰাচায ৰেরমণিযা চ সমনুঞ্ঞো হোতি, ফরুসায ৰাচায ৰেরমণিযা চ ৰণ্ণং ভাসতি; অত্তনা চ সম্ফপ্পলাপা পটিৰিরতো হোতি, পরঞ্চ সম্ফপ্পলাপা ৰেরমণিযা সমাদপেতি, সম্ফপ্পলাপা ৰেরমণিযা চ সমনুঞ্ঞো হোতি, সম্ফপ্পলাপা ৰেরমণিযা চ ৰণ্ণং ভাসতি; অত্তনা চ অনভিজ্ঝালু হোতি, পরঞ্চ অনভিজ্ঝায সমাদপেতি, অনভিজ্ঝায চ সমনুঞ্ঞো হোতি, অনভিজ্ঝায চ ৰণ্ণং ভাসতি; অত্তনা চ অব্যাপন্নচিত্তো হোতি, পরঞ্চ অব্যাপাদে সমাদপেতি, অব্যাপাদে চ সমনুঞ্ঞো হোতি, অব্যাপাদস্স চ ৰণ্ণং ভাসতি; অত্তনা চ সম্মাদিট্ঠিকো হোতি, পরঞ্চ সম্মাদিট্ঠিযা সমাদপেতি, সম্মাদিট্ঠিযা চ সমনুঞ্ঞো হোতি, সম্মাদিট্ঠিযা চ ৰণ্ণং ভাসতি – ইমেহি খো, ভিক্খৰে, চত্তারীসায ধম্মেহি সমন্নাগতো যথাভতং নিক্খিত্তো এৰং সগ্গে’’তি.

২২৫-২২৮. ‘‘দসহি, ভিক্খৰে, ধম্মেহি সমন্নাগতো খতং উপহতং অত্তানং পরিহরতি…পে… অক্খতং অনুপহতং অত্তানং পরিহরতি…পে… ৰীসতিযা, ভিক্খৰে…পে… তিংসায, ভিক্খৰে…পে… চত্তারীসায, ভিক্খৰে, ধম্মেহি সমন্নাগতো খতং উপহতং অত্তানং পরিহরতি…পে….

২২৯-২৩২. ‘‘দসহি, ভিক্খৰে, ধম্মেহি সমন্নাগতো ইধেকচ্চো কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি…পে… ইধেকচ্চো কাযস্স ভেদা পরং মরণা সুগতিং সগ্গং লোকং উপপজ্জতি. ৰীসতিযা, ভিক্খৰে…পে… তিংসায, ভিক্খৰে,…পে… চত্তারীসায, ভিক্খৰে, ধম্মেহি সমন্নাগতো ইধেকচ্চো কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি…পে… ইধেকচ্চো কাযস্স ভেদা পরং মরণা সুগতিং সগ্গং লোকং উপপজ্জতি’’.

২৩৩-২৩৬. ‘‘দসহি, ভিক্খৰে, ধম্মেহি সমন্নাগতো বালো ৰেদিতব্বো…পে… পণ্ডিতো ৰেদিতব্বো…পে… ৰীসতিযা, ভিক্খৰে…পে… তিংসায, ভিক্খৰে…পে… চত্তারীসায, ভিক্খৰে, ধম্মেহি সমন্নাগতো বালো ৰেদিতব্বো…পে… পণ্ডিতো ৰেদিতব্বো …পে… ইমেহি খো, ভিক্খৰে, চত্তারীসায ধম্মেহি সমন্নাগতো পণ্ডিতো ৰেদিতব্বো’’তি.

সামঞ্ঞৰগ্গো দুতিযো.