৮. তিকিচ্ছকসুত্তং

১০৮. ‘‘তিকিচ্ছকা, ভিক্খৰে, ৰিরেচনং দেন্তি পিত্তসমুট্ঠানানম্পি আবাধানং পটিঘাতায, সেম্হসমুট্ঠানানম্পি আবাধানং পটিঘাতায, ৰাতসমুট্ঠানানম্পি আবাধানং পটিঘাতায. অত্থেতং, ভিক্খৰে, ৰিরেচনং; ‘নেতং নত্থী’তি ৰদামি. তঞ্চ খো এতং, ভিক্খৰে, ৰিরেচনং সম্পজ্জতিপি ৰিপজ্জতিপি.

‘‘অহঞ্চ খো, ভিক্খৰে, অরিযং ৰিরেচনং দেসেস্সামি, যং ৰিরেচনং সম্পজ্জতিযেৰ নো ৰিপজ্জতি, যং ৰিরেচনং আগম্ম জাতিধম্মা সত্তা জাতিযা পরিমুচ্চন্তি, জরাধম্মা সত্তা জরায পরিমুচ্চন্তি, মরণধম্মা সত্তা মরণেন পরিমুচ্চন্তি, সোকপরিদেৰদুক্খদোমনস্সুপাযাসধম্মা সত্তা সোকপরিদেৰদুক্খদোমনস্সুপাযাসেহি পরিমুচ্চন্তি. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমঞ্চ তং, ভিক্খৰে, অরিযং ৰিরেচনং, যং ৰিরেচনং সম্পজ্জতিযেৰ নো ৰিপজ্জতি, যং ৰিরেচনং আগম্ম জাতিধম্মা সত্তা জাতিযা পরিমুচ্চন্তি, জরাধম্মা সত্তা জরায পরিমুচ্চন্তি, মরণধম্মা সত্তা মরণেন পরিমুচ্চন্তি, সোকপরিদেৰদুক্খদোমনস্সুপাযাসধম্মা সত্তা সোকপরিদেৰদুক্খদোমনস্সুপাযাসেহি পরিমুচ্চন্তি?

‘‘সম্মাদিট্ঠিকস্স, ভিক্খৰে, মিচ্ছাদিট্ঠি ৰিরিত্তা হোতি; যে চ মিচ্ছাদিট্ঠিপচ্চযা অনেকে পাপকা অকুসলা ধম্মা সম্ভৰন্তি তে চস্স ৰিরিত্তা হোন্তি; সম্মাদিট্ঠিপচ্চযা চ অনেকে কুসলা ধম্মা ভাৰনাপারিপূরিং গচ্ছন্তি.

‘‘সম্মাসঙ্কপ্পস্স, ভিক্খৰে, মিচ্ছাসঙ্কপ্পো ৰিরিত্তো হোতি…পে… সম্মাৰাচস্স, ভিক্খৰে, মিচ্ছাৰাচা ৰিরিত্তা হোতি… সম্মাকম্মন্তস্স, ভিক্খৰে, মিচ্ছাকম্মন্তো ৰিরিত্তো হোতি… সম্মাআজীৰস্স, ভিক্খৰে, মিচ্ছাআজীৰো ৰিরিত্তো হোতি… সম্মাৰাযামস্স, ভিক্খৰে, মিচ্ছাৰাযামো ৰিরিত্তো হোতি… সম্মাসতিস্স, ভিক্খৰে, মিচ্ছাসতি ৰিরিত্তা হোতি… সম্মাসমাধিস্স, ভিক্খৰে, মিচ্ছাসমাধি ৰিরিত্তো হোতি… সম্মাঞাণিস্স, ভিক্খৰে, মিচ্ছাঞাণং ৰিরিত্তং হোতি…পে….

‘‘সম্মাৰিমুত্তিস্স, ভিক্খৰে, মিচ্ছাৰিমুত্তি ৰিরিত্তা হোতি; যে চ মিচ্ছাৰিমুত্তিপচ্চযা অনেকে পাপকা অকুসলা ধম্মা সম্ভৰন্তি তে চস্স ৰিরিত্তা হোন্তি; সম্মাৰিমুত্তিপচ্চযা চ অনেকে কুসলা ধম্মা ভাৰনাপারিপূরিং গচ্ছন্তি. ইদং খো তং, ভিক্খৰে, অরিযং ৰিরেচনং যং ৰিরেচনং সম্পজ্জতিযেৰ নো ৰিপজ্জতি, যং ৰিরেচনং আগম্ম জাতিধম্মা সত্তা জাতিযা পরিমুচ্চন্তি…পে… সোকপরিদেৰদুক্খদোমনস্সুপাযাসেহি পরিমুচ্চন্তী’’তি. অট্ঠমং.