৭. পঠমপচ্চোরোহণীসুত্তং

১১৯. তেন খো পন সমযেন জাণুস্সোণি [জানুস্সোনি (ক. সী.), জানুস্সোণি (ক. সী.), জাণুসোণি (ক.)] ব্রাহ্মণো তদহুপোসথে সীসংন্হাতো [সীসংনহাতো (সী. পী.), সীসন্হাতো (স্যা.)] নৰং খোমযুগং নিৰত্থো অল্লকুসমুট্ঠিং আদায ভগৰতো অৰিদূরে একমন্তং ঠিতো হোতি.

অদ্দসা খো ভগৰা জাণুস্সোণিং ব্রাহ্মণং তদহুপোসথে সীসংন্হাতং নৰং খোমযুগং নিৰত্থং অল্লকুসমুট্ঠিং আদায একমন্তং ঠিতং. দিস্ৰান জাণুস্সোণিং ব্রাহ্মণং এতদৰোচ – ‘‘কিং নু ত্ৰং, ব্রাহ্মণ, তদহুপোসথে সীসংন্হাতো নৰং খোমযুগং নিৰত্থো অল্লকুসমুট্ঠিং আদায একমন্তং ঠিতো? কিং ন্ৰজ্জ [কিং নু অজ্জ (স্যা.), কিং নু খো অজ্জ (পী.), কিং নু খ্ৰজ্জ (ক.)] ব্রাহ্মণকুলস্সা’’তি [ব্রাহ্মণ ব্রহ্মকুসলস্সাতি (ক.)]? ‘‘পচ্চোরোহণী, ভো গোতম, অজ্জ ব্রাহ্মণকুলস্সা’’তি [ব্রহ্মকুসলস্সাতি (ক.)].

‘‘যথা কথং পন, ব্রাহ্মণ, ব্রাহ্মণানং পচ্চোরোহণী হোতী’’তি? ‘‘ইধ, ভো গোতম, ব্রাহ্মণা তদহুপোসথে সীসংন্হাতা নৰং খোমযুগং নিৰত্থা অল্লেন গোমযেন পথৰিং ওপুঞ্জিত্ৰা হরিতেহি কুসেহি পত্থরিত্ৰা [পৰিত্থারেত্ৰা (ক.)] অন্তরা চ ৰেলং অন্তরা চ অগ্যাগারং সেয্যং কপ্পেন্তি. তে তং রত্তিং তিক্খত্তুং পচ্চুট্ঠায পঞ্জলিকা অগ্গিং নমস্সন্তি – ‘পচ্চোরোহাম ভৰন্তং, পচ্চোরোহাম ভৰন্ত’ন্তি. বহুকেন চ সপ্পিতেলনৰনীতেন অগ্গিং সন্তপ্পেন্তি. তস্সা চ রত্তিযা অচ্চযেন পণীতেন খাদনীযেন ভোজনীযেন ব্রাহ্মণে সন্তপ্পেন্তি. এৰং, ভো গোতম, ব্রাহ্মণানং পচ্চোরোহণী হোতী’’তি.

‘‘অঞ্ঞথা খো, ব্রাহ্মণ, ব্রাহ্মণানং পচ্চোরোহণী হোতি, অঞ্ঞথা চ পন অরিযস্স ৰিনযে পচ্চোরোহণী হোতী’’তি. ‘‘যথা কথং পন, ভো গোতম, অরিযস্স ৰিনযে পচ্চোরোহণী হোতি? সাধু মে ভৰং গোতমো তথা ধম্মং দেসেতু যথা অরিযস্স ৰিনযে পচ্চোরোহণী হোতী’’তি.

‘‘তেন হি, ব্রাহ্মণ, সুণাহি, সাধুকং মনসি করোহি; ভাসিস্সামী’’তি. ‘‘এৰং, ভো’’তি খো জাণুস্সোণি ব্রাহ্মণো ভগৰতো পচ্চস্সোসি. ভগৰা এতদৰোচ –

‘‘ইধ, ব্রাহ্মণ, অরিযসাৰকো ইতি পটিসঞ্চিক্খতি – ‘মিচ্ছাদিট্ঠিযা খো পাপকো ৰিপাকো দিট্ঠে চেৰ ধম্মে অভিসম্পরাযঞ্চা’ তি. সো ইতি পটিসঙ্খায মিচ্ছাদিট্ঠিং পজহতি; মিচ্ছাদিট্ঠিযা পচ্চোরোহতি.

… মিচ্ছাসঙ্কপ্পস্স খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চাতি. সো ইতি পটিসঙ্খায মিচ্ছাসঙ্কপ্পং পজহতি; মিচ্ছাসঙ্কপ্পা পচ্চোরোহতি.

… মিচ্ছাৰাচায খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চাতি. সো ইতি পটিসঙ্খায মিচ্ছাৰাচং পজহতি; মিচ্ছাৰাচায পচ্চোরোহতি.

…মিচ্ছাকম্মন্তস্স খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চাতি. সো ইতি পটিসঙ্খায মিচ্ছাকম্মন্তং পজহতি; মিচ্ছাকম্মন্তা পচ্চোরোহতি.

…মিচ্ছাআজীৰস্স খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চাতি. সো ইতি পটিসঙ্খায মিচ্ছাআজীৰং পজহতি; মিচ্ছাআজীৰা পচ্চোরোহতি.

…মিচ্ছাৰাযামস্স খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চাতি. সো ইতি পটিসঙ্খায মিচ্ছাৰাযামং পজহতি; মিচ্ছাৰাযামা পচ্চোরোহতি.

…মিচ্ছাসতিযা খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চাতি. সো ইতি পটিসঙ্খায মিচ্ছাসতিং পজহতি; মিচ্ছাসতিযা পচ্চোরোহতি.

…মিচ্ছাসমাধিস্স খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চাতি. সো ইতি পটিসঙ্খায মিচ্ছাসমাধিং পজহতি; মিচ্ছাসমাধিম্হা পচ্চোরোহতি.

…মিচ্ছাঞাণস্স খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চাতি. সো ইতি পটিসঙ্খায মিচ্ছাঞাণং পজহতি; মিচ্ছাঞাণম্হা পচ্চোরোহতি.

‘মিচ্ছাৰিমুত্তিযা খো পাপকো ৰিপাকো – দিট্ঠে চেৰ ধম্মে অভিসম্পরাযঞ্চা’তি. সো ইতি পটিসঙ্খায মিচ্ছাৰিমুত্তিং পজহতি; মিচ্ছাৰিমুত্তিযা পচ্চোরোহতি. এৰং খো, ব্রাহ্মণ, অরিযস্স ৰিনযে পচ্চোরোহণী হোতী’’তি.

‘‘অঞ্ঞথা, ভো গোতম, ব্রাহ্মণানং পচ্চোরোহণী, অঞ্ঞথা চ পন অরিযস্স ৰিনযে পচ্চোরোহণী হোতি. ইমিস্সা চ, ভো গোতম, অরিযস্স ৰিনযে পচ্চোরোহণিযা ব্রাহ্মণানং পচ্চোরোহণী কলং নাগ্ঘতি সোল়সিং. অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. সত্তমং.